ئەڤرۆ نیۆز، قائید میرۆ
بەری چەند رۆژان حوکمەتا ھەرێما کوردستانێ ل بەربوو مووچێ ھەموو مامۆستایێن کوردستانێ بھێتە کێمکرن، بەلێ ئێکەتیا مامۆستایان ئەف چەندە قەبوولنەکر.
ئەحمەد گەرمیانی، جێگرێ سەرۆکێ ئێكەتیا مامۆستایێن کوردستانێەب ئەڤرۆ نیۆز راگەھاند” حوکمەتا ھەرێما کوردستانێ لبەربوو موچێ مامۆستا کێم بکەت و ھەموو دەرمالەیێن ھاتنوچوونێ و باوەرناما ببریت و مووچە ب ڤی شێوەی بھێتە کێمکرن.
گەرمیانی گۆتژی” بەلێ پشتی بزاڤێن زۆر یێن ئێکەتیا مامۆستایان مە دانوستان دگەل حوکمەتێ کرن و دووماھیێ ئەم شیاین ڤێ باوەریێ بۆ حوکمەتێ چێکەین مووچێ مامۆستا نەھێتە کێمکرن.
ئه‌ڤرۆ نيوز:
سه‌لاحه‌دين بابه‌كر، وه‌زيرێ كاره‌با حوكمه‌تا هه‌رێما كوردستانێ بۆ باسنيوز راگه‌هاند: “پلانا وه‌زاره‌تا كاره‌بێ بۆ وه‌رزێ زڤستانێ ئه‌وه كو بشێن پترترين رێژا كاره‌بێ ب وه‌لاتيان بده‌ن و بۆ ڤێ چه‌ندێ ژى پێدڤى ب بۆدجه‌كێ باشن بۆ سه‌خبێريكرنێ ب تايبه‌ت ل وان ده‌ڤه‌رێن بارگرانى ل سه‌ر و دڤێت فيده‌رێن نوو بدانن، به‌لێ بودجا پێدڤى ل به‌ر ده‌ست نينه دا كو ئه‌ڤ كاره بهێته كرن و ژێرخانا كاره‌بێ ل هه‌رێمێ پێش بكه‌ڤيت”.
وه‌زيرێ كاره‌يێ ل حوكمه‌تا هه‌رێما كوردستانێ ئاماژه ب وێ چه‌ندێ ژى كر كو د بێ ئومێد نين كو بشێن ل وه‌رزێ زڤستانێ رێژه‌كا باش يا كاره‌بێ بۆ وه‌لاتيان دابين بكه‌ن و گۆت: “هه‌ر چه‌نده ئه‌و رێژا پێدڤى يا كاره‌بێ بێ دابينكرنا بودجه‌يى يا ب زه‌حمه‌ته، به‌لێ دێ بزاڤێ كه‌ين كو ئه‌و رێژا مه هه‌يى، ب سه‌ر كێشان دا زال بين.
ژێده‌ر: باس
ئه‌ڤرۆ نيوز:
سه‌عد حه‌ديسى، ئاخفتنكه‌رێ ب ناڤێ حوكمه‌تا عيراقێ ئه‌ڤرۆ رۆژا سێشه‌مبى راگه‌هاند: دڤێت حوكمه‌تا مه‌ركه‌زى كار ل سه‌ر هێمنكرنا ره‌وشا هه‌رێما كوردستانێ بكه‌ت و نه‌هێليت ئێدى ره‌وش تێكبچيت و دا زنانين ژى كو هێمنى و ئاسايشا هه‌رێما كوردستانێ بۆ عيراقێ گه‌له‌ك يا گرنگه.
داخواز ژ هه‌موو لايه‌نێن سياسى يێن ناڤا هه‌رێما كوردستانێ كريه و ڤه‌گه‌رنه دانوستاندنان و نه‌بنه ئه‌گه‌رێ تێكدانا ئاراميا ل ناڤا كوردستانێ هه‌يى.
ئه‌ڤرۆ نيوز، له‌زگين جۆقى:
وه‌زيرێ ساخله‌ميێ ل حوكمه‌تا هه‌رێما كوردستانێ، د كۆنگره‌كێ رۆژنامه‌ڤانى دا ل پارێزگه‌ها دهۆكێ راگه‌هاند كو ب تنێ دو حاله‌تێن كولێرايێ ل دهۆكێ هاتينه تۆماركرن، ئه‌ڤێن دى هه‌موو گۆمانلێكرى بووينه و نوكه ژ به‌ر ره‌وشا وان يا باش بۆ مالێن وان هاتينه ره‌وانه‌كرن.
