ئه‌ڤرۆنیۆز، ئه‌یاد به‌رواری

رۆژنامه‌كا ئیسرائیلی ئاشكراكر كو رێڤه‌به‌رێ گشتیێ وه‌زاره‌تا ده‌رڤه‌ یا ئیسرائیلی دوری گولد سه‌ره‌دانه‌كا نهێنی بۆ باژێرێ (ئه‌بوزه‌بی) پایته‌ختێ ئیماراتێ ئه‌نجامدایه‌ ب ئارمانجا هه‌ڤكاریێ د ڤه‌كرنا نوونه‌راتیا ئیسرائیلێ د ئاژانسا نێڤده‌وله‌تی یا وزا نووكه‌ر یا ب سه‌ر نه‌ته‌وێن ئێكگرتی ڤه‌.
رۆژناما (هارتس) یا ئیسرائیلی ئه‌ڤرۆ ئه‌ینیێ دیاركر كو د چه‌ند هه‌فتیێن داهاتی دا، بۆ جارا ئێكێ، دێ ئیسرائیل نوونه‌راتیه‌كا دبلوماسی یا فه‌رمی و ئاشكرا ل پایته‌ختێ ئیماراتێ ڤه‌كه‌ت و به‌رپرسه‌كێ ئیسرائیلی یێ مه‌زن بۆ وێ رۆژنامیچ گوتیه‌ كو ئه‌و نوونه‌راتیا ئیسرائیلی دێ سه‌ر ب ئاژانسا نه‌ته‌وێن ئێكگرتی بۆ وزا نووكه‌ر ڤه‌بیت كو باره‌گایێ وێ ل ئه‌بو زه‌بی یه‌ ل ئیماراتێ.
به‌ری راگه‌هاندنا ڤه‌كرنا وێ نوونه‌راتیا ئیسرائیلی ل ئیماراتێ، رێڤه‌به‌رێ گشتیێ وه‌زاره‌تا ده‌رڤه‌یا ئیسرائیلی سه‌ره‌دانا ئیماراتێ كربوو و پشكداری د كۆنگره‌كێ تایبه‌ت ب جڤاتا وێ ئاژانسا نه‌ته‌وێن ئێكگرتی كربوو و د چارچۆڤێ سه‌ره‌دانا خوه‌ دا بۆ ئیماراتێ، رێككه‌فتنه‌ك كربوو ل گه‌ل ( عه‌دنان ئه‌مین) رێڤه‌به‌رێ ئاژانسێ ل دۆر ڤه‌كرنا نوونه‌راتیا ئیسرائیلێ.
رۆژناما ئیسرائیلی ئاشكراكر ژی كو وه‌زاره‌تا ده‌رڤه‌ یا ئیسرائیلێ، دبلوماسی (رامی حه‌نان) ده‌ستنیشانكریه‌ وه‌كو سه‌رۆكێ وێ نوونه‌راتیا ئیسرائیلی ل ئیماراتێ و وه‌زاره‌تا ده‌رڤه‌ یا ئیسرائیلێ ئۆفیسه‌ك ژی بۆ نوونه‌راتیێ ل ئه‌بو زه‌بی ده‌ستنیشانكرینه‌.
ئاژانسا نه‌ته‌وێن ئێكگرتی بۆ وزا نووكه‌ر 145 وه‌لات تێدا ئه‌ندامن و 29 وه‌لات ژی بزاڤا ئه‌ندامبوونێ دكه‌ن، چو وه‌لاتان ژی نوونه‌راتیه‌كا سه‌ربخوه‌ یا سه‌ر ب ئاژانسێ ڤه‌ نینه‌، وی به‌رپرسێ ئیسرائیلی گوتبوو كو ئیسرائیل دێ وه‌لاتێ ئێكێ بیت كو دێ نوونه‌راتی ل ده‌ڤ وێ ئاژانسێ ل ئه‌بو زه‌بی هه‌بیت.
