ئەڤرۆ نیوز:
شیرەتکارێ شاھێ سعوودیێ و بەرپرسێ وی وەلاتی د دانوستاندنێن ل گەل ئیسرائیلێ د دیدارەکێ دا ل گەل ئاژانسا سپۆتینک یا نووچەیان دیار کر کو د دەمەکی نێزیک دا دێ نەخشێ رۆژھەلاتا ناڤین ھێتە گوھۆرین و ئیران دێ ل سەر چار پارچان ھێتە دابەش کرن و ھەکە کورد ژی دەولەتا خوە رابگەھینن چ کەسەک نەشێت ئاستەنگیان ل ھەمبەر وان دروست کەت.
ئەنوەر ماجد عەشقی شیرەکارێ شاھێ سعوودیێ و بەرپرسێ دانوستاندنێن وی وەلاتی ل گەل ئیسرائیلێ د دیدارەکێ دا ل گەل ئاژانسا سپۆتینگ سەبارەت ب پاشەرۆژا رۆژھەلاتا ناڤین و پرسا کوردی داخۆیانیێن گرنگ دان و دیار کر کو روودانێن نھا نیشا ددەن کو دێ نەخشێ سیاسی یێ دەڤەرا مە د دەمەکێ گەلەک نێزیک دا ھێتە گوھۆرین، ئیران بزاڤێ دکەت کو ئیمپراتورکیا فارس زندی بکەت و ل ھەمبەر وێ یەکێ ژی تورکیا دڤێت ئیمپراتوریا ئۆسمانیان زندی بکەت و ناکۆکیێن مەزھەبی ژی رۆژ ب رۆژێ بەرفرەھتر دبن و گۆت: (ناکۆکیێن ل دەڤەرێ و شەرێ نھا نیشا ددەت کو بەرنامێ سەد سال بەری نھا ھاتیە دانان ژ ناڤ چوویە و ئێک ژ گوھۆرینێن ل دەڤەرێ ژی ئاڤابوونا دەولەتا کوردی یە و ھەروەسا دێ ئیران ژی ھێتە پارچەکرن و تورکیا ژی دێ گوھۆرین دروست ببن).
ناڤھاتی د پشکەکا دی یا ئاخڤتنا خوە دا ئەو یەک ژی دیار کر کو نھا دڤێت کورد بخوە بریارێ بدەن، چونکو دەلیڤەکا گەلەک مەزن ھاتیە پێش و ھەکە کورد بخوە بریارێ بدەن و دەولەتا خوە رابگەھینن چو کەسەک نەشێت ئاستەنگیان ل ھەمبەر وان دروست بکەت و ژ بەر ھندێ ژی نھا ھەموو تشتەک د دەستێ کوردان بخوە دایە و گۆت: (دەولەتێن کو کوردستان د ناڤبەرا وان دا ھاتینە پارچەکرن ئەڤرۆکە د رەوشەکا گەلەک خراب دا دژین و لاواز بووینە، ناکۆکیێن وان ل گەل ھەڤدو ھەیە و ئەوە ژی بۆ کوردان دەلیڤەکا زێرینە و دڤێت کورد بخوە بریارا خوە بدەن کا وان چ دڤێت و دێ چاوا بژین).
سەبارەت ب وێ یەکێ ھەکە کورد دەولەتا خوە راگەھینن دێ تورکیا و ئیران چ ھەلویستەکێ نیشا بدەن ژی شیرەتکارێ شاھێ سعوودیێ راگەھاند کو جارێ دڤێت ڤێ یەکێ دیار بکەین کو ھەلویستێ تورکیا و ئیرانێ سەبارەت ب کوردان نھا وەک ئێک نینە، چونکو ب تایبەتی پشتی کو ل عیراقێ کورد وەک نیڤ دەولەت خوە برێڤە دبەن، تورکیا دیت کو بەرژەوەندیێن وان ل گەل کوردان گەلەک زێدەیە و ب تایبەتی ژی د بیاڤێ ئابووری دا ھەرێما کوردستانێ مفایەکا گەلەک مەزن گەھاندە تورکیا و ژ بەر ھندێ تورکیا نەشێت وێ یەکێ ژ دەستێ خوە بدەت و ئیرانێ ژی سیاسەتا دی ھەیە و گۆت: (ھەکە کورد بخوە بریارێ بدەن و د ناڤا خوە دا خودان ستراتیژیەکا ھەڤپشک بن، ھەلویستێ ئیران و تورکیا چو کاریگەریەکا وەسا مەزن ل پاشەرۆژا وان ناکەت، چونکو ھەکە ھندەک دژبەریا کوردان بکەن دێ گەلەک وەلات ژی پشتەڤانیێ ل کوردان بکەن و ئەوە ژێ بێگومان بۆ کوردان دێ یا گرنگ بیت و نھا ژی گەلەک وەلاتێن جیھانێ ب رەنگەکێ ئاشکرا پشتەڤانیێ ل ئاڤاکرنا دەولەتا کوردی دکەن و ھەکە کورد دەولەتا خوە رابگەھینن رەنگە گەلەک وەلاتێن دیتر کو ھەتا نھا بێدەنگن ئەو ژی پشتەڤانیێ ل کوردان بکەن).

