ئه‌ڤرۆ نیوز:
پشتى وه‌زاره‌تا خواندنا بلند دوهى ناڤێن به‌ربژارێن خواندنا دكتورایێ راگه‌هاندین، ئه‌ڤرۆ سپێدى ئه‌ڤرۆ نیوز، ناڤێ به‌ربژارێن زانكۆیا دهۆك بو خواندنا دكتورایێ به‌لاڤ كرن و ب رێیا ڤى لینكێ ل خوارێ هوین دشێن ناڤێن به‌ربژاران ببینن.
ئه‌ڤرۆ نیۆز، قائید میرۆ:
ژ ئه‌گه‌رێ شورتێ كاره‌بێ ل قه‌زا تلكێف سێ چه‌كدارێن داعش هاتنه كوشتن و كۆگه‌هه‌كا چه‌ك و ته‌قه‌مه‌نیان ژی هاته ژناڤبرن.
غه‌یاس سورچی، په‌یڤدارێ مه‌لبه‌ندێ ئێكه‌تیێ ل نه‌ینه‌وا ب ئه‌ڤرۆ نیۆز راگه‌هاند” ئه‌ڤرۆ ل سه‌نته‌رێ قه‌زا تلكێف یا سه‌ر ب پارێزگه‌ها نه‌ینه‌وا ژ ئه‌گه‌رێ شورته‌كێ كاره‌بێ ئاگر به‌ربوویه كۆگه‌هه‌كا گروپا تیرۆرستیا داعش و د ئه‌نجامێ ئه‌ڤی ئاگری هژماره‌كا زۆرا بۆمب و ته‌قه‌مه‌نیێن ناڤا كۆگه‌هێ په‌قینه.
غه‌یاسی گۆتژی” ژ ئه‌گه‌رێ په‌قینا كۆگه‌ها چه‌ك و ته‌قه‌مه‌نیێن داعش سێ چه‌كدارێن تیرۆرستن هاتنه كوشتن و جهێ بۆمبڕێژكرنا ترۆمبێلێن داعش هاته ژناڤبرن.
ئه‌ڤرۆ نیوز:
ئێكه‌تیا نیشتمانیا كوردستانێ پرۆژه‌یه‌كێ نوى بۆ سازانا لایه‌نێن سیاسى یێ هه‌ى و بۆ ڤێ مه‌ره‌مێ ژى دێ ناڤه‌رۆكا پرۆژه‌ى ل گه‌ل لایه‌نێن سیاسى شروڤه‌كه‌ت.
سەعدی ئەحمەد پیرە، ئه‌ندامێ مه‌كته‌با سیاسى یا ئێكه‌تیا نیشتمانیا كوردستانێ دیاركر كو ل چه‌ند رۆژێن بهێت لایه‌نێن سیاسى دێ پرۆژێن وان بینن بۆ ئةنجامدانا دانوستاندنان.
سه‌باره‌ت ئه‌گه‌رێ ده‌ستپێكرنا كومبوونێن 5 قولى، سه‌عدى ئه‌حمه‌د پیره گوت” نزانم ناڤێ كومبوونان دێ پێنج قولى بیت یان نه، به‌لێ لایه‌ن بۆ دانوستاندن سه‌باره‌ت گرفتێن سیاسى یێن ئه‌ڤرۆ كوردستان تێكه‌فتى، دێ كومبن.
ئه‌ڤرۆ نیوز:
بریاره سوبه په‌رله‌مانێ عیراقێ خواندنا ئێكێ بۆ پرۆژه قانوونا بودجێ گشتى یێ 2016 یێ عیراقێ بكه‌ت.
ئەحمەد حاجی ڕەشید بریارده‌رێ لژنا دارایى ل په‌رله‌مانێ عیراقێ راگه‌هاند كو سه‌رۆكایه‌تیا په‌رله‌مانێ عیراقێ بریار یا داى سوبه‌هى خواندنێ بۆ پرۆژه قانوونا بودجه‌ى بكه‌ت.
سه‌باره‌ت بوچوونا فراكسیونێن كوردى ل سه‌ر پروژه قانوونێ، بریارده‌رێ لژنا دارایى ل په‌رله‌مانێ عیراقێ ئاماژه ب وێ یه‌كێ كر كو ئه‌وان تێبینى ل سه‌ر چه‌ند برگه‌یان یێن هه‌ین، به‌لێ هه‌تا نوكه سه‌ركردایه‌تیا سیاسى یا كوردى چ بزاڤه‌ك نه‌كرینه بۆ ره‌فتاركرنێ ل گه‌ل بودجێ عیراقێ.
