ئه‌ڤرۆ نیوز:
ده‌رباز محه‌مه‌د وه‌زیرێ كوچ و كوچبه‌رێن عیراقێ د وێ باوه‌رێ دایه كو عه‌بادى پێشمه‌رگه‌ى ب پشكه‌ك ژ هێزێن عیراقێ نزانیت.
وه‌زیرێ كوچ و كوچبه‌رێن عیراقێ زێده‌تر گوت: عه‌بادى ل نه‌ته‌وێن یه‌كگرتى گوتاره‌ك پێشكێش كر و سوپاسیا هه‌موو وه‌لاتێن جیهانى كر د هاریكاریا وان د شه‌رێ داعشدا، به‌لێ به‌حسێ پێشمه‌رگه‌ى نه‌كر كو ئه‌ڤ چه‌نده وێ یه‌كێ دیار دكه‌ت كو عه‌بادى پێشمه‌رگه‌ى ب پشكه‌ك ژ هێزێن عیراقێ نزانیت و ئه‌ڤه سیاسه‌تا سه‌رۆك وه‌زیرانه چونكه وى ب خو گوتارا خوه یا دارێشتى.
ئه‌ڤرۆ نیوز:
له‌یلا زانا سیاسه‌تمه‌دارێ كورد راگه‌هاند” ئه‌ردوگان و ئاك پارى ل وان جهێن هه‌ده‌پێ گه‌له‌ك ده‌نگ بده‌ستڤه ئیناین، وه‌لاتیێن مه‌ده‌نى یێن كوشتى، ل ئێكێ چریا دوێ، ب ده‌نگى دێ به‌رسڤا وێ زورلما وان ده‌ین و جاره‌كادى دێ شكه‌ستنێ ب ئه‌ردوگان و حزبا وى ئینین.
هه‌ده‌پێ د راگه‌هاندنه‌كێ دیاركریه كو حكومه‌تا ئاكه‌پێ ب رێیا گرتنا رێڤه‌به‌ر و ئه‌ندامێن پارتا وان، دخوازیت وان ژ هه‌لمه‌تا هه‌لبژارتنان سار بكه‌ت.
ئەڤرۆ نیوز، بارزان مزووری:
ئێك ژ فه‌رماندێ هێزێن پێشمه‌رگه‌يى دياركر كو رزگارکرنا مووسل بریارەکا سیاسی یە نە بریارا بەرپرسێن له‌شكرىه وێ بریارێ بدەن، یا ب ئەمریکاڤە گرێدایە، ئەگەر پێشمەرگە پشكدار ژی بیت دێ ب مەرج پشكدارى رزگارکرنا مووسل کەت.
لیوا وەحید کوڤلی، فه‌رماندێ هێزێن پێشمه‌رگه‌ى ل میحوەرێ تلسقوف بۆ ئه‌ڤرۆ نيوز گۆت: “ھندی مووسل د دەستێن داعش دا بیت دێ مەترسی ل سەر ھەرێمێ بیت ل دووڤ بۆچوونا من کونترۆلکرنا باژێرێ مووسل ژ لایێ داعش ڤە یاریەکا نێڤدەولەتی بوو، ژڤان ھەموو باژێران مووسل ئا خستيە د دەستێن داعش دا چونکو مووسل دکەڤیتە سنورێ سوریا و تورکیا و ھەرێما کوردستانێ”، دا زانين كو باژێرێن ب گرنگ ب خوه ڤە دگریت، لەوا خستیە د دەستێن داعش دا”.
ناڤبری ل دۆر مەترسیا وان گوندێن ل پشت سەنگەرێن پێشمەرگەی دا زانين کو 24 گوندێن عەشیرەتا حەدیدیا ئەوێن ل پشت سەنگەرێن پێشمەرگەی مەترسيترین تشتە بۆ پێشمەرگەی و گۆت: “مه‌ترسيا وان بۆ سه‌ر پێشمه‌رگه‌يى ژ يا داعش زێده‌تره”.
