ئه‌ڤرۆ:

وه‌زیرێ ده‌رڤه‌ یێ روسیا راگه‌هاند ده‌م یێ هاتی كو ئه‌مریكا هه‌موو هێزێن خوه‌ ژ سووریێ ڤه‌كێشیت، چونكو هه‌كه‌ ئه‌مریكا هێزێن خوه‌ ژ باكورێ سووریێ ڤه‌كێشیت وی ده‌می دێ ده‌لیڤه‌كا دی هێته‌ پێش دا كورد و شام ب رێیا دانوستاندنان پرسێن د ناڤبه‌را خوه‌ دا چاره‌سه‌ر بكه‌ن.

ل هه‌مبه‌ر هه‌لویستێ وه‌زیرێ ده‌رڤه‌ یێ روسیا ژی جۆی هود جێگرێ وه‌زیرێ ده‌رڤه‌ یێ ئه‌مریكا راگه‌هاند كو هێزێن وان دێ ل سووریێ مینن و جارێ چو به‌رنامێ ئه‌مریكا بۆ هندێ نینن كو هێزێن خوه‌ ژ باكورێ سووریێ ڤه‌كێشیت، چونكو مه‌ترسیا داعشێ و رژێما به‌شاری ل سه‌ر خه‌لكێ كورد و نه‌ته‌وێن دی ل باكورێ سووریێ به‌رده‌وام دكه‌ت و هێزێن سووریا دیموكرات ژی د شه‌رێ ل دژی داعشێ دا گه‌له‌ك قوربانی داینه‌ و هه‌ڤپه‌یمانێ سه‌ره‌كی یێ ئه‌مریكا نه‌ ل سووریێ، ژ به‌ر هندێ ژی ئه‌مریكا هه‌ڤپه‌یمانێن خوه‌ ل سووریێ ب تنێ ناهێلیت و گۆت: (هاریكاریا مه‌ بۆ هێزێن سووریا دیموكرات دێ به‌رده‌وام بیت، چونكو داعش و گرۆپێن دی یێن تیرۆرستی ل باكورێ سووریێ خوه‌ ب رێكخستن دكه‌ن و دشێن جاره‌كا دی ده‌ست ب كریارێن تیرۆرستی ل دژی خه‌لكێ سڤیل بكه‌ن، ژ به‌ر هندێ ژی ئه‌مریكا جارێ هێزێن خوه‌ ژ سووریێ ڤه‌ناكێشیت).

ل دۆر هه‌لویستێ وه‌زیرێ ده‌رڤه‌ یێ روسیا ژی ناڤهاتی راگه‌هاند كو روسیا دڤێت مفای ژ ئالۆزیێن نها ژ سووریێ وه‌ربگریت، به‌ری نها گه‌له‌ك وه‌لاتێن رۆژئاڤایی بزاڤا هندێ كرن كو قه‌یرانا سووریێ ب رێیا دانوستاندنان بهێته‌ چاره‌سه‌ر كرن، لێ روسیا دڤێت ب ریێا هاریكاریێن نێڤده‌وله‌تی كو بگه‌هنه‌ سووریێ پێگه‌هێ خوه‌ ب هێز بكه‌ت و قه‌رێن كو به‌ری نها داینه‌ سووریێ ژێ وه‌ربگریت، ئانكۆ روسیا پتر بۆ به‌رژه‌وه‌ندیێن خوه‌ كار دكه‌ت و خه‌لكێ سووریێ دكه‌ته‌ قوربانی، روسیا كار بۆ ئاشتی و ئارامیێ ل سووریێ ناكه‌ت و روسیا ب پشته‌ڤانیا به‌شاری بوویه‌ ئه‌گه‌رێ هندێ كو ب هزاران وه‌لاتیێن سڤیل ببنه‌ قوربانی.

جێگرێ وه‌زیرێ ده‌رڤه‌ یێ ئه‌مریكا ئه‌و یه‌ك ژی نه‌ ڤه‌شارت كو ئه‌مریكا هه‌تا نها گه‌له‌ك كارێن گرنگ ل باكورێ سووریێ ئه‌نجام داینه‌ و ستراتیژیا ئه‌مریكا ل هه‌مبه‌ر كوردان ل سووریێ نه‌هاتیه‌ گوهۆرین و هاریكاریا ئه‌مریكا بۆ كوردان و هێزێن سووریا دیموكرات دێ به‌رده‌وام بیت.

ئه‌ڤرۆ:

پشكا رۆژنامه‌ڤانی یا سه‌ر ب ده‌زگه‌هێ ره‌وشه‌نبیری و راگه‌هاندنا پارتی دیموكراتی كوردستان به‌رسڤا داخۆیانیێن دۆران كالكان ئه‌ندامێ كۆمیتا ب رێڤه‌برنا pkk دده‌ت كو ل رۆژا 21 ڤێ مه‌هێ پێگه‌هێ (ANFNEWS) یێ سه‌ر ب pkk به‌لاڤكربوون.

د به‌رسڤا ده‌زگه‌هێ ره‌وشه‌نبیری و راگه‌هاندنا پارتی دا هاتیه‌” هه‌موو ئه‌و پێزانینێن كالكانی به‌حسكرین د شاشن و زێده‌تر وه‌كو راپۆرته‌كێ بۆ رازیكرنا ده‌ره‌كی بوون، كو ئه‌و پێزانینه‌ د نهێنی نه‌ و هیچ كه‌س و لایه‌نه‌ك د ئاگه‌هدار نینن ل سه‌ر و ئاشكراكرنا وان پارتی ئیحراج دكه‌ت! به‌لێ كالكان و pkk شاش ده‌رچوون، چونكه‌ ئه‌و ب خوه‌ ژ هه‌موویان باشتر دزانن، پارتی ب ئاشكرایی هه‌لویستی وه‌ردگریت و ب رۆهنی ئاخڤتنێن خوه‌ دكه‌ت.

هه‌روه‌سا تێدا هاتیه‌ ژی” جهێ سه‌رنجێ یه‌، كالكان، به‌رۆڤاژی هه‌ر داخۆیانیه‌كا 20 سالێن بۆری یێن سه‌رانێن pkk، ناڤێ كورد و كوردستان چه‌ند جاران دوباره‌كر، ئه‌ڤه‌ ژی بزاڤه‌كا دی یا چه‌واشه‌كرنا خه‌لكێ كوردستانێ یه‌، چونكه‌ ئه‌م هه‌موو دزانین چه‌ندین ساله‌ ناڤێ كورد و كوردستان د فه‌رهه‌نگ و ئه‌ده‌بیاتێن سه‌رانێن pkk دا نه‌مایه‌ و په‌یوه‌ندیا سه‌رانێن pkk ب كورد و كوردستانێ تنێ خوه‌سه‌پاندنا وانه‌ ب سه‌ر ئاخه‌كێ دا كو كوردستانه‌ و ئیستیغلالكرنا وان گه‌نجێن كورد یێن سه‌رانێن pkk كرینه‌ قوربانیێن شه‌رێن خوه‌”.