ل دووڤ وی به‌رپرسێ وه‌زاره‌تا ده‌رڤه‌یا ئیسرائیلێ، ئه‌ڤ پێنگاڤا ئاشكرا دبیته‌ سه‌ركه‌فتنه‌ك سیاسی یا گرنگ ل رۆژهه‌لاتا ناڤین و به‌رهه‌مێ په‌یوه‌ندیێن سیاسی یێن نهێنی یه‌ كو بۆ چه‌ندین سالان د به‌رده‌وام بوون، ئیسرائیلێ به‌ری نوكه‌ هزر د ڤێ پێنگاڤێ دا كربوو كو پشته‌ڤانیا ئیماراتێ كربوو د هه‌ڤڕكیێ دا ل گه‌ل ئه‌لمانیا ل سه‌ر باره‌گایێ وێ ئاژانسێ كو ل سالا 2009 ێ هاتیه‌ دامه‌زراندن و وی ده‌می ئیسرائیلێ مه‌رجێ ڤه‌كرنا نوونه‌راتیا خوه‌ ل ده‌ڤ وێ ئاژانسێ ل ئه‌بو زه‌بی پێشكه‌شێ ئیماراتێ كربوو.
په‌یوه‌ندیێن گرێدای ڤه‌كرنا وێ نوونه‌راتیێ ئاشكرا ببون ژ ئه‌گه‌رێ كوشتنا سه‌ركردێ دیارێ حه‌ماس (مه‌حمود مه‌بحوح) ل ئه‌بو زه‌بی كو پۆلیسێن ئه‌بو زه‌بی تۆمه‌تا كوشتنا وی ئاراسته‌ی موسادا ئیسرائیلی كربوو.

ئه‌ڤرۆ نیوز:

سوپاسالارێ وه‌زاره‌تا پێشمه‌رگه‌ى بۆ ئه‌ڤرۆ نیوز دیاركر، خالید عوبه‌یدى وه‌زیرێ به‌ره‌ڤانیا عیراقێ د چارچوڤێ سه‌ره‌دانه‌كێ دا بۆ هه‌رێما كوردستانێ، ئه‌ڤرۆ رۆژا ئه‌ینى گه‌هشته‌ قه‌زا شنگال كو به‌رى چه‌نده‌كێ ل سه‌ر ده‌ستێ هێزا پێشمه‌رگێ قاره‌مان هاتیه‌ رزگاركرن.
سه‌ردانا عوبه‌یدى بۆ وێ چه‌ندێ یه‌ ل گه‌ل به‌رپرسێن وێ قه‌زایێ كوم ببیت و ژ نێزیك ئاگه‌هدارى ره‌وشا وێ ببیت.

ئه‌ڤرۆنیۆز، ئه‌یاد به‌رواری
شاره‌زایه‌كێ له‌شكریێ عیراقی پایته‌ختێ نهێنیێ رێكخستیا ده‌وله‌تا ئیسلامی (داعش) یا تیرۆرستی ئاشكرا دكه‌ت و دبێژیت ئه‌و ده‌ڤه‌ر یا پاراستیه‌ ب چه‌ندین جهێن ب زه‌حمه‌ت ژ لایێ سنۆری یێ عیراقێ و سووریێ ژی.
هیشام هاشمی بۆ (عین العراق نیۆز) گوت” باژێرێ به‌عاج ل رۆژئاڤایێ مووسلێ گرنگترین ده‌ڤه‌ره‌ بۆ داعشێ و پایته‌ختا وێ یا نهێنی یه‌ و سه‌ركردێن داعشێ یێن ل وی باژێری و ئه‌و باژێر (به‌عاج) یێ پاراستیه‌ و ده‌وردایه‌ ب ده‌ڤه‌ر و جهێن ب زه‌حمه‌ت، كو ژلایێ سووریێ ده‌ڤه‌رێن (دیرلزۆر و ئه‌لبوكه‌مال و هه‌جین) و ژلایێ عیراقێ (قائیم و بیابانا قه‌یره‌وان و گزیرتا سه‌رسار و بیابانا به‌عاج).
