ئه‌ڤرۆ نيوز:
گرێدايى نه‌ره‌حه‌تيا ژ ڤه‌گه‌ريانا هێزێن پێشمه‌رگێ له‌شكرێ رۆژئاڤا، بۆ ناڤ ئاخا رۆژئاڤا، سه‌ركرداتيا هێزێن پاراستنا گه‌له‌ك “هه‌په‌گه” و يه‌كێن پاراستنا گه‌ل “يه‌په‌گه” دێ كۆم بن.
ب هزاران پێشمه‌رگێ له‌شكرێ رۆژئاڤا كو ژ كوڕ و كچێن پێشمه‌رگه‌يێ كوردستانێ يێ خه‌لكێ رۆژئاڤا پێك دهێن و ل هه‌رێما كوردستانێ مه‌شق كريه، چاڤه‌رێ رێكه‌فنێ نه بۆ چوونا رۆژئاڤا و پاراستنا ئاخا كوردستانێ، به‌لێ ده‌سته‌لاتدارێن رۆژئاڤا رێ ب چوونا وان ناده‌ن، نوكه ژى ب رۆژانه ب ده‌هان گه‌نجێن رۆژئاڤا و شه‌رڤانێن يه‌كينێن پاراستنا گه‌ل، په‌يوه‌نديێ ب وێ هێزێ دكه‌ن.
ژێده‌ره‌كێ ئاگه‌هدار ژ كاودانێن رۆژئاڤايێ كوردستانێ بۆ “باس” ئاشكه‌را كر كو رۆژا 8ى تيرمه‌ها 2015ێ باهۆز ئاردال، ئه‌ندامێ جڤاتا له‌شكرێ هه‌په‌گێ ل چيايێ “په‌ره‌چۆخ – دێرك” ل كوردستانا رۆژئاڤا، كۆمبوونه‌كا ل گه‌ل سه‌ركرداتيا يه‌كێن پاراستنا گه‌له‌ك “يه‌په‌گه” كريه.
ئه‌ڤى ژێده‌رى گۆت: “د ڤێ كۆمبوونێ دا به‌حسێ مه‌ترسيا هاتنا پێشمه‌رگه‌يێ له‌شكرێ رۆژئاڤا بۆ ناڤ ئاخا رۆژئاڤايێ كوردستانێ كريه و هه‌ردولا نه‌ره‌حه‌تيا خوه ده‌ربڕيه كو هه‌كه بهێت و ئه‌و هێز بچيته رۆژئاڤايێ كوردستانێ، دێ ژمارا چوونا شه‌رڤانان بۆ ناڤ وى له‌شكرى گه‌له‌ك زێده بيت و ئه‌گه‌رێ وێ چه‌ندێ ژى يێ هه‌يى گه‌له‌ك كه‌س ئێكسه‌ر په‌يوه‌نديێ ب ڤى له‌شكرى بكه‌ن.
ب گۆره‌يى پێزانينان ئه‌و له‌شكر ژ 11 فه‌رجێن پێشمه‌رگه‌يى پێكهاتيه و هێزه‌كا نيزامى يا ب چه‌ك و ئمتيازاته و ل به‌رامبه‌ر “يه‌په‌گه” جوداهيه‌كا مه‌زن يا هه‌يى كو هێزه‌كا ژێك ڤه‌قه‌تيايه و بێ ئاماده‌كاريێن له‌شكرى هاتيه دامه‌زاندن، ئه‌ڤه ژى دێ بيته ئه‌گه‌رێ وێ چه‌ندێ كو ژماره‌كا زێده يا شه‌رڤانان د ناڤبه‌را هه‌ردو هێزان دا، هێزا له‌شكرێ رۆژئاڤا هه‌لبژێرن. ب تايبه‌ت ئه‌وێن بيروباوه‌رێن وان دوور ژ “په‌كه‌كێ” و “يه‌په‌گێ” كو كه‌سێن حزبى نينن و د سه‌ربه‌خۆ نه، چونكو له‌شكرێ رۆژئاڤا هه‌لگرێ هه‌موو ئايدولۆژيايێن جودا يێن رۆژئاڤايێ كوردستانێ يه و بنه‌مايێ وه‌رگرتنێ ب تنێ نشتيمانى يه، نه‌وه‌كو سياسى و حزبى.
