ئه‌ڤرۆ نيوز:
سكرتێرێ ئێكه‌تيا ته‌پا پێ يا كوردستانێ ئاشكه‌را كر كو هه‌موو بزاڤێن خوه راگرتن، ژ ئه‌گه‌رێ وێ چه‌ندێ كو وه‌زاره‌تا دارايى پارێ ئێكه‌تيا وان ناده‌ت، هه‌ر چه‌نده سه‌رۆكاتيا حوكمه‌تا هه‌رێما كوردستانێ ره‌زامه‌ندى ده‌ربڕى يه.
سه‌لاح حسێن راگه‌هاند: “مه بڕيار دايه هه‌موو چالاكى و قاره‌مانيێن خوه ب راوه‌ستينين و چو چالاكى ب رێڤه ناچن، هه‌تا وه‌زاره‌تا دارايى يا حوكمه‌تا هه‌رێما كوردستانێ ئه‌وى پاره‌ى بۆ خه‌رج نه‌كه‌ت ئه‌وێ ره‌زامه‌ندىا سه‌رۆكاتيا حوكمه‌تێ ل سه‌ر ده‌ربڕى.
سكرتێرێ ئێكه‌تيا ته‌پا پێ يا كوردستانێ روون كر ژى كو بۆ چالاكيێن وه‌رزێ 2014-2015 حوكمه‌تا هه‌رێما كوردستانێ ره‌زامه‌ندى ل سه‌ر ئێك مليار دينار دابوو، ژ وى پاره‌يى ژى ب تنێ 250 مليۆن دينار وه‌رگرتينه و يێن دى كو 750 مليۆن دينارن ژ لايێ وه‌زاره‌تا دارايى ڤه نه‌هاتينه مه‌زاختن و گۆت: “د ئاماده ژى نينن ئه‌وى پاره‌ى بده‌ن، ژ به‌ر هندێ ژى مه هه‌موو چالاكى و خولێن خوه راگرتن هه‌تا وى پاره‌يى بۆ مه د مه‌زێخن”.
ئەڤرۆ نيوز:
بەرپرسێ پەیوەندیێن جەماوەری ل ئوفیسا دھۆکێ یا کۆمسیونا بلندا سەربخوە یا ھەلبژارتنان دیار کر کو تۆمارکرنا ئەلکترۆنی (بایومەتری) یا گشتی بۆ تۆمارکرنا پێزانینێن دەنگدەران ئەڤرۆ ٢٠١٥-٧-٢٦ دێ دەست پێ کەت و ١٤ بنگەھێن تۆمارکرنێ ل سەرانسەری پارێزگەھا دھۆکێ بۆ ڤێ مەرەمێ دێ ھێنە ڤەکرن.
سەگڤان حەسەن، بەرپرسێ پەیوەندیێن جەماوەری ل ئوفیسا دھۆکێ یا کۆمسیونا بلندا ھەلبژارتنان خویا کر، د ڤێ تۆمارکرنا بایومەتری دا پێزانینێن دەنگدەری وەکو (شوون تبلێن دەنگدەری، وێنە، ناڤێ چار قولی، ناڤێ سێ قولی یێ دەیکێ، ناڤ ونیشان) ب شێوەکێ ئەلکترۆنی دێ ھێنە تۆمارکرن، ھەروەسا ئەگەر دەنگدەری بڤێت بنگەھێ خوە یێ دەنگدانێ ڤەگوھێزیت یان ھەر ئاریشەک د پێزانینێن وی دا ھەبیت دێ د ڤێ تۆمارکرنێ دا بۆ ھێتە راستڤەکرن و گۆت: “ئارمانج ژ ڤێ پروسێسێ ئەوە، تۆمارەکا دەنگدەران یا رێکوپێک بھێتە دروستکرن و ئەڤ کارە دێ بیتە بناغە بۆ دەنگدانا ئەلکترۆنی ل پاشەرۆژێ”.
ئاشکرا ژی کر، ١٤ بنگەھێن تۆمارکرنا بایومەتری ل سەرانسەری پارێزگەھا دھۆکێ بۆ وەلاتیان دێ ھێنە ڤەکرن و گۆت: “نەە بنگەە ژ وان ل سەنتەرێ قەزا دھۆکێ نە، دیسا ل ھەر ئێک ژ قەزایێن سێمێلێ، ئامیدیێ، ئاکرێ، زاخۆ و ناحیا دەرکارێ ژی بنگەھەکێ تۆمارکرنا ئەلکترۆنی بۆ تۆمارکرنا دەنگدەران دێ ھێنە ڤەکرن”.
