ئەڤرۆ نیوز:
کەسایەتیەکێ سیاسیێ کورد راگەھاند، شاشیەکا مەزنە حەشد شەعبی ل قەزا خورماتوو ھەبیت و ب چو شێوەکی نابیت ل وێرێ بمینیت و پێتڤیە ب تنێ پۆلیسیێن ناڤخوەیی ل وێرێ بن، نەکو حەشد شەعبی رابیت ب رێڤەبرنا کارگێریا وێرێ و رەوشێ ئاڵوزتر بکەت.
مەحموود عوسمان بۆ رۆژناما ئەڤرۆ گوت” تورکومان گەلەک ڕیکلامێ بو خورماتوو دکەن کو باژێرەکێ وانە و ئەو دخوازن وەکو تلەعفەر ب باژێرێ خوە بدەنە نیاسین و گەلەک جاران ژی داخواز دکەن ببیت پارێزگەە و وەکو پارێزگەھەکا تورکومانی بدەنە نیاسین و ئەگەرێ سەرەکیێ ڤان ھەموو ئاریشان بەغدایە”.
محموود عوسمانی زێدتر گوت” پێتڤیە شاندێ ھەرێما کوردستانێ بەر ب بەغدا بچیت بۆ چارەسەرکرنا ھەموو ڤان ئاریشان، نوزانم بوچی ھەتا نوکە شاندێ ھەرێما کوردستانێ نەچوویە بەغدا و حوکمەتا ھەرێمێ دبێژیت ئەم چاڤەڕێی نە ھەتاکو حوکمەتا بەغدا بێژیتە شاندێ ھەرێمێ وەرە و بەغدا ژی ڕادگەھینیت ئەم دبەرھەڤین بو پێشوازیا شاندێ ھەرێمێ و ل دەڤ من یا سەیرە ھەتا نوکە شاندێ ھەرێمێ نەچوویە بەغدا بۆ چارەسەرکرنا ڤان ھەموو ئاریشان”.
ڤی سیاسەتمەدارێ کورد ل سەر رەوشا سیاسی ل ھەرێما کوردستانێ گوت” نوکە جورەکێ بێدەنگیێ ب سەر ئاڵوزیێن سیاسی یێن کوردستانێ ڤە یێ دیارە، بەلێ بێدەنگ بوون نە چارەسەریە و پێتڤیە چارەسەریا وان پرسێن ھەڵاویستی بھێتە کرن، ژبەرکو ئێکەتیا ئوڕوپی و ئەمریکا و پێشمەرگەی و ڤی گەلی ھەموویان دڤێت پرس بھێنە چارەسەرکرن، ھەکە ئەڤ پرسە نەھاتنە چارەسەرکرن، دبیت سەنگا کوردان ل دەرڤە و ناڤخوە ژی کێم ببیت و ھەتاکو ل ھەمبەری بەغدا ژی، ژبەر ھندێ پێتڤیە چارەسەریەکێ ببینن”.
دیارکر ژی” یا نوڕمالە گوھۆرین د پەرلەمانی دا بھێنە کرن، ژ بەر کو چاوان ھەلبژارتن ھاتنە کرن بۆ پەرلەمانی، وەسا دروستە ھەلبژارتنان بکەن ڤە بۆ گوھۆرینان د پەرلەمانی دا، لێ یا گرنگ ئەوە حوکمەت ڕونشتنان بکەت و پەرلەمان ژی ڕونشتنێن خوە بکەت بۆ چارەسەرکرنا ئاریشێن کۆم بوین و کەفتینە سەر ئێک .
محموود عوسمان ئەگەرێن سەرەکی یێن کێشا نوکە ل خورماتۆ ھەیی ئاشکەرا دکەت
نيشاندان