ئەڤرۆ نیوز، سالار دۆسکی:
سەرۆکێ لژنا نەزاھێ ل پەرلەمانێ کوردستانێ کو ژ فراکسیۆنا ئێکگرتوویا ئیسلامی یا کوردسستانێ یە، پێشتر ئاشکرا کر بوو کو وى ئەندامەتیا خوە راگرت وەک ھەلویست دژی نە نێزیک بوونا پارتێن سیاسی، به‌لێ ل رێکەفتی ٣٠-٩-٢٠١٥ عومەر کوچەر سەرۆکێ لژنا نەزاھێ ل سەرپەرشتیا کومبوونەکا لژنا ناڤبری کر.
عومەر کوچەر ھەمبەر شکاندنا ڤی ھەلویستی بۆ ئەڤرۆ نیۆز گۆت: سەرۆکێ لژنەکا گرنگا پەرلەمانێ کوردستانێ مە و گەلەک کێشە و ئاریشێن خەلکی د دەستێ مە دانە و دڤێت بھێنە چارەسەرکرن و ھەر ھەلویستێ مە ژی یێ جاران بۆ ھندێ بوویە پارتێن کوردی بەر ب سازانێ و کومبوونێ بچن و ئەڤە ژی ھەر بۆ خەلکی بوویە.
کوچەری گۆت ژی: ئەگەر بۆ دانا پارێزگەرەکی شەش ھەیڤ پێڤە بچن و پێکئینانا حوکمەتێ سالەک پێڤە بچیت، ئایا دانانا سەرۆکی دێ چەند پێڤەچیت؟
ئه‌ڤرۆ نيوز، ئه‌ياد به‌روارى:
ئەندامەکێ کورد ل پەرلەمانێ عیراقێ راگەھاند، چەندین پۆستێن کوردان ل بەغدا یێن ھاتینە ھەلوەشاندن و ھندەک ژوان ژی پۆستێن گرنگن کو ئێک ژوان جێگرێ سەرۆکێ کۆماری بوو.
شوان داودی ئەندامێ کورد ل پەرلەمانێ عیراقێ بۆ باسنیۆز گوت” ل سەر لیستا نیشتمانی یا عیراقی ب سەرۆکاتیا ئەیاد عەلاوی سێ کورد یێن ھەین کو ھەرسێ برایێن ئێکن و دو ژوان ئەندامێن پەرلەمانێ عیراقێ نە و یێ سیێ ب ناڤێ (مەلاس محەمەد عەبدولکەریم) وەزیرێ بازرگانیا عیراقێ یە کو ل سەر نڤیسارەکا (مەھدی عەلاق) رێڤەبەرێ نڤیسینگەھا حەیدەر عەبادی سەرۆک وەزیرێن عیراقێ، داخواز ژ وەزیرێ کار و کاروبارێن کومەلایەتی یێ عیراقێ ھاتە کرن کاروبارێن وەزارەتا بازرگانی ب رێڤەببەت”.
گوت ژی” کوردان دو وەزیر د چاکسازیێن عەبادی دا ژ دەست دان، ئەوژی وەزیرێ دەولەتێ کو ب سەر کۆمەلا ئیسلامی ڤەبوو و وەزیرێ کاروبارێن ژنان کو ب سەر ئێکگرتووی ئیسلامی ڤەبوو و وەزارەت ژی ھاتە ھەلوەشاندن، دیسا عەبادی ھندەک وەزارەتێن شیعان و سونان ژی ھەلوەشاندن و ھەتا نوکو فراکسیۆنێن کوردی چو ھەلویستەکێ فەرمی نەبوو”.
ئەڤرۆ نیۆز، قائید میرۆ:
فەرماندەکێ پێشمەرگەی بەحسێ ژیانا شەڤا بۆریا پێشمەرگەی دکەت و ئیماژە بڤێ چەندێ دکەت، سەرەرای توز بارین و ھڕو بایەکێ بھێز داعش و دیپشکا ھێرشی سەر پێشمەرگەی دکر.
