ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كا فراكسيۆنا پارتى ل په‌رله‌مانێ كوردستانێ راگه‌هاند، بڕياره حه‌فتيا بهێت ل گه‌ل سه‌رۆكێن زانكۆيێن ئه‌هلى كۆم ببن و چه‌ند بابه‌ته‌كێن گرنگ گه‌نگه‌شه بكه‌ن، به‌لێ ژ به‌ر كاودانان دبيت پيچه‌ك بهێته پاشخستن
زۆزان سادق، ئه‌نداما په‌رله‌مانێ كوردستانێ ل سه‌ر فراكسيۆنا پارتى ديموكراتى كوردستان بۆ مالپه‌رێئه‌ڤرۆ نيوز گۆت: “بڕيار بوو حه‌فتيا بهێت ل گه‌ل سه‌رۆكێن زانكۆيێن ئه‌هلى كۆم ببن و چه‌ند بابه‌ته‌كێن گرنگ گه‌نگه‌شه بكه‌ن ژ وان ژى كێمكرنا 30% ژ قستێن خواندنێ و زێده‌كرنا عبورێ و قوتابى ب تنێ پارێ وان وانان بده‌ن يێن عبورى هه‌يى نه‌كو يێن ساله‌كێ، به‌لێ ژ به‌ر كاودانان هێشتا چ تشتێ مسوگه‌ر نينه كا دێ ل چ رۆژ بيت”.
ئه‌نداما لژنا په‌روه‌رده و خواندنا بلند و ڤه‌كۆلينێن زانستى ل په‌رله‌مانێ كوردستانێ زێده‌تر گۆت: “د دووماهى كۆمبوونا لژنێ دا، مه بڕيار دايه رۆژا دوشه‌مبيا بهێت مێڤانداريا سه‌رۆكێن هه‌موو زانكۆيێن ئه‌هلى ل هه‌رێما كوردستانێ و رێڤه‌به‌رێن گشتى يێن زانكۆيێ ئه‌هلى ل وه‌زاره‌تا خواندنا بلند و ڤه‌كۆلينێن زانستى بكه‌ين، حه‌فتيا پشت وێ ژى ل گه‌ل رێڤه‌به‌رێن گشتى يێن قوتابخانێن ئه‌هلى و دانوستاندنێ ل سه‌ر چه‌ندين پرسان كه‌ين ده‌رباره‌يى سيسته‌مێ خواندنا وان”.
ل دۆر گازيكرنا سه‌رۆكێن زانكۆيێن ئه‌هلى د. زۆزان گۆت: “دێ ب مه‌ره‌ما چه‌ند پرسان بيت كو د تايبه‌تن ب زانكۆيێن ئه‌هلى و يا ژ هه‌موويان گرنگتر ژى قستێن سالانه يێن خواندنێ نه كو ژ به‌ر ره‌وشا نوكه يا دارايى و كاودانێن وه‌لاتيان، دێ بزاڤێ كه‌ين هنده‌ك ژ قستێن خوه كێم بكه‌ن و هاريكاريا وه‌لاتيان بكه‌ن، وه‌زاره‌تا خواندنا بلند دبێژيت مه په‌يوه‌ندى ب پارێ وان ڤه نينه، ژ به‌ر هندێ ژى مه بڕيار دا ل گه‌ل سه‌رۆكێن زانكۆيێن ئه‌هلى كۆم ببين و بزاڤێ بكه‌ين بهايێ قستێن وان بينينه خوار”.
ئه‌نداما فراكسيۆنا پارتى ديموكراتى كوردستان ل په‌رله‌مانێ كوردستانێ گۆتژى: “مه بڕيار دايه پێشنيازه‌كێ پێش كێش بكه‌ين كو 30% ژ قستێن خوه بيننه خوار، هه‌كه دشيان و به‌رژه‌وه‌ندا وان دا بيت، چونكو ئه‌ڤه د به‌رژه‌وه‌نديا قوتابيان ژى دايه”.
ده‌رباره‌يى بابه‌تێ عبۆرێ ژى، ئه‌نداما لژنا په‌روه‌رده و خواندنا بلند و ڤه‌كۆلينێن زانستى ل په‌رله‌مانێ كوردستانێ، دا زانين كو ئه‌و دێ بزاڤێ كه‌ن ژ وانه‌كێ بكه‌نه دو يان ئه‌و مادێن عبۆر ب تنێ قوتابى پارێ وان وانان بده‌ن نه‌يێ سالێ هه‌موويێ.
نيشاندان