ئەڤرۆ نیوز:
نھا بشێوەکێ بەرچاڤ جڤاکێ مە ب تەماشەکرنا درامایێن بیانی ڤە د مژوولن و ئەڤ چەندە ژی رۆژ بۆ رۆژێ بەر ب زێدەبونێ یە کو ھەلبەت بەرێخۆدان بۆ ڤان درامایا باندورا خوە ھەیە لسەر جڤاکی.
بەیار رەمەزان گەنجەکە بۆ ئەڤرۆ خویا کر، بشێوەکێ گشتی ھەر جڤاکەک خۆدان جیاوازیەکا تایبەتە دگەل جڤاکەکێ دی ژ ھەموو لایەکێ ڤە و گۆت: لێ جیاوازیا ھەرە مەزن ئەوە کو ب چو شێوەیان د ئامادەکرن و دروستکرنا درامایان دا ئەم وەک ھەر مللەتەکێ نینین، چونکی تاما درامایێن کوردی گەلەک یا جیاوازە سەرەرای وێ چەندێ ژی تا نھا درامایا کوردی نەشیایە وەک پێویست جھێ خوە دناڤ جڤاکێ مە دا دروست بکەت.
ڤەکولەرێ جڤاکی حاجی رەمەزان بێسکی دا زانین، درامایا بیانی ٧٥% کارتێکرنێن خراب لپەی خوە دھێلیت، چونکی درامایا بیانی زور دووری رەوشت وتیتال و داب ونەریتێن مەنە و گۆت: لێ ئەگەرێ ڤێ چەندێ ژی ئەوە کو مە درامایا ناڤخویی نینە و ئەو کەسێن بەرپرس ژ ڤێ چەندێ ھەولێن رژد نەداینە بو ڤێ چەندێ بەروڤاژی ھەر ئە وان ژی چاڤ ل درامایێن بیانیە کو ئەو خوە دھەژمێرن کەسانێن نووخاز و رەشەنبیر، بەلێ بەروڤاژی ڤێ چەندێ ھەر درامایە کا دووری رەوشت و تیتالێن مە بیت زیانێت وێ دێ پتر بن لسەر مللەت و جڤاکێ مە.
بەیار رەمەزان دیارکر ژی، دوبلاژ کرن و ئامادەکرنا درامایا بیانی چەندین خرابیان لپەی خوە دھێلیت و گۆت: یا ژ ھەموویان گرنگتر ئەوە کو دڤێت دایک و باب نەھێلن زارۆ ل بەر تەماشەکرنا ڤان درامایان بمینن چونکی دناڤا ڤان درامایان دا دزیکرن و توندوتیژی و چەندین کارێن دژی یاسایێ دھێنە ئەنجامدان.
بێسکی دبینیت کو، دڤێت ئەو کەسێن ئەڤ کارە د دەستێ وان دا لخوە بزڤرن و سەحکەنێ کا چو دراما دگونجیت دگەل جڤاک و رەوشت و داب و نەریت و کە لتورێ مە ھەکە نە دێ زیانێن مەزن بینین ھەروەکو مە تا نھا گەلەک زیان ژێ دیتین و کارتێکرنێن خراب لپەی خوە ھێلاین.
ئەڤرۆ نیۆز، قائید میرۆ:
سێ تاخێن ھەولێرێ بن ئاڤێ کەفتن و ب ئەگەرێ لەھی و لێ مشتا پازدە مال ئاوارەبووینە.
کەنعان خەیلانی، سەرۆکێ فڕاکسیۆنا پارتی ل جڤاتا پارێزگەھا ھەولێرێ ب ئەڤرۆ نیۆز راگەھاند” شەڤا بۆری وەرە پێلەکا بارانێ باژێڕێ ھەولێرێ ڤەگرتیە و بۆ ئەگەرێ بن ئاف کەفتنا ھژمارەک مال و ترۆمبێل و جھێن بازرگانیێن وەکی دوکان و بازاڕێن مللی، بەلێ تیمێن ھەوارھاتنێ بلەز گەھشتینە جھێ لەھی چێبووی.
خەیلانی گۆتژی” سێ تاخێن باژێڕی بن ئاڤێ کەفتینە و لەھیێ لێدایە، بەلێ ژبلی زیانێن ماددی چو زیانێن گیانی نەبووینە و ھژمارەک ترۆمبێل بن ئاڤێ کەفتینە و پازدە مالژی ب ئەگەرێ لەھیێ ئاوارەبووینە.