موقەدەم حسێن عەبدولا، فەرماندێ پێشمەرگەی ل میحوەرێ گوێڕ ب ئەڤرۆ نیۆز راگەھاند” شەڤا بۆری ب ئەگەرێ ئەڤێ پێلا توزبارینێ و ھڕوبای رەوشا پێشمەرگەی زۆر یا خراپبوو، چونکە ب ھەر شێوەیەکێ بیت نابیت پێشمەرگە سەنگەرا بەردەت، لەوڕا مە شەڤەکا نەخوەش دەربازکر، بەلێ سەرەرای ڤێ چەندێ ژی پێشمەرگە یێ بەرھەڤە د نەخوەشترین کاوداندا بەڕەڤانیێ بکەت.
موقەدەم حسێنی گۆتژی” دگەل ھاتنا ھڕوبای چەکدارێن داعش ب چەکێن گران ھێرشی سەر ھێزێن پێشمەرگەی دکر، بەلێ پێشمەرگەی ب توندی بەرسیڤا واندا و چو زیان نەبوون، ئەڤە دەمەکیدایە رەوشا سەقای یا دژواربوو ھەتا دیپشکاژی ھێرشی سەر پێشمەرگەی دکر.
ئەڤرۆنیۆز، سالار دۆسکی:
ئەندامەکێ پەرلەمانێ کوردستانێ ژ لیستا زەر د پەیجێ خوەیێ تایبەتێ فەیسبووکی دا ئاماژە ب شەرەکێ گەرم کریە ل رۆژھەلاتا ناڤین و تایبەت وەلاتێن عیراق و سووریێ.
دلشاد شەعیان غەفار، ئەندامێ پەرلەمانێ کوردستانێ، دپەیجێ خوە دا گۆتیە ب ھاتنا رۆسیا بۆ سوریێ ئێدی ھەر تشتەک ئاشکرابوو، شەرێ جەمسەرێ رۆسیا و ئەمریکا ژ ساریێ بەر ب گەرمیێ دچیت و شەرێ ھەر دو جەمسەران ل سەر ھەڤپیەمانێن وانە.
دلشادی ئاماژەکریە وێ چەندێ ژی کو ل گەل دەسپێکرنا ئەڤی شەری، دڤێت کومبوونێن پێنچ قولی ب دووماھی بھێن، ئەگەر ھەبن ژی دڤیت خەلک چاڤەرێ نەکەت و ب بریارا گەلی دڤێت ئێدی بتنێ مەسعود بارزانی ب سەرۆک بزانین ھەتا ئەڤ شەرە ب دووماھی بھێت، چونکە دناڤبەرا ئەڤان ھەر دو شەران دا مە کوردان پێدڤی ب کەسەکێ خودان ھزر و شارەزا و دبلومات و لەشکەری ھەیە بۆ مفا وەرگرتن ژ گوھۆرینێن پێشبینی دھێتەکرن، چونکە ھەر شاشیەکا بھێتەکرن ل سەر ئاستێ سەرکرداتیا کوردی دێ باجا وێ پاشەرۆژێ زەرەمەند بین.
ئەڤرۆ نیۆز، قائید میرۆ
بڕیاردەرێ لیژنا ئاسایش و بەڕەڤانیا پەرلەمانێ عێراقێ ئاشکراکر، د کۆمبوونا ئەڤرۆیا پەرلەمانێ عێراقێ دا دێ پرسیار لدۆر گیرۆبوونا ئازادکرنا مووسل ل وەزیرێ بەڕەڤانیێ ھێنەکرن.
