ئەڤرۆ نیوز:
سەرکردەکێ کورد ئاشکراکر کو پلانەکا ئیرانی یا ھەی بۆ کونترۆلکرنا ھەردو باژێرێن کەرکووک و مووسل و ئەڤ پلانە ژ بزاڤا دەست ب سەرداگرتنا قەزا خورماتوو ل باشوورێ کەکووکێ دەستپێکر.
حەسەن یەزدان بەنا بەرپرسێ بالێ لەشکریێ پارتا ئازادیا کووردستانێ کو پارتەکا رۆژھەلاتا کوردستانێ یە دوھی سێشەمبی 16-11-2015 ێ بۆ رۆژناما (الشرق الاوسط) یا لەندەنی گوت” بزاڤا دەست ب سەرداگرتنا قەزا خورماتوو دەستپێکا بجھئینانا وێ پلانا ئیرانی بوو بۆ کونترۆلکرنا کەرکووکێ و مووسلێ، بەلێ ئازادکرنا باژێرێ شنگالێ ژلایێ ھێزێن پێشمەرگێ کوردستانێ ڤە ڕێ ل بەر ئیرانێ گرت”.
حەسەن یەزدان بەنا خویاکر ژی” ھژمارەکا فەرماندە و ئەفسەرێن ئیرانی یێن ب سەر (فەیلەق قودس) یێ گرێدای زێرەڤانێن شورشا ئیرانی، سەرپەرشتیێ دکەن ب شێوەکێ ئێکسەر ل سەر وان کریارێن ل قەزا خورماتوو ژلایێ میلیشیێن حەشد شەعبی یێن شیعی دژی کوردان دھێنە ئەنجامدان.
ناڤبری دیاکر کو فەیلەق قودس یێ ئیرانی 23 نیشانگرێن ئیرانی (قەناێ) یێن ل سەر بانێن ئاڤاھیان ل قەزا خورماتووی بەلاڤکرین کو ل ڤێ دووماھیێ گرژیەکا تمام د ناڤبەرا کوردان و میلیشیێن شیعی ل وێ قەزایێ یا پەیدابووی”.
ڤی سەرکردێ بالێ لەشکریێ حزبا ئازادیا کوردستانی ئاشکراکر ژی کو سەرکردێ دیار دناڤ فەیلەق قودس دا ب ناڤێ (ئاغایێ ئیقبالی) ل گەل دو مەزنە ئەفسەرێن فەیلەقا ناڤبری کو ئێک ژوان ناڤێ وی (فەرھادی) یە، ل رۆژا ئەینیا بۆری 13-11-2015 ێ یێن ھاتینە عیراقێ ب ڕێیا فرۆکخانا بەغدا یا نێڤدەولەتی و پاشی ئێکسەر یێن ھاتینە ڤەگوھاستن بۆ قەزا خورماتوو ژبۆ سەرپەرشتیا ئۆپەراسیۆنان ل وێ دەڤەرێ”.

ئەڤرۆ نیوز، ئەیاد بەرواری:
پەیڤدارێ ھەڤپەیمانیا نێڤدەولەتی دژی داعشێ ئامارا کوشتیێن رێکخستیا داعش یا تیرۆرستی ژ ئەنجامێن ھێرشێن ئەسمانی د دەمێ پتر ژ سالەکێ دا ئاشکراکرن.
ستیف وارن پەیڤدارێ ھەڤپەیمانیا نێڤدەولەتی دژی داعشێ د دخۆیانیەکێ دا بۆ رۆژنامەڤانان ل بەغدا گوت” ھزار چەکدارێن داعشێ ل عیراقێ ژ ئەنجامێ ھێرشێن ئەسمانی ھەر ژ مەھا تەباخا 2014 ێ و ھەتا نوکە یێن ھاتینە کوشتن”.
گوت ژی” 50% ژ ھێرشێن ئەسمانی باژێرێ رومادی سەنتەرێ پارێزگەھا ئەنبارێ ل رۆژئاڤایێ عیراقێ، کریە ئارمانج” گوت ژی” ئەم ل دەستپێکێ چاڤەڕێی ئازادکرنا ئەنبارێ نە و پاشی (رەقە) پایتەختێ دەولەتا ئیسلامی ( داعش) ل سووریێ”.

ئەڤرۆ نیوز، ئەیاد بەرواری:
شارەزایەکێ ئەمنی یێ عیراقی ئاشکراکر کو (لەشکرێ ئیسلامیێ نھێنی ل ئورۆپا) ئەوێ ژلایێ سەرکردێ رێکخستیا داعشێ، تیرۆرست (ئەبو بەکر بەغدادی) ڤە ھاتیە پێکئینان، بەرپرسیارە ژ ئەنجامدانا ھێرشێن تیرۆرستی ل پاریس پایتەختێ فرەنسا و دیارکر کو ئەنجامدەرێن وان ھێرشان ل مووسلێ یێن ھاتینە مەشقدان.
حەمزە ئەبولسوف شارەزایێ ئەمنیێ عیراقی ل دووڤ (الاتجاە پرێس) راگەھاند ” ئەوێن ھێرشێن پاریس ئەنجامداین ئەندامێن لەشکرێ ئیسلامیێ نھێنی ل ئورۆپا نە کو ل مووسلێ ھاتیە پێکئینان”.
خویاکر ژی” ئەندامێن لەشکرێ ناڤبری یێن ھاتینە ھنارتن بۆ ئورۆپا ل گەل پەنابەرێن ژ سووریێ و عیراقێ و ھندەک وەلاتێن رۆژھەلاتا ناڤین بەر ب ئورۆپا ڤە چووین” و گوت ژی” ب سەدان ئەندامێن ڤی لەشکری ل ئورۆپا یێن ھەین ب تایبەتی ل بریتانیا و فرەنسا و سوید و ئیسپانیا و ئەلمانیا”.
گوت ژی” ئەو تیرۆرستێن ھێرشێن پاریس ئەنجامداین، ل مووسل یێن ھاتینە مەشقدان و ھەتا نوکە ژی ب دەھان ژوان تیرۆرستان یێن ل فرەنسا بەلاڤ بووین و ھەوالگیریا فرەنسی نەشێت بگەھیتە وان، چونکی ھەموو ھەلگرێن رەگەزناما فرەنسی نە”.
ئەڤ شارەزایێ ئەمنیێ عیراقی پێشبینیا ئەنجامدانا ھێرشێن تیرۆرستی یێن خویناوی ل باژێرێن ئورۆپی دکەت سەرەرای ھەبوونا پێرابوونین ئەمنی ل وەلاتێن ئورۆپی.