ئەڤرۆ نیوز:
بۆ ب دەستڤەئینانا دادوەریێ و نەھێلانا توندوتیژیێ و جیاوازیا رەگەزی ل ھەرێما کوردستانێ، پەرلەمانێ ھەرێمێ رابۆ ب راوەستاندنا کارکرنێ ب مادەیا ٤٠٩ ژ قانوونا سزایا عێراقێ ژمارە ١١١ ئەوا دبێژیت: ئەو کەسێ ژ نیشکەکێڤە ژنا خوە یان ئێک ژ محارمێن خوە د حالەتێ زنایێ دا دبینیت و دکوژیت دێ ھێتە زیندان کرن ھەتا ٣ سالان و ل جھێ وێ قانوونێ دڤێت کار ب قانوونا ژمارە ٣ یا سالا ٢٠١٥ یا ھەموار کری بھێتە کرن. لێ قانووندانەر نەگەھشتیە سیاسەتا تاوانگەریێ و دادوەریێ بڤێ ھەموارکرنێ و ئارمانجا خوە ب دەستڤە نەئینا کو یەکسانیێ پەیدا بکەت.
د.ئەحمەد مستەفا شارەزایێ قانوونا گشتی ل زانکویا نەورۆز بۆ ئەڤرو دیارکر، راوەستاندنا کارکرنێ ب مادەیا ٤٠٩ و کارکرن ب ھەموارکرنا وێ دێ وی کەسی دانیت بەرامبەر مادەیا ٤٠٥ کو زیندانکرن ھەتا ھەتایێ یان دارڤەکرنێ لدووڤ مادەیا ٤٠٦ ئەگەر وی کەسی ژنا خوە یان ئێک ژ مەحارمێن خوە دیت یا زنایێ لگەل زەلامەکێ دیتر دکەت، دەمێ قانووندانەر ب ھەموارکرنا ڤێ قانوونێ رابووی، رەوشتێ جڤاکێ کوردستانێ بەرچاڤ نەوەرگرتیە وەک بنەمایێن ئاینی و پەیوەندیێن خێزانی و ھۆزی و نەریتێن کوردی کو جڤاکێ کوردەواریێ لسەر ھاتیە پەروەردەکرن و گۆت: بێگۆمان ھەر قانوونەکا ڤان بھایێن چەسپای بەرچاڤ وەرنەگریت ل دەمێ دەرکەفتنێ، دێ خرابیێ گەھینتە جڤاکی و جڤاکی ئاڤا ناکەت و ھیچ ئارمانجەکێ ب دەستڤە نائینیت.
د. ئەحمەد مستەفا دا زانین ژی ، ئەگەر کەسەکی ژنا خوە یان کەسەک ژ مەحارمێن خوە دیت یا زنایێ دکەت، لدووڤ ھەموارکرنا قانوونا ٤٠٩، دڤێت ئەڤ کەسە ئەو تشتێن ئەو لسەر پەروەردە بووی ھەموویان بجە بھێلیت و دەرگەھی کلیل بدەت و دوور بچیت و گۆت: چونکو ئەگەر ھەڤژینا خوە کوشت دێ ھەتا ھەتایێ ھێتە زیندان کرن لدووڤ مادەیا ٤٠٥ یان دێ ھێتە دارڤە کرن لدووڤ مادەیا ٤٠٦، ئەڤ چەندە ژی ناھێتە قەبولکرن د جڤاکەکێ دا کو بھایێن ئاینی و ھوزی و زەڵامینیێ تێدا ھاتبنە بنەجە کرن.
ل دووماھیێ ماموستایێ زانکۆیێ گوت: ژبەر وان ئەگەرێن مە دیار کرین و ل پێناڤ نەھێلانا جیاوازیا رەگەزی و ب دەستڤەئینانا وێ دادوەریا قانووندانەر لدووڤ دگەریت، ئەز بۆ قانووندانەرێ کوردستانێ پێشنیاز دکەم مفای بۆ خوە ژ دەقێ قانووندانەرێ جەزائیری وەربگریت ل مادەیا ٢٧٩ کو مفای ژ بەھانەیا سڤک کری یا زەلامی وەربگریت دەمێ ژنا خوە دکوژیت ئەگەر دیت یا زنایێ دکەت، ھەروەسا ژنێ ژی ئەگەر مێرێ خوە کوشت دەمێ دبینیت یێ زنایێ دکەت.
