ئەڤرۆ نيوز:
وەزارەتا بازرگانیا ھەرێمێ راگەھاند:پاوانکرنا ئینانا ترۆمبێلێن تاکسی ژلایێ چەند کۆمپانی یەکێن تایبەتڤە ب دوماھی ھات و ژنھا پێدا تەڤایا بازرگانان دشێن تەکسیان بینە ھەرێما کوردستانێ.
بەریا نھا ل ھەرێما کوردستانێ سێ کۆمپانیان مۆلەتا ئینانا ترۆمبێلێن تەکسیان ھەبوون،لێ وەزارەتا بازرگانیا توخیبدارکرنێ ب پاوانکرن دھاتە وەسفکرن،ئەو بریار ھاتە ھەلوەشاندن.
سامال سەردار وەزیرێ بازرگانی و پیشەسازی یا حوکمەتا ھەرێما کوردستانێ راگەھاند:دەستەیەکا تایبەت ل وەزارەتێ ھەیە ل کۆمبوونا خوە بریار دا رێگریێ ژ پاوانکرنا ئینانا ترۆمبێلێن تەکسی بگریت.
ناڤبری ئەو چەندە ژی گۆت:بتنێ کۆمپانیەکا توخیبدار ژ وی کاری مفا بەخش بوون،ژبەرکو بریار ھاتە دان ھەر کسەکێ نیازا ئینانا تەکسیان ھەیە بلا بینیت دشێت داخازیەکێ پێشکێشی وەزارەتا بازرگانیێ بکەت و تەکسیان بینیت.
وەزیرێ بازرگانی و پیشەسازیا ھەرێمێ دیارکر پێدانا مولەتێ وەزارەتا بازرگانی یە ددەت و بیاڤێن گومرکی و کەوالیتا کونترۆلی ژلایێ وەزارەتا پلان و نافخو دھێتە ئیکلایکرن بۆ ئینانا ترۆمبێلێن تەکسی .
ئه‌ڤرۆ نیوز، هشیار دوبانكى:
پشتى دوهى ئێڤارى ل بازارێ زاخو ته‌قه ل دو ژنان هاتیه كرن و ژنه‌كێ گیانێ خوه ژ ده‌ستداى، نه‌شئه‌ت سلێمان به‌رپرسێ راگه‌هاندنا پۆلیسێن زاخۆ بۆ ئه‌ڤرۆ نیوز دیاركر كو بریار بۆ گرتنا تاوانبارى هاتیه ده‌ركرن و هێش نه‌هاتیه گرتن و گۆت” ئه‌ڤ روودانه سه‌را كێشه‌كا جڤاكى بوویه”.
د ڤێ روودانێ دا ژنه‌ك ب ناڤێ د.د.ی، د ته‌مه‌نێ 32 سالیێ دا ژ ئه‌نجامێ ته‌قه‌كرنێ گیانێ خوه ژ ده‌ستدا و ژنا دى د ته‌مه‌نێ 30 سالیێ دا ب ناڤێ ك أ س هاته برینداركرن ژ ئالیێ تومه‌تبار أ س ى و هه‌ردو ئافره‌ت هه‌ویێن ئێك بوون.
ئه‌ڤرۆ نيوز:
ھژمارەک مامۆستایێن زانکۆیێ و چاڤدێرێن سیاسی ل رۆژھەلاتێ کوردستانێ دیار کرن کو پشتی رێککەڤتنا ئیرانێ ل گەل وەلاتێن زلھێز ئەو وەلاتێن رۆژئاڤایی کو ھەتا دوھی بەحسێ مافێ کوردان ل ئیرانێ دکرن ئەڤرۆکە خوە بێدەنگ کرینە و پەیوەندیێن خوە ل گەل کۆمارا ئیسلامی بەر ب پێشڤە دبەن و ھەکە پارتێن کوردی ل رۆژھەلات بلەز دەست ب قۆناغەکا نوو یا خەباتێ نەکەن دێ مەترسیێن مەزن ل سەر وێ پارچەیا کوردستانێ دروست بن.
