ئه‌ڤرۆ نيوز:
سه‌رۆك بارزانى په‌يامه‌ك به‌لاڤكر و راگه‌هاند:تيرورستان دخواستن ل رۆژا ئالايێ كوردستانێ هێرشێ بكه‌نه سه‌ر كوردستانێ و ئالايێ كوردستانێ دابگرن، به‌لێ خه‌يالا تيرورستان و دوژمنان يا خاڤه و ئالايێ مه ل سايا خودايێ مه‌زن و قاره‌مانيا پێشمه‌رگه‌ى و هيمه‌تا گه‌لێ مه هه‌رده‌م دێ ب بلند مينيت.
ئه‌ڤرۆ نيوز:
بۆ جارا ئێكێ ل سه‌دێ 21ێ، د شه‌ڤا جه‌ژنا سه‌رێ سالا داهاتى دا، دێ هه‌يڤا تابان ده‌ركه‌ڤيت.
پشتى سالا 1977ێ ئه‌ڤ ديارده ل شه‌ڤا جه‌ژنا سه‌رێ سالێ دا نه‌هاتيه ديتن وه‌كو پێگه‌هێ ” Huffington Post”ژى به‌حس لێ كرى، ئه‌ڤ ديارده جاره‌كا دى دێ ل سالا 2034ێ رووده‌ت.
ده‌ركه‌فتنا هه‌يڤێ ب پرى، ب هه‌يڤا تابان يان يا 14 شه‌ڤى دهێته ب ناڤبرن و هنده‌ك هه‌يڤا شه‌ڤگارى يا درێژى ب ناڤ دبه‌ن.
ئه‌ڤرۆ نيوز، بارزان مزوورى:
ئاخفتنكه‌رێ ب ناڤێ فه‌رماندا سپيلك يا پێشمه‌رگێ كوردستانێ بۆ ئه‌ڤرۆ نيوز دياركر كو د هێرشا شه‌ڤا بۆرى دا، بۆ سه‌ر هێزێن پێشمه‌رگه‌ى ل ميحوه‌رێ تلسقۆف هاته تێكشاندنن و چه‌ندين ته‌رم ژى ل دووڤ خوه هێلان.
عه‌ميد مه‌رعان گۆت: “شڤێدى 18ى كانوونا ئێكێ يا 2015ێ چه‌كدارێن داعش ل ميحوه‌رێ تلسقۆف هێرشه‌كا چه‌كدارێن داعش تێكشاندن يا كو پێشتر مه پێزانين ل سه‌ر هه‌ين كو دێ هێرشێ كه‌ن”.
زێده‌تر گۆت: “زيانێن دروست يێن ب وان كه‌فتينه نه‌هاتينه زانين، به‌لێ 15 ته‌رمێن وان كه‌فتينه ده‌ستێ مه ل گه‌ل چه‌ندێن چه‌ك و ته‌قه‌مه‌نيان و هێزێن پێشمه‌رگه‌ى ژى چو زيان نه‌بوون”.
ئه‌ڤرۆ نيوز، بارزان مزوورى:
ل رۆژا 16ى كانوونا ئێكێ يا 2015ێ چه‌كدارێن داعش پلانه‌كا سه‌رانسه‌رى بۆ هێرشكرنا سه‌ر هێزێن پێشمه‌رگه‌ى ئه‌نجام دا و مه‌ره‌م ژ وێ هێرشێ ژى ل دووڤ گۆتنا فه‌رماندێ پێشمه‌رگه‌ى ل ميحوه‌رێ ناوه‌ران، سه‌ربه‌ست تراوانشى، ئه‌و بوو كو خالێن بورجێ ناوه‌ران كونترۆل بكه‌ن.
هه‌ر وه‌كو د ڤيديۆيێ دا ديار و ب گۆتنا سه‌ربه‌ست تراوانشى ژى داعش د وێ هێرشا خوه دا چه‌كێ جودا ب كارئينايه، به‌لێ هه‌ر هاتنه شكاندن و هه‌ر وه‌كو ناڤبرى پێشتر بۆ ئه‌ڤرۆ نيوز گۆتى: “75 ته‌رمێن داعش كه‌فتبوونه ده‌ستێ پێشمه‌رگه‌ى ژبلى ئه‌و كوشتى و بريندارێن ره‌ڤاندين”.
ئه‌ڤرۆ نيوز:
هه‌ڤسه‌رۆكێ پارتيا ئێكه‌تيا ديموكرات “په‌يه‌ده” ره‌خنێ ل وى كۆنگره‌ى دگريت ئه‌وێ دێ ل سعوديێ بۆ هێزێن ئۆپۆزسيۆنا سوريا ل رياز يا پايته‌ختێ وى وه‌لاتى هاتيه رێكخستن.
سالح موسلم، هه‌ڤسه‌رۆكێ په‌يه‌دێ بۆ كه‌نالێ كوردستان 24 راگه‌هاند: د كۆنگرێ رياز دا سه‌ره‌راى شه‌رعيه‌تێ ب لايه‌نگرێن رژێما سوريا، شه‌رعيه‌ت ب لايه‌نگرێن رێكخراوا داعش ژى دا.