ب ديتنا ڤى ژێده‌رێ “باس” نوكه ب ره‌نگه‌كێ كريارى ژماره‌كا زۆر يا شه‌رڤانان په‌يوه‌نديێ ب له‌شكرێ پێشمه‌رگێ رۆژئاڤا دكه‌ن و نوكه بووينه پێشمه‌رگه.
د ڤێ ده‌ربارێ دا، نورى بريمۆ، ئه‌ندامێ سه‌ركرداتيا پارتى ديموكراتى كوردستان – سوريا بۆ “باس” ته‌كست ل سه‌ر وێ چه‌ندێ كريه كو ئه‌و هێزه‌كا نيزامى و له‌شكرى يه هه‌ر وه‌كو هێزا پێشمه‌رگێ كوردستانێ ل ژێر فه‌رماندا سه‌رۆكێ كوردستانێ يه و فه‌رمانێ ژ وه‌زاره‌تا پێشمه‌رگه‌يى وه‌ردگرن.
گۆتژى: “ئاماده‌كاريێن ته‌مام بۆ چوونا ناڤ رۆژئاڤا كرينه و ئه‌و نوكه هێزه‌كا ته‌مام و نيزامى و پرچه‌ك و مه‌شقكرى نه و راهێنانێن باش ديتينه و د دوورن ژ ئايدولۆژيايێن حزبى و سه‌ر ب چو پارت و حزبا نينن، ب تنێ سه‌ر ب نشتيمانێ خوه نه.
بريمۆى راگه‌هاند ژى كو ئه‌و هێز دێ پشتى جه‌ژنێ به‌ر ب رۆژئاڤا ب رێ كه‌ڤيت و ئه‌و ژى ئه‌ركێ سه‌رۆكێ هه‌رێمێ يه ل گه‌ل هه‌پڤه‌يمانان و ده‌سته‌لاتدارێن نوكه يێن رۆژئاڤا رێك بكه‌ڤن، چونكو دڤێ چوونا وێ هێزێ بێ كێشه و ب رێكه‌فتن بيت.
به‌لێ غه‌ريب حه‌سۆ، نوونه‌رێ “په‌يه‌دێ” ل هه‌رێما كوردستانێ بۆ “باس” ئاماژه ب وێ چه‌ندێ كر كو ئه‌و رێگريێ ل چو هێز و لايه‌نان ناكه‌ن بچنه رۆژئاڤايێ كوردستانێ و خه‌باتێ بكه‌ن، ب تنێ مه‌رجێ وان ئه‌وه ل ژێر فه‌رمانده‌يا “يه‌په‌گێ” دا بن و گۆتژى: “هه‌كه ئه‌و هێز ئه‌وى مه‌رجى قه‌بۆل بكه‌ت، ده‌رگه‌هێ رۆژئاڤا ب روويێ وان دا يێ ڤه‌كرى يه”.
ده‌رباره‌ى وێ چه‌ندێ كا بۆچى “يه‌په‌گه” هاتيه باشوورێ كوردستانێ بێى ل ژێر فه‌رمانا وه‌زاره‌تا پێشمه‌رگێ كوردستانێ بيت، حه‌سۆى گۆت: “يه‌په‌گێ ب تنێ ل سنورێ شنگال پێشره‌وى كريه و ئه‌و ژى ژ ئه‌گه‌رێ كاودانێن ده‌ڤه‌رێ بوويه، هه‌ر ده‌ما كاودان ئاسايى بوون، “يه‌په‌گه” دێ خوه ژ وان وان سنوران ڤه‌كێشيت”.
ئه‌ڤرۆ نيوز:
ئاژانسا رۆيته‌رز ژ زارێ دبلوماتكاره‌كێ ئيرانى به‌لاڤكريه كو ئيران و وه‌لاتێن 5+1 رێكه‌فتن و ب رێكه‌فنه‌كا مێژوويى ژى وه‌سف كر.
ئه‌ڤرۆ رۆژا سێشه‌مبى رێكه‌فتى 14ى تيرمه‌ها 2015ێ، ئاژانسا ده‌نگوباسێن رويته‌رز ژ زارێ دبلوماتكاره‌كێ ئيران كو نه‌ڤيايه ناڤێ خوه ئاشكه‌را بكه‌ت به‌لاڤكر كو ئيران و وه‌لاتێن 5+1 به‌رامبه‌ر كێمكرنا به‌رنامێ ئه‌تومى گه‌هشتنه رێكه‌فتنێ.