د. کامیران مەتین مامۆستایێ زانکۆیێ ل وەلاتێ بریتانیا د داخۆیانیەکێ دا بۆ رۆژناما ئەڤرۆ دیار کر کو نھا سیاسەت ل جیھانێ ب گشتی وەک بەرێ ناھێتە کرن و گوھۆرینێن گەلەک مەزن د چەند سالێن بۆری دا روو دان، ژ بەر ھندێ ژی وەلاتێن زلھێز وەک ئەمریکا و وەلاتێن ئورۆپی ل گۆر سیستەمێ نوو بزاڤێ دکەن کو بەرژەوەندیێن خوە بپارێزن و رێککەڤتنا کو د ناڤبەرا ئیرانێ ل گەل وەلاتێن زلھێز بەری دەمەکێ ھاتیە ئیمزا کرن ژی بۆ پاراستنا بەرژەندیێن ھەر دو ئالیان ھاتە کرن و گۆت: (ئیرانێ بالیۆزخانا خوە ل بریتانیا ڤەکر و بریارە چەند رۆژێن دی بالیۆزخانا بریتانیا ژی ل ئیرانێ بھێتە ڤەکرن و گەلەک وەلاتێن دیتر ژی یێ بزاڤان دکەن کو د بیاڤێ ئابووری و سیاسی دا پەیوەندیێن خوە ل گەل کۆمارا ئیسلامی باش بکەن و کۆمارا ئیسلامی یا ئیرانێ ژی دەست ب ھەوەکا مەزن یا پشتەڤانیا نێڤدەولەتی بۆ خوە کریە و د دەمەکێ وەسا دا گەلەک تشت ھاتینە پشتگوە ھاڤێتن کو بێگومان یەک ژ وان پرسێن سەرەکی ژی پرسا گەلێ کوردە ل ئیرانێ).
ناڤھاتی د بەردەوامیا ئاخڤتنا خوە دا ئەو یەک ژی راگەھاند کو دڤێت گوھۆرینەکا مەزن د شێوەیێ خەباتا پارتێن سیاسی دا ل رۆژھەلاتێ کوردستانێ بھێتە کرن و بەری ھەر تشتەکێ ل رۆژھەلاتێ کوردستانێ دڤێت ئیرادەیەکا ب ھێز یا سیاسی دروست ببیت، ژ بەر ھندێ ژی دھێتە خواستن کو ھەموو پارتێن رۆژھەلاتێ کوردستانێ بلەز بەرەیەکێ ھەڤپشک دروست بکەن و پێکڤە ل سەر ستراتیژیەکا نەتەوی یا ھەڤپشک کار بکەن و ئێدی وەک سالێن بۆری دەستان ژ دژبەراتیا ھەڤدو بەردەن، چونکو وێ یەکێ ژ بلی زیانێ چو مفایەک نەگەھاندیە رۆژھەلاتێ کوردستانێ.
ل ئالیێ دی حامد رەحمانی چاڤدێرێ سیاسی یێ رۆژھەلاتێ کوردستانێ ژی راگەھاند کو پارتێن رۆژھەلاتێ کوردستانێ د بیست سالێن بۆری دا شاشیێن گەلەک مەزن کرن، ئەو چاڤەرێ ھندێ بوون کو ئەمریکا و ئیسرائیل ھێرشی ئیرانێ بکەن دا ئەو بشێن مفایەکێ باش ژ وی شەری ببینن و ھندەک تشتان بکەن، لێ ئەو یەک نەھاتە کرن و پشتی رێککەڤتنا ئیرانێ و وەلاتێن زلھێز ئێدی زەحمەتە کو ھێرشی ئیرانێ بھێتە کرن و ژ بەر ھندێ ژی نھا دھێتە خواستن کو پارتێن رۆژھەلات گرنگیێ بدەنە شیانێن خوە و دەست ب خەباتا خوە د رۆژھەلاتێ کوردستانێ دا بکەن و گۆت: (کاریگەریا پارچێن دی یێن کوردستانێ و پێشڤەچوونێن کو رۆژانە روو ددەن کاریگەریەکا گەلەک باش ل رۆژھەلاتێ کوردستانێ کریە، لێ مخابن خەلکێ مە بێ خودان مایە و پارتێن سیاسی ژی ل خەلکێ دوور کەڤتینە و نھا داخوازیێن پارتێن سیاسی یە و خەلکێ مە ژ ھەڤدو د دوورن و ئەڤە ژی ژ ئەنجاما وێ دووربوونا پارتێن سیاسی ژ خەلکی ھاتیە پێش و دڤێت ئەو یەک ب دووماھی بھێت و پارتێن سیاسی یێن رۆژھەلاتێ کوردستانێ ل سەر بنەمایێ داخوازیێن خەلکی دەست ب ستراتیژیەکا نوو بۆ خەباتێ بکەن).