د به‌رسڤێ دا هاتیه‌ ژی” دیاره‌ كالكان وهه‌اڤلێن خوه‌ یێن گه‌هشتینه‌ وێ راستیێ ئێدی درووشم ب سه‌ر خه‌لكی دا ده‌رباز نابن، ئه‌و رۆژه‌ ژی هند نه‌مایه‌ كو پێدڤیه‌ سه‌رانێن pkk به‌رسڤا پرسیارێن دایك و بابێن هزاران قوربانیێن ده‌ستێ خوه‌  بده‌ن: رۆلێن مه‌ ل پیناڤی چ دا كرنه‌ قوربانی؟ كور و كچێن مه‌ چ دكه‌ن ل گاره‌ و مه‌تین و باتیفا و شنگالێ و ماوه‌ت و شارباژێر و پنجوین؟”.

د پشكه‌كا دی یا به‌رسڤێ دا هاتیه‌” كالكان چه‌ندین جاران به‌حسێ هاریكاریێ بۆ هه‌رێما كوردستانێ دكه‌ت، جارێ خه‌لكێ كوردستانێ باش دزانن pkk ژ جوگرافیا راسته‌قینه‌ یا چالاكیێن خوه‌ یا ره‌ڤی، نه‌ ئه‌م و نه‌ چ لایه‌نه‌ك، نه‌ نوكه‌ و نه‌ ل ده‌مێن بۆری، داخوازا هاریكاریێ ژ pkk نه‌كریه‌، ئه‌و ژ رۆژا ئێكێ و هه‌تا نوكه‌ تنێ بارگرانی و جهێ سه‌رئێشێ و شه‌ر و شوریێ بوون بۆ خه‌لكێ كوردستانێ، ب سه‌دان جاران هاتینه‌ ئاگه‌هداركرن كو نه‌بنه‌ بیانوو ب ده‌ستێ ڤی و یێ دی تاكو ئاخا كوردستانێ توپباران و داگیر بكه‌ن، به‌لێ ژ به‌ركو ئه‌و رێكخراوه‌كا ئایدیۆلۆژی یا داخستی یه‌، به‌رده‌وام ب دفن بلندی به‌رسڤ ددان”.

ئاماژه‌كر” كالكان به‌حسێ هاریكاریا pkk دكه‌ت د شه‌رێ حه‌فته‌نینێ دا، لێ دیاره‌ یێ بێ ئاگه‌هه‌ ژ وێ چه‌ندێ كو چ جاران هێزێن حوكمه‌تا ئیراقێ ل وێ ده‌ڤه‌رێ نه‌بوون، تاكو شه‌ره‌ك دروست ببیت و pkk هاریكاریا پێشمه‌رگه‌ی كربیت و پارتی چ جاران كارێن هه‌ڤپشك ل گه‌ل pkk نه‌كرینه‌ و ئه‌و شه‌رێن كالكان د ده‌مێ 40 سالان دا به‌حس وان دكه‌ت، هه‌ر هه‌موو دژی بزاڤا رزگاریخوازا كوردستانێ و پاشی دژی به‌رژه‌وه‌ندیێن خه‌لكێ هه‌رێما كوردستانێ و ده‌زگه‌هێن وێ یێن شه‌رعی و كێمترین شه‌رێن وان ل مه‌یدانا راسته‌قینه‌یا یا وان بوو”.

هه‌روه‌سا دیاركریه‌” ئه‌م نزانین ب چ مه‌نتقه‌كی كالكان چه‌ندین جاران دوباره‌ دكه‌ت كو ئه‌و بۆ ئازادیا كوردستانێ یێن هاتینه‌ ڤێرێ؟ به‌لكو گه‌له‌ك جاران و هه‌تا ئه‌ڤرۆ هاریكاریا حوكمه‌تا ئیراقێ دكه‌ن، سه‌رانێن pkk ل دووماهیا سالێن هه‌شتیان شه‌ش كادرێن لقێ ئێكێ پارتی راده‌ستی حوكمه‌تا به‌عس كرن ، نوكه‌ ژی سه‌رانێن pkk هه‌ڤپه‌یمانێن هێزێن نه‌یارێن كوردستانێ نه‌ ل شنگالێ و جهێن دی”.

د ئالیه‌كێ دی یێ به‌رسڤێ دا هاتیه‌” كالكان به‌حسێ وێ چه‌ندێ كریه‌ كو سه‌رانێن pkk دخواست سه‌رۆك بارزانی بكه‌نه‌ سه‌رۆكێ نه‌ته‌وی!! ئه‌م هه‌موو دزانین pkk د وی ئاستی دا نینه‌ و مافێ وێ چه‌ندێ ژی نینه‌ كه‌سه‌كی بكه‌ته‌ سه‌رۆكێ نه‌ته‌وی، به‌لكو خه‌لكێ كوردستانێ بریارێ ل سه‌ر وێ چه‌ندێ دده‌ت”.

دلایه‌كێ دی دا ئاماژێ ب داخۆیانیێن وی ئه‌ندامێ كۆمیتا ب رێڤه‌برنا pkk دكه‌ت كو تێدا به‌حسێ رێككه‌فتنه‌كێ دكه‌ت ل هه‌یڤا كانوونا ئێكێ 1996، ئه‌ڤ به‌حسه‌ وێ هێرشا به‌ربه‌لاڤ یا pkk دئینیته‌ بیر كا چاوا د ئێك شه‌ڤ دا هێرشی 25 بنكه‌ و باره‌گایێن پێشمه‌رگه‌ی كر و چه‌ندین پێشمه‌رگه‌ شه‌هید و برینداركرن و ئاگرێ شه‌ری هه‌لكر و ب رێیا هاتنا دناڤ شه‌ری دا، درێژی ب شه‌رێ ناڤخوه‌یی دا”.

هه‌روه‌سا تێدا هاتیه‌ كو سه‌ره‌رای وێ چه‌ندێ هه‌موو پێزانینێن كالكانی د راست نینن، ته‌رحێن وی ژی د لۆژیكی نینن، ده‌مێ دپرسیت: هێزێن پێشمه‌رگه‌ی چ دكه‌ن ل چیایێ مه‌تین و بۆچی هاتینه‌، د ده‌مه‌كی دا چیایێ مه‌تینی دناڤ جه‌رگێ هه‌رێما كوردستانێ دایه‌، پێشمه‌رگه‌ ژی هێزا قانوونی و فه‌رمی یا ڤێ هه‌رێمێ یه‌ و پرسیار دكه‌ین كێ ئه‌و ماف دایه‌ كالكانی پێشمه‌رگه‌ی ل ئاخا خوه‌ یا ره‌سه‌ن قه‌ده‌غه‌ بكه‌ت؟. Pkk ژ وان جهێن ژێ دره‌ڤیت شه‌ری ناكه‌ت، به‌لێ ل وان جهێن بۆ دره‌ڤیت، نه‌كو هه‌ر شه‌ری دفرۆشیت و پێشمه‌رگه‌ی شه‌هید دكه‌ت، بگره‌ وه‌كو حاكم خوه‌ د سه‌پینیت”.

