ئه‌ڤرو نیوز،بارزان مزوورى
وه‌لاتیه‌كى ئاكنجیێ ناحیا باعه‌درێ بو مالپه‌رێ ئه‌ڤرو نیوز ئاشكرا كر كو دوهى 2/12/2015 به‌له‌مه‌ك كو كاروانێن كوچبه‌رێن كوردێن ئیزدى تێدابون د رێیا ئاڤێ ژ توركیا بو یونانستانێ دچوین، دناڤ ئاڤێ دا، به‌له‌ما وان كێشه‌ك بۆ دروست دبیت و خراب دبیت و ئێك ژوان كه‌سێن سه‌رپه‌رشتیا وان كوچبه‌را دكر، په‌یوه‌ندى ب پولیسێن یونانستانێ ڤه‌كر و ئه‌و به‌له‌م ب 65 كوچبه‌ران ڤه رزگاركرن ب رێیا هه‌لیكوپترا كو پتریا ژوان كوچبه‌را زاروك بون.
ئه‌ڤرۆ نیۆز، قائید میرۆ
فیدڕاسیۆنا سه‌رانسه‌ریا په‌نابه‌ران ل هه‌رێما كوردستانێ ئاشكراكر، 30 وه‌لاتیێن هه‌رێما كوردستانێ د رێیا ئورۆپادا گیانێ خوه ژده‌ستداینه.
ئامانج عه‌بدولا، سه‌رۆكێ فیدڕاسیۆنا سه‌رانسه‌ریا په‌نابه‌ران لهه‌رێما كوردستانێ ب ئه‌ڤرۆ نیۆز راگه‌هاند” تنێ د سالا بۆری دا نێزیكی 23 هزار وه‌لاتیێن هه‌رێما كوردستانێ ب رێیا نه‌قانوونی چووینه ده‌رڤه‌ی وه‌لاتی و هژماره‌ك ژ وانا ڤه‌گه‌ڕیاینه، بتایبه‌تی ئه‌ڤێن چوینه ئه‌لمانیا.
ئامانجی گۆتژی” ل گوره‌ی ئامارا به‌رده‌ستێ مه، 30 وه‌لاتیێن هه‌رێما كوردستانێ د رێیا ئورۆپادا گیانێ خوه ژده‌ستدایه و هژماره‌كا دی ژی به‌رزه‌نه و چاره‌نڤیسێ وانا ناهێته زانین.
ئه‌ڤرۆ نیۆز، قائید میرۆ
بڕیاره كۆمارا ئیسلامیا ئیرانێ 200 میگاواتێن كاره‌بێ ب رێیا پارێزگه‌ها هه‌له‌بجه بده‌ته هه‌رێما كوردستانێ.
سه‌عید هه‌له‌بجه‌یی، رێڤه‌به‌رێ كاره‌با پارێزگه‌ها هه‌له‌بجه ب ئه‌ڤرۆ نیۆز راگه‌هاند” پشتی سه‌ره‌دانا شانده‌كێ پارێزگه‌ها هه‌له‌بجه بۆ باژێڕێ سنه یا كۆمارا ئیسلامیا ئیرانێ، ئیرانێ به‌رهه‌ڤیا خوه نیشاندایه بۆ پێدانا 200 میگاواتێن كاره‌بێ ب هه‌رێما كوردستانێ، به‌لێ هێشتا كارێن گرێدانا تۆڕا كاره‌با هه‌رێمێ دگه‌ل ئیرانێ ماینه.
سه‌عیدی گۆتژی” ئه‌گه‌ر ئیران ئه‌ڤان 200 میگاواتێن كاره‌بێ بده‌ت هه‌رێما كرودستانێ دێ چیته ناف تۆڕا نیشتیمانی و دێ بۆهه‌موو كوردستانێ بیت نه‌ك تنێ هه‌له‌بجه، به‌لێ ئه‌ڤێ چه‌ندێ پێدڤی ب رازینا حوكمه‌تا عێراقا فیدڕال هه‌یه.
ئه‌ڤرو نیوز،بارزان مزوورى
ئه‌ڤرو ده‌مژمێر 10 سپێدێ 3/12/2015 بریسێ ل مالا پێشمه‌رگه‌یه‌كى دا ل گوندێ بلان سه‌ر ب ناحیا ئه‌تروش ڤه و ئه‌نجامدا زیانه‌كا مه‌زن گه‌هانده خانیێ وى.