سەگڤان حەسەن ئاماژە ب وێ چەندێ ژی کر، ھەر کەسەکێ سەرەدانا بنگەھێن تۆمارکرنێ بکەت، دڤێت بەلگەنامێن پێدڤی یێن رەسەن وەکو (ناسناما بارێ شارستانی، پلێتا ئاھێن خـوارنـێ، رەگـەزنامـا عیراقـی و کــارتـا دەنگــدەری) د گەل خوە بینیت.
بەرپرسێ پەیوەندیێن جەماوەری ل ئوفیسا دھۆکێ داخواز ژ ھەموو وەلاتیێن تەمەنێ وان ١٨ سالیێ و د سەر دا کر کو سەرەدانا نێزیکترین بنگەھێ تۆمارکرنێ بکەن دا کو پێزانینێن خوە تۆمار بکەن و مافێ خوە یێ دەنگدانێ ل پاشەرۆژێ گەرەنتی بکەن.
ئەڤرۆ نیۆز، قائید میرۆ:
لیژنا نافخۆیا پەرلەمانێ کوردستانێ بۆ ژنێزیک ئاگەھداربوونێ ل رەوشا دەڤەرێن سینوری دێ سەرەدانا دەڤەرێن بوردۆمانکری ژ لایێ فڕۆکەیێن تورکیا کەت.
سەعید مەسیفی، ئەندامێ لیژنا نافخۆ یا پەرلەمانێ کوردستانێ بۆ ئەڤرۆ نیۆز راگەھاند: “ھێشتا چو فڕاکسیۆن و لیژنەیێن پەرلەمانی داخوازا کۆمبوونا پەرلەمانی بۆ ڤەکۆلینێ ل بوردۆمانا فڕۆکەیێن تورکیا بۆ سەر ئاخا ھەرێما کوردستانێ نەکریە و تنێ ھاتیە ئیدانەکرن”.
مەسفی ئاماژە ب وێ چەندێ ژی کر، بڕیارە لیژنا نافخۆیا پەرلەمانێ کوردستانێ بۆ دووڤچوونا رەوشا دەڤەرێن ھاتینە بوردۆمانکرن سەرەدانا ڤان دەڤەرێن سینوری بکەت و ل ھویردەکاریێن بوردۆمانا تورکیا زیانێن وەلاتیان ئاگەھداربیت”.
ئه‌ڤرۆ نيوز:
ل رۆژا ئەینیێ 24ى تيرمه‌ها 2015 فرۆکە و تۆبخانا تورکی بارەگا و چەکدارێن پەکەکێ ل دەڤەرێن سنۆری ل ھەرێما کوردستانێ کرنە ئارمانجێن خوە، دەڤەرێن سنۆری یێن پارێزگەھا دھۆکێ ژی ڤەگرتیە وھەتا نوکە یا بەردەوامە.
ل دەڤەرا ئامێدیێ 200 کەس ماینە ئاسێ و دو کەس بریندار بووینە
فرۆکێن تورکی ل دەمژمێر 11 ێ شەڤا 24 ل سەر 25ى تيرمه‌ها 2015ێ پتر ژ 40 جاران بارەگەھێن پەکەکێ ل دەڤەرێ بوردومانکرن و چەندین زیانێن مالی و جانی لێ دروست بووینە.
ل گۆر ھندەک وەلاتیێن دەڤەرێ، فرۆکێن تورکی گوندێن دەڤەرا نھێلێ و نێروە و رێکان ل سنۆرێ ناحیێن دێرەلۆکێ و شێلادزێ ب دژواری بوردومانکرنە و ھەروەسا چەندین جاران ژی بوردومانا گوندێن دەڤەرا زێباریان یا سەر ب قەزا ئاکرێ ڤە کریە و زیانێن مەزن گەھاندینە رەزو بیستانێن وەلاتیان و ئاگرەکێ مەزن ژی بەربوویە دارستانێ و ب ھزارەھا دونەم ھاتینە سوتن.