ل دووماهیا به‌رسڤا خوه‌ دا، ده‌زگه‌هێ ره‌وشه‌بنیری و راگه‌هاندنا پارتی دبێژیت” سه‌ره‌رای كو ئاخڤتنێن دۆران كالكان هه‌موو جه‌واشه‌كاری نه‌، دووپاتكه‌رێن واقعه‌كێ ته‌حلن كو سه‌رانێن Pkk د رژدن ل سه‌ر دژایه‌تیا هه‌رێما كوردستانێ و حوكمه‌ت و ده‌زگه‌هێن وی یێن شه‌رعی و به‌رژه‌وه‌ندیێن خه‌لكێ هه‌رێما كوردستانێ، د وی پیناڤی ژی دا د به‌رهه‌ڤن هه‌موو ره‌فتار و جه‌واشه‌كاری و رێككه‌فتنێن ژێر ب ژێر بكه‌ن، به‌لێ پێدڤیه‌ دو راستیان ل به‌رچاڤ وه‌ربگرن، خه‌لكێ هه‌رێما كوردستانێ ب گشتی، ب درووشمێن ئایدیۆلۆژی یێن ده‌م ب سه‌ر ڤه‌چووی یێن Pkk ناهێته‌ سه‌ردابرن و ب قه‌ناعه‌ت داكۆكیێ ل قه‌وار و ده‌ستكه‌فت و ئاخا خوه‌ دكه‌ت، یا دوویێ ژی، روو ب رووبوونا سه‌رانێن Pkk ل گه‌ل وان گه‌نجێن دناڤ Pkk دا كو ب ناڤێ كورد و كوردستانێ ب دووڤ وان كه‌فتین، لێ ئه‌و شه‌رێ كورد و كوردستانێ ب وان گه‌نجان دكه‌ن، گه‌له‌ك یا نێزیكه‌”.

هه‌ولێر، قائید میرۆ

ره‌وشا كه‌ركووكێ پشتی روودانێن ١٦ی ئۆكتۆبه‌رێ ئالۆز بوویه‌ و كورد دبێژن، ئیداره‌كا سه‌پاندی هه‌موو بزاڤه‌كێ دكه‌ت بۆ لاوازكرنا كوردان ل كه‌ركووكێ و عه‌ره‌بكرنا ده‌ڤه‌رێن كوردی ژی زێده‌كریه‌، به‌رپرسه‌كێ پارتی ل كه‌ركووكێ ئاشكراكر، پارتی مه‌رجێن پێشوه‌خت یێن هه‌ین بۆ وێ چه‌ندێ ڤه‌گه‌ڕیت كه‌ركووكێ و دبێژیت، ئه‌و لایه‌نێن كوردی یێن نوكه‌ ل كه‌ركووكێ و پشته‌ڤانیا ئیدارا كه‌ركووكێ دكر نوكه‌ ئه‌وژی په‌شێمانن.

دیاری حوسێن، جێگری سه‌رۆكێ جڤاتا سه‌ركردایه‌تیا پارتی ل كه‌ركووكێ بۆ رۆژناما ئه‌ڤرۆ گۆت” پارێزگارێ سه‌پاندیێ كه‌ركووكێ به‌رده‌وامه‌ لسه‌ر ب عه‌ره‌بكرنا كه‌ركووكێ و رۆژانه‌ ئینانا وه‌لاتیێن عه‌ره‌ب ل پارێزگه‌هێن ناڤین و باشوورێ دهێته‌ زێده‌كرن بۆ كه‌ركووكێ، هه‌موو ژی ئه‌و عه‌ره‌بن یێن سه‌رده‌مێ رژێما به‌عسا ژناڤچوویی هاتینه‌ ڤه‌گوهاستن بۆ كه‌ركووكێ و پشتی پڕۆسا ئازادیا ئیراقێ لهه‌مبه‌ر وه‌رگرتنا گوژمه‌كێ پاره‌ی ڤه‌گه‌ڕیاینه‌ جهێن خوه‌، به‌لێ نوكه‌ دیسان ئه‌و عه‌ره‌بێن داگیركه‌ر ڤه‌دگه‌ڕن بۆ كه‌ركووكێ و ئه‌ردێ جوتیارێن كورد داگیر دكه‌ن، بێگومان ئیدارا نوكه‌ یا كه‌ركووكێ تۆمه‌تباره‌ ب ڤێ چه‌ندێ، چونكه‌ ئه‌و عه‌ره‌بێن شۆڤێنی هاتینه‌ قه‌ره‌بووكرن و ئه‌رد یێ كوردانه‌، به‌لێ حوكمه‌تا خوه‌جهیا كه‌ركووكێ یا به‌رهه‌ڤ نینه‌ رێگریێ ل ڤه‌گه‌ڕیانا وه‌لاتیێن عه‌ره‌ب بكه‌ت ، له‌وڕا ده‌ستهه‌لاتدارێن نوكه‌ یێن كه‌ركووكێ دخوازن ره‌وشا كه‌ركووكێ هه‌ر یا ئالۆز بیت، هه‌تا ئه‌و بشێن پیلانێن خوه‌ تێدا بجهبینن، به‌رۆڤاژی هه‌كه‌ ره‌وشا كه‌ركووكێ ئاسایی ببیت، دێ ئاسته‌نگ بۆ كارێن وانا په‌یدا بن”.

ل دۆر ڤه‌گه‌ڕیانا پارتی بۆ كه‌ركووكێ، دیاری حوسێن گوت” پارتی ب چو شێوه‌یه‌كی ناڤه‌گه‌ڕیت كه‌ركووكێ هه‌كه‌ ره‌وش نه‌هێته‌ ته‌ناكرن و ئاسایی كرن، چونكه‌ نوكه‌ كه‌ركووك هاتیه‌ داگیركرن و هه‌تا ئه‌و لایه‌نێن به‌ری نوكه‌ ل كه‌ركووكێ ژی بووینه‌ و پشته‌ڤانیا ئیدارا كه‌ركووكێ دكرن، نوكه‌ په‌شێمانن و دبێزارن ژی ژ ره‌وشا كه‌ركووكێ،  پارتی مه‌رجێن خوه‌ یێن هه‌ین بۆ ڤه‌گه‌ڕیانێ، هه‌تا ئه‌و مه‌رجێن پارتی نه‌هێنه‌ بجه‌ ئینان پارتی یا به‌رهه‌ڤ نینه‌ ڤه‌گه‌ڕیت بۆ كه‌ركووكێ، راسته‌ نوكه‌ دانوستاندن د ناڤبه‌را پارتی و به‌غدا بۆ ته‌ناكرنا ره‌وشا كه‌ركووكێ دهێنه‌كرن، به‌لێ هه‌تا مه‌رجێن پارتی نه‌هێنه‌ بجهئینان ڤه‌ناگه‌ڕیت بۆ كه‌ركووكێ، ب تایبه‌تی ئه‌م به‌ر ب هه‌لبژارتنان دچین و دڤێت ره‌وش بهێته‌ ئاسایی كرن، چونكه‌ ره‌وشا نوكه‌ یا كه‌ركووكێ یا گونجای نینه‌ بۆ رێڤه‌چوونا هه‌لبژارتنان، چه‌ندین هێزێن میلیشیا ل كه‌ركووكێ یێن هه‌ین و دڤێت بهێنه‌ ڤه‌كێشان و باده‌كا ئه‌منی راده‌ستی پۆلیسێن فیدڕالی بهێته‌كرن، هه‌روه‌سا ئیدارا سه‌پاندی نه‌مینیت و كورد وه‌كی پێكهاته‌یا سه‌ره‌كی د ئیدارا كه‌ركووكێ دا پشكدار ببیت”.

