ئه‌ڤرۆ نيوز:
خێزانا كايلا مۆله‌ر كو به‌رى نوكه وه‌كو چه‌كدارێن داعش وه‌كو ئێخسير ده‌سته‌سه‌ركربوو د به‌ياننامه‌كێ دا راگه‌هاند كو ئه‌بۆ به‌كر به‌غدادى سه‌ركردێ رێكخراوا تيرۆرستى يا داعش ل مالا ئێك ژ سه‌ركردێن وێ رێكخراوێ ده‌ستدرێژيا سكسى كريه سه‌ر كچا وان.
كايلا مۆله‌ر ژ تيمێن هه‌وارهاتنا گۆزارى بوويه و ل سالا 2013ێ چه‌كدارێن داعش ل وه‌لاتێ سوريا ئێخسير كريه و پاشان ژى ته‌رمێ وێ ب كوشتى هاتيه ديتن.
ئەڤرۆ نیۆز، قائید میرۆ:
بەرپرسەکێ پارتی دیموکراتی کوردستان ئیماژە بڤێ چەندێ دکەت، پتریا لایەنێن سیاسی و جەماوەرێ کوردستانێ گەھشتینە ڤێ باوەریێ پێشنیارێن ناڤا پەیاما سەرۆک بارزانی باشترین چارەسەرن بۆ ئێکلاکرنا ئاریشەیان.
فازل بەشارەتی، بەرپرسێ لقا ١٢یا پارتی بۆ ئەڤرۆ نیۆز راگەھاند” خالێن ناڤا پەیاما سەرۆک بارزانی باشترین چارەسەرن بۆ ئێکلاکرنا پرسێن نوکەیێن ھەرێما کوردستانێ و راستڤەکرنا قانوونا سەرۆکایەتیا ھەرێما کوردستانێ، ژبەرکو لایەنێن سیاسی ناگەھن چو رێکەفتنان و ئاریشە دێ مەزنترببن.
بەشارەتی گۆتژی” ھندەک کەس و لایەن ناخوازن ل راستیان تێبگەھن و ھندەک کەس و لایەنانژی چو بەرپرسیاریەتێن نیشتیمانی و نەتەوەیی ب ستویێ خوەڤە ناگرن، بەلێ نوکە پتریا لایەنێن سیاسی و خەلکێ کوردستانێ گەھشتینە ڤێ باوەریێ تنێ دێ پێشنیارێن سەرۆک بارزانی تاکە چارەسەربن بۆ ئێکلاکرنا ئاریشەیان.
ئه‌ڤرۆ نيوز:
نێچيرڤان بارزانى جێگرێ سه‌رۆكێ پارتى ديموكراتى كوردستان د په‌يامه‌كێ دا پشته‌ڤانيا خوه بۆ گازيا كوسره‌ت ره‌سۆل جێگرێ ئێكێ يێ ئێكه‌تيا نشتيمانى كوردستان كر كو وى ژى د هه‌مان ده‌م دا پشته‌ڤانيا پرۆژێ د. به‌رهه‌م سالح جێگرێ دويێ يێ سكرتێرێ ئێكه‌تيا نشتيمانى كوردستانێ كريه.
ده‌قێ په‌ياما جێگرێ سه‌رۆكێ پارتى:
ب ناڤێ خودايێ مه‌زن و دلۆڤان
جه‌ماوێ خۆشتڤى يێ كوردستانێ..
حيزب و لايه‌نێن سياسى يێن كوردستانێ..
ئه‌ڤرۆ به‌رێز كوسره‌ت ره‌سۆل عه‌لى، جێگرێ ئێكێ يێ سكرتێرێ ئێكه‌تيا نشتيمانى كوردستانێ د په‌يانه‌كێ دا داخوازا سازانێ ژ هه‌موو لايه‌نێن كوردستانێ كر و پشته‌ڤانيا خوه ژى بۆ پرۆژێ به‌رێز به‌رهه‌م سالح جێگرێ دويێ يێ سكرتێرێ گشتيێ ئێكه‌تيا نشتيمانى كوردستانێ راگه‌هاند.
ئه‌م پشته‌ڤانيا وێ په‌ياما به‌رێز كوسره‌ت ره‌سۆل دكه‌ين د پێناڤى سازانێ دا و ته‌كست دكه‌ين كو پارتى ديموكراتى كوردستان بزاڤه‌كا مه‌زن يا كرى د پێناڤى ئێكرێزيا نشتيمانى و دروستكرنا سازانێ، نوكه ژى پێداگريێ ل سه‌ر پاراستنا ئێكرێزيا نشتيمانى دكه‌ين و وه‌سان دبينين و وه‌سان دبينين هه‌ڤپه‌يمانيا چه‌ندين ساليا ناڤبه‌را پارتى ديموكراتى كوردستان و ئێكه‌تيا نشتيمانى كوردستان، ئه‌ركه‌كێ زێده‌تر دئێخيته سه‌ر ملێن هه‌ردولا بۆ دروستكرنا سازانێ و ئێكرێزيا نوو يا سياسى و نشتيمانى ل كوردستانێ.