هه‌ڤده‌م ئاخفتنكه‌رێ ب ناڤێ ئێكه‌تيا ئورۆپا بۆ رۆيترز راگه‌هاند: بڕياره ئه‌ڤرۆ رۆژا سێشه‌مبى وه‌زيرێن وه‌لاتێن 5+1 ل گه‌ل وه‌زيرێ ده‌رڤه يێ ئيرانێ كۆم ببن و پاشان ل باره‌گايێ نه‌ته‌وێن ئێكگرتى ل ڤيه‌نا كۆنگره‌كێ رۆژنامه‌ڤانى ئه‌نجام بده‌ن.
12 ساله كێشا ئه‌تۆمى يا ئيرانێ و كۆمه‌لگه‌ها نێڤده‌وله‌تى جيهان ب خوه مژوول كريه و د ماوێ بۆرى دا و ب تايبه‌ت پشتى سه‌رۆكاتيا حه‌سه‌ن رۆحانى دانوستاندن د ناڤبه‌را هه‌دو لادا پێشكه‌فتنێن به‌رچاڤ ب خوه ڤه دي بوون.
ئەڤرۆ:
بڕیاردەرێ لیژنا بەرەڤانیکرنێ ژ مافێن رۆژنامەڤانێن کوردستانێ راپۆرتا شەش ھەیڤێن ئێکێ یێن ئیسال ل دۆر پێشێلکاریێن ھەمبەری رۆژنامەڤانان ھاتینە کرن دیار کر کو ھێشتا پێشێلکاری ھەمبەری رۆژنامەڤانان بەردەوامن و جوداھی ل دۆر دانا پێزانینان بۆ سازیێن راگەھاندنێ ھەیە.
جەمال حسێن بڕیاردەرێ لیژنا بەرەڤانیکرنێ ژ مافێن رۆژنامەڤانان دیار کر کو د ھەیاما شەش ھەیڤێن بۆری دا (١٨) حالەتێن پێشێلکاریان ھەمبەری رۆژنامەڤانان ھاتینە تۆمارکرن و گۆت “پێشێلکاری ب ڤی جۆری بووینە: سێ رۆژنامەڤان ھاتینە گرتن و چار ژی ھاتینە قوتان و گەف ل دو رۆژنامەڤانان ھاتینە کرن و د کڤانێ رۆمالکرنا بوویەران دا رێک ل نەە رۆژنامەڤانان ھاتیە گرتن”.
ھەروەسا حسێنی خویا ژی کر زێدەباری کو ژمارا پێشێلکاریان ھەمبەری سالێن بۆری کێم کریە، لێ پێشێلکاری دبەردەوامن و جوداھی د دانا پێزانینان دا ھەیە و گۆت “ل ھندەک دادگەھان کار ب قانوونا ژمارە ٣٥ یا سالا ٢٠٠٧ێ ژ قانوونا رۆژنامەگەریا کوردستانێ ناھێتە کرن”.
ئه‌ڤرۆ نيوز:
ئەندامێ جڤاتا نوونەرێن عیراقێ دیار کر کو گەندەلیەکا مەزن د بەھرا وەلاتیان یا ھەیڤانە یا ئاھێن خوارنێ دا ھەیە و ب تنێ ب رێیا دروستکرنا کارتا ژیر بۆ ھەموو وەلاتیان دێ رێگری ل ڤێ گەندەلیێ ھێتە گرتن و ئەڤ کارتە دێ بیتە دەرگەھەک بۆ نەھێلانا خێزانێن بن دیواری ل عیراقێ.
حاکم سەرحان سلێڤانەی، ئەندامێ لژنا دارایی ل جڤاتا نوونەرێن عیراقێ بۆ ئەڤرۆ گۆت:”بزاڤ یێن دھێنە کرن ل سالا بھێت ئاھێن خوارنێ ب رێیا کارتا ژیر ل سەر وەلاتیان بھێتە بەلاڤکرن، چونکی ب تنێ کارتا ژیر دێ بیتە ئەگەرێ وێ چەندێ خێزانێن بن دیواری و ئەو گەندەلیا د ئاھێن خوارنێ دا دھێتە کرن ل عیراقێ نەمینیت:”
ناڤھاتی دیار ژی کر، پێدڤیە لژنا دەستپاکیێ د بابەتێ گەندەلیا ئاھێن خوارنێ دا کار بکەت و رێ ل وان خێزانان بگرن ئەوێن پێدڤی ب ئاھێن خوارنێ نە و بەردەوام وەردگرن و گۆت:”نھا ئاھێن خوارنێ ژ ھندەک کەسێن مووچێ وان بلند ھاتیە بڕین و ژ ھندەکان نەھاتینە بڕین، بەلێ ڤێ چەندێ نە دادپەروەری یا ئێخستیە د بەلاڤکرنا ئاھێن خوارنێ دا و ب تنێ ب رێیا کارتا ژیر دێ کونترۆل ل سەر ڤێ چەندێ ھێتە کرن”.