ئه‌ڤرۆ:

جوی هود جێگرێ وه‌زیرێ ده‌رڤه‌ یێ ئه‌مریكا بۆ كاروبارێن رۆژهه‌لاتا ناڤین راگه‌هاند كو هێزێن ئه‌مریكا یێن ل سووریێ و رۆژئاڤایێ كوردستانێ ژ به‌ر شه‌رێ ل دژی تیرۆرێ چووینه‌ وێرێ و بێگومان هه‌تا نها ژی شه‌رێ ل دژی داعشێ و رێكخراوێن دی یێن تیرۆرستی ب دژواری به‌رده‌وام دكه‌ت و ژ به‌ر هندێ ژی هێزێن ئه‌مریكا دێ ل سووریێ و رۆژئاڤایێ كوردستانێ مینن و ئه‌مریكا هێزێن خوه‌ ل وان ده‌ڤه‌ران ڤه‌ناكێشیت.

جێگرێ وه‌زیرێ ده‌رڤه‌ یێ ئه‌مریكا ئه‌و یه‌ك ژی دیار كر كو ره‌وشا ژیانا وه‌لاتیان ژی ل سووریێ و رۆژئاڤایێ كوردستانێ گه‌له‌ك خرابه‌ و پێدڤیا وان ب هاریكاریێن مرۆڤی هه‌نه‌، ژ به‌ر هندێ ژی پێدڤیه‌ هێزێن مه‌ ل وان ده‌ڤه‌ران بمینن دا بشێن هاریكاریا خه‌لكێ سڤیل بكه‌ن و گۆت: (ره‌وشا سووریێ گه‌له‌ك خرابه‌، مه‌ترسیا كریارێن تیرۆرستی ل هه‌موو ده‌ڤه‌رێن سووریێ هه‌یه‌، ب تایبه‌تی ژی رێكخراوا تیرۆرستی یا داعشێ د ڤان چه‌ند مه‌هێن دووماهیێ دا جاره‌كا دی خوه‌ ب رێكخستن كریه‌ و دشێت ده‌ست ب كریارێن تیرۆرستی بكه‌ت، وی ده‌می دێ مه‌ترسی ل سه‌ر ژیانا هه‌موو وه‌لاتیان ل باكورێ سووریێ هه‌بیت، ژ به‌ر هندێ ژی بۆ پاراستنا وان وه‌لاتیان دێ هێزێن ئه‌مریكا جارێ ل باكورێ سووریێ مینن و د به‌رنامێ مه‌ دا نینه‌ هێزێن خوه‌ ڤه‌كێشین).

ل دۆر ئه‌گه‌رێ ئۆپه‌راسیۆنه‌كا دی یا توركیا ل باكورێ سووریێ ژی ناڤهاتی راگه‌هاند كو وان به‌ری نها هۆشداری داینه‌ توركیا كو ب چو ره‌نگه‌كێ رێ ناده‌ن توركیا ده‌ست ب ئۆپه‌راسیۆنه‌كا دی ل باكورێ سووریێ بكه‌ت، هه‌روه‌سا ئه‌مریكا نه‌رازیبوونا خوه‌ ل هه‌مبه‌ر كریارێن گرۆپێن سه‌ر ب توركیا ل عه‌فرینێ و ده‌ڤه‌رێن دی یێن باكورێ سووریێ دیار كریه‌ و بۆ به‌رپرسێن توركیا دیار كریه‌ كو ئه‌و ب چو ره‌نگه‌كێ رێ ناده‌ن ئێدی توركیا ل ژێر ناڤێ شه‌رێ ل دژی تیرۆرێ ده‌ست ب ئۆپه‌راسیۆنه‌كا دی ل باكورێ سووریێ بكه‌ت.

قائید میرۆ

بڕیاره‌ دو لیوایێن هه‌ڤپشك  بۆ پێشمه‌رگه‌ و له‌شكرێ ئیراقی بهێنه‌ پێكئینان و سه‌رۆكێ لیژنا پێشمه‌رگه‌ ژی ل په‌رله‌مانێ كوردستانێ دبێژیت، هه‌ردو لیوا دێ بۆ پاراستنا ده‌ڤه‌رێن كوردستانی بن و ئه‌گه‌ر پێدڤی كر دێ هێزێن دی ژی هێنه‌ دامه‌زراندن

رێڤینگ هروری، سه‌رۆكێ لژنا پێشمه‌رگه‌ ل په‌رله‌مانێ كوردستانێ بۆ رۆژناما (ئه‌ڤرۆ) گۆت” بڕیاره‌ دو لیوایێن هه‌ڤپشك  یێن پێشمه‌رگه‌ی د ناڤبه‌را وه‌زاره‌تا پێشمه‌رگه‌ و به‌رگریا ئیراقی بهێنه‌ دامه‌زراندن و كارێ وان ژی دێ ل ده‌ڤه‌رێن كوردستانی بیت بۆ پاراستنا ره‌وشا ئه‌منی ل وان ده‌ڤه‌ران، گاڤا ئێكێ پێكئینانا چار ژۆرێن ئۆپه‌ڕاسیۆنێن هه‌ڤپشكه‌ و كه‌فتیه‌ د بیاڤێ بجهئینانێ دا، قۆناغا دویێ دێ دامه‌زراندنا دو لیوایێن هه‌ڤپشك بیت ژلایێ هه‌رێمێ و به‌غدا ڤه‌، هه‌ردو لیوا دێ  ژ پێشمه‌رگه‌ و سه‌ربازێن ئیراقی پێك هێت و گاڤه‌كا باشه‌ پێكڤه‌ به‌رهنگاری تیرۆرستان ببن.

رێڤینگ هروری ئاماژه‌كر” ره‌وشا ئه‌منی یا ده‌ڤه‌رێن كوردستانێ دێ راده‌ستی وان لیوایێن هه‌ڤپشك  هێته‌كرن و هه‌كه‌ بهێت و ره‌وش زێده‌تر ژی ئالۆز ببیت، وی ده‌می بێگومان دێ هێزێن هه‌ڤپشك یێن زێده‌تر هێنه‌ هنارتن بۆ هاریكاریا وان، ئه‌م باوه‌رین بڕیارا پێكئینانا لیوایێن هه‌ڤپشك  دێ باوه‌ریێ د ناڤبه‌را هه‌رێما كوردستانێ و به‌غدا ڤه‌گه‌رینیت ژلایێ له‌شكری ڤه‌، چونكه‌ ئه‌م ناڤه‌شێرین پێشمه‌رگه‌ و له‌شكرێ ئیراقی هه‌تا نوكه‌ وه‌ك نه‌یار ره‌فتارێ دگه‌ل هه‌ڤدو دكه‌ن”.