شاخەوان عەبدولا، بڕیاردەرێ لیژنا ئاسایش و بەڕەڤانیێ ب ئەڤرۆ نیۆز راگەھاند” دەمژمێر ١١ پەرلەمانێ عێراقێ دەست ب رۆنشتنا خوە یا ئاسایی کریە و بڕیارە د کۆمبوونا ئەڤرۆدا خالید عوبێدی وەزیرێ بەڕەڤانیا عێراقێ بەرھەڤبیت ئەوژی ژبۆی گەنگەشەکرنا رەوشا ئەمنی و پاشکەتنا ئۆپەڕاسیۆنا ئازادکرنا مووسل”.
شاخەوانی دیارکر” ژبلی پرسا ئەمنی دێ دانوستان لدۆر پلانا وەزارەتا دارایی و ئابوری ژبۆی بەرھەڤکرنا پڕۆژە قانوونا بودجێ گشتیێ عێراقێ یێ ٢٠١٦ێ ھێنەکرن.
ئەڤرۆ نیوز، ئەیاد بەرواری
بالیۆزێ ئەمریکی ل بەغدا، ستیوارت جونز، ھەبوونا ب ھزاران شیرەتکارێن ب سەر ھەڤپەیمانیا نێڤدەولەتی ڤە ل عیراقێ ئاشکراکر.
ستوارت جونز د کونگرەکێ رۆژنامەڤانی دا ل بارەگایێ بالیۆزخانا ئەمریکی ل بەغدا گوت” پێنج ھزار شیرەتکارێن لەشکری ژ ھەڤپەیمانیا نێڤدەولەتی یێن نوکە ل عیراقێ کاردکەن و ئەڤە بەلگەیە ل سەر بەردەوامبوونا ئەمریکا و ھەڤپەیمانیێ ل سەر لێدانا داعشێ و سەرکردێن وێ”.
بالیۆزێ ئەمریکی ل عیراقێ دیارکر ژی کو وەلاتێ وی ل رۆژا چار شەمبیا بۆری راگەھاندیە کو دێ ٥٦ ملیۆن دۆلاران پێشکەش کەت ژبۆ پشتەڤانیا کاروبارێن مروڤایەتی ل عیراقێ کو ب ڤێ چەندێ گوژمێ ھاریکاریێن دراڤی یێن ھاتینە پێشکەشکرن بۆ عیراقێ ژ ٢٠١٤ و ھەتا نوکە دگەھیتە ٥٣٤ ملیۆن دۆلار.
ژلایێ خوەڤە ستیف وارن، پەیڤدارێ فەرمی ب ناڤێ ھەڤپەیمانیا نێڤدەولەتی ب سەرکێشیا ئەمریکا دژی داعشێ، د وی کونگرێ رۆژنامەڤانی دا دوپاتکر کو ھەڤپەیمانیێ چو ئۆپەراسیۆنێن لەشکری ل سەر ئاخا عیراقێ نەکرینە ژبلی پشکداریێ ب تۆبخانێ ب ھەڤکاری ل گەل لایەنێ عیراقی.
وارنی دیارکر ژی” ھەتا نوکە مە ٤٥٨٣ ھێرشێن ئەسمانی دژی داعشێ ل عیراقێ ئەنجامداینە، ژوان ٣٥٠٠ ھێرش ژلایێ فرۆکێن ئەمریکی ڤە ھاتینە ئەنجامدان و مە ١٥ ھزار ژ ھێزێن ئەمنی یێن عیراقێ یێن مەشقداین و ٤٥٠ ترومبێلێن لەشکری یێن تایبەت ب ئاشکراکرنا بۆمبێن چاندی و ٢٠٠ موشەک ژ جۆرێ ھێلفایەر پێشکەشێ عیراقی کرینە”.
ڤی بەرپرسێ لەشکریێ ئەمریکی ئاشکراکر ژی کو ئەمریکا پشتەڤانی پێشکەشێ ھێزێن عیراقی کریە ب بھایێ دو ملیار و ٣٠٠ ملیۆن دۆلاران.
نيشاندان