ەڤرۆ نیوز:
وەلاتیێن گۆندێن دەڤەرا بارزان ئەڤێن ل ژێر کونترولا PKK دا گازندا وێ یەکێ دکەن کو ژ بەر سەدەما ھەبوونا گەریلایێن PKK زیانێن مەزن ب رێیا فروکێن تورکی ب وان کەفتینە و دخوازن گۆندێن وان ژلایێ وان ڤە بھێنە چولکرن، قایمقامێ مێرگەسوورێ ژی دیارکر کو ٨٠ گۆندێن دەڤەرا بارزان د بن کۆنترولا وانن.
عومەر عەلی، وەلاتیەکێ دەڤەرا بارزانە دیار کر، ئەڤە زێدەتری ٢٥ سالایە ئەو نکارن بچنە سەر گۆندێن خوە و گۆت: (وەکو ھەموو سالەکێ ئەڤ سال ژی گۆندێن مە بوونە ئارمانجا بۆمبەبارانکرنا فروکێن تورکی و زیانێن زورێن مەزنێن ماددی ب گۆندێن مە کەفتینە و ئەڤە سەرەرایی وێ یەکێ کو ئەم نکارین گۆندێن خوە ئاڤەدان بکەین).
گۆت ژی: (سالانە ملیاران دینار وەلاتی وەکو داھات ژ متایێن ھشک و ئاڤی و رەز و بیستانێن خوە بەرھەم دئینن و گۆندێن مە ھەموو جھێ ب خودانکرنا پەزی و چاندنێ یە، بەلێ ب مخابنیڤە ھەتا نھا مرۆڤ نکاریت بچیتە گۆندێ خوە وەکو گەریان ژی).
ئەرکان عەزیز ئەو ژی وەلاتیەکێ گۆندێن وەلاتی ژێری یە ل دەڤەرا بارزان گۆت: (من ژ دایبابێن خوە زانیە مە گۆندەک ھەیە و خودان مولک و رەز و بیستانین و ھێلاینە و نھا ل سەر مولک و ئاخا جھەکێ دن دژین وەکو ئاوارە).
دڤیا ب رێیا ئەڤرء بۆ جھێن پەیوەندیدار بێژیت کو ئەو دخوازن گۆندێن وان بھێنە ئاڤەدانکرن و گۆت: (ئەڤ سالە ژ بەر ھەبوونا مەترسیا بۆمبەبارانکرنا فورکێن تورکی بوو گۆندێن مە ئەم نەچوینە ھێلا کەزان، سماق، کەنگروک، گیز، گھیشک و ھەموو متایێن دن کو ئەڤ یەک ژی ئێک بوو ژ دەھان وان زیانێن ب وەلاتیان کەفتی).
غەفور ئەحمەد قایمقامێ قەزا مێرگەسوورێ دیار کر، زێدەتری ٨٠ گۆندێن دەڤەرا بارزان نھا د بن کۆنترولا PKK دانە و گۆت: (ل ڤان سالێن دووماھیێ پشتی پرۆسەیا ئاشتیێ ل تورکیا بەر ب پێشڤەچوونێ د چوو وەلاتیێن گۆندێن دەڤەرا بارزان قەستا سەر گۆندێن خوە کربوون و بەھرا پتریا وان ژی رەز و بیستان و چاندن ل گۆندێن خوە کربوو و سالانە داھاتیەکێ باش بۆ خوە کۆم دکر، بەلێ ب مخابنیڤە جارەک دن گۆندێن بارزان بوونەڤ ئارمانجا بۆمبەبارانکرنا فروکێن تورکی و ھەتا نھا ژی ئەڤ یەک یا بەردەوامە و بێگومان ئەگەر ژی دزڤریت بوو ھەبوونا گەریلایێن PKK بوو دەڤەرێ و ھندی PKK ل دەڤەرێ ژی ھەبن ئەڤ گۆندە دێ ھەر د چول و وێرانکری بن).
زێدەتر گۆت: (گۆند چەند د مەترسی و وێرانکری بن مرۆڤ نکاریت رێگریێ ل وەلاتیان بکەت کو قەستا گۆندێن خوە نەکەن، ژ بەر کو ئاخا وایە و چو منەتا ل خەلکی ناکەن، ژ بەر ڤێ سەدەمێ ژی چەندان کەس تووشی مرن و بریندارکرن و گرەنتێ بووینە).
قایمقامێ مێرگەسوورێ دیار کر ژی، سەدان بزاڤ ھاتینەکرن کو PKK دەڤەرێ چول بکەن و وەلاتی بوو گۆندێن خوە بزڤرن، بەلێ ھەموو د بەر ئاڤێ داچووینە و گۆت ژی: (ئەڤ سالە پتر ھەموو سالان وەلاتیان قەستا گۆندێن خوە کربوون و رەز و بیستانێن خوە ساخکربوون و ببوویە جھێ ب خودانکرنا پەز و مێشێن ھنگڤینی و داھاتیەکێ باش ژ متایێن ھشک و ئاڤی دھاتن دەستڤەئینان و د نھا دا دخوازین کو وەلاتی قەستا گۆندێن خوە نەکەن، ژ بەر کو جھێ مەترسیێ یە).