ژلایێ خۆڤه‌، د. محه‌مه‌د خورشید، به‌رپرسێ لقێ پارتی ل كه‌ركووكێ بۆ رۆژناما ئه‌ڤرۆ دیاركر” پێكئینانا ژۆرێن هه‌ڤپشك  یێن ئۆپه‌ڕاسیۆنان چ كاریگه‌ری ل سه‌ر ته‌ناكرنا ره‌وشا ده‌ڤه‌رێن كوردستانی یێن ل ده‌رڤه‌ی ئیدارا هه‌رێما كوردستانێ نابیت، ب تایبه‌تی ژی ل كه‌ركووكێ، چونكه‌ هێزێن حه‌شدا شه‌عبی ب چ شێوه‌یه‌كی پێگیریێ ب فه‌رمانێن سه‌ربازی ناكه‌ن و هه‌كه‌ هێزه‌ك پێگیریێ ب فه‌رمانێن فه‌رماندێ گشتیێ هێزێن چه‌كدارێن ئیراقی نه‌كه‌ت كو (مسته‌فا كازمی) یه‌، دێ چاوا پێگیریێ ب فه‌رمان و بڕیارێن چه‌ند ئه‌فسه‌رێن ژۆرا هه‌ماهه‌نگیێ كه‌ت، ئه‌م باوه‌رین چاره‌سه‌را ئێكانه‌ و دوماهیێ تنێ ڤه‌گه‌ڕیانا هێزێن پێشمه‌رگه‌ یه‌ بۆ ده‌ڤه‌رێن كوردستانێ، چونكه‌ هه‌كه‌ پێشمه‌رگه‌ ڤه‌گه‌ڕیت ره‌وش ب خوه‌ دێ به‌ره‌ ب چاره‌سه‌ركرنێ و ته‌ناهیێ چیت، به‌رۆڤاژی هه‌ر گاڤه‌كا دی بهێته‌ هاڤێتن وه‌كه‌ پێدڤی جهێ خوه‌ ناگریت، داعش لڤینێن خوه‌ یێن زێده‌كری و هه‌كه‌ سنوره‌ك بۆ لڤینێن داعشێ نه‌هێته‌ دانان، دێ ره‌وشا وان ده‌ڤه‌ران به‌ر ب ئالۆزیێن زێده‌تر چیت، چونكه‌ ره‌وشا ئیراقێ ژلایێ سیاسی ڤه‌ چه‌ند نه‌ سه‌قامگیر ببیت دێ كاریگه‌ریێ كه‌ته‌ سه‌ر ره‌وشا ئه‌منی و داعش دێ بهێز كه‌ڤیت”.

به‌رپرسێ لقێ پارتی ل كه‌ركووكێ پتر رۆهنكر” ل ده‌ڤه‌رێن ده‌وروبه‌رێ كه‌ركووكێ ره‌وش زێده‌ یا ئالۆزه‌ و هه‌ر پشتی روودانێن ١٦ی ئۆكتۆبه‌رێ ره‌وش ب ئێكجاری ل ڤان ده‌ڤه‌ران تێكچوویه‌ و رۆژ بۆ رۆژێ ب پیلان هێزێن ئه‌منی و له‌شكری بۆ كه‌ركووكێ دهێنه‌ هنارتن، ئه‌ڤه‌ ژی پیلانه‌كا دا هژمارا هێزێن خوه‌ ل كه‌ركووكێ زێده‌ بكه‌ن، به‌لێ یا خویایه‌ داعش زێده‌تر ل ده‌وروبه‌رێ كه‌ركووكێ لڤینان دكه‌ت و كریارێن تیرۆرستی ئه‌نجام دده‌ت، باشه‌ بۆچی هێزێن ئیراقی ل ده‌وروبه‌رێن كه‌ركووكێ به‌رهنگاری چه‌كدارێن داعشێ نابن ، هه‌كه‌ نیه‌ته‌كا دروست نه‌بیت بۆ ته‌ناكرنا ره‌وشێ چه‌ند بڕیار بهێنه‌دان چ چاره‌سه‌ری نابن”.

بریكارێ پێشتر یێ وه‌زاره‌تا دارایی یا ئیراقێ راگه‌هاند، حوكمه‌تا هه‌رێما كوردستانێ هیچ بیانوویه‌ك بۆ بجهئینانا قانوونا بودجا گشتی یا ئیراقێ بۆ سالا 2021 و هنارتنا پشكا هه‌رێما كوردستانێ بۆ به‌غدا نه‌هێلایه‌، له‌وما هه‌كه‌ حوكمه‌تا ئیراقێ پێگیر نه‌بیت، حوكمه‌تا هه‌رێمێ دشێت ل دادگه‌ها فیدرالی سكالایێ تۆمار بكه‌ت.

د. فازل نه‌بی، بریكارێ پێشتر یێ وه‌زاره‌تا دارایی یا ئیراقێ گۆت” ئه‌وا ل سه‌ر حوكمه‌تا هه‌رێما كوردستانێ پێدڤی و ئه‌ركێ وێ، به‌رهه‌ڤیا خوه‌ یا نیشاندای بجه بینیت ل دۆر پشكا هه‌رێما كوردستانێ د قانوونا بودجا گشتی یا ئیراقێ بۆ سالا 2021، له‌وما حوكمه‌تا هه‌رێمێ شاند هنارتیه‌ به‌غدا و هیچ بیانوویه‌ك بۆ حوكمه‌تا ئیراقێ نه‌هێلایه‌ و به‌غدا یا نه‌چاره‌ پێگیریێ ب قانوونا بودجه‌ی بكه‌ت، چونكه‌ ل جڤاتا نوونه‌رێن ئیراقێ ده‌نگ ل سه‌ر هاتیه‌ دان و بوویه‌ قانوون”.

بریكارێ پێشتر یێ وه‌زاره‌تا دارایی یا ئیراقێ به‌حس ل وێ چه‌ندێ ژی كر، هه‌كه‌ هات و حوكمه‌تا ئیراقێ پێگیری ب قانوونا بودجێ نه‌كر و پشكا هه‌رێما كوردستانێ نه‌ هنارت، كو ب گۆره‌ی قانوونێ پێدڤیه‌ بهێته‌ هنارتن، وی ده‌می حوكمه‌تا هه‌رێما كوردستانێ دشێت ل دادگه‌ها فیدرالی سكالایێ تۆمار بكه‌ت و ئه‌و سكالایه‌ ژی دێ د به‌رژه‌وه‌ندیا هه‌رێما كوردستانێ دا ئێكلا بیت، چونكه‌ حوكمه‌تا هه‌رێمێ ب باشی ره‌فتار كریه‌ كو هیچ بیانوویه‌ك بۆ حوكمه‌تا ئیراقێ نه‌هێلاینه‌”.

دیاركر ژی” نوكه‌ لژنه‌كا هه‌ڤپشك یا چاڤدێریا دارایی ژ هه‌رێما كوردستانێ و ئیراقێ هووربینیێ د داهاتان دا دكه‌ن و د به‌رده‌وامن ل سه‌ر كارێن خوه‌، هه‌كه‌ نیازێن به‌غدا ژی د باش بن، د ده‌مه‌كێ كێم دا ئه‌و كاره‌ ژی دێ ب دووماهی هێت”.

شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری راگه‌هاند، حوكمه‌تا هه‌رێما كوردستانێ ل گه‌ل حوكمه‌تا ئیراقێ ل دۆر ده‌ڤه‌رێن سنووری ل سه‌ر هێلێ یه‌ و حوكمه‌تا ئیراقێ بریار دایه‌ هێزێن پاسه‌وانێن سنووری زێده‌ بكه‌ت و چه‌ك و پێدڤیێن زێده‌تر بۆ دابین بكه‌ت، بۆ وێ چه‌ندێ بشێن ده‌ڤه‌رێن سنووری كونترۆل بكه‌ن.