ئه‌ڤرۆ نيوز:
حوکمەتا بەروەخت یا تورکیا ب رەنگەکی دژوار ئۆپەراسیۆنێن سەربازی و سیاسی ل دژی گەلێ کورد برێڤە دبەت و د ناڤا ھەیڤەکی دا ١٩٨٠ وەلاتیێن کورد کو پرانیا وان سیاسەتمەدار و کەسێن ھەلبژارتینە ھاتنە دەستەسەر کرن و زۆرداریا ل سەر باژێر و گوندێن کوردان ژی زێدە بوویە و ھندەک کۆنترۆلا باژێرک و گوندان د بن کۆنترۆلا گەریلا دایە.
د ڤێ دەربارێ دا فارۆق چەلیک پەیڤدارێ حوکمەتا تورکیا د داخۆیانیەکی دا راگەھاند کو PKK و پارتیا دیموکراتی یا گەلان خەلکێ بۆ کارێن تیرۆرستی ھان ددەت و گۆت: (وان گەلەک بزاڤ کرینە کو پرسگرێکێن وەلاتی ب دیالۆگێ و ئاشتیێ چارە بکەن لێ PKK و HDP ھەم قۆناغا ئاشتیێ ژناڤ برینە و ھەم ژی ب تەمامی ل دژی ئاشتیێ نە و ئەز باوەر دکەم د ھەلبژارتنێن پێشوەخت دا گەلێ کورد و تورک دێ بەرسڤەکا دژوار دەتە وان ژ بەر کو گەلێ تورک و گەلێ کورد شەری ناخوازن و روویێ راست یێن HDP و PKK بۆ وان ئاشکرا بوویە).
فارۆق چەلیک ھەروەسا راگەھاند ژی کو دادگەە ب رەنگەکی سەربخوە کارێن خوە دکەن و چ کەس ل دژی قانوونان کار بکەت و خەلکێ بۆ ئەنجامدانا کارێن تیرۆرستی ھان بدەت مافێ دادگەھێیە وان کەسان سزا بدەت و گۆت: (ئەم ھیڤیدارین HDP ڤەگەریتە سەر سیاسەتێ و دەست ژ کارێن کرێت بەردەت و فشارێ بێخیتە سەر PKK دا کو دەستان ژ چەکی بەردەن و ژ ئاخا تورکیا دەرکەڤن، ھەکە وەسا بکەن ئەز ب باوەرم دێ قۆناغا ئاشتیێ جارەکا دی دەستپێ کەت و بەر ب سەرکەڤتنێ ڤە چیت).
ل ھەمبەر ئاخڤتنێن فارۆق چەلیکی ، ئیدریس بالوکەن جێگرێ سەرۆکێ کۆما HDP ل پەرلەمانێ تورکیا ژی راگەھاند کو حوکمەتا نھا یا تورکیا ل گەل سەرۆک کۆمار ئەردۆگانی وەلاتی بەر ب شەرەکی دژوار ڤە دبەن و ئەڤ شەرە پاشەرۆژا تورکیا تاری دکەت و گۆت: (ئەم جارەکا دی دبێژین بلا کەسێن بێ ئالی و جڤاکێ نێڤدەولەتی نوونەرێن خوە بشینن و وەرنە باکورێ کوردستانێ و تورکیا و ئەم پێکڤە ل سەر قۆناغێ کار بکەین و ھەموو بەلگەیێن ل ئیمرالیێ بەلگەیێن ھەڤدیتن و دانوستاندنێن د ناڤبەرا حوکمەت، دەولەت و ئۆجەلانی و پارتا مە دا ھەموو نھا ھەنە و کێ چ سۆزەکی دایە ھەموو د ئاشکرا نە، لێ ھەتا نھا حوکمەت و دەولەت بەرسڤا داخوازیێن مە نادەن).