محەمەد رێکانی ئاکنجی ل ناحیا شێلادزێ بۆ ئەڤرۆ دیارکر، ھەژمارەکا مەزن یا وەلاتیان ل گوندێن خوە ئاسێ ماینە و نەشێن ھاتنوچوونێ بکەن و نەشێن لڤینێ ل گوندێن خوە بکەن و پەیوەندی ژی پێ ناھێتە کرن ژ بەر نەبوونا ھێلێن تەلەفۆنان ل وان دەڤەران.
ژێدەرەکێ ژ نەخوەشخانا ئامێدیێ بۆ ئەڤرۆ دیارکر، کو دوھی سپێدێ دوو ژ وان وەلاتیێن ژ ئەنجامێ تۆپبارانکرنا فرۆکێن تورکی بریندار ببوون و گەھاندنە نەخوەشخانێ و پشتی چارەسەریێن دەسپێکی بۆ دھۆکێ ھاتینە ھنارتن.
وی ژێدەری ئەو یەک ژی دیاکر، کو ئێک ژ وان برینداران زارۆ بوویە و ھەروەسا بریندارەکی پێیەکێ خوە ژ دەست دایە کو ل دەڤەرا رێکانیان ل گوندێ (ئورەخەل)ێ و گوندێ (بێزەلێ) یێن سەر ب ناحیا شێلادزێ ڤە بریندار بووینە.
ل گۆر ئاخفتنا حسنی سەرگەلی ھەلبژێرێ گوندێ سەرگەلێ توپبارانکرنێ ترسەکا مەزن ئێخستیە دلێ خەلکێ گوندی، تایبەتی ژی ژن و زارۆیان و زیانێن مەزن گەھاندە بیستان و رەزێن وان و ژێدەرێ ئاڤا ڤەخوارنێ و ئاڤا چاندنێ یا گوندی ژناڤبریە.
بەری نیڤرۆیا دوھی ژی بەردەوام فرۆکێن تورکی بوردومانا دەڤەرێ کریە و ئاگرەکی مەزن بەردایە دارستانا دەڤەرا ئامێدیێ و تا نھا ژی یا بەردەوامە و پتریا خەلکێ سەر گوندان دەڤەرێن خوە چۆلکرینە و قەستا جھێن تەنا کرین.
چار چەکدارێن پەکەکێ ل دینارتێ خوە رادەستی ھێزێن ئێمناھیێ کرینە
پشتی ل شەڤا 24 ل سه‌ر 25ى تيرمه‌هێ فرۆکێن توکیا ھژمارەکا بارەگایێن (پ. ک. ک) ل ھەرێما کوردستانێ بەردومان کری، دەڤەرا زێباریان ژی ڤەگرت، مەھران لوقمان رێڤەبەرێ ناحیا دینارتێ بۆ ئەڤرۆ گۆت: “ل دۆرێن دەمژمێر 11:00ێ شەڤێ ڤێ بوردومانکرنێ دەڤەرا زێباریان ژی ل سنوورێ ناحیا دینارتێ ڤەگرت، ل گوندێن (کافیا و چەم شرتێ و سەرێ شەھێ) لێ چو زیانێن گیانی و مادی نەگەھشتینە خەلکێ دەڤەرێ و چ زانیاری ل سەر زیانێن (پ. ک. ک) نینن”. ئاشکرا کر ژی دوھی چار چەکدارێن پەکەکێ ل دینارتێ خوە رادەستی ھێزێن ئێمناھیێ کرینە.
ل بەرواری بالا خانیێ وەلاتیەکێ ھەرفاند و 300 دۆنەمێن ئەردی سۆتن
ژ ئەنجامێ تۆپبارانکرنا فرۆکێن تورکی ل دەمژمێر 11:00 شەڤا 24ى تيرمه‌ها 2015 بۆ سەر چەندین گوند و جھێن جودا ل دەڤەرا بەرواری بالا خانیێ وەلاتیەکێ ل گوندێ ھێسێ ھەرفاند و پتری 300 دۆنەمێن ئەردێ دارستانێ و رەزێن خەلکی سۆتن.