وه‌لید حسێن سه‌لیم ،خودانێ خانى كو پێشمه‌رگه‌یه بو روژناما ئه‌ڤرو دیار كر : ئه‌م د خه‌وبوین و ل دوڤ ده‌نگێ لێدانا بریسێ ژ خه‌و رابوین كو دوكێله دناڤ خانى دا و كه‌سه‌ك هه‌وارا مه‌هات و دناڤ دوكێلێ قورتال كرین .
سه‌باره‌ت زیانێن ب خانى كه‌تین ، وه‌لیدى گوت” خانى بتمامى هاتیه ژ ناڤ برن زێده‌بارى كه‌ل و په‌لێن كاره‌بایى بكوژمێ پتر ژ حه‌فت ملیونا هه‌مى ژ وان سوتینه و هاتینه شكاندن.
ئەڤرۆ نیوز، زنار تۆڤی:
ئەڤڕۆ رۆژا پێنجشەمبی رێكه‌فتى 3ى كانوونا ئێكێ 2015 شەپۆلەکا بەفرێ دەڤەرا بەرواری بالا و چەندین دەڤەرێن دیتر یێن ب سەر قەزا ئامێدیێ ڤە گرت و پلێن گەرماتیێ گەلەک دابەزین ب خوه ڤە دیتیتە و دھێتە پێشبینی کرن، ھێشتا بەفر بباریت و نوکە ژی بەردەوام بەفر یا دباریت.
ئۆمێد مایی رێڤەبەرێ کەشناسی و پیڤەلەرزان ل دھۆکێ بۆ ئەڤرۆ نیوز دیارکر کو ھەتا دەمژمێر نەھی سپێدێ 7 سەنیمێن بەفرێ ل سەنتەرێ ناحیا کانی ماسێ باریبوون و ھەروەسا ل سەنتەرێ ناحیا بامەرنێ سەنتیمەکا بەفرێ باریە و ل جھێن دیتر پشتی ھنگێ بەفر باریە، لەورا ھەتا نوکە رێژەیا بارینا بەفرێ ل جھێن دیتر یێن سەر ب قەزا ئامێدیێ ڤە نەھاتیە زانین.
ئەڤرۆ نیوز، زنار تۆڤی:
سەرۆکێ رۆسیا ڤلادیمێر پۆتین ل مۆسکویا پایتەختێ وی وەلاتی گۆتارەک پێشکێشکر و تێدا بەحسێ چەندین پێشھاتە و شەرێ ل دژی داعشێ و رێکخراوێن دی یێن تیرۆرسی و جاره‌كا دى هێرش كره سه‌ر توركيا كو ئه‌و وه‌لات ھەڤکاریا داعش و تیرۆرستان دکەت و وەسا دیارکر گو توڕکیا بوویە جھەکێ ئارام بۆ تیرۆرستان.
ئەڤرۆ نیوز، ئەیاد بەرواری:
میلیشیێن حەشد شەعبی 10 مزگەفت ل باژێرێ بێجی یێ سەر ب پارێزگەھا سەلاحەدین ڤە ل ڤێ دووماھیێ پەقاندینە و چەندین سەرپێچی ژی دژی وەلاتیێن باژێرێ تکریت ئەنجامداینە.
سایتێ (ساحات التحریر) یێ نێزیک ژ (ئەیاد عەلاوی) جێگرێ برێ یێ سەرۆک کۆماری بەلاڤکریە” میلیشیێن حەشد شەعبی مەزگەفتا ( رەحمە) ل باژێرێ بێجی پەقاند و د چەند رۆژێن بۆری دا، 10 مزگەفت ل قەزا بێجی یێن پەقاندین”.
دیارکر ژی” حەشد شەعبی چەندین سەرپێجی ل تکریتێ ئەنجامداینە ژوان ژی ھێرش کرن ل سەر نەخوەشخانا سەلاحەدین ل تاخێ قادسیە ل ناڤەراستا تکریتێ و کادرێن نوژداری تووشی لێدانێ بوون و برین پێچەک ژی کوشت”.