ئەڤرۆ:
ئەندامەکێ سەرکردایەتیا پارتی دیموکراتی کوردستان رەخنە ل بزاڤا گۆڕانێ گرتن و راگەھاند، گۆڕان شەرمزارا دەنگدەرێن خوەیە و ل شوینا بەرنامەکی بۆ کوردستانێ پێشکێش بکەت، مژوولی فەوزایێ یە.
عەلی عەونی ئەندامێ سەرکردایەتیا پارتی بۆ نوچە نیت گوت” پرسا دستووری و سەرۆکاتیا ھەرێما کوردستانێ پەیوەندی ب حزب و کەسەکێ ڤە نینە ، بەلکو پەیوەندی یا ب ھەموو خەلکێ کوردستانێ ڤە ھەی، لەوما ئەڤ پرسە پێدڤی ب سازانێ نە، لژنەک ژ ھەموو حزبان یا ھاتیە پێکئینان و دانوستاندنێ دکەن ل سەر دانانا دستوورێ ھەرێما کوردستانێ کو پرسا سەرۆکاتیا ھەرێمێ ژی یا تێدا و نوونەرێ گۆڕانێ ژی یێ دناڤ وێ لژنێ دا و دانوستاندنێ دکەن”.
ل دۆر رەشنڤیسێ پرۆژێ گۆڕانێ ئەوێ ل ڤێ دووماھیێ ھاتیە پێشکێشکرن، ڤی ئەندامێ سەرکردایەتیا پارتی گوت” بەرچاڤکرنا ڤی بابەتی ژلایێ گۆڕانێ ڤە لادانا ژ وی پرەنسیبی، یان ژی لێدانا وی کاری یە یێن ئەندامێن وێ لژنێ پێ ھاتینە راسپاردن، لەوما ب دیتنا من گۆڕان زێدەتر یا مژوولی ئینانا فەوزایێ یە ژ وێ چەندێ کو بەرنامەکی بۆ کوردستانێ پێشکێش بکەت”.
عەلی عەونی گوت ژی” ئەو لژنەیە نوکە یا دستووری ددانیت، کارێ وێ چیە ھەکە گۆڕانێ پرۆژە پێشکێشکر و دەربازبوو؟ ئەو لژنەیە بۆ چیە، گۆڕانێ دڤێت ئەو کار و رێککەفتنا گشتی یا ھەموو حزب و لایەنان کری، ژ ناڤببەت”.

ب دیتنا ئەندامێ سەرکردایەتیا پارتی، ئەڤ پێرابوونا گۆڕانێ کری ھۆکارەکێ دی یێ ل پشت و گوت” ئەم ھەست ب وێ چەندێ دکەین کو گۆڕان یا ئیحراج بووی بەرامبەر دەنگدەرێن خوە، چونکی سۆزێن مەزن دابوون و دەمێ ھاتینە د مەیدانێ دا، ژ نوو زانی پرۆسا ئیدارەکرنا حوکمەتەکی ب وی بارودۆخێ کوردان ھەی کو ل ھەرچار دەورێن وان داگیرکەر و دوژمن و نەحەزن و ئەو ھەموو شەڕ و کێشێن ھەین کارێ سۆزان نینە و زەلامێ ئاسنی و کارێ دڤێت، ئەوان ب گەف و فەوزا دەستپێکر و نوکە یێ دبینن خەلک یێ دبێژیتە وان ( ئێ باشە ھەوە دگوت ب رێکخستنا داھاتێ ناڤخوەییێ ھەرێما کوردستانێ تێرا ب رێڤەبرنا دو دەولەتان دکەت، بۆچی ھوون وێ نێڤ دەولەتێ ب رێڤەنابەن و وەزیرێ دارایی یێ ھەوەیە و ھەموو داھات ژی یێن ددەستی وی دا) ، لەوما بۆ دەربازبوونێ ژ ڤان گازندێن دەنگدەرێن خوە، مژوولی پەداکرنا فەوزایەکا دی نە”.