ئه‌ڤرۆ نيوز:
رێڤه‌به‌ريا په‌يوه‌ندى و راگه‌هاندێ ل وه‌زاره‌تا دارايى و ئابوورى يا حوكمه‌تا هه‌رێما كوردستانێ راگه‌هاند كو بڕياره ئه‌ڤرۆ رۆژا ئێكشه‌مبى رێكه‌فتى 24ى گۆلانا 2015ێ، مووچێ هه‌يڤا ئادارێ يێ وه‌زاره‌تێن چاندن و ژێده‌رێن چاڤێ و ئه‌وقاف و كاروبارێن ئاينى و باژێر ڤانى و گه‌شتوگۆزار و خواندنا بلند و ڤه‌كۆلينێن زانستى به‌لاڤ كه‌ن.
ئه‌ڤرۆ نیۆز، قائید میرۆ
ئه‌ڤرۆ فڕۆكه‌یێن هه‌ڤپه‌یمانان ل میحوه‌رێ گوێڕ هژماره‌ك چه‌كدارێن تیرۆرستێن داعش كوشتن و چوار ترۆمبێل ژی هاتنه ژناڤبرن.
ژێده‌ره‌كێ به‌رپرس ب مالپه‌ڕی ئه‌ڤرۆ نیۆز راگه‌هاند” سپێده‌هیا ئه‌ڤرۆ فڕۆكه‌یێن هه‌ڤپه‌یمانان ل گوندێ سولتان عه‌بدولا یێ میحوه‌رێ گوێڕ كاروانه‌كێ ترۆمبێلێن داعش كره ئامانج و زیانێن مه‌زن گه‌هاندن تیرۆرستێن داعش.
ژێده‌ری گۆتژی” ب ئه‌گه‌رێ ئه‌ڤێ بوردۆمانێ 16 چه‌كدارێن داعش هاتینه كوشتن و چوار ترۆمبێلێن سه‌ربازیێن وانژی هاتینه ژناڤبرن، ئه‌ڤه ژبلی برینداربوونا هژماره‌كا چه‌كدارێن داعش.
ئه‌ڤرۆ نیوز:
خالد عوبێدى وه‌زیرێ به‌ره‌ڤانیا عیراقێ دیاركر كو چ به‌هانه بۆ ڤه‌كێشانا هێزێن سه‌ربازى و ئێمناهى ل باژێرێ روومادى نینن و خه‌مسارى هاتیه كرن و گۆت: هه‌ر كه‌سێ ئه‌ركێن خوه بجه نه‌ئینابن و كێماسى كربن و خوه‌ڤه‌كێشابیت ل به‌رۆكێن شه‌رى ل رومادى دێ لێپرسین ل گه‌ل هێته كرن و دێ راده‌ستى دادگه‌ها سه‌ربازى هێته كرن.
عوبەیدی ئاماژه ب وێ یه‌كێ ژى كر كو عه‌بادى فه‌رمان ده‌ركریه كو لژنه‌كا بلند بهێته پێكئینان بۆ لێپرسینێ ل هه‌موو وان كه‌سێن ئه‌ركێن خوه بجهـ نه‌ئیناین ب تایبه‌ت فه‌رمانده و به‌رپرسێن سوپایان.
ئه‌ڤرۆ نیۆز، قائید میرۆ
چه‌كدارێن داعش ل باژێڕێ مووسل هه‌موو شه‌ڤێ سه‌د گه‌نجێن مه‌شق پێكری فڕێدكه‌ته رۆمادی و به‌رپرسه‌كێ كوردژی دبێژیت، هنارتنا ڤان گه‌نجا بۆ ئازادكرنا به‌غدایه.
غه‌یاس سورچی، په‌یڤدارێ مه‌لبه‌ندێ ئێكه‌تی نیشتیمانی كوردستان ل نه‌ینه‌وا ب ئه‌ڤرۆ نیۆز راگه‌هاند” زانیاریێن دروست گه‌هشتینه مه، نوكه گروپا تیرۆرستیا داعش لناڤا سه‌نته‌رێ باژێڕێ مووسل ڤه‌كرینه و مه‌شق و راهێنانێ ب گه‌نجێن مووسل دكه‌ت، ئه‌ڤه‌ژی تنێ دده‌مێ چه‌ند رۆژه‌كێن كێم ئه‌ڤان گه‌نجان فڕێدكه‌ته باژێڕێ رۆمادی”.
غه‌یاسی گۆتژی” هه‌موو شه‌ڤێ داعش رێوره‌سمه‌كێ برێڤه دبه‌ت و تێدا سه‌د گه‌نجێن راهێنانكری ب به‌رهه‌ڤكرنا كه‌س و كارێن وان فڕێدكه‌ته رۆمادی و ئاماژه ب وێ چه‌ندێ دكه‌ت، كو ئه‌ف گه‌نجه بۆ ئازادكرنا به‌غدا دهێنه هنارتن”.