ناڤبری ئاشکرا ژی کر، ھەکەر کارتا ژیر بۆ ھەموو وەلاتیێن ھەرێما کوردستانێ و عیراقێ ھاتە دروستکرن ژی دێ ئاھێن خوارنێ ھەر ب رێیا بریکارێن بەلاڤکرنا ئاھێن خوارنێ ھێنە بەلاڤکرن.
ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ خشتێ به‌لاڤكرنا مووچێ هه‌يڤا گۆلانێ يێ ئه‌ڤرۆ رۆژا سێشه‌مبى رێكه‌فتى 14ى تيرمه‌ها 2015ێ كو بهێنڤه‌دانا فه‌رمى يه به‌لاڤكر.
ب گۆره‌يى راگه‌هاندنا پشكا په‌يوه‌ندى و راگه‌هاندنێ ل وه‌زاره‌تا دارايى و ئابوورى يا حوكمه‌تا هه‌رێما كوردستانێ كو دانه‌ك ب ده‌ست ئه‌ڤرۆ نيوز كه‌فتيه، تێدا هاتيه: ئه‌ڤرۆ رۆژا سێشه‌مبى 14ى تيرمه‌ها 2015ێ، سه‌ره‌رايى وێ چه‌ندێ كو بهێنڤه‌دانا فه‌رمى يه، به‌لێ هه‌ر ئێك ژ فه‌رماندا پێشمه‌رگێ زێره‌ڤانى و هێزا ئاماده دێ مووچێ هه‌يڤا گۆلانێ يێ ئه‌ڤ ساله وه‌رگرن.
ئه‌ڤرۆ نيوز:
رێڤەبەرێ ناحیا چەمانکێ دیار کر کو دەست ب چێکرنا پرۆژێ جادا ناحیا چەمانکێ – دەڤەرا نەھلێ ھاتە کرن و ب تمامبوونا وێ ھەردو قەزایێن ئامێدیێ و ئاکرێ پێکڤە دێ ھێنە گرێدان.
ھەڤال محەمەد شەریف، رێڤەبەرێ ناحیا چەمانکێ بۆ ئەڤرۆ خویا کر، درێژاھیا جادێ ١٥ کیلۆمێترن و و شەش ملیار دینار بۆ ئەنجامدانا وێ ھاتینە تەرخانکرن و گۆت: “پرۆژەکێ گرنگە ل دەڤەرا چەمانکێ دھێتە ئەنجام دان، بۆ جارا ئێکێ یە جادەکا مودرن و قێرکری دێ گەھیتە ھەشت گوندێن مەسیحی ل سنوورێ ناحیێ، تمامبوونا پرۆژەی دێ مفایەکێ مەزن بۆ دەڤەرێ ھەبیت و دەڤەرا ئامێدیێ و ئاکرێ ب رێیا چەمانکێ – نەھلێ پێکڤە گرێدەت”.
ناڤبری ئاماژە ب وێ چەندێ ژی کر، بەری نوکە رێیا ئامێدیێ بۆ ئاکرێ گەلەک یا دوور بوو، وەلاتی د رێیا دھوکێ را دچوونە ئاکرێ و گۆت: “ب چێکرنا ڤێ جادێ ژ بلی ئەو گوندێن دکەڤنە سەر رێیێ دێ مفا ژێ وەرگرن، ھەروەسا رێ د ناڤبەرا ئاکرێ بۆ ئامێدیێ دا دێ نێزیک بیت”.
رێڤەبەرێ ناحیا چەمانکێ ئاشکرا ژی کر، نوکە کارکرن د پرۆژەی دا یێ بەردەوامە و خودێ حەز کەت د دەمێ خوە یێ دیارکری دا دێ ب دووماھی ھێت و کەڤیتە دخزمەتا وەلاتیێن ھەردو قەزایان دا.