هاشمی كو د هه‌مان ده‌مدا ڤه‌كۆله‌ره‌ د بیاڤێ گرۆپێن تیرۆرستی دا دبێژیت” ده‌ڤه‌را به‌عاج ڕێیا هه‌موو پرۆسێن ڤه‌گوهاستنێن له‌شكری و بازرگانی نه‌ و ژ گرنگترین وان ڕێیان ( به‌عاج – جه‌زیره‌) و ( روتبه‌ – هباریه‌) و ( قائیم – راوا) و ( ره‌قه‌ – ئه‌لبو كه‌مال) و ( حه‌زه‌ر – مووسل) و ( صگار – درێشه‌) و (ره‌قه‌ – تریفاوی) و ( عكاشات – قائیم – ئه‌لبو كه‌مال).
گوت ژی” ل ته‌موزا 2014 ێ، داعشێ هه‌رسێ باژێرێن (ئه‌لبو كه‌مال و هه‌جین و قائیم) تێكهه‌لكرن و ناڤه‌كێ نوو دانا سه‌ر ئه‌وژی (ویلایه‌تا فورات) و ل شوباتا 2015 ێ ویلایه‌تا جه‌زیره‌ راگه‌هاند كو ژ باژێرێن (شنگال و زومار و ته‌له‌عفه‌ر و ته‌ل عه‌بته‌ و حه‌مه‌دانیه‌ و قه‌یره‌وان و شه‌مال و عه‌یازیه‌ و به‌عاج پێكدهات) و ئه‌ڤ دابه‌شكرنێن نوو یێن وان باژێران ژلایێ داعشێ ڤه‌ ستراتیژیه‌تا باژێرێن ئه‌لترناتیڤ بوو ژلایێ داعشێ ڤه‌ پشتی شكه‌ستنێ و ئه‌وژی باژێرێن رۆژئاڤا عیراقێ و رۆژهه‌لاتا سووریێ كو باژێرێن سنۆری نه‌ و به‌ری نوكه‌ نه‌ شكه‌ستینه‌ و گرۆپێن ته‌كفیری هه‌ر ژ سالا 2003 ێ ل هنده‌ك ژ وان باژێران یێن هه‌ین و گرۆپێن قه‌چاخچیان ژی یێن لێ هه‌ین، و هنده‌ك ده‌ڤه‌ر ژوان ده‌ڤه‌رێن چاندنێ نه‌ ب تایبه‌تی ب گه‌نمی و جه‌هی و هه‌تاكو ماده‌ێ هوشبه‌رێ (قه‌نه‌ب هندی) و ئه‌ردێ بیابانێ یێ به‌رفره‌ه لێ هه‌یه‌ و شه‌قێن مه‌زن یێن ئه‌ردی یێن لێ هه‌ین كو جهێن گونجاینه‌ بۆ عومبارێن له‌شكری و لۆژستی و دگونجاینه‌ ژی ببنه‌ سه‌ربازگه‌هێن مه‌شقدانێ و ئه‌ڤ باژێره‌ ژلایێ عه‌شائیری ڤه‌ د تێكهه‌لن ل گه‌ل باژێرێن سنۆری یێن رۆژهه‌لاتا سووریا و ئالوگۆریێن بازرگانی و ئابووری یێن دناڤ واندا هه‌ین”.
گوت ژی” پتریا سه‌ركردێن مه‌زن یێن داعشێ ئه‌وێن هاتینه‌ كوشتن، ل ده‌ڤه‌را به‌عاج یێن هاتینه‌ كوشتن و (عه‌دنانی) په‌یڤدارێ داعشێ هه‌ر ل سه‌ر ئاخا به‌عاج خیلافه‌ت راگه‌هاندبوو و هه‌تاكو هه‌موو به‌لگه‌ و راپۆرت ئاماژێ دده‌ن كو ئه‌به‌ به‌كر به‌غدادی ب خوه‌ ژی یێ ل وێ ده‌ڤه‌رێ”.