ئیدریس بالوکەن ھەروەسا راگەھاند ژی وان ب دەھان جار داخوازا راوەستاندنا شەری ژ PKK و دەولەتێ کرینە لێ ھەتا نھا ئالیێ دەولەتێ بەرسڤەکا ئەرەنی نە دایە و گۆت: (سەرۆکاتیا KCK بەرسڤا داخۆیانی و داخوازا مە یا راوەستاندنا شەری دا لێ حوکمەتێ ھەتا نھا بەرسڤا مە نە دایە و شەری دژوار دکەت و سەرۆک کۆمار و سەرۆکێ وەزیران رۆژانە دەردکەڤنە مەیدانان و خوە ب کوشتنا لاوێن کورد سەربلند دبینن و سیاسەتێ ل سەر خوینا سەربازێن تورکیا دکەن).
ل ئالیێ دی شاندێ ئاشتیێ یێ کو ژ ئالیێ مرۆڤێن ئاقلمەند، رۆژنامەڤان، سیاسەتمەدار، رەوشەنبیر و نوونەرێن سازیێن جڤاکێ سڤیل ڤە ھاتیە ئاڤاکرن، خەباتا خوە یا بۆ راوەستاندنا شەری بەرفرەە دکەت و د ڤێ چارچۆڤێ دا شاندێ ئاشتیێ ل گەل سەلاحەدین دەمیرتاش ھەڤسەرۆکێ HDP روونشتنەک سازکر و داخوازا ھەڤدیتنێ ژ کەمال کلچدار ئوگلۆ سەرۆکێ پارتا کۆماریا گەل CHP و سەرۆک وەزیران ژی کرینە.
ھەروەسا شاندێ ئاشتیێ بەرنامەکێ بەرفرەە دارێتیە و د بەرنامێ دا سازکرنا کۆمبوونان ل ٤٠ باژێرێن تورکیا ھەیە و دخوازیت ب ڤان کۆمبوونان خەلکی ل ھەمبەر شەری و ئەنجامێن وێ ئاگەھدار بکەت.
ئه‌ڤرۆ نيوز:
سیایەتمەداەکێ عیراقێ پێشبینیا وێ چەندێ دکەت سەرۆک وەزیرێن عیراقێ حەیدەر عەبادی نەشێت بەردەوام بیت ل سەر ئەنجامدانا چاکسازیان و دێ دەست ژ کاری بکێشیت.
عزەت شابەندەر، ل دووڤ عیراق پرێس گوت” عەبادی شاشیەکا مەزن کر دەمێ وەزارەت کێم کرین و بەر ب تاکرەویێ د دەستھەلاتێ دا یێ دچیت و راوێژ ل گەل کەسەکێ ژی نەکر د پرسا لادانا جێگرێن سەرۆک کۆماری و جێگرێن سەرۆک وەزیران و ھەلوەشاندنا ھندەک وەزارەتان و گرێدانا وان ب ھندەک وەزارەتێن دی ڤە”.
شابەندەری گوت ژی” کێمکرنا وەزارەتان پاداشتکرنا گەندەل و دزیکەرێن مەزنە”.
ئه‌ڤرۆ نيوز:
ئەندامەکێ پەرلەمانێ عیراقێ ل سەر لیستا ئێکگرتوو ئیسلامی راگەھاند، کێشێن ناڤخوەیی د ناڤبەرا لایەنێن سیاسی دا ل ھەرێما کوردستانێ کاریگەریا کریە سەر پەرلەمانتارێن کورد ل بەغدا و ژ بەر وان کێشێن ناڤخوەیێ، وان حزبان ئاگەە ژ بەغدا نەمایە.
عادل نوری بۆ رووداو گوت” ژبەر مژوولبوونا لایەنێن سیاسی ب کێشێن ناڤخوەیی ڤە، کەسێ ئاگەە ژ بەغدا نەمایە، ھەتا نوکە ل سەر وان چاکسازیێن عەبادی کرین و زیانێن ب بەھرا کوردان کەفتین ژ ئەنجامێ وان چاکسازیان، بەلکو ھەتا کۆمبوونێن د ناڤبەرا نوونەرێن کورد ل بەغدا نەھاتینە کرن”.