د هه‌مان ده‌م دا د وێ باوه‌رێ داينه كو پرۆژێ به‌رێز به‌رهه‌م سالح دشيان دايه وه‌كو بنچينه‌كێ دانوستاندنێ بهێته ته‌ماشه‌كرن بۆ گه‌هشتن ب وێ سازانێ و ئێكرێزيێ كو خه‌لكێ كوردستانێ و هه‌ڤالێن مه داخواز دكه‌ن.
نێچيرڤان بارزانى
جێگرێ سه‌رۆكێ پارتى ديموكراتى كوردستان
14ى ته‌باخا 2015ێ
ئەڤرۆ نیوز،زنار تۆڤی: \
ئەڤرۆ رۆژا پێنجشەمبی 14ى ته‌باغا 2015ێ فرۆکێن لێنێرینێ(استگلاع) یێن سۆپایێ تورکی بۆ ماوێ پتر ژ ٣ دەمژمێران ل دەڤەرا بەورای بالا و ل ھنداڤی چیایێ مەتینا و رووبارێ زێی دەور ڤەداینە،ب مەرەما پێزانینا جھێن چەکدارێن پەکەکێ ل ڤێ دەڤەرێ.
ئەیوب ئیسماعیل وەلاتیەکێ دەڤەرا بەرواری بالا یە بۆ ئەڤرۆ نیوز دبێژیت:ھاتنا ڤان فرۆکێن لێنیرینێ بۆ ڤێ دەڤەرێ راستەوخو ترسێ لدەف خەلکێ مە پەیدا دکەن،ژبەرکو ھەردەمێ ئەڤ جۆرێ فرۆکان دھێن بۆ لێنێرینا جھێن پەکەکێ ل دووڤ دا فرۆکێن شەرکەر یێن سۆپایێ تورکی ھاتینە و ئەڤ دەڤەرە بۆمبەباران کرینە و چەندین جاران بەری نوکەژی ئەڤ چەندە پەیدا بوویە.
دیارکر ژی:لەورا دبیت جارەکادی ئەڤ دەڤەرە ژلایێ سۆیایێ تورکی ڤە بھێنە بۆمبەبارانکرن و ھەروەسا ڤێ جارێ ئەڤ جۆرە فرۆکە گەلەک نزم دھاتنە دیتن.
ئه‌ڤرۆ نيوز:
جڤاتا سه‌ركرداتيا پارتى ديموكراتى كوردستان ب سه‌رپه‌رشتيا مه‌سعود بارزانى سه‌رۆكێ پارتى ديموكراتى كوردستان و نێچيرڤان بارزانى جێگرێ سه‌رۆكێ پارتى ئه‌ڤرۆ رۆژا ئه‌ينى رێكه‌فتى 14ى ته‌باخا 2015ێ ل پيرمام كۆمبوو و به‌رى ده‌مه‌كێ كێم راگه‌هاندنه‌ك به‌لاڤكر.
جڤاتا سه‌ركرداتيا پارتى د ڤێ راگه‌هاندنێ دا ئاماژه ب وێ چه‌ندێ كريه كو ژ ئه‌گه‌رێ كوده‌تايا ده‌ركه‌فتن ژ ته‌ڤده‌نگيێ ل هه‌يڤا خزيرانێ و ئه‌و رێكه‌فتنێن حوكمه‌ت و سه‌رۆكاتيا په‌رله‌مانى ل سه‌ر هاتينه پێكئينان قه‌يران دژوارتر لێ كريه.
پارتى مخابنيا خوه ده‌ربريه و راگه‌هانديه كو ل 23ى خزيرانێ سه‌ره‌رايى كاودانێن سياسى يێن نه ل رێ يێن كوردستانێ و هێرشێن دڕندانه يێن چه‌كدارێن داعش و كاودانێن سه‌ختێن ئابوورى يێن كوردستانێ و ئه‌و ره‌وشا خه‌لكى و كێشه و ئه‌ركێن مليۆنه‌ها ئاواران كو روو كريه كوردستانێ، ئها د ده‌مه‌كێ هوسا يێ هه‌ستيار دا پلانه‌ك دارێتيه و ژ لايێ لايه‌نه‌كێ به‌رنياس كوده‌تا دژى ته‌ڤده‌نگيێ و ئێكرێزيێ ل په‌رله‌مانێ كوردستانێ ئه‌نجام دايه، ئه‌و ژى ب وه‌رگرتنا بڕياره‌كا ئێكلاكه‌ر بۆ كێمكرنا پێگه‌هـ و رۆلێ سه‌رۆكاتيا هه‌رێما كوردستانێ كو هێمايێ گه‌لێ مه‌يه، ديسا دژى به‌رژه‌وه‌نديێن بلندێن كورد و كوردستانێ.