ئه‌ڤ داخويانيا سالح موسلم د ده‌مه‌كى دا كو پشكه‌ك ژ حزبێن رۆژئاڤايێ كوردستان، سالح موسلم و حزبا وى ب خوه ژى ب هه‌بوونا په‌يوه‌نديان ل گه‌ل حزبا به‌عس دهێنه تۆمه‌تبار كرن، هێزێن وێ رژێمێ ژى ل گه‌ل شه‌رڤانێن په‌يه‌دێ مل ب ملێ ئێك ل قامشلۆ چالاكيێن خوه ئه‌نجام دده‌ن.
د كۆنگرێ هێزێن ئۆپۆزسيۆنا سوريا دا، په‌يه‌دێ پشكدارى نه‌كر بوو و چاڤدێر وه‌سان دبينن كو ژ به‌ر به‌ره‌يێ ئيرانى رۆسى ئه‌وان پشكدارى نه‌كربيت ل رۆژا 9ى كانوونا ئێكێ يا 2015ێ ل رياز يا پايته‌ختێ سعوديێ ب سه‌رپه‌رشتيا وى وه‌لاتى بۆ دانوستاندنێ ل سه‌ر پاشه‌رۆژا سوريا هاتبوو ئه‌نجام دان.
ئەڤرۆ نیوز، بارزان مزووری:
تارق سلێمان ھەرنی، فەرماندەیێ فەرماندەیا سپیلک ل میحوەرێ تلسقوف بۆ مالپەرێ ئەڤرۆ نیوز دیار کر کو ئەڤ شەڤە دەمژمێر 8:30 خولەک چەکدارێن تیرورستێن داعش ھێرش کرە سەر ھێزێن پێشمەرگەی ل میحوەرێ تلسقوف بەری ب دروستی ھێرشا خوە جێ بە جێ بکەن پێشمەرگەی ب قارەمانیانە بەرسڤا ھێرشا وان دا و ھاتە تێک شکاندن، ل دووڤ زانیاریێن دەسپێکێ 11 تەرمێن وان کەفتینە لبن ئاخا کونترولا پێشمەرگەی ژبلی تێک شکاندنا ترومبێلێن وان.
ناڤبری دیار کر کو چ چەکدارێن وان نەگەھشتینە ساترێ پێشمەرگەی بەری نێزیک بانە دھاتیە کوشتن و گۆت: “د بەرسینگگرتنا ڤێ ھێرشێ دا فرۆکان رۆلەکێ بەرچاڤ ھەبوو”.
ئەڤرۆ نیوز، زنار تۆڤی:
باراک ئۆباما سەرۆکێ ئەمریکا د پرێس کۆنفرانسەکی دا دیارکر:دێ کار لسەر چاڤدێریکرنا تۆرێن ئنتەرنێتێ کەین، بۆ ئاشکراکرنا ھێرشێن چاڤەرێکری،دێ ھێرشێن خۆ بۆ سەر داعشێ چرتر لێکەین،ئۆبامای گۆت ژی:نوکە داعش ژ رێکخراوا قاعیدە مەترسیدارترە،دێ ب ھەمی شیانێن خۆ یێن سەربازی روو ب روو داعشێ بین دگەل ھەمی ھەڤپەیمانێن خۆ،دێ کارکەین بۆ ئالۆگۆرکرنا پێزانینێن سەربازی،ھەروەسا خویاکر ژی،ئەم دێ ھەمی شیان و ھەولێن خۆ مەزێخین بۆ ژناڤبرنا داعش و ھەمی ژێدەرێن وێ یێن دارایی ل عێراق و سووریا.
ئەڤرۆ نیوز، ئەیاد بەرواری:
حوکمەتا ئەلمانی دوھی رۆژا پێنج شەمبی 17 دیسمبەرێ، مزگەفتەک و بنگەھەکێ ئیسلامی ب گۆمانا پشتەڤانیا وان بۆ داعشێ داخستن.
رینھولد گال، وەزیرێ ناڤخوە ل ھەرێما (بادی- فورتمبرگ) دیارکر” بنگەھێ پەروەردێ و رەوشەنبیریێ ل شتوتگارت و مزگەفتا (سەحابە) پشتەڤانیا گرۆپەکێ ئیسلامی دکەن کو ھاندانا ئەنجامدانا ھێرشان ل سەر کەسان یان مولکان دکەت” وەکو ئاماژەک بۆ رێکخستیا دەولەتا ئیسلامی (داعش) یا تیرۆرستی.
ل دووڤ سایتێ (ھاڤینگتۆن پۆست) ناڤبری گوت ژی” ھندەک بانگخوازێن ئیسلامی کو پتریا وان ژ بنەرەتدا خەلکێ وەلاتێن بەلقانێ نە، سەرەدانا وی بنگەھێ ئیسلامی دکر، ئەوێ ھاتیە ھەلوەشاندن و مزگەفت ژی ھاتیە داخستن و ھەموو کەلوپەلێن وان دەست د سەردا ھاتە گرتن”.