دیاركر” دبیت باژێرێ به‌عاج سه‌نته‌رێ سه‌نگا وان ویلایه‌تێن سنۆری بیت، عه‌شیره‌تێن وان ده‌ڤه‌رێ وزه‌ و چه‌كه‌كێ گرنگه‌ دده‌ستێ داعشێ دا، ژ گرنگترین وان عه‌شیره‌تان ژی ل درووڤ هنده‌ك راپۆرتێن ناڤخوه‌یی، عه‌شیره‌تێن (خاتونی و متێوت و زبێدات (ئه‌لعبێد) كو پتریا ئه‌ندامێن وان عه‌شیره‌تان یێن گه‌هشتینه‌ داعشێ و رێژه‌كا كێم ژی یێن بۆ توركیا و هه‌رێما كوردستانێ ڕه‌ڤین، دیسا هه‌موو لایه‌ن ئه‌ندامێن وان هه‌رسێ عه‌شیره‌تان ئه‌وێن گه‌هشتینه‌ داعشێ ، دیسا هه‌موو لایه‌ن ئه‌ندامێن وان هه‌رسێ عه‌شیره‌تان ئه‌وێن گه‌هشتینه‌ داعشێ دكه‌نه‌ ئه‌گه‌رێ وێ كاره‌ساتا ب سه‌رێ ئێزدیان هاتی، سه‌باره‌ت عه‌شیره‌تێن (ساده‌ ئه‌لبو سه‌لامه‌) ( ئه‌لشێخ عیسا) و عه‌شیره‌تا ئه‌لحه‌سون ( ئه‌لجبور) و عه‌شیره‌تا (عگێدات) نێڤه‌كا وان یێن ل گه‌ل داعشێ و ییچن دی ئاواره‌ی گوندێن ده‌وروبه‌ری به‌عاج بووینه‌، هژماره‌كا كێم ژ عه‌شیره‌تێن (شمه‌ر و حه‌دیدی و راشد) گه‌هشتینه‌ داعشێ و ییچن دی هه‌موو یێن هاتینه‌ ده‌ربه‌ده‌ركرن و ئاواره‌كرن بۆ ده‌رڤه‌ی ده‌ڤه‌رێن دبن كونترۆلا داعشێ دا”.
قه‌زا به‌عاج سه‌ر ب پارێزگه‌ها نه‌ینه‌وا ڤه‌یه‌ و دكه‌ڤیته‌ رۆژئاڤایێ باژێرێ مووسلێ و باشوورێ باژێرێ شنگالێ ل سه‌ر سنۆرێ عیراقێ و سووریێ و حه‌سه‌كه‌ باژێرێ هه‌ڤسنۆرێ وێ یه‌ ژلایێ سووری ڤه‌.

ئه‌ڤرۆنیۆز، ئه‌یاد به‌رواری
ڤه‌كۆله‌ره‌كێ ئه‌مریكی دیاركر كو توندره‌وی د مزگه‌فتان دا دیارنابیت و پتریا وان كه‌سێن دگه‌هنه‌ دناڤ رێزێن رێكخستیا ده‌وله‌تا ئیسلامی (داعش) یا تیرۆرستی ب ڕێیا خێزانێ و هه‌لاڤان دگه‌هنێ.