پارتى د ڤێ راگه‌هاندنا خوه دا ده‌ركه‌فتن ژ ته‌ڤده‌نگيێ ب مه‌ترسى دزانيت و ب مه‌ترسيه‌كا مه‌زن وه‌سف دكه‌ت كو كارتێكرنه‌كا نه‌رێنى يا مه‌زن دێ ل سه‌ر هه‌دو ئاستێن نه‌ته‌وى و نشتيمانى هه‌بيت و “خه‌له‌تيه‌كا مه‌زنه ژى و پێدڤيه ب له‌ز بهێته راستڤه‌كرن”. هاتيه ژى: “ڤێ كۆمبوونا وان ره‌تدكه‌ين و دێ دژى وێ راوه‌ستين”.
دده‌ته زانين ژى كو ئه‌ڤ پلانه چه‌ند كه‌سه‌كان ب رۆله‌كێ دوژمنكارى به‌رامبه‌ر ئه‌زمونا گه‌لێ مه و ئێكرێزيا ناڤمالا كوردى گێرايه، دبێژيت ژى: “ل ڤێره ب تايبه‌ت سه‌رۆكێ په‌رله‌مانى بێ لايه‌نى و شه‌رعيه‌تا خوه ژ ده‌ست دايه”.
جڤاتا سه‌ركرداتيا پارتى د ڤێ راگه‌هاندنێ دا يا ب هيڤيه ژى كو “هێشتا ده‌رفه‌ت ژ ده‌ست نه‌چوويه، دشيان دايه ب ته‌ڤده‌نگى و ئێكرێزى بهێته ئاڤاكرن و رێ بهێته خوه‌شكرن كو چاڤ ل هه‌موو ئه‌وان پێشنياز و هه‌لويستان بگرن كو ژ لايێ لايه‌ن و كه‌ساتيا ڤه هاتينه پێشكێشكرن”.
ل دووماهيێ ژى ب هه‌لكه‌فتا 69 ساليا دامه‌زراندنا پارتى، پيرۆزباهيێن خوه ئاراسته‌يى كه‌سوكارێن شه‌هيد و پێشمه‌رگێن قه‌هره‌مان ل سه‌نگه‌رێن شه‌ره‌فێ دا و هه‌موو ئه‌ندام و لايه‌نگرێن خوه و هه‌موو كوردستانيان كرينه.
ئه‌ڤرۆ نيوز:
ئومێد خۆشناو سه‌رۆكێ فراكسيۆنا پارتى ل په‌رله‌مانێ كوردستانێ، بۆ مالپه‌رێ فه‌رميێ پارتى ديموكراتى كوردستان گۆت: “هه‌تا نوكه ب ره‌نگه‌كێ فه‌رمى سه‌رۆكاتيا په‌رله‌مانى ئاگه‌هداريا چو فراكسيۆنێن ناڤا په‌رله‌مانى نه‌كريه ئه‌وا بڕياره رۆژا ئێكشه‌مبى ل گه‌ل سه‌رۆكاتيا په‌رله‌مانى ب رێڤه بچيت.
دا زانين ژى كو ب تنێ د داخۆيانيه‌كێ دا سكرتێرێ په‌رله‌مانى راگه‌هانديه كو بڕياره رۆژا ئێكشه‌مبى روونشتنا سه‌رۆكاتيا په‌رله‌مانى ل گه‌ل سه‌رۆك فراكسيۆنێن ناڤا په‌رله‌مانى بهێته ئه‌نجان دان.
خوشناو گۆتژى: “هه‌كه بهێينه ئاگه‌هداركرن ژى ب پشت راستى ڤه ل ده‌سپێكێ دێ هه‌لسه‌نگاندنێ بۆ به‌رنامێ كارى كه‌ين و باشان ژى ل گه‌ل فراكسيۆنێ روونين و پاشان ژى بڕياره ئاماده‌بوون يان ئاماده‌نه‌بوونێ ده‌ين و دێ پاشان ئه‌گه‌ران ژى دياركه‌ين”.