د. رێكه‌وت حه‌مه ره‌شيد ئاماژه ب وێ چه‌ندێ ژى كر ئه‌وان رێوجهێن دژوارتر گرتنه به‌ر و دا زانين كو ئه‌ڤ حاله‌تێن دروست بووين نه ژ ئه‌گه‌رێ ئاڤا پيس بووينه.
ئه‌ڤرۆ نيوز:
تارق گه‌ردى، جێگرێ سه‌رۆكێ فراكسيۆنا پارتى ل جڤاتا نوونه‌رێن عيراقێ بۆ رووداو راگه‌هاند، ئه‌ڤرۆ 13ى چريا ئێكێ يا 2015ێ سه‌رۆكێن فراكسيۆنێن كوردى ل جڤاتا نوونه‌رێن عيراقێ دێ ل به‌غدا كۆم بن و گۆت: “د پێناڤى ئێكرێزيا مالا كوردى، پێكڤه مه بڕيار دايه ئه‌و كێشێن ل كوردستانێ هه‌ين، نه‌هێلين بۆ به‌غدا بهێنه ڤه‌گوهاستن، مه وه‌كو پارتى نه‌ڤێت ئه‌و ئێكرێزيا ل به‌غدا هه‌يى تێكبچيت”.
ده‌رباره‌يى ئاماده‌بوونا سه‌رۆكێ فراكسيۆنا گۆڕان، هۆشيار عه‌بدولا، د كۆمبوونێ دا، تارق گه‌ردى گۆت: “كاك هۆشيار ژ ئه‌گه‌رێ مژوولاهيا وى ب كاره‌كى ڤه ئاماده نابيت، به‌لێ به‌رى نوكه ل گه‌ل د. موسه‌نا ئه‌مين سه‌رۆكێ فراكسيۆنا ئێكگرتوو دانوستاندن يا كرى و هه‌مان بۆچوون هه‌بوويه كو كێشێن لايه‌نێن سياسى بۆ به‌غدا نه‌هێنه ڤه‌گوهاستن”.
ئه‌ڤرۆ نيوز:
پشتى ده‌ركرنا گۆڕان ژ حوكمه‌تا هه‌رێما كوردستان و ئه‌و ره‌وشا نوكه هاتيه پێش، كۆمبوونێن نه‌ئاسايى يێن هه‌موو لايه‌نێن سياسى ل هه‌رێما كوردستانێ ده‌سپێكريه و د هه‌مان ده‌م دا كۆمبێن ناڤبه‌را پارتێن سياسى ژى دهێنه كرن.
ل هه‌ولێرا پايته‌ختێ كوردستانێ و پشتى ده‌ركرنا وه‌زيرێن گۆڕان و سه‌رۆكێ په‌رله‌مانى ب ره‌نگه‌كێ ده‌مكى ژى حوكمه‌تێ و په‌رله‌مانى، ئه‌ڤرۆ رۆژا دوشه‌مبى رێكه‌فتى 13ى چريا ئێكێ يا 2015ێ ل هه‌ولێر ل مالا كوسره‌ت ره‌سۆل جێگرێ ئێكێ يێ ئێكه‌تى نشتيمانى كوردستان، هه‌ر ئێك ژ ئێكه‌تى و يه‌كگرتوو و كۆمه‌ل ل سه‌ر ئاستێ كه‌سێن ئێكێ يێ حزبێ بۆ دانوستاندنێ ل سه‌ر ڤێ ره‌وشێ كۆمبوون.
دوهى و پێر ژى 11 و 12ى چريا ئێكێ يا 2015ێ هه‌ر ئێك ژ مه‌كته‌با سياسى يا ئێكه‌تى نشتيمانى كوردستان و ئێكگرتوويا ئيسلامى كوردستان ژى ل سه‌ر ئاستێ سه‌ركرداتيێ كۆم ببوون بۆ ده‌ربڕينا دووماهى بۆچوونا خوه، پارتى راگه‌هاند كو گه‌هشتنه وێ راستيێ كو نابيت ئێدى گۆڕان د حوكمه‌تێ دابيت و ئێكگرتوو ژى هه‌لويستێ خوه يێ دووماهيێ رانه‌گه‌هاند.
ئه‌ڤرۆ ل سلێمانيێ ژى ل سه‌ر ئاسته‌كێ بلند هه‌ردو حزبێن ئێكه‌تى نشتيمانى كوردستان و بزاڤا گۆڕان كۆمبوون و داخۆيانيێن بزاڤا گۆڕان ئاماژێ ب وێ چه‌ندێ دكه‌ن كو هندى هێز د لاشێ وان مايه ئه‌و دێ شه‌رى بۆ مانا د ناڤا حوكمه‌تێ دا كه‌ن.
