ئه‌ڤرۆ نیوز، ئه‌كره‌م ئیبراهیم
ب هه‌لكه‌فتا روژا جیانى یا نه‌هێلانا توند وتیژیێ ل دژى ئافره‌تان ول ژێر دوریشمێ ((ژ ئاشتیا خێزانێ بو ئاشتیا جیهانێ په‌روه‌رده‌كا ئارام بو هه‌میا)) ئه‌ڤرو سپێدێ 25-11-2015ل كه‌مپا شاریا یا ئاواره‌یان وب ئاماده‌بونا به‌رێزان اسماعیل احمد محمد نونه‌رێ پارێزگه‌رێ دهوكێ و قایمقامێ سێمێلێ وچه‌ند رێڤه‌به‌رێن میرى ورێكخراوێن UNوNGOیێن خویى وبیانى رێ ورسمێن راگه‌هاندنا هه‌وا نه‌هێلانا توند وتیژیێ هاتنه‌ گێران .
ل ده‌ست پێكێ نونه‌رێ پارێزگه‌رێ دهوكێ په‌یڤه‌ك پێشكێشكر تێدا ده‌ست خوشى ل رێڤه‌به‌ریا نه‌هێلانا توند وتیژیێ كر كو به‌رنامه‌كێ رێك وپێك ئاماده‌كریه‌ بو هه‌وا نه‌هێلانا توند وتیژیێ دژى ئافره‌تان وته‌كه‌زكر كو حكومه‌تا كوردستانێ وپارێزگه‌ها دهوكێ به‌رده‌وام كارى دكه‌ن بو به‌لافكرنا ره‌وشه‌نبیرى یا نه‌هێلان وكێمكرنا توند وتیژیێ دژى ئافره‌تان وهیڤى خاستن ئه‌ڤ دیارده‌ دناڤ جڤاكى دا بهێته‌ كێمكرن وبنبركرن وپشته‌ڤانیا كارگێریا پارێزگه‌ها دهوكێ نیشان دا بو ئه‌نجامدانا به‌رنامێ رێڤه‌به‌ریا نه‌هێلانا توند وتیژیێ.
پاش رێڤه‌به‌رێ نه‌هێلانا توند وتیژیێ دپه‌یڤه‌كێ ئارمانجێن ئه‌نجامدانا هه‌وێ دیاركرن وسوپاسیا وان هه‌موو لایه‌ن ورێكخراوان كر یێن بوینه‌ اریكار بو ئه‌نجامدانا هه‌وێ.
پاش جودا جودا په‌یڤێن رێكخراوێن پشكدار هاتنه‌ خاندن وهه‌مویان پشته‌ڤانیا خو بو به‌رنامه‌ى دیاركرن.
پاش هه‌وا نه‌هێلانا توند وتیژیێ ب شێوه‌كێ فه‌رمى ژلایێ نونه‌رێ پارێزگه‌رێ دهوكێ هاته‌ راگه‌هاندن…
ئه‌ڤ هه‌وه‌ بو ماوێ 16روژا دێ به‌رده‌وامكه‌ت وبریاره‌ (180) سمینار وچالاكیێن جورا وجور ل دور توند وتیژیێ وبه‌لافكرنا ره‌وشنبیریا كێمكرنا توند وتیژیێ دژى ئافره‌تان لناڤ وده‌رڤه‌ى كه‌مپان ولناڤ باژێر وگوندا ژلایێ شاره‌زا وماموستایێن بسپور بهێنه‌ پێشكێشكرن.