ئەحمەد محەمەد وەلاتیەکێ ڤێ دەڤەرێ یە بۆ ئەڤرۆ دبێژیت: ھەر ژ دەمژمێر 11:00 شەڤا 24ى تيرمه‌هێ ھەتا کو دەمژمێر 1:00 پشتی نیڤرۆیا 25ى تيرمه‌هێ ب رەنگەکێ بەردەوام فرۆکێن تورکی جھێن پەکەکێ ل گەلیێ بێشیلێ و گوندێ زڤنگێ و مەگلانا و مێردینکێ و بناڤیکێ و کێفتکێ و کانی رەشێ و گوندێ ھێسێ و مێرگاجیا و کانیا بەستێ و گەلیێ قومریێ و سەرکێ دێشێشێ و زنارا کێستە و بالۆلەی و گەلیێ قەسرکێ و کارە و بێتکار ل دەڤەرا بەرواری بالا ب دژواری بوردومانکرن و گوت ژی، وان فرۆکان ترس ل دەف خەلکێ دەڤەرێ پەیداکریە و ئێدی نەوێرن بچنە سەر گوندێن خوە و چەندین وەلاتی ئاسێ بووینە، ھەروەسا فرۆکان خانیێ وەلاتیەکێ ل گوندێ ھێسێ ھەرفاند و ئاگرەکێ مەزن بەربوویە دارستانێ و رەزێن چەندین گوندان و ھەتا نوکە پتری 300 دونەمێن ئەردی ھاتینە سۆتن.
دلدار عادل وەلاتیەکێ دییە دبێژیت، ھەکە بوردومانکرن ب ڤی رەنگی یا بەردەوام بیت خەلک ژبۆ پاراستنا گیانێ خوە دێ نەچاربن ڤێ دەڤەرێ چولکەن،ژبەرکو فرۆکە ڤێ دەڤەرێ ب شێوەیەکێ دژوار و بەردەوام بۆردومان دکەن و گەلەک بۆمبە ب نێزیکی چەند گوندان کەفتینە.
ھەروەسا پشتی دەمژمێر 5:30 ئێڤاریا 25ى تيرمه‌هێ تۆپخانا تورکی چەندین جھێن پەکەکێ ل دەڤەرا بەرواری بالا توپبارانکرن.
ئه‌ڤرۆ نيوز، ڤه‌گێر:
ھاریکارێ وەزیرێ دەرڤە یێ ئەمریکا برێت ماکگورک د تورا کومەلایەتی یا تویتەری دا، ھەلویستێ ئەمریکا سەبارەت پۆپبارانا فرۆکێن شەرکەرێن تورکیا بۆ سەر بارەگەھێن PKKێ ل باشوورێ کوردستانێ راگەھاند.
ماکگورک دبێژیت “ئەم (ئەمریکا) کارێن تیروریستی یێن PKKێ ب دژواری شەرمزار دکەین و ئەم بتمامی رێزێ ل ھەڤپەیمانا خو (تورکیا) دگرین د مافێ وێ یێ خو پاراستنێ دا.”
ھاریکارێ وەزیرێ دەرڤە یێ ئەمریکا د تویتەکا دی دا دبێژیت: چو پەیوەندی د ناڤبەرا لێدانا PKKێ ژلایێ فرۆکێن جەنگی ڤە و لێکتێگەھشتنا ئەمریکا و تورکیا بۆ ھاریکاریا زێدەتر ل دژی داعشێ دا نینە.
ماکگورک داخوازێ ژ ھەر دو ئالیان (تورکیا و PKK)ێ دکەت کو پێگیریێ ب پرۆسەیا چارەسەریا ئاشتیانە بکەن بۆ چارەسەریەکا عادل و بەردەوام.
ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ راگه‌هاند كو ئه‌ڤرۆ ژى رۆژا ئێكشه‌مبى رێكه‌فتى 26ى تيرمه‌ها 2015ێ مووچێ هه‌يڤا گۆلانێ دێ هێته به‌لاڤكرن.
ب گۆره‌يى نڤيساره‌كا فه‌رمى يا وه‌زاره‌تا دارايى و ئابوورى ل حوكمه‌تا هه‌رێما كوردستانێ كو دانه‌ك بۆ ئه‌ڤرۆ نيوز ره‌وانه‌كريه، تێدا هاتيه كو ئه‌ڤرۆ رۆژا ئێكشه‌مبى رێكه‌فتى 26ى تيرمه‌ها 2015ێ دێ وه‌زاره‌تا ساخله‌ميێ مووچێ هه‌يڤا گۆلانێ يێ 2015ێ وه‌رگريت.