ئه‌ڤرو نیوز ،بارزان مزوورى
عصمت ره‌جه‌ب، به‌رپرسێ لقا 14 ل مووسل بو روژناما ئه‌ڤرو دیار كر كو ئه‌ڤرو سپێدێ 13ته‌موزێ 2015 چه‌كدارێن تیرورستێن داعش بریاره‌ك ب زورى ل سه‌ر هه‌مى كارمه‌ندێن نه‌خوشخانه‌یێن مووسل سه‌پاندیه كو بو ماوێ 24 ده‌مژمێرا كارمه‌ند نه‌خوشخانێن مووسل بریارا وان جێ به جێ بكه‌ن و هه‌ر كه‌سێ بریارا وان جێ به جێ نه‌كه‌ن دهێته سێداره‌دان كو نه‌خوشخانه‌یێن مووسل ب گشتى هه‌مى بهێنه ڤالاكرن ژ نه‌خوشیێن پارێزگه‌ها مووسل و هه‌مى ل نه‌خوشخانێ ده‌ربێخن چونكو گه‌له‌ك بریندار كه‌فتینه ده‌ستێن داعشدا كو ل بوردومانێن فروكه‌یا یێن ڤان دو روژا و شه‌رێ شه‌نگال و گوندێ گابارێ شكه‌ستن خوارینه ل سه‌ر ده‌ستێ پێشمه‌رگه‌ى و ل ده‌ستپێكا بریارێ نوژداره‌كێ نه‌خوشخانا مووسل بناڤێ وه‌لید تحان سێداره‌دا ل پێش چاڤێن نوژدارا .
ناڤبرى دیار كر كو دهه‌مان روژدا چه‌كدارێن تیرورستێن داعش چار پێش نڤێژێن سه‌ر ب رێڤه‌به‌ریا ئه‌وقافا مووسل ڤه بناڤێ پێش نڤێژ عومه‌ر بركات نازم نعیمى و درید عبدالله و محه‌مه‌د محسن سێداره‌دان .
ناڤبرى گوت ژى : دهه‌مان روژدا چه‌كدارێن تیرورستێن داعش دوو قوتابخانه‌یێن ئاینێ مه‌سیحیان ل ده‌ڤه‌را فلاج سه‌ر ب پارێزگه‌ها مووسل ڤه TNT كرن و په‌قاندن .
ئه‌ڤرۆ نيوز، قائيد ميرۆ:
پەیڤدارێ فڕاکسیۆنا پارتی دیموکراتی کوردستان ئاشکراکر، پشتی جەژنێ دێ داخوازا رۆھنکرنێ ل ئێکەتیێ کەن ل دۆر گازندەیێن وان دبارەيى مەلەفێ پتڕۆلا ھەرێما کوردستانێ.
محەمەد عەلی یاسین، پەیڤدارێ فڕاکسیۆنا پارتی ل پەرلەمانێ کوردستانێ بۆ ئەڤرۆ نیۆز راگەھاند: “مە گازندە ژ مەکتەبا سیاسیا ئێکەتی نیشتیمانی کوردستان ھەنە، ژ بەر کو دبێژن مە ئاگەهـ ژ مەلەفێ پتڕۆلا ھەرێما کوردستانێ نینە.
محه‌مه‌د عه‌لى دیارکر، پشتی جەژنێ ب رێیا سەرۆکایەتیا پەرلەمانێ کوردستانێ دێ داخوازا رۆھنکرنێ ژ ئێکەتیێ کەن، كا بۆچی دبێژن ئەو ئاگەھداری مەلەفا پتڕۆلێ نینن.
پەیڤدارێ فڕاکسیۆنا پارتی دیموکراتی کوردستان، گۆتژى: “دا كو رايا كوردستانى و گشتى ئاگه‌هدار بكه‌ين كا بۆچى ئێكه‌تيێ پێزانين ل سه‌ر سێكته‌رێن په‌ترۆل و ئاسايش و سياسه‌تا ئابوورى نينن، دێ قوباد ته‌له‌بانى گازى په‌رله‌مانێ كوردستانێ كه‌ين، يان هه‌كه هه‌نه ژى دا بزانين چونكو ئه‌و جێگرێ سه‌رۆكێ حوكمه‌تێ يه، دبيت ژى ئه‌ڤه بۆ وان تێكنه‌گه‌هشتنێن ناڤ ئێكه‌تيێ دا ب ڤه‌گه‌ريت”.
نيشاندان