ژ ئەگەرێ چاکسازیێن عەبادی، کوردان چەندین پۆست ل بەغدا ژدەستداینە وەکو جێگرێ سەرۆک وەزیران، وەزیرێ دەولەتێ بۆ کاروبارێن ژنان و وەزیرەکێ دەولەتێ.
ئەڤرۆ نیوز:
مالپەرێ فەرمیێ پارتی دیموکراتی کوردستان د سەر گۆتارەکا خوەدا دیارکر کو نەوشیروان موستەفا رێکخەرێ گشتیێ بزاڤا گۆڕان دڤێت ئێکەتیێ زێدەتر بچووک بکەت.
مالپەرێ پارتی د وێ سەرگۆتارێ دا دبێژیت” شەڕێ خوەکوژیێ قۆناغەکا تاری و تال بوو و ھندەک شوونوارێن سیاسی و جڤاکی ھەتا نوکە ژی یێن ماین، خوەشبەختانە ئەڤ قۆناغا نەخوەش ب دووماھی ھات و ب رێککەفتنا ئاشتیێ د ناڤبەرا پارتی و ئێکەتیێ دا و پاشی رێککەفتنا ستراتیژی و کارێ پێکڤە، دەستکەفتێن گەلەک مەزن ل سەر ئاستێ ناڤخوەیی و عیراقێ و نێڤدەولەتی بۆ ھەرێما کوردستانێ ھاتنە مسۆگەرکرن و پێکڤەبوونا ئێکەتیێ و پارتی ل سەر وان بنەمایان بوون کو مام جەلال و سەرۆک بارزانی ل سەر رێککەفتبوون ب تەوافوقێ و ڤەکرنا بەرپەرەکێ نوو و کارکرنا ھەڤپشک بۆ پێشخستنا کوردستانێ و پارتی و ئێکەتی پیچکڤە گەھشتنە گەلەک ئارمانجێن مەزن، کوردستانێ ڤەژاندن ب خوەڤە دیت و ئیدارە بوونە ئێک و بیاڤێ فرەسیاسی و ئازادیا بیرورا بەرفرەھبوو و ژ ئەگەرێ ڤێ چەندێ ژی پێگەھێ گەلێ کوردستانێ د ئاستێ جیھانی دا بلندبوونەکا بێ وێنە ب خوەڤە دیت، ھەموو ئەڤ چەندە ژ ئەنجامێ برایەتی و پێکڤەبوونا پارتی و ئێکەتیێ بوو”.
مالپەرێ پارتی زێدەتر دبێژیت” ھەر ئەو برایەتیە ژی بوو وەکری پێشمەرگە ب خوینا خوە ئەفسانا داعشێ بشکێنیت، فیداکاریا پێشمەرگێ پارتی و ئێکەتیێ د ئێک سەنگەر دا، باشترین بەلگەیە کو ئێکبوون و ئێکرێزی چاوان دبیتە ئەگەرێ سەرکەفتنێ و شانازیا نیشتمانی، دناڤ سەنگەران دا ل بن فەرماندەییا پێشمەرگەکێ ئێکەتی ب دەھان پێشمەرگێن پارتی یێن شەھید بووین و ل بن فەرماندەییا پێشمەرگەگێ پارتی ژی، پێشمەرگێن ئێکەتیێ خوینا خوە یا بەخشیو ئەڤە ئەو وانێن گرانبەھا نە کو پێدڤیە سیاسیێن پارتی و ئێکەتی ژێ فێربن و بکەنە ھێڤێنێ کارێ خوە یێ داھاتی، دڤێت ژ وێ چەندێ ژی پشت راست بین کو پێشمەرگێن پارتی و ئێکەتیێ ڕێ نادەن خەلکێ دی ب شێوەکێ نەبەرپرسیارانە یاریێ ب چارەنڤیسێ کوردستانێ بکەن”.