سكوت ئه‌تران ڤه‌كۆله‌ر ل زانكۆیا ئوكسفورد یا ئه‌مریكی، ل دووڤ رۆژناما (ئه‌ندبندنت) یا بریتانی و ژلایێ سایتێ (هاڤینگتون پۆست) ڤه‌ هاتیه‌ ڤه‌گوهاستن، د كۆمبوونه‌كێ دا كو ژلایێ لژنا به‌رهنگاریا تیرۆرێ ل جڤاتا ئاسایشا نێڤده‌وله‌تی ل باره‌گایێ نه‌ته‌وێن ئێكگرتی ڤه‌ هاتیه‌ رێكخستن ل نیویۆركێ، گوت” سێ چارێكێن وان كه‌سێن دگه‌هنه‌ داعشێ ژ چه‌كدارێن بیانی، ئه‌و پێنگاڤ هاڤێتیه‌ ب پشته‌ڤانیا هه‌ڤالێن خوه‌ و 20 % ژی ب ڕێیا خێزانێن خوه‌ دگه‌هنه‌ داعشێ.
ڤی ڤه‌كۆله‌ری خویاكر ژی” داعش هه‌مان (ڤه‌كێشانا شورشگێری) یا هه‌ی ئه‌وا ل سه‌رده‌مێ شورشا فره‌نسی و شورشا به‌لشه‌فی ل روسیا و ل سه‌رده‌مێ سه‌رهلدانا نازیه‌تێ ل ئه‌لمانیا په‌یدابووی” و گوت “رۆژئاڤای شاشی كر ده‌مێ هزركری كو داعش پێكهاته‌كه‌ ژ تیرۆرستێن شێت، به‌لكو داعش پتر د گه‌نجان دگه‌هێت ژ وان حوكمه‌تێن شه‌ڕێ وێ دكه‌ن”.
گوت ژی” دوور ژ كێشا توندره‌ویێ ل مزگه‌فتان، گه‌له‌ك كه‌سێن گه‌هشتینه‌ داعشێ د بنه‌ره‌ت دا دگه‌هنه‌ خێزانێن مه‌سیحی و دیاربوو ژی كو ئه‌و ب خوه‌ ژ هه‌موو چه‌كدارێن داعشێ توندره‌وترن”.
ئه‌ترانی دیاركر ژی” داعش كوپیتكا بزاڤه‌كا شوره‌شگێریا دژی ره‌وشه‌نبیریا گشتی یه‌ و ژ هه‌مو بزاڤێن پشتی شه‌ڕێ جیهانیێ دویێ هاتینه‌ دامه‌زراندن ب لڤینتره‌ و مه‌زنترین هێزا له‌شكری كو پێكدهێت ژ شه‌ڕكه‌رێن خوه‌به‌خش یا پێكئینای كو دبیته‌ ئێكه‌مین جار پشتی شه‌ڕێ جیهانیێ دویێ ئه‌ڤ چه‌نده‌ روو دده‌ت”.
ئاماژه‌ دا “دهێته‌ گوتن كو ئه‌وێن دگه‌هنه‌ داعشێ، كه‌سێن نه‌سه‌ركه‌فتی و بێ ره‌وشتن، یان ژی یێن تووشی كریارێن شووشتنا مه‌ژی بووین، به‌لێ ئه‌ڤ چه‌نده‌ راست نینه‌ و پتریا وان چه‌كدارێن بیانی دناڤ رێكخستیا داعشێ دا ب تایبه‌تی ئه‌وێن ژ ئورۆپا هاتین، ب حه‌زا خوه‌ یێن هاتین”.
ل دووماهیی ڤه‌كۆله‌رێ ئه‌مریكی سكوت ئه‌تران دبێژیت”هێرشێن پاریس ئه‌وێن بووینه‌ ئه‌گه‌رێ كوشتنا 130 كه‌سان، پشكه‌ك بوو ژ یاریا داعشێ و یاریا وێ رێكخستیێ نه‌هاتیه‌ گوهۆرین، ژبه‌ر كو هه‌ر ئه‌و پلان بوو و دێ هه‌ر ئه‌و پلان ژی به‌رده‌وام مینیت”.