بابه‌كر زێباری، شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری، گۆت” چاره‌كرنا كێشان ل گه‌ل pkk گه‌له‌ك یا ب زه‌حمه‌ته‌، چونكه‌ خوه‌ د سه‌پینیت و دكه‌ته‌ خودانا هه‌موو جهه‌كی، له‌وما ب ڤی جۆرێ هزركرنێ گه‌له‌ك یا ب زه‌حمه‌ته‌ دانوستاندن ل گه‌ل بهێنه‌ كرن بۆ چاره‌كرنا كێشان، چونكه‌ نه‌كو تنێ ده‌ڤه‌ران داگیر دكه‌ن، به‌لكو رێ ناده‌ن خه‌لكێ هه‌رێما كوردستانێ بچیته‌ سه‌ر ده‌ڤه‌رێن خوه‌ ژی”.

بابه‌كر زێباری زێده‌تر گۆت” دو لیوایێن پاسه‌وانێن سنووری یێن هه‌ین، ئه‌و ب سه‌ر ئیراقێ ڤه‌نه‌، به‌لێ هژمارا وان یا كێمه‌، له‌وما حوكمه‌تا هه‌رێمێ ل گه‌ل به‌غدا ل سه‌ر هێلێ یه‌ و حوكمه‌تا ئیراقێ سۆزت زێده‌كرنا هێزێن پاسه‌وانێن سنووری دایه‌، كو پێدڤیێن له‌شكری و چه‌ك ژی بۆ وان هێزان زێده‌تر بهێنه‌ دابینكرن، بۆ وێ چه‌ندێ بشێن رۆلێ خوه‌ ببینن د پرسا پاسه‌وانیا سنووران دا، چونكه‌ ئه‌و هێزێن هه‌ین، د كێمن و پێدڤی ب هێزێن زێده‌تره‌”.

زێباری به‌حس ل وێ چه‌ندێ ژی كر، pkk كۆمه‌كا ئه‌جیندایێن ده‌ره‌كی بجه دئینیت و چه‌كێ كرێ گرتی نه‌، له‌وما ئه‌و هه‌ر دێ مینن و هه‌كه‌ ب شه‌ری نه‌بیت، كو ئه‌وژی د به‌رژه‌وه‌ندیا هیچ كه‌سه‌كی دا نینه‌، به‌لێ مخابن زمانێ دانوستاندنێ نزانن”.

خویاكر ژی” pkk ل ڤێرێ نه‌شێت چ بكه‌ت، ئه‌ڤجا چاوان ل باكوورێ كوردستانێ، له‌وما ئه‌و بۆ خه‌باتێ نه‌هاتینه‌ و تنیچ بۆ تێكدانا ره‌وشا هه‌رێما كوردستانێ یێن هاتین”.

ناڤه‌ندا چاڤدێریا مافێن مرۆڤی كو بنگه‌ها وێ ل له‌نده‌نێ یه‌ دوهی راگه‌هاند كو هێزێن سه‌ر ب ئیرانێ ل سووریێ ب تایبه‌تی ژی گرۆپێ چه‌كدارێن ئه‌فغانی كو چه‌ند سالن ل سووریێ شه‌ری دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی بۆ هێزێن سووریا دیموكرات مه‌ترسیه‌كا مه‌زنه‌.

ناڤه‌ندا چاڤدێریا مافێن مرۆڤی یا سووریێ‌ دوهی راگه‌هاند كو چه‌ند رۆژن هێزێن سه‌ر ب ئیرانێ ب تایبه‌تی ژی گرۆپێ فاتمیون كو هه‌موو چه‌كدارێن وێ خه‌لكێ ئه‌فغانستانێ نه‌ و چه‌ند سالن ل سووریێ شه‌رێ داعشێ دكه‌ن نها چه‌كێن گران ل نێزیكی ده‌ڤه‌رێن ل ژێر كۆنترۆلا هێزێن سووریا دیموكرات بجه دكه‌ن و ئه‌و یه‌ك ژی دشێت ببیته‌ مه‌ترسیه‌كا مه‌زن بۆ هێزێن سووریا دیموكرات، چونكو ده‌مه‌كه‌ رژێما سووریێ دڤێت ئاخا ل ژێر ده‌ستهه‌لاتا هێزێن سووریا دیموكرات ژێ وه‌ربگریت و دیاره‌ نها دڤێت ب پشته‌ڤانیا هێزێن سه‌ر ب ئیرانێ ده‌ست ب پیلانه‌كا نوو بكه‌ت.

هه‌مان ناڤه‌ندێ ئه‌و یه‌ك ژی دیار كریه‌ كو ل نێزیكی دێرازۆرێ و چه‌ندین ده‌ڤه‌رێن دی یێن ستراتیژی گرۆپێ فاتمیون چه‌كێن گران بجه كرینه‌ و ئه‌و یه‌ك ژی ب رازیبوونا له‌شكرێ سووریێ هاتیه‌ كرن، لێ هه‌تا نها دیار نینه‌ كا ئارمانجا سه‌ره‌كی یا وێ هێزێ ئه‌وه‌ كو شه‌رێ هێزێن سووریا دیموكرات بكه‌ن یان ژی ژ به‌ر داعشێ ل وان ده‌ڤه‌ران بجه بووینه‌ لێ هه‌ر چاوا بیت بجهبوونا وێ هێزێ كو سه‌ر ب ئیرانێ یه‌ د ره‌وشا نها دا د به‌رژه‌وه‌ندیا هێزێن سووریا دیموكرات دا نینه‌.

ناڤه‌ندا چاڤدێریا مافێن مرۆڤی یا سووریێ ئه‌و یه‌ك ژی دیار كریه‌ كو چه‌ندین بنگه‌هێن سه‌ربازی یێن ئه‌مریكا ژی ل وێ ده‌ڤه‌رێ هه‌نه‌ و هه‌روه‌سا ئه‌مریكا ژی گه‌له‌ك چه‌كێن گران ل وێ ده‌ڤه‌رێ و ده‌ڤه‌رێن دی یێن ستراتیژی بجه كرینه‌، ژ به‌ر هندێ ژی هه‌كه‌ ئه‌مریكا ئاسته‌نگیان ل هه‌مبه‌ر بزاڤێن نوو یێن هێزێن سه‌ر ب ئیرانێ دروست نه‌كه‌ت له‌شكرێ فاتمیون و هێزێن دی یێن سه‌ر ب ئیرانێ دشێن ئاریشێن نوو بۆ ئه‌مریكا و هه‌ڤپه‌یمانێن وێ ل سووریێ دروست بكه‌ن، ژ به‌ر هندێ ژی دڤێت چاڤه‌رێ بین دا بزانین كا دێ د پاشه‌رۆژێ دا هه‌لویستێ ئه‌مریكا چ بیت.