بڕياره ئه‌ڤرۆ ئێڤارى ل هه‌ولێر ژى هه‌ردو حزبێن پارتى ديموكراتى كوردستان و ئێكه‌تى نشتيمانى كوردستان كۆم ببن و بڕيارێ ل سه‌ر ئه‌ڤ ره‌وشا نوكه هه‌يى بده‌ن، كو پارتى چاڤ ل وێ چه‌ندێ يه حوكمه‌ته‌كا نوو بێى گۆڕان ژ هه‌موو لايه‌نێن دى يێن سياسى پێكبينيت، به‌لێ هێشتا ئێكه‌تيێ خوه ئێكلا نه‌كريه.
سه‌فين دزه‌يى بۆ رويترز دياركر كو نێچيرڤان بارزانى ل گه‌ل وه‌زيرێن گۆڕان كۆمبوويه و ژێ خواستيه كو ئێدى ده‌وامێ نه‌كه‌ن و ل جهێ وان دێ هنده‌ك وه‌زيرێن دى هێنه دانان كو هه‌ر ئه‌ون يێن د كابينا هه‌شتێ دا و دێ ب وه‌كاله‌ت هێنه دانان، ب گۆره‌يى پێزانينێن ئه‌ڤرۆ نيوز ژى نێچيرڤان بارزانى ب وه‌زيرێن گۆڕان گۆتيه كو ئه‌وان چو كێشه نينه و د سه‌ركه‌فتى بووينه د كارێ خوه دا، به‌لێ ژ به‌ر كريارێن حزبا وان جارێ نابيت ئه‌و د ناڤ حوكمه‌تێ دا بمينن و هه‌رده‌مێ كاودان دروست بوون، دبيت دووباره ڤه‌گه‌رنه سه‌ر كارێن خوه.
هه‌ر چه‌نده هه‌تا نوكه چو سيناريۆيێن نوو بۆ داهاتيێ سه‌رۆكاتيا په‌رله‌مانى و وه‌زيرێن ناڤا حوكمه‌تێ نه‌هاتيه دياركرن، به‌لێ ب گۆره‌يى په‌رله‌مانتاره‌كى كو بۆ ئه‌ڤرۆ نيوز دياركريه نوكه دشيان دايه په‌رله‌مانێ كوردستانێ روونشتنان ئه‌نجام بده‌ت و جێگرێ سه‌رۆكێ په‌رله‌مانى دشێت ل جهێ سه‌رۆكێ په‌رله‌مانى روونشتنان ب رێڤه ببه‌ت هه‌ر وه‌كو په‌يره‌وێ ناڤخۆ ئيشاره‌ت پێ دايى و سه‌رۆكێ په‌رله‌مانى يێ به‌رێ ژى دشێت وه‌كو په‌رله‌مانتار ئاماده‌يى روونشتنان ببيت.
ده‌رباره‌يى وه‌زيران ژى چ تشتێ نوو نه‌هاتيه راگه‌هاندن، ئه‌و نه‌بيت يا ژمارا ئه‌ڤرۆ يا ئاوێنه ئيشاره‌ت پێ دايى كو سه‌رۆكێ حوكمه‌تێ داخوازا هه‌لوه‌شاندنا ڤێ كابينێ ژ سه‌رۆكێ هه‌رێمێ بكه‌ت و ئه‌و دێ رازى بيت و پاشان دووباره ب حوكمه‌ته‌كا نوو يا ده‌مكى بۆ به‌رى هه‌لبژارتنان راسپێريت و ب ڤێ چه‌ندێ ژى دێ حوكمه‌ته‌كا بێ گۆڕان ئاڤا كه‌ت و پشكداريا كۆمه‌لێ ژى دێ د گۆمانێ دابيت.
ئه‌ڤرۆ نيوز، نيوار محه‌مه‌د سه‌ليم:
ب گۆره‌ى نڤيساره‌كا سه‌رۆكاتيا ديوانا جڤاتا وه‌زيران حوكمه‌تا هه‌رێما كوردستانێ هه‌موو قوتابيێن ئێزدى دێ بۆ زانكۆ و په‌يمانگه‌هێن هه‌رێما كوردستانێ هێنه ڤه‌گوهاستن.