ئه‌ڤرۆنیۆز، ئه‌یاد به‌رواری
پێكئینانا (هێزێن سووریا دیموكراتی) ل 10 مه‌ها بۆری د چارچۆڤێ پلانه‌كا ئه‌مریكیبوو بۆ پێكئینانا هێزه‌كا عه‌ره‌بی- كوردی یا هه‌ڤپشك كو ببیته‌ ده‌ستپێكه‌ك بۆ ئازادكرنا پارێزگه‌ها ره‌قه‌ ژ ده‌ستێ داعشێ.
سایتێ (روسیا الیوم) د راپۆرته‌كا خوه‌دا به‌لاڤكر كو ده‌زگه‌هێن راگه‌هاندنێ ل ئه‌مریكا به‌حسێ شه‌ڕێ بهێته‌ یێ ره‌قه‌ دكر د چارچۆڤێ پلانه‌كا ئه‌مریكی بۆ قوتكرنا وێ پارێزگه‌هێ ژ هێلێن هاریكاریان ل باكوورێ ل گه‌ل توركیا و ل رۆژهه‌لاتی ل گه‌ل عیراقێ، به‌لێ ئه‌و پلان زوو هاته‌ گوهۆرین و هێزێن سووریا دیموكراتی به‌ر ب باكوورێ رۆژهه‌لاتا سووریێ ل پارێزگه‌ها حه‌سه‌كه‌ ڤه‌ چوون بۆ شه‌ڕێ داعشێ ل وێرێ.
ل دووڤ (روسیا الیوم)، روودانێن پاریس، دوباره‌ رۆناهی خسته‌ سه‌ر ره‌قه‌ كو (پایته‌ختا ده‌وله‌تا ئیسلامی – داعشێ- یه‌) و ل گه‌ل بزاڤێن جڤاكێ نێڤده‌وله‌تی بۆ ژناڤبرنا داعشێ، ڤان رۆژێن دووماهیێ پرۆسێن توپبارانكرنا ئه‌سمانی ژلایێ هه‌ڤپه‌یمانیا نێڤده‌وله‌تی و روسیا و فره‌نسا پێكڤه‌.
لێ شه‌ڕێ وێ رێكخستیا تیرۆرستی ل ره‌قه‌ هنده‌ك دیتنێن دی بۆ دڤێن و هێرشێن ئه‌سمانی ب تنێ به‌س نینن و كورد ب تنێ ژی نه‌شێن وی شه‌ڕی بكه‌ن هه‌چه‌نده‌ خوه‌ نێزیكی ره‌قه‌ ژی ببن.
ئه‌مریكا ژلایێ خوه‌ڤه‌ بزاڤا به‌رفره‌هكرنا بازنێ شه‌ڕكه‌رێن عه‌ره‌ب دكه‌ت كو هنده‌ك گرۆپێن دی ژی بهێن شه‌ڕێ داعشێ بكه‌ن وه‌كو ( له‌شكرێ شورشگێر ل ره‌قه‌) و هنده‌ك عه‌شیره‌تێن عه‌ره‌ب، زێده‌باری هنده‌ك هێزێن كوردی یێ ژ ده‌رڤه‌ی ( یه‌كینه‌یێن پاراستنا گه‌لێ كورد – یه‌په‌كه‌) وه‌كو پێشمه‌رگێن رۆژئاڤا یێن كو ل هه‌رێما كوردستانێ هاتینه‌ مه‌شقدان.