ئه‌و یه‌ك د ده‌مه‌كێ دایه‌ كو حه‌فتیا بۆری شانده‌ك بلند ژ به‌رپرسێن وه‌زاره‌تا ده‌رڤه‌ و به‌ره‌ڤانیێ یا ئه‌مریكا سه‌ره‌دانا رۆژئاڤایێ كوردستانێ كرن و ل گه‌ل به‌رپرسێن رێڤه‌به‌ریا خوه‌سه‌ر یا رۆژئاڤایێ كوردستانێ و هێزێن سووریا دیموكرات كۆمبوون و د كۆمبوونێ دا شاندێ ئه‌مریكی بۆ ره‌نگه‌كێ ئاشكرا بۆ هێزێن سووریا دیموكرات دیار كر كو ئه‌و رێ ناده‌ن توركیا و هێزێن رژێما سووریێ هێرشی ده‌ڤه‌رێن ل ژێر كۆنترۆلا وان بكه‌ن و هه‌روه‌سا ژ به‌ر شه‌رێ ل دژی داعشێ ژی ئه‌مریكا دێ به‌رده‌وام هاریكاریا هێزێن سووریا دیموكرات كه‌ت.

چاڤدێرێن سیاسی ژی دیار دكه‌ن كو مه‌ترسیا ئیرانێ ل سووریێ و عیراقێ ل سه‌ر به‌رژه‌وه‌ندیێن ئه‌مریكا رۆژ ب رۆژێ زێده‌تر لێ دهێت و هه‌كه‌ ئه‌مریكا ل عیراقێ و سووریێ ده‌ست ب هنده‌ك پێرابوونێن نوو ل دژی ئیرانێ و هێزێن سه‌ر ب وێ ڤه‌ نه‌كه‌ت دێ مه‌ترسیا ئیرانێ و هێزێن سه‌ر ب وێ ل سه‌ر ئه‌مریكا زێده‌تر لێ هێت و ژ به‌ر هندێ ژی دڤێت ئه‌مریكا رێ نه‌ده‌ت كو له‌شكرێ فاتمیون و هێزێن دی یێن سه‌ر ب ئیرانێ ل سووریێ ببنه‌ مه‌ترسی بۆ هه‌ڤپه‌یمانێن وێ.

ئه‌ڤرۆ ، زنار تۆڤی:

بسپۆره‌كێ زانستێن سیاسی ل زانكۆیا سه‌لاحه‌دین ل هه‌ولێرێ‌، بۆ رۆژناما راگه‌هاند، ل سالێن نۆتان ل سه‌دێ‌ بۆری له‌شكرێ توركی چه‌ندین ئۆپه‌راسیۆن ل دژی pkk  ل سه‌ر ئاخا هه‌رێما كوردستانێ‌ ئه‌نجامداینه‌ و ل سالا 1995 توركیا ئۆپه‌راسیۆنه‌كا مه‌زن ب ناڤێ‌ ” پیلا “، ل دژی په‌كه‌كێ‌ ئه‌نجامدا و ل وی ده‌می نێزیكی 35 هزار سه‌ربازێن توركی ئه‌و ئۆپه‌راسیۆنه‌ ئه‌نجامدا و نێزیكی 35 كیلۆمه‌تران هاتنه‌ د ناڤا ئاخا هه‌رێمێ‌ دا، د دووڤدا چه‌ندین ئۆپه‌راسیۆنێن دیتر ئه‌نجامداینه‌، نوكه‌ ژی ئۆپه‌راسیۆنێن توركی ل سه‌ر گوند و ده‌ڤه‌رێن هه‌رێما كوردستانێ‌ د به‌رده‌وامن و چه‌ندین گوند ژی ژ ئه‌نجامێ‌ ئۆپه‌راسنیۆنێن توركی هاتینه‌ چۆلكرن.

د نه‌وزاد هێتوتی، بسپۆرێ زانستێن سیاسی و مامۆستا ل زانكۆیا سه‌لاحه‌دین بۆ رۆژناما (ئه‌ڤرۆ) گۆت” ژ سالا 2015 وێڤه‌ سیاسه‌تا توركیا ل هه‌مبه‌ری هه‌رێما كوردستانێ‌ گوهۆرین ب سه‌ر دا هاتن، ڤێ‌ چه‌ندێ‌ هژماره‌كا فاكته‌رێن ناڤخوه‌یی هه‌نه‌، كو توركیا دڤێت ئۆپه‌راسیۆنان دناڤا ئاخا هه‌رێمێ‌ دا ئه‌نجام بده‌ت و ئارمانج ژ وان ئۆپه‌راسیۆنان ئه‌وه‌، ل سالا 2023 دێ‌ هه‌لبژارتن ل توركیا هێنه‌ ئه‌نجامدان، ل سه‌ر ئاستێ‌ ناڤخوه‌یی ده‌ستهه‌لاتا akp لاواز بوویه‌ و دڤێت ب  ڤێ‌ چه‌ندێ‌ پشته‌ڤانیا خه‌لكێ‌ بۆ خوه‌ ب ده‌ستڤه‌ بینیت، دیسان بریارا ناساندنا جینۆسایدا ئه‌رمه‌نان ژ لایێ‌ ئه‌مریكا ڤه‌ شكه‌ستنه‌كا مه‌زن بوو بۆ حوكمه‌تا akp ، دیسان ئابوورێ‌ توركیا ژی گه‌له‌ك لاواز بوویه‌ و بۆ ڤه‌شارتنا ڤان شكه‌ستنێن خوه‌، ئه‌ردۆگانی دڤێت ڤان ئۆپه‌راسیۆنان ل هه‌رێما كوردستانێ‌ و رۆژئاڤایێ‌ كوردستانێ‌ ئه‌نجام بده‌ت، دیسان هه‌تا راده‌كێ‌ مه‌زن ژی pkk به‌هانه‌ دایه‌ توركیا كو ئۆپه‌راسیۆنان ل دژی وان دناڤا ئاخا هه‌رێمێ‌ دا ئه‌نجام بده‌ت، هه‌ر چه‌نده‌ pkk ئه‌و شیان و هێز نه‌ماینه‌ هێرشێ‌ بكه‌ته‌ سه‌ر له‌شكرێ توركی، دیسان توركیا دشێت سه‌دێ‌ سه‌د سنۆرێن خوه‌ بپارێزیت و پێدڤی ب ڤان ئۆپه‌راسیۆنان نه‌بیت، لێ‌ ژ بلی pkk توركیا هنده‌ك ئارمانجێن دیتر هه‌نه‌.