سایتێ ناڤبری بەلاڤکر ژی کو میلیشیێن حەشد شەعبی مامۆستایەکێ زانکۆیا تکریت د مالا وی دا تیرۆکر، دیسا چەکدارێن حەشد شەعبی ب ڕەنگەکێ بەرفرەە ل تکریتێ یێن بەلاڤبووین و کریارێن کوشتنێ ل سەر ناسنامێ ئەنجام ددەن.
ئەڤرۆ نیوز،زنار تۆڤی:
ژ ئەنجامێ نزمبوونا پلێن گەرمێ و هاتنا بایەکێ سار،پێلەکا بەفرێ دەڤەرا بەرواری بالا ڤەگرت و هەتانوکە ژی بەردەوام بەفر یا دباریت.
ل شەڤا پێنجشەمبی 3/12/2015 رێژەکا باش یا بەفرێ ل دەڤەرا بەرواری بالا باریە و ژ ئەنجامێ بارینا بەفرێ رێکێن گەلەک گوندان هاتینە برین و هەتانوکە رێکێن وان نەهاتینە رامالین و نەشێن هاتنوچوونێ بکەن.
هەروەسا ژ ئەگەرێ بارینا بەفرێ دەوام ل هندەک قوتابخانانێن ڤێ دەڤەرێ نەهاتیەکرن.
ئەڤرۆ نیوز:
حوکمەتا ھەرێما کوردستانێ داخوازەکێ ئاراستەی وەزارەتان دکەت لیستا مووچێ ھەیڤێن دووماھیا ئەڤ سالە بەرھەڤ بکەت، ژێدەرەک ژی ژ وەزارەتا دارایی و ئابووری یا حوکمەتا ھەرێما کوردستانێ ئاشکرا دکەت کو لیستا مووچێ وان چار ھەیڤان ب بڕیارا حوکمەتێ دێ بیتە چەک.
ل دووڤ وان پێزانینان، وەزارەتا دارایی ھەموو وەزارەت ئاگەھدارکرینە کو لیستا مووچێن ھەر چار ھەیڤێن (نەە، 10، 11، 12) یێن دووماھیا سالا 2015 بەرھەڤ بکەن، لێ وەزارەتا دارایی ئەگەرێن ڤێ چەندێ بۆ وەزارەتان دیار نەکرینە.
ژێدەرەکی ژ وەزارەتا دارایی کو نەڤیا ناڤێ وی بھێتە ئاشکرا کرن بۆ SNN ئەڤ پێزانینە پشتراستکرینە و گۆت: “بەرھەڤکرنا لیستا مووچێ وان چار ھەیڤان پەیوەندی ب وێ چەندێ ڤە نینە کو مووچە راستەوخۆ بھێتە بەلاڤکرن”.
وی ژێدەرێ وەزارەتا دارایی خویا ژی کر، دووماھیا ھەموو سالان، حوکمەت حساباتێن خوە راستڤەدکەت و د سالا نوو دا ب حساباتێن نوو کاردکەت، لەو حوکمەتا ھەرێمێ داخواز کریە لیستا مووچێ فەرمانبەران یێ ھەر چار ھەیڤێن دووماھیا ئەڤ سالە ببیتەلیستەک و بۆ گەنجینان بھێتە ھنارتن، دا کو بکەنە چەک و گۆت: “ھەر دەمێ پارە ھەبیت مووچە بھێنە بەلاڤکرن”.
ئاشکرا ژی کریە، حوکمەتێ نەڤێت حساباتێن ئەڤ سالە تێکھەلی حساباتێن سالا بھێت بکەت، لەو لیستا وان چار ھەیڤان دێ کەتە چەک و بەرھەڤ کەت و گۆت: “ھەکە پارە ھەبوو، ئێکسەر مووچان دێ بەلاڤ کەت”.
ژ ئەگەرێ برینا پشکا بودجا ھەرێما کوردستانێ ژ لایێ بەغدا ڤە، بۆ دەمێ دو سالانە، ھەرێما کوردستانێ تووشی قەیرانەکا کوور یا دارایی بوویە، ژ بلی کو پتریا پرۆژان ھاتینە راوەستاندن، ھەتا نوکە حوکمەتا ھەرێمێ نەشیایە مووچێ فەرمانبەرێن خوە د دەمێ وان دا بەلاڤ بکەت و ھەتا نوکە حوکمەت ب مووچێ چار ھەیڤان قەردارا فەرمانبەرێن خوە یە.
نيشاندان