ئه‌ڤرۆ نیوز:
نێچیرڤان بارزانى سه‌رۆكێ حكومه‌تا هه‌رێمێ كوردستانێ د په‌یامه‌كێ دا ل دۆر توپبارانكرنا توركیا بۆ باره‌گایێن په‌كه‌كێ به‌رهه‌ڤیا خوه و حكومه‌تا هه‌رێما كوردستانێ بۆ هه‌ڤكاریكرن ژ پێخه‌مه‌ت ئاگربه‌ست و ئاشتیێ ل توركیا دیاركر.
نێچیرڤان بارزانى سه‌رۆكێ حكومه‌تا هه‌رێمێ كوردستانێ دیسا دیاركریه كو توندوتیژى و ب كارئینانا هێزێ چ كێشه‌یه‌كێ چاره ناكه‌ن.
نێچیرڤان بارزانى سه‌رۆكێ حكومه‌تا هه‌رێمێ كوردستانێ داخواز ژ پارتا كرێكارێن كوردستانێ كریه كو د هێمن بن و هه‌موو بزاڤه‌كێ بكه‌ن بۆ وێ یه‌كێ ئاگربه‌ست و پروسا ئاشتیێ ده‌ستپێبكه‌ته‌ڤه و رول ب ئوجه‌لان و HDP بهێته دان و ئه‌م ژى بۆ هه‌ر هاریكاریه‌كێ د به‌رهه‌ڤین.
ئه‌ڤرۆ نیوز:
سه‌رۆكایه‌تیا هه‌رێمێ ل دور توپبارانكرنا شڤێدى پا سوپایێ توركیا رۆنكرنه‌ك بۆ رایا گشتى به‌لاڤكریه و د پشكه‌كا وێ دا هاتیه” شڤێدى سوپایێ توركیا باره‌گایێن په‌كه‌كێ ل چه‌ند ده‌ڤه‌رێن هه‌رێما كوردستانێ دانه به‌رتوپپان، و پشتى وێ توپبارانكرنێ سه‌عه‌ت 9 و نیڤى به‌رى نیڤرویا ئه‌ڤرۆ داود ئوغلو سه‌رۆك وه‌زیرێن توركیا ب رێیا ته‌له‌فونى په‌یوه‌ندى ب مه‌سعود بارزانى سه‌رۆكێ هه‌رێمێ كریه و ب درێژى به‌حسێ ڤێ ره‌وشێ كریه و ئه‌گه‌رێن گه‌هشتنا ڤێ ره‌وشى بۆ ڤى ئاستى، د به‌رامبه‌ر دا سه‌رۆك بارزانى دلگرانیا خوه نیشادا كو ره‌وش گه‌هشتیه ڤێ ئاستێ ب ترس و رژدى ل سه‌ر وێ یه‌كێ كر كو گه‌له‌ك داخواز كریه كو كێشه نه‌گه‌هته ئاستێ ئالوزیێن زێده‌تر، ژبه‌ر كو ئاشتى تاكه رێكا چاره‌كرنا كێشانه و سالانه ئه‌نجامدانا دانوستاندنان باشتره ژ ده‌مژمێره‌كا شه‌رى.
ئه‌ڤرۆ نیۆز، قائید میرۆ
ئێڤاریا ئه‌ڤرۆ دێ ل باژێڕێ هه‌ولێرێ لایه‌نگرێن په‌كه‌كێ خۆنیشاندانێ دژی بوردۆمانا توركیا ئه‌نجام ده‌ن.
ژێده‌ره‌كێ ئاگه‌هدار ب ئه‌ڤرۆ نیۆز راگه‌هاند” ل دژی بوردۆمانكرنا بنكه و باره‌گایێن پارتا كرێكارێن كوردستانێ په‌كه‌كێ، بڕیاره ئێڤاریا ئه‌ڤرۆ ل باژێڕێ هه‌ولێرێ لایه‌نگرێن په‌كه‌كێ خۆنیشانده‌كێ ئه‌نجام بده‌ن.
ژێده‌ری گۆتژی” ئه‌ف خۆنیشاندان دێ ل سه‌نته‌رێ باژێڕی برێڤه‌چیت و دروشمێن دژی حوكمه‌تا توركیا دێ هێنه بلندكرن، ئه‌ڤه ژبلی خواندنا یاداشته‌كێ.
نيشاندان