ب گۆره‌يى نڤيساره‌كا سه‌رۆكاتيا ديوانا جڤاتا وه‌زيران ل جوكمه‌تا هه‌رێما كوردستانێ يا ژماره 6985 ل رێكه‌فتى 31ى ته‌باخا 2015ێ كو بۆئيمزا سه‌رۆكێ ديوانا جڤاتا وه‌زيران ل سه‌ره و بۆ وه‌زاره‌تا خواندنا بلند و ڤه‌كۆلينێن زانستى ره‌وانه كريه، ئاماژه ب وه‌رگرتنا قوتابيێن ئێزدى ل زانكۆيێن هه‌رێما كوردستانێ كريه.
د ڤێ نڤيسارێ دا ئاماژه ب وێ چه‌ندێ كريه كو ل سه‌ر بڕيارا سه‌رۆكێ حوكمه‌تا هه‌رێما كوردستانێ و ژ به‌ر ره‌وشا ب سه‌رێ كوردێن ئێزدى هاتين و ئه‌و ره‌وشا ئه‌و نوكه تێدا، ره‌وشا هه‌موو ئه‌و قوتابيێن زانكۆيێ مووسل و ناڤه‌راستا عيراقێ ژ وه‌رگرتن “استضافة” بهێته گوهۆڕين بۆ “نقل”.
ديسا بڕيار ژى دايه كو قوتابيێن ل زانكۆيێن ژ ده‌رڤه‌يى هه‌رێمێ هاتينه وه‌رگرتن بهێنه ڤه‌گوهاستن بۆ وان زانكۆيێن ناڤ هه‌رێمێ ب گۆره‌يى بسپۆريان.
ئەڤرۆ نیوز، لەزگین جۆقی:
سەرۆکێ کوتلا برایەتی و پێکڤەژیان ل جڤاتا پارێزگەھا نەینەوا بۆ ئەڤرۆ نیوز دیارکر کو شاندەکێ جڤاتا پارێزگەھا مووسل ب سەرۆکاتیا پارێزگارێ نوو یێ مووسل دێ ئەڤرۆ ١٣ی چریا ئێکێ سەرەدانا وەزیرێ بەرەڤانیا عیراقێ کەن بۆ گەنگەشەکرنی ل سەر پلانا رزگارکرنا پارێزگەھا مووسل.
سەیدۆ چەتۆ زێدەتر گۆت: “شاندێ مووسل چاڤ ب قونسلێ ئەمریکا کەفت و گەنگەشە ل سەر رزگارکرنا مووسل ھاتە کرن و دێ ژوورا ئوپەراسیونا رزگارکرنا مووسل ل مەخمور ھێتە دانان و چاڤەرێ شاندێ پارێزگەھا مووسلن، فشارێ بێخنە سەر حوکمەتا عیراقێ دا کو ھەڤکاریێ د گەل ھێزێن پێشمەرگەیێ کوردستانێ و حوکمەتا ھەرێمێ بکەن و دەست ب رزگارکرنا مووسل بھێتە کرن، چونکو خەلکێ مووسل زۆر یێ دلتەنگ بوویی.
ئه‌ڤرۆ نيوز:
شێخ جه‌عفه‌ر مسته‌فا فه‌رماندێ يه‌كا 70 يا پێشمه‌رگێ كوردستانێ د ديداره‌كێ دا بۆ باس به‌حس ل چه‌ند پرسێن گرنگ دكه‌ت و د ته‌وه‌ره‌كى دا به‌حس ل فه‌رمان و رۆلێ سه‌رۆك بارزانى دكه‌ت و دبێژيت: “ئه‌ڤرۆ د هه‌ر كاره‌كى دا يان هه‌ر بزاڤه‌ك و كرياره‌كا ل كوردستانێ دهێته كرن، يان هه‌ر به‌رنامه‌ك بهێته بجهئينان، دڤێت ب ره‌زامه‌نديا سه‌رۆكێ هه‌رێما كوردستانێ بيت، بێ فه‌رمانا سه‌رۆك بارزانى هێزێن هه‌ڤپه‌يمانان خوه فرۆكه‌كێ ژى بۆ مه بلند ناكه‌ن”.
ئه‌ڤى ئه‌ندامێ مه‌كته‌با سياسى يا ئێكه‌تى نشتيمانى كوردستان زێده‌تر گۆت: “هێزێن هه‌ڤپه‌يمانان بێ هه‌ڤكاريا بارزانى هاريكاريا هێزێن پێشمه‌رگه‌يى ژى ناكه‌ن. ژ به‌ر هندێ ژى هه‌موو فه‌رمانێن مه‌سعود بارزانى بجهـ دئينم و هه‌كه مه بڤێت به‌ره‌ڤانيێ ژ ئاخا كوردستانێ بكه‌ين و پارێزگاريێ ژ ڤێ هه‌رێمێ بكه‌ين، دڤێت فه‌رمانێن بارزانى بجهـ بينين”.
نيشاندان