نه‌وزادی زێده‌تر گۆت” توركیا دڤێت ده‌ڤه‌ره‌كا دابرایی ژ هه‌رێما كوردستانێ‌ دروست بكه‌ت، وه‌كو ئه‌وا ل رۆژئاڤایێ‌ كوردستانێ‌ دروست كری، توركیا نوكه‌ ل ده‌ڤه‌رێن چیایی رێیان دگریت و لبه‌ره‌ ده‌ڤه‌ره‌كا ژێك دابرایی ل سنۆرێ‌ خوه‌ هه‌تا دچیته‌ قه‌ندیلی، دیسان ل گه‌ل رۆژئاڤایێ‌ كوردستانێ‌ ژی دروست بكه‌ت، وان ده‌ڤه‌ران هه‌موویان كونترۆل بكه‌ت، ئه‌ڤه‌ ئێك ژ ئارمانجێن توركیا یه‌، ئه‌و ده‌ڤه‌ره‌ د گرنگ و ستراتیژی نه‌ بۆ توركیا، هه‌ر چه‌نده‌ هه‌تا نوكه‌ توركیا نێزیكی 40 پێگه‌هێن له‌شكری دناڤا ئاخا هه‌رێما كوردستانێ‌ دا هه‌نه‌، توركیا دشێت ب ساناهی ب رێیا وان بنگه‌هێن له‌شكری فشاران ل سه‌ر ئیراقێ‌ و هه‌رێمێ‌ دروست بكه‌ت، دیسان توركیا دڤێت لسه‌ر ئاستێ‌ ڤێ‌ ده‌ڤه‌رێ‌ ژی خودان هێزه‌كا مه‌زن بیت، نوكه‌ ئیران و توركیا هه‌ردو یێ‌ هه‌ڤركیێ‌ ل سه‌ر ئیراقێ‌ دكه‌ن، توركیا ل هه‌مبه‌ری هه‌ژموونا ئیرانێ‌ ل ئیراقێ‌ بێده‌نگ نابیت، دیسان توركیا وێ‌ هزرێ‌ دكه‌ت، هه‌كه‌ هات و ئیراق دابه‌ش ببیت، یان ئه‌مریكا هێزێن خوه‌ ژ وی وه‌لاتی ڤه‌كێشیت و ره‌وشا ئیراقێ‌ گه‌له‌ك ئالۆز ببیت، ئیران كونترۆلێ‌ ل سه‌ر پشكه‌كا ئیراقێ‌ بكه‌ت، ل وی ده‌می دێ‌ توركیا ژی كونترۆلێ‌ هه‌تا باژێرێ‌ مووسلێ‌ كه‌ت، ل سه‌ر ئاستێ‌ ڤێ‌ ده‌ڤه‌رێ‌ ئه‌ڤ چه‌نده‌ یا هه‌ی، نوكه‌ بنگه‌هه‌كێ له‌شكری یێن توركی ل به‌عشیقه‌ یێ هه‌ی، هه‌ر چه‌نده‌ ڤێ‌ ئێكێ دوور دبینم، چونكی هه‌رێما كوردستانێ‌ قه‌وارێ‌ خوه‌ یێ هه‌ی، دیسان د وارێ‌ ئابووری و بازرگانی و ڤه‌دیتنا مه‌عده‌نی و برینا داران دا، توركیا ڤیایه‌ ئۆپه‌راسیۆنان ل سه‌ر ئاخا هه‌رێمێ‌ ئه‌نجام بده‌ت و ئه‌ڤه‌ ژی ئێكه‌ ژ ئارمانجێن وێ‌”

ناڤهاتی ئه‌و چه‌ند ژی خویاكر” توركیا دخوازیت په‌یوه‌ندیێن هه‌رێمێ‌ ل گه‌ل كوردێن رۆژئاڤا تێكبچن، هه‌موو بزاڤان دكه‌ت، چو رێككه‌فتن د ناڤبه‌را كوردێن رۆژئاڤا دا نه‌هێنه‌ كرن، دیسان توركیا دێ‌ هه‌موو بزاڤان كه‌ت، رێیا قه‌ندیلی ژی بگریت، پاشی بهێته‌ شنگالێ‌ و دیسان ده‌روازێ‌ ئۆڤاكوی ل گه‌ل ئیراقێ‌ ڤه‌كه‌ت و ب ڤێ‌ چه‌ندێ‌ توركیا دڤێت ئابوورێ‌ هه‌رێمێ‌ لاواز بكه‌ت و ئه‌ڤ چه‌نده‌ مه‌ترسیه‌كا مه‌زنه‌ ل سه‌ر هه‌رێما كوردستانێ‌، هه‌روه‌سا توركیا دڤێت هه‌موو ده‌ڤه‌رێن چیایی یێن بلند كونترۆل بكه‌ت و بنگه‌هێن له‌شكری لێ‌ دانیت و كوردێن هه‌رێمێ هه‌موو قه‌ستا ده‌شتێ‌ و باژێران بكه‌ن و ب ڤی ره‌نگی كورد دێ‌ مه‌زنترین دۆستێن خوه‌ ژ ده‌ست ده‌ن، ئه‌و ژی چیانه‌، تورك دێ‌ شێن ب ساناهی فشاران ل سه‌ر هه‌رێما كوردستانێ‌ دروست كه‌ن، دیسان د نوكه‌ دا دڤێت pkk خوه‌ ژ هنده‌ك ده‌ڤه‌ران ڤه‌كێشیت، ب تایبه‌تی وان ده‌ڤه‌رێن توركیا ئۆپه‌راسیۆنان لێ‌ ئه‌نجام دده‌ت،  هه‌كه‌ پێشمه‌رگه‌ بچنه‌ وان ده‌ڤه‌ران، توركیا نه‌شێت ئۆپه‌راسیۆنان ل هه‌موو ده‌ڤه‌ران ئه‌نجام بده‌ت، دیسان نابیت ب چ ره‌نگان گوند بهێنه‌ چۆلكرن، هه‌ر چه‌نده‌ هه‌كه‌ ئه‌و ئۆپه‌راسیۆنێن توركی چه‌ند ب هێز ژی بن، دڤێت خه‌لك گوندێن خوه‌ چۆل نه‌كه‌ن، هه‌كه‌ گه‌له‌ك مه‌ترسی كه‌فته‌ سه‌ر ژیانا خه‌لكی، بلا ژن و زارۆیان ژ گوندان ده‌ربێخن و ب تنێ‌ زه‌لام بمینن تێدا، چونكی هه‌كه‌ گوند هاتنه‌ چۆلكرن، ئێدی ئه‌و گوند و ده‌ڤه‌ر دێ‌ كه‌ڤنه‌ ژێر ده‌ستێ‌  توركان و ژێ‌ ده‌رناكه‌ڤن”.

د. نه‌وزاد هێشتا دبێژیت ژی” دڤێت هه‌رێم فشاران ل سه‌ر به‌غدا دروست بكه‌ت، چونكی به‌غدا سه‌روه‌ریا خوه‌ هه‌یه‌ و دشێت مایێ‌ خوه‌ دڤی بابه‌تی بكه‌ت و نه‌هێلیت تورك ئۆپه‌راسیۆنێن له‌شكری ل سه‌ر ئاخا هه‌رێمێ‌ ئه‌نجام بده‌ن، هه‌روه‌سا دڤێت هه‌رێم سه‌ره‌ده‌ریه‌كا نه‌رم ل گه‌ل ڤی بابه‌تی بكه‌ت، چونكی دروستبوونا هه‌ر شه‌ره‌كی دێ‌ مه‌ترسیان ل سه‌ر هه‌رێمێ‌ په‌یدا كه‌ت، ب تایبه‌تی ژی د ڤێ‌ قووناغێ‌ دا، هه‌ر چه‌نده‌ pkk گه‌له‌ك به‌هانه‌ داینه‌ ده‌ستێ‌ توركیا، كو ئه‌ڤان ئۆپه‌راسیۆنان دناڤا ئاخا هه‌رێما كوردستانێ‌ دا ئه‌نجام بده‌ت، لێ‌ ڤێ‌ جارێ‌ هه‌ر ده‌ڤه‌را توركیا گرت، ئێدی ژێ‌ ناڤه‌كێشیت”.