ئارمانجا واشنتۆن و ئه‌نقه‌رێ ژ ڤێ پێنگاڤێ ئه‌وه‌ كو نه‌ تنێ (یه‌كینه‌یێن پاراستنا گه‌لێ كورد یه‌په‌كه‌) كو بالێ له‌شكریێ حزبا ئێكه‌تیا دیموكراتی یه‌ ( په‌یه‌ده‌)، هه‌بوونا له‌شكری هه‌بیت، به‌لكو ئه‌و دخوازن كونترۆل ل باكووری و باكوورێ رۆژهه‌لاتا سووریێ ب ده‌ستێن گه‌له‌ك لایه‌نان دا بیت كو ژ عه‌ره‌ب و مه‌ره‌م ژ وێ چه‌ندێ ژی دێ ئه‌و بیت كو كورد ل بن ده‌ستهه‌لاتا ئێك هێز دا نه‌بن كو كونترۆلا بریارا كوردی بكه‌ت و سیاسه‌تا خوه‌ یا به‌رته‌نگ بكاربینیت، دیسا هه‌تاكو هێزێن كوردی ب تنێ ل مه‌یدانێ نه‌بن، ب ڤێ چه‌ندێ ژی هێزێن كوردی دێ شێن رێگریێ ل هێزێن عه‌ره‌بی كه‌ن هه‌كه‌ هات و ژ هێلا ئارمانجا ئه‌مریكی ده‌ركه‌فتن.
به‌ری چه‌ند رۆژان وه‌زیرێ به‌رگریێ فره‌نسی (جان ئیف لودریان) ژ سه‌رۆكێ هه‌رێما كوردستانێ (مه‌سعود بارزانی) ڤه‌گوهاستبوو كو ئه‌و یێ به‌رهه‌ڤه‌ شه‌ڕێ ل ره‌قه‌ بكه‌ت، ژلایێ خوه‌ڤه‌ (كیفاح مه‌حموود) شیره‌تكارێ راگه‌هاندنێ یێ سه‌رۆكێ هه‌رێمێ دیاركربوو كو دانوستاندن د ناڤبه‌را ئه‌مریكا و هه‌رێما كوردستانێ دا یێن هه‌ین ژبۆ پشكداریكرنا هێزێن پێشمه‌رگه‌ی د شه‌ڕێ ئازادكرنا ره‌قه‌ دا.
ل دووڤ (روسیا الیوم) ئه‌ڤ پێنگاڤه‌ دێ بیته‌ ئاریشێ د ناڤبه‌را پێكهاتێن كوردی دا دروست كه‌ت، چونكی پێشمه‌رگێن رۆژئاڤا ب سه‌ر جڤاتا نیشتمانی یا كوردی ڤه‌نه‌ كو ژلایێ هه‌رێما كوردستانێ ڤه‌ دهێنه‌ پشته‌ڤانیكرن و په‌یوه‌ندیێن باش ل گه‌ل توركیا یێن هه‌ین، یه‌كینه‌یێن پاراستنا گه‌لێ كورد و بزاڤا جڤاكی دیموكراتیێ كوردی به‌ری نوكه‌ گه‌ف كربوون كو هه‌كه‌ پێشمه‌رگێن رۆژئاڤا هاتنه‌ دناڤ سووریێ دا، ئه‌و دێ ده‌سته‌سه‌ركه‌ن، یه‌كینه‌یێن پاراستنا گه‌ل ژی هه‌بوونا هه‌ر هێزه‌كا كوردی كو دووری ده‌ستهه‌لاتا وان بیت، ره‌ت دكه‌ن.
ڤان هه‌موو كێشان، شه‌ڕێ ئازادكرنا ره‌قه‌ ل مه‌ها بۆری گیرۆكربوو و هه‌ر ئه‌و ب خوه‌ ژی دێ بنه‌ ئه‌گه‌رێ گوهۆرینان د هه‌ڤپه‌یمانیێن كوردی ل گه‌ل هێزێن هه‌رێمایه‌تی و نێڤده‌وله‌تی، ژ به‌ر كو ره‌قه‌ كو دكه‌ڤیته‌ د ناڤبه‌را حه‌سه‌كه‌ ل رۆژهه‌لاتی و حه‌له‌ب ل رۆژئاڤای، دهێته‌ هژمارتن كاگلكا ده‌ڤه‌را باكووری و ڕێیا سه‌ره‌كی بۆ گه‌هاندنێ كوردی ل سووریێ.