ئەڤرۆ نیوز،زنار تۆڤی:

پشتی کۆمبوونا شه‌شێ يا لایەنێن سیاسی ل ھۆلا سەعەد عەبدولا ل ھەولێرا پایتەخت دناڤبەرا ھەر پێنج لایەنێن سیاسی دا ھاتیە ئەنجامدان و د وێ کۆمبوونێدا لایەنێن سیاسی نەگەھشتینە چ ئەنجامان،ھندەک لایەن د وێ کۆمبوونێ دا بەشدار نەبووین،بریارە ئەڤرۆ رۆژا سێشەمبی ١-٩-٢٠١٥ مەسعود بارزانی سەرۆکێ ھەرێما کوردستانێ دگەل وان لایەنان کۆمبیت کو بەشداری د دوماھیک کۆمبوونا لایەنێن سیاسی دا ل کوردستانێ دا نەکری.

ئه‌ڤرۆ نيوز:

رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان راگەھاند، د ماوەیێ سێ سالێن بۆری دا وان نێزیکی ١٠ ھزار مامەلێن زیندایێن سیاسی بۆ ئەنجوومەنێ وەزیران و وەزارەتا دارایی یا حوکمەتا ھەرێما کوردستانێ ھنارتینە بۆ ھندێ مۆچەیەک بۆ وان بھێتە تەرخانکرن، بەلێ ژ بەر قەیرانا دارایی ھەتا نوکە ئەو مامەلە نەھاتینە وەرگرتن و د راگرتینە.

ئەحمەد مامە رەسول، رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان بۆ ئەڤرۆ دیار کر، د ھەیاما بۆری دا وان سێ لیستێن ناڤێن زیندانیێن سیاسی بۆ ئەنجوومەنێ وەزیران و وەزارەتا دارایی ھنارتینە بۆ ھندێ مۆچەیەکێ ھەیڤانە بۆ وان بھێتە تەرخانکرن و د وان لیستان دا ناڤێ نەە ھزار و ٩٨٧ زیندانیێن سیاسی تێدا بوون و گۆت ژی: ھەتا نوکە بەرسڤا ڤان مامەلان نەھاتیە دان و ھەر ل ئەنجوومەنێ وەزیران ماینە و ھاتینە پشتگوە ھاڤێتن.

مامە رەسول ئاماژە دا وێ چەندێ، ل وەزارەتا کاروبارێن شەھید و ئەنفالکریان ھەموو رێکارێن قانوونی بۆ مامەلێن وان ھاتینە کرن و چو ئاریشە تێدا نەماینە ژ نوو بۆ ئەنجوومەنێ وەزیران ھاتینە ھنارتن، بەلێ ژ ئەگەرێ قەیرانا دارایی یا کو ئەڤە دو سالە ب سەر ھەرێما کوردستانێ دا ھاتی، ئەڤ مامەلە ھاتینە راگرتن و گۆت ژی: ھەکە ئەڤ مامەلە ھەموو ب رێڤەبچن و مۆچە بۆ وان بھێتە تەرخانکرن، دێ ھەیڤانە ب ٢٠٠ ملیار دیناران ل سەر حوکمەتا ھەرێما کوردستانێ تەکلیف بن، لەو حوکمەتێ ئەڤ مامەلە راگرتینە ھەتا کو قەیرانا دارایی ب دووماھی دھێت.
ناڤبری خویاژی کر، پشتی راگرتنا مامەلێن وان زیندانیێن سیاسی، مە پێشنیازەک پێشکێشی ئەنجوومەنێ وەزیران کریە و ژێ خواستیە ل شوونا مۆچەی ھەموویێ، ب تنێ مۆچێ بنەرەت بۆ وان بھێتە تەرخانکرن، بەلێ ھوسا دیاربوو کو حوکمەت خوە نەشێت وی پارەی ژی بدەت و گۆت ژی: ھەتا قەیرانا دارایی ب دووماھی نەھێت، باوەرناکەم ئەڤ مۆچە بھێنە خەرجکرن.
ئەحمەد مامە رەسول ئاشکرا کر، نھا ل ھەرێما کوردستانێ نێزیکی پێنچ ھزار ١٥٦ زیندانیێن سیاسی ھەنە کو ھەیڤانە مۆچێ خوە ژ حوکمەتێ وەردگرن و د تۆمارکرینە و ھندەک ژ وان ھەیڤانە ٥٠٠ ھزار دیناران وەکو مۆچە وەردگرن و ھەنە ژی ھەتا ٢٠٠ ھزار دیناران وەردگرن و گۆت ژی: ئەڤ زیندانیێن سیاسی ھەیڤانە نێزیکی دو ملیار و ٢٠٠ ھزار دیناران ژ حوکمەتا ھەرێمێ وەردگرن.
ل دور دانا پارچە ئەردان بۆ زیندانیێن سیاسی رێڤەبەرێ کاروبارێن زیندانیێن سیاسی ل وەزارەتا کاروبارێن شەھید و ئەنفالکریان خویا کر، ھەتا نوکە نێزیکی دو ھزار و ٥٤٥ زیندانیێن سیاسی ل ھەرێما کوردستانێ پارچە ئەرد ژ حوکمەتێ وەرگرتینە و نھا بۆ ٨٨٨ زیندانیێن دی ژی فەرمانا دانا پارچە ئەردی دەرچوویە و ل نێزیک دێ ئەو ژی پارچە ئەردان وەرگرن.

ئەڤرۆ نیوز،زنار تۆڤی:
بریاربوو ئەڤرۆ کۆمبوونا سەرۆکێن فراکسیۆنێن لایەنێن سیاسی ل پەرلەمانێ کوردستانێ بهێته ئەنجامدان،لێ ئەو کۆمبوون نەهاتە ئەنجامدان،هەر چەندە ئەڤرۆ خۆلا پاییزی یا پەرلەمانێ کوردستانێ دەستپێکریە.