ئه‌ڤرۆ نیوز:
سەروکاتیا زانکویا دهوک- نڤێسینگەها هاریکارێ سەروکێ زانکویێ بو کار وبارێن زانستی، ئەنجامێن بەرایێ یێن خواندنا بلند (دکتورایێ) ل زانکویا دهوک راد گەهینن بو سالا خواندنێ (2015-2016) ئەوێن هاتینە پەسەندکرن ژلایێ وەزارەتا خواندنا وبلند وتوێژینەوەیا زانستی.
ئه‌ڤرۆ نيوز:
رێڤەبەرێ شوونوارێن پارێزگەھا دھۆکێ بۆ ئەڤرۆ دیار کر کو چار گۆر ل گۆڕستانەکا شندوخا ھاتینە دیتن، کو پێشبینی دھێتە کرن مێژوویا وان بۆ بەری زاینی بزڤڕیت و گۆت “ڤان رۆژان دێ نموونە ژ ڤان گۆڕان ھێنە وەرگرتن و رەوانەکرن بۆ وەلاتی ئیتالیا، دا کو ڤەکۆلین ل سەر بھێنە کرن و دیار ببیت کا زەلامن یان ژنن”.
د. حەسەن ئەحمەد قاسم رێڤەبەرێ شوونوارێن پارێزگەھا دھۆکێ دیار کر کو نوکە ئەو چار گۆڕ ل گۆرەستانەکا دا دەڤەرا شندوخا ل باژارێ دھۆکێ دھێنە کولان، کو گۆڕین تابووتن و پرۆژە ژلایێ پارێزگارێ دھۆکێ ڤە دھێتە پێشتەڤانیکرن و تێمین رێڤەبەریا شوونوارێن دھۆکێ د پرۆژەی دا کار دکەن و گۆت “مە بسپور د وارێ ئەنسروپولۆجی دا نینە، لەورا نەچار بووینە بسپورێ ڤی واری ژ ئیتالیا بینین و بۆ ڤەکرنا ھەر چار گۆرێن د ناڤ گۆرستانێ دا ھاتینە دیتن دا دگەل تیمێن مە کار دکەت و دێ پێزانینان ل سەر ڤان مریان کۆم کەت، بگرە ژلایێ نفشی و ژیێ وان ڤە و دێ ڤەکۆلین ل سەر ھێنەکرن کا ژنن یان زەلامن”.
د. حەسەن ئەحمەد قاسم دیار کر ژی کو ئێک ژ وان گۆڕین ھاتینە دیتن دێ بۆ مۆزەخانا دھۆکێ یا نشتیمانی ھێتە ڤەگوھاستن و کار ب سەرکەفتی یێ دھێتە ئەنجامدان دێ و چەند نموونە ژی دێ ھێنە وەرگرتن و رەوانەکرن بۆ وەلاتی ئیتالیا بۆ پشتراستبوونێ ژ مێژوویا وان و دێ ل تاقیگەھێن تایبەتێن شوونواران ھێنە پشکنین، داکو دیار بیت کا بۆ چ چەرخی ڤەدگەرن و گۆت “چار گۆرن، لێ مرۆڤەک ھەتا چار مرۆڤان د ئێک گۆڕی دا ھاتینە ڤەشارتن و ئەڤە ئێکەمین جارە ب ڤی شێوەیێ ئەکادیمی ڤەکۆلین ل سەر شوونواران دھێتە کرن و ئەم پێشبینیێ دکەین کو مێژوویا وان ڤەگەریت بۆ بەری زاینی”.
ئەلی ساندرو بسپۆرێ ئیتالیی د وارێ ئەنسروپولۆجی دا بۆ ئەڤرۆ دیار کر کو دێ ل ڤان نێزیکان چەندین نموونە ژ ڤان مریێن ھاتینە دیتن ھێنە وەرگرتن و رەوانەکرن بۆ ئیتالیا و پشتی دو ھەیڤان دێ ئەنجام ئاشکرا بن، ئەو ژی دێ دیار بیت کا مێژوویا ڤان مریان بۆ کیژ چەرخی ڤەدگەریت و دێ پیشکنینەکا ھوور ل سەر ھێتە کرن.
نيشاندان