خویاکر ژی” د ئۆپەراسیۆنەکا پشکنینێ دا ل ئادارا بۆری ل بارەگایێ وی بنگەھێ ئیسلامی، دەست ب سەر ھندەک ھندەک کومپیۆتەران و مۆبایلان و سیدیان و پەرتۆک و بەلاڤۆکان ھاتبوو گرتن”.
گالی خویاکر ژی” گۆمان ل سەر ڕابوونا وی بنگەھێ ئیسلامی ب کۆمکرنا پارەی بۆ گرۆپێن ئیسلامی و ئینانا کەسان بۆ شەڕکرنێ ل سووریێ و ھندەک ئەندامێن وی بنگەھی ژی پشتەڤانیا جیھادێ و تیرۆرێ دکر بۆ مەرەمێن ئایینی” ئاماژە دا ” ئەم ڕێ ب چو کۆمەلێن پشتەڤانیا توندوتیژیێ دکەن ب مەرەما پرۆپاگندێ بۆ بەرژەوەندیێن ئایینی و کۆمکرنا ھاریکاریان بۆ گرۆپێن تیرۆرستی نادەین”.
ئەڤرۆ نیوز، ئەیاد بەرواری:
عیراقێ داخوازکر ھەڤپەیمانیەکا نێڤدەولەتی د چارچۆڤێ بزاڤێن جیھانێ د شەڕێ دژی داعشێ دا کر.
پەیڤدارێ کونگرێ نێڤدەولەتیێ لەشکری بۆ ئۆپەراسیۆنێن دەروونی ژبۆ بەرھنگاریا داعشێ ل دووڤ (عین العراق نیۆز) گوت” کونگرەی ب ھووری گرنگیا مفا وەرگرتن ژ پێزانینان ژلایێ مەڤە وەکو دەولەتەکا مەدەنی دیموکراسی د وەرگرتنا مێشکی خەلکی ب تایبەتی ل دەڤەرێن ژ دەستێ داعشێ دێ ھێنە ئازادکرن”.
خویاکر ژی”ڕاسپاردێن کونگرەی بەحسێ پێکئینانا ھەڤپەیمانیەکا ئەلکترونی یا نێڤدەولەتی کر کو بارەگایێ وێ ل عیراقێ بیت بۆ شەڕێ تیرۆرا ئەلکترونی ل دووڤ بریارا 193 ێ یا کونگرێ مەندوبێن ئێکەتیا نێڤدەولەتی یا گەھاندنێ کو ل بۆسان ل کوریا باشوور ل سالا 2014 ێ ھاتبوو گرێدان، زێدەباری پشتەڤانیا وێ ھەڤپەیمانیا نێڤدەولەتی بۆ عیراقێ ب ڕێیا مەشقکرنا لایەنێ عیراقی ل سەر تەکنیکێن نوو یێن شەڕێ دەروونی و شەڕێ ئەلکترونی”.
گوت ژی” کونگرەی داخوازکر کو ل دووڤ بریارێن جڤاتا ئاسایشا نێڤدەولەتی یێن ھژمار ( 2170 و 2178 یێن سالا 2014 ێ و 2199 یا سالا 2015 ێ) پشتەڤانیا عیراقێ ل سەر ئاستێ جیھانێ بھێتە کرن بۆ دادگەھکرنا وەلات و کەس و دەزگەھێن راگەھاندنێ ئەوێن پشتەڤانیا داعشێ دکەن”.
ئەڤرۆ نیوز، ئەیاد بەرواری:
سەرۆک وەزیرێن تورکیا (ئەحمەد داود ئوگلۆ) ئەڤرۆ ئەینیێ گۆتارەک ب ڕێیا فیسبووکی ئاراستەی وەلاتیێن تورک کر و تێدا دەستکەفتیێن حوکمەتا خوە د ھەفتیا وێ یا ئێکێ دا بەرچاڤکرن و سۆز دا وان ژی کارێ حوکمەتا وی ئەنجامدای د ئێک مەە دا بەرچاڤ کەت و یێ بەردەوام بیت ل گەل وان ب ڕێیا تۆرێن جڤاکی بێ چو پرۆتۆکۆلێن فەرمی.
ئەحمەد داود ئوگلۆ د گۆتارا خوەدا یا ب ناڤونیشان ( مە سۆزدا و نوکە بجە دئینین) دیاردکەت کو سۆزێن حزبا وی (حزبا داد و گەشەپێدانێ) نا بنە حبر ل سەر کاغەزێ و ھندەک ژ وان سۆزا ئێکسەر پشتی پێکئینانا حوکمەتا نوو ب سەرۆکاتیا وی یێن ھاتینە بجھئینان.
خویاکر ژی کو ئەو دێ بەردەوام ئاگەھداریا وەلاتیان کەت ب بریارێن دێ حوکمەتا وی دەرکەت د چار سالێن داھاتی دا و گوت” دێ سوپاسدار بم ب پەیوەندیێ ل گەل وەلاتیان ب ڕێیا تۆرێن جڤاکی”.
نيشاندان