ئه‌ڤرۆ نيوز:
شێخ عه‌بدولمه‌هدى كه‌ربه‌لائى نوونه‌رێ تايبه‌تێ عه‌لى سيستانى د گۆتارا ئه‌ڤرۆ يا رۆژا ئه‌ينى دا راگه‌هاند كو ئايه‌تولا عه‌لى سيستانى مه‌رجه‌عێ بلندێ شيعان ل عيراقێ پشته‌ڤانيا ئه‌وان چاكسازيان كر يێن حوكمه‌تێ راگه‌هاندين و جڤاتا نوونه‌ران په‌سه‌ند كرين و ب پێدڤى ژى زانى چاكسازى د ده‌زگه‌هێن دادوه‌رى ژى دا بهێنه كرن.
ئه‌ڤرۆ نيوز:
كوسره‌ت ره‌سۆل جێگرێ سكرتێرێ گشتيێ ئێكه‌تيا نشتيمانى كوردستان به‌ياننامه‌ك ل دۆر ره‌وشا نوكه يا كوردستانێ به‌لاڤكريه و تێدا داخوازێ ژ هه‌موو حزب و لايه‌نێن سياسى و كاركه‌رێن د گۆره‌پانا سياسيا كوردستانێ دكه‌ت كو زێده‌تر ده‌مى ب هه‌روه نه‌بن هه‌تا د وان رۆژێن ماين دا، خوه ل دۆر مێزێن دانوستاندنێ خرڤه بكه‌ن ب پێخه‌مه‌ت گه‌هشتن ب سازانه‌كا نشتيمانى كو چاره‌سه‌ره‌كا هه‌موولانه‌يه و دبێژيت: “بلا ئه‌م ب خوه حه‌كيمێن ده‌ردێ خوه بين، هه‌كه مێژوو ره‌حمێ ب كه‌سێ نابه‌ت”.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ ئامارا دروستا رزگار بوويى و ئازادكريێن ناڤ ده‌ستێ داعش ئاشكه‌را دكه‌ت كو يێن هه‌تا 11ى ته‌باخا 2015ێ نه.
خه‌يرى بۆزانى، رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ بۆ ئه‌ڤرۆ نيوز گۆت: “گه‌له‌ك كه‌س ژ ناڤ ده‌ستێ داعش رزگار بووينه و گه‌له‌ك ژى ماينه”.
خه‌يرى بۆزانى زێده‌تر گۆت: “كه‌سانێن هه‌تا نوكه ماينه د ناڤ ده‌ستێ داعش دا، پێنج هزار و 838 كه‌سن و ژ وان ژى سێ هزار و 192 كه‌س ژنن و دو هزار و 646 كه‌سن”.
رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ خۆيا كر كو ئه‌و كه‌سێن ژ ناڤ ده‌ستێ داعش رزگار ژى بووين دو هزار و 58 كه‌سن و ژ وان ژى 300 زه‌لام و 779 ژن و 477 زارۆيێن كچ و 502 زارۆيێن كوڕن.
دا زانين ژى كو ئه‌ڤ ژمارا رێڤه‌به‌ريا كاروبارێن ئێزديان ل وه‌زاره‌تا ئه‌وقاف و كاروبارێن ئاينى يا حوكمه‌تا هه‌رێما كوردستانێ راگه‌هاندى يا هه‌تا 11ى ته‌باخا 2015ێ يه
ئه‌ڤرۆ نیۆز، قائید میرۆ
شه‌ڤا بۆری هێزێن پێشمه‌رگه‌ی ل میحوه‌رێ گوێڕ هێرشه‌كا تیرۆرستێن داعش شكاند و گورزه‌كا كوژه‌ك ل چه‌كدارێن داعش كه‌فتیه.
ژێده‌ره‌كێ هێزێن پێشمه‌رگه‌ی ب ئه‌ڤرۆ نیۆز راگه‌هاند” ده‌مژمێر 12ی شه‌ڤا چه‌كدارێن داعش هێرش كریه سه‌ر هێزێن پێشمه‌رگه‌ی ل گوندێ تلڕیم یێ سه‌ر ب ناحیا گوێڕ و بۆده‌مێ ده‌مژمێره‌كا شه‌ڕه‌كێ گران بڕێڤه‌چوویه.
ژێده‌ری گۆتژی” پێشمه‌رگه‌ی ب چه‌كێن گران و سڤك به‌رسڤا هێرشا داعش دایه و د ئه‌نجامدا هێرش هاتیه شكاندن و زیانێن مه‌زن گه‌هشتینه تیرۆرستێن داعش، به‌لێ قه‌باره‌یێ ئه‌ڤان زیانا ناهێته زانین.
نيشاندان