ئەڤرۆ نیوز:
رۆژنامەکا ئەمریکی د راپۆرتەکێ دا دیار دکەت کو ئێدی سنۆرێن دەستکرد یێن کو بوو ئەگەر ئاخا کوردان بھێتە پارچە کرن نھا ئەو سنۆر ژناڤ دچن و کوردان د شەرێ ل دژی داعشێ دا ژی جارەکا دی بۆ ھەموو جیھانێ سەلماند کو ئەو گەلەک ئاشتیخوازن و ئالیگرێ پێکڤەژیانێ و ئازادیێ نە و ژ بەر ھندێ ژی دڤێت ئێدی دەولەتا کوردی ل رۆژھەلاتا ناڤین بھێتە راگەھاندن، چونکو ھەتا دوەلەتا کوردی ئاڤا نەبیت قەیرانێن ل رۆژھەلاتا ناڤین ژی چارە نابن.
رۆژناما دێیلی بیست یا ئەمریکی سەبارەت ب بارودوخێ نھا یێ رۆژھەلاتا ناڤین و رەوشا کوردان راپۆرتەک بەلاڤ کریە و د راپۆرتێ دا ھاتیە دیار کرن کو سنۆرێن دەستکرد یێن کو د چەرخێ بیستێ دا بوونە ئەگەرێ پارچەبوونا وەلاتێ کوردان نھا ئەو سنۆر ژناڤ دچن و قەیرانێن ل رۆژھەلاتا ناڤین ژی رۆژ ب رۆژێ مەزنتر لێ د‌ھێن، ئەو یەک ژی نیشا ددەت کو ھەتا کورد ژی وەک نەتەوێن دی یێن ل رۆژھەلاتا ناڤین نەگەھنە مافێن خوە دێ قەیران ھەر یا بەردەوام بیت، چونکو پتر ژ ٤٠ ملیۆن کورد ل دەڤەرێ دژین و ب سالانە ھەر چار وەلاتێن داگیرکەرێن کوردستانێ زۆرداریێ ل کوردان دکەن و ناھێلن ئەو ب رەنگەکێ ئازادانە بژین.
د پشکەکا دی یا راپۆرتێ دا ھاتیە دیار کرن کو ئەڤرۆکە سنۆرێ ھەر دو وەلاتێن سووریا و عیراقێ نەماینە و نھا دەستھەلاتا ھەر دو وەلاتان ل سەر کوردان نەمایە، لێ پێدڤیە کو وەلاتێن رۆژئاڤا ب تایبەتی ژی ئەمریکا پشتەڤانیا خوە بۆ دەولەتا کوردی دیار بکەت، چونکو ئەزموونێن چەرخێ بۆری نیشا ددەت کو ھەتا کورد ژی وەک ھەموو گەلێن دی یێن دەڤەرێ نەگەھنە مافێن خوە رەوشا رۆژھەلاتا ناڤین ئارام نابیت و ژ بەر ھندێ ژی دڤێت ئەمریکا د ئاستێ نێڤدەولەتی دا دانپێدانەکا فەرمی ب کوردان و مافێ وان یێ رەوا بھێتە دان، چونکو کوردان پتر ژ ھەر گەلەکێ دی ل رۆژھەلاتا ناڤین قوربانی بۆ ئازادیێ داینە و ئەڤرۆکە ژی بەردەوام قوربانیان ددەن و د شەرێ ل دژی داعشێ دا ژی کوردان گەلەک قوربانی دان و زەلام و کچێن وان وەک قارەمانان ل سەنگەرێن شەری مان و بەرەڤانی ژ شەرەف و کەرامەتا مرۆڤاتیێ کرن و ژ بەر ھندێ ژی ئەرکێ ھەموو جیھانێ یە کو ئەڤرۆکە پشتەڤانیێ ل کوردان بکەن.
د راپۆرتێ دا بەحسێ رەوشا کوردان ل تورکیا و ئیرانێ ژی ھاتیە کرن و ھاتیە دیار کرن کو نھا ژی رۆژانە لاوێن کورد ل ئیرانێ دھێنە سێدارەدان و ل تورکیا ژی رۆژانە لاوێن کورد ب دەستێ ھێزێن ئێمناھیێ دھێنە کوشتن، لێ خەباتا کوردان ل وان ھەر دو وەلاتان ژی یا بەردەوامە و کوردان خوە بێدەنگ نەکریە و ھەردەم دەنگێ خوە بلند دکەن و داخوازا مافێ خوە دکەن، ھەرچەندە نھا ل تورکیا پارتەکا کوردی شیایە کو بچیتە پەرلەمانێ تورکیا، لێ ژ بەر سیاسەتا دەولەتێ و رەوشا شەری یا ل وی وەلاتی رێیێن سیاسەتێ ھاتینە گرتن و کورد نەشێن ب رێیێن سیاسی بگەھنە مافێن خوە.
د دووماھیا راپۆرتێ دا بەحسێ ھەرێما کوردستانێ ھاتیە کرن و ھاتیە دیار کرن کو ھەرێما کوردستانێ سەرەرای زۆرداریا کو ژ ئالیێ حوکمەتا ناڤەندی لێ دھێتە کرن، شیایە پتر ژ دو ملیۆن پەنابەرێن عیراقی و سووری خوەدان بکەت و ھاریکاریا وان بکەت، ھەروەسا دەمێ تیرۆرستێ داعشێ ھێرشی ھەرێما کوردستانێ کری، سەرەرای نەبوونا چەک و شیانێن مادی وێ حوکمەتێ شیا کو خوەدان ژ وان نەتەوە و کێم نەتەوێن دی دەربکەڤیت یێن کو ژ بەر داعشێ درەڤین و بەرێ خوە ددانە کوردستانێ، وێ یەکێ ژی نیشا دا کو کورد ھەردەم رێزێ بۆ خەلکێ دی دگرن و ھەرێما کوردستانێ وەک نموونەکا گەلەکا باش یا پێکڤەژیانا ھەموو بیروباوەریانە ل رۆژھەلاتا ناڤین دا، ژ بەر ھندێ ژی دەمێ ھندێ ھاتیە کو دەولەتا کوردی بھێتە راگەھاندن و کورد ژی وەک ھەموو خەلکێن دی یێن ل رۆژھەلاتا ناڤین بریارێ ل سەر پاشەرۆژا خوە بدەن، چونکو ئێدی باوەریا کوردان ب حوکمەتا عیراقێ نەمایە، چونکو حوکمەتا نھا یا عیراقێ رۆژ ب رۆژێ ب رەنگێن جودا جودا زۆلم و زۆرداریێ ل کوردان دکەت و چەند سالن کو بۆدجێ کوردان ژی ھاتیە راگرتن و ھەرێما کوردستانێ ھاتیە دۆرپێچ کرن، لێ دیسان ژی کورد بەرخوەدانیێ دکەن و دخوازن ب ئازادانە بژین، ژ بەر ھندێ ژی دڤێت ئەمریکا و وەلاتێن رۆژئاڤا پشتەڤانیێ ل ئاڤاکرنا دەولەتا کوردی بکەن، چونکو ئەزموونا شەرێ ل دژی داعشێ سەلماند کو ھەڤپەیمانێ نھا یێ وەلاتێن رۆژئاڤا کوردن.
رۆژنامەکا ئەمریکی: دەمێ ھندێ ھاتیە کورد دەولەتا خوە رابگەھینن
نيشاندان