سەرۆکێ فراکسیۆنا پارتی ل پەرلەمانێ کوردستانێ دیارکر:ل رۆژێن بهێن دێ سەرۆکێن فراکسیۆنان دگەل ئێک کۆمبن،لێ دڤێ خۆلێ دا پەرلەمانی کێشێن ناڤ پەرلەمانی دەرخستینە ناڤ جادێ،لێ هەر پارتی پەرلەمانی ب دۆهی و ئەڤرۆ و داهاتیێ خوە دزانیت.

سەرۆکێ فراکسیۆنا پارتی ئۆمێد خۆشناوی زێدەتر گۆت:پەرلەمانی شەرعیەتا خوە هەیە،لێ تەوافۆقێ شەرعیەتا خوە نەمایە.

ئه‌ڤرۆ نيوز:

رێڤه‌به‌ريا گشتى يا كونترۆلا كاره‌با هه‌رێما كوردستانێ راگه‌هاند، ل نيڤا ڤێ هه‌يڤێ كاره‌ب دێ بيته‌ 24 ده‌مژمێر و ب به‌رده‌مى دێ ده‌نه‌ وه‌لاتيان.

پشتى كۆمبوونا ناڤبه‌را رێڤه‌به‌ريا كۆنترۆلا كاره‌با پارێزگه‌هان و رێڤه‌به‌ريا گشتى يا كونترۆلا كاره‌بێ ل هه‌رێما كوردستانێ، رێڤه‌به‌ريا گشتى يا كونترۆلا كاره‌بێ خشته‌كێ نوو يێ به‌لاڤكرنا كاره‌بێ بۆ هه‌يڤا ئيلۆنێ دانا و تێدا ژ نيڤا هه‌يڤێ وێ ڤه‌ دێ كاره‌ب بيته‌ 24 ده‌مژمێرى.

ده‌رباره‌يى ڤان رۆژێن ده‌سێپكا هه‌يڤا ئيلۆنێ ژى حوكموتێ بڕيار دايه‌ 21 ده‌مژمێران كاره‌بێ دابين بكه‌ت و ب تنێ سێ ده‌مژمێران كاره‌با موه‌ليده‌ى دێ هه‌بيت و بهايێ ئه‌مپێران ژى ژ لايێ پارێزگه‌هان ڤه‌ دێ هێته‌ دياركرن.

ئەڤرۆ نیوز:
ژ ئەگەرێ پێنەدانا مافێن وان و زیندانکرنا د ناڤ خانیەکی دا دو کرێکارێن ژن خوە د ئاڤاھیەکێ بلند دا ھاڤێتە خوار و د ئەنجامدا برینداربوون، سەرۆکێ لژنا مافێن مرۆڤی ژی ئاشکرا کر، ھژمارەکا کرێکارێن دی ژ لایێ کۆمپانیا نافھاتی ڤە ھاتینە زیندانیکرن و وەزارەتا ناڤخوە ھاتیە ئاگەھدارکرن.
سۆران عومەر، سەرۆکێ لژنا مافێن مرۆڤی ل پەرلەمانێ کوردستانێ بۆ رۆژناما ئەڤرۆ گۆت:” بەری چەند رۆژان ل تاخێ بەختیاری یێ باژێڕێ ھەولێرێ دو کرێکارێن ژن یێن بیانی ژبەر تەپەسەرکرنا وان ژلایێ خۆدانێ کۆمپانیەکا ئینانا کرێکارێن نافمالیێ خوە ژ ئاڤاھیەکێ بلند دا ھاڤێتیە خوارێٍ و نوکە رەوشا ساخلەمیا وان تێکچوویە و برینداربووینە”.
ناڤھاتی دیار کر، ل دووڤ وێ دووڤچوونا وان کری دیاربوویە کو ھژمارەکا ژنێن دی د ناڤ ئەڤی ئاڤاھیێ بلند ھەنە و ب مەرەما کارکرنێ ژ لایێ کۆمپانیەکا کەرتێ تایبەت ھاتینە ھەرێما کوردستانێ، بەلێ خۆدانێ وێ کۆمپانیێَ مافێ وان کرێکاران نەدایێ و وەکو زیندانی د ناڤ خانیەکی دا ھاتینە دەستەسەرکرن و چو رێ پێنەھاتینە دان بۆ کارکرنێ ژبەر ڤێ چەندێ نەچاربووینە بۆ خوە رزگارکرنێ خوە ل سەر بانێ خانیەکێ بلند ب ھاڤێژنە خوارێ.
ل دووماھیێ سۆرانی دیار کر، کو پشتی پێزانین گەھشتینە وان لژنا مافێن مرۆڤی دووڤچوون بۆ ڤێ روودانێ کر و دیاربوو ئەڤان دو کرێکارێن بیانی خوە ھاڤێتیە خوار و د ئەنجامدا برینداربووینە و نوکە ژ بۆ چارەسەریێ ھاتینە ڤەگۆھاستن بۆ نەخۆشخانێ و گۆت: “ئەڤان کرێکاران ئاشکرا کریە کو زۆری ل چەندین کرێکارێن دی یێن بیانی دھێتە کرن و مافێن وان ناھێنەدان، ژبەر ڤێ چەندێ مە ژی وەزارەتا ناڤخوە ئاگەھدارکریە ب زووترین دەم دووڤچوونێ بۆ ڤی بابەتی بکەت و خۆدانێ کۆمپانیێ بھێتە سزادان و کرێکار بھێنە رزگارکرن”.