د تەوەرەکێ دی دا مالپەرێ پارتی دبێژیت” مخابن دناڤ ئێکەتیێ دا ھندەک دەنگ یێن ھەین دبێژن ئێکەتیێ د دەمێ بۆری دا یا بوویە پاشکۆیا پارتی، ئەڤە ژی یا دوورە ژ راستیێ، ئێکەتی ھەڤپشک و ھەڤپەیمانێ پارتی بوو و گەلەک جاران ژی پارتی بۆ پشتەڤانیا ئێکەتیێ ژ مافێ خوە یا خوەش بووی، باشترین نموونە سالا ٢٠٠٩ ێ بوو کو سەرەرای پارچەکرنا ئێکەتیێ ژلایێ نەوشیروانی ڤە، دەنگێن ئێکەتیێ گەلەک ھاتنە خوار، بەلێ پارتی رێککەفتنا ستراتیژی و بەرژەوەندیا کوردستانێ ل بەرچاڤ وەرگرت و کورسیێن خوە ل گەل ئێکەتیێ بەلاڤکرن و ھەر ب چاڤێ ئێکەتیا جاران سەحکرە ئێکەتیێ، بەلێ ئەوێن ئەڤرۆ بزاڤا تێکدانێ د ناڤبەرا پارتی و ئێکەتیێ دکەن، ئەون یێن ل گەل نەوشیروانی خودانێن ھەمان گرێیێن دەروونی یێن کەڤنێن خوەنە، ھەر ئەو ژی نەک ب تنێ بوونە پاشکۆ، بەلکو بریارا ئێکەتیێ ژی تەسلیمی نەوشیروان موستەفای کرن”.
دیسا تێدا ھاتیە” قەیرانا نوکە نە د بەرژەوەندیا کوردستانێ و نە د بەرژەوەندیا ئێکەتیێ دا ژی نینە، پێدڤیە یێن ئێکەتی باش ھزر د وێ چەندێ دا بکەن کو ئایا گۆڕان ھەر دەمەکی دێ یا بەرھەڤ بیت ژبۆ بەرژەوەندیا کوردستانێ، ئێک کورسیا خوە بدەتە ئێکەتیێ؟ ئایا یا رەوایە چارەنڤیسێ جەماوەرێ ئێکەتیێ ب دەستێ کەسەکی بھێتە دان کو حزبا وان پارچەکری و نوکە ژی دڤێت زێدەتر بچووک بکەت و چو کارەک نینە ب تنێ دڤێت جەماوەرێ ئێکەتیێ ل سەر بنەمایێ دوژمناتیا پارتی بۆ لایێ خوە ڕابکێشیت و دڤێت سیستەمەکی دابمەزرینیت کو ل گردەکە ب ریمۆت کوترۆلی پەرلەمانی و سەرۆکێ وەلاتی و جەماوەرێ ئێکەتیێ کونترۆل بکەت؟ ئایا یا رەوایە کادرێن ئێکەتیێ گوھێ خوە بدەتە ھەناسا دوژمنکارانە و پشتا خوە بدەتە وێ ئاشتیێ و برایەتیێ کو مام جەلالی بناغە بۆ دانای؟.
ئه‌ڤرۆ نیوز:
نێچیرڤان بارزانى جێگرێ سه‌رۆكێ پارتى دیموكراتى كوردستان دووماهى هه‌لویستێ حزبا خوه سه‌باره‌ت چاوانیا هه‌لبژارتنا سه‌رۆكێ هه‌رێمێ راگه‌هاند كو ئه‌گه‌ر لایه‌نێن سیاسى نه‌گه‌هنه رێككه‌فتنه‌كێ و سازان نه‌هێته كرن، ب پێدڤى دزانین بكه‌ڤیته به‌ر راپرسیێ.
نێچیرڤان بارزانى ئه‌ڤ شه‌ڤه پشتى ڤه‌كرنا نوونه‌راتیا ئێكه‌تیا ئوروپا ل هه‌ولێرێ سه‌باره‌ت كومبوونێن 5 قولى و پرسا سه‌رۆكایه‌تیا هه‌رێما كوردستانێ راگه‌هاند كو هه‌موو هیڤیێن وان ئه‌وه‌ن بگه‌هنه ئه‌نجامه‌كێ.
نيشاندان