ھەولێر، قائید میرۆ
رێکخراوەک داخوازێ ل وەلاتیان دکەت د دەمێ سووتنا فويل پەمپێ ترۆمبێلا وان ل دادگەھێ سکالایێ تۆمار بکەن و تەکەزکر، ئەو دێ پارێزەری بۆ وەلاتیان دابین بکەن.
شڤان زەنگەنە، سەرۆکێ رێکخراوا سکالا و چاڤدێری بۆ ئەڤرۆ نیۆز راگەھاند: “ئەڤە ماوەیەکە ژ ئەگەرێ خراپیا جۆرێ پانزینێ ترۆمبێلێن وەلاتیان ژ کار دکەڤن و پانزینا پیس بوویە ئەگەرێ سوتنا ھژمارەکا ترۆمبێل و فويل پەمپێن ترۆمبێلا، لەوڕا وەلاتی دشێن داخوازا قەرەبوویێ بکەن و سکالایێ تۆمار بکەن.
شڤان گۆتژی: “ب سێ رێیا وەلاتی دشێن سکالایێ تۆمار بکەن، یا ئێکێ راستەوخۆ ل دادگەھێ، یا دویێ ب رێیا داخوازکارێ گشتی، یا سیێ سەرەدەنا پشکا قانوونی یا رێکخراوا سکالا و چاڤدێریێ بکەن، پێکڤە سکالایەکێ تۆمار بکەن و داخوازا قەرەبوویا زیانێن خوە بکەن”.
ئه‌ڤرۆ نيوز:
حوكمه‌تا عيراقێ بڕيارا داخستنا پرا بزێبيز دا كو رێيا ئێكانه‌يه د ناڤبه‌را ئه‌نبار و به‌غدا دايه، ئه‌و ژى ب مه‌ره‌ما رێگرتن ل چوونا وه‌لاتيان ژ بن ده‌ستێ توندوتيژيێن داعش.
پشتى ئاواره‌بوونا ب هزاران وه‌لاتيێن پارێزگه‌ها ئه‌نبار و ره‌ڤينا وان ب روويێ به‌غدا دا، حوكمه‌تا عيراقێ بڕيارا داخستنا پرا بزێبيز ل سه‌ر رووبارێ فورات دا كو رێيا ئێكانه‌يا ئاوارايه د ناڤبه‌را به‌غدا و ئه‌نبار دا، ئه‌ڤه ژى ب مه‌ره‌ما رێگرتن ل ره‌ڤينا وه‌لاتيان ژ توندوتيژيێن ناڤ ده‌ستێ داعش.
د ڤێ ده‌ربارێ دا، BBC به‌لاڤكريه كو هه‌تا نوكه 40 هزارا ئاواره شياينه ژ وێ پرێ ده‌رباز ببن و حوكمه‌تا به‌غدا ژى ژ وێ چه‌ندێ دترسيت، چه‌كدارێن داعش خوه د ناڤ وان ئاواران دا ڤه‌شێرن و بگه‌هنه به‌غدا يا پايته‌خت.
ئه‌ڤرۆ نيوز:
چه‌كدارێن داعش د حه‌فتيا بۆرى دا، ل باژێرێ رومادى ناڤه‌ندا پارێزگه‌ها ئه‌نبار كۆنترۆل كر و نوكه نێزيكى فرۆكخانا حه‌بانيێ ل رۆژهه‌لاتێ به‌غدا دبيت كو ل وێ ده‌ڤه‌رێ چه‌كدارێن شيعى د به‌ربه‌لاڤن.
ب گۆره‌يى ئاژانسا ده‌نگوباسێن رويته‌رز داعش دوهى رۆژا ئه‌ينى رێكه‌فتى 23ى گۆلانا 2015ێ، شيان ده‌ست ب سه‌ر ده‌ڤه‌را “حه‌سيه” دا بگه‌هينن ل نێزێك باژێرێ خالديه كو يێ ل نێزێكى فرۆكخانا حه‌بانيه كو ئێك ژ گرنگترين فرۆكخانێن عيراقێ يه”.
ب گۆره‌يى ژێده‌رى، چه‌كدارێ، داعش به‌ر ب رۆژئاڤايێ فه‌لۆجه ڤه د پێشڤه‌چوونێ دانه ب مه‌ره‌ما كۆنترۆلكرنا پشكه‌كا دى يا پارێزگه‌ها ئه‌نبار.
جێگرێ سه‌رۆك وه‌زيرێن عيراقێ راگه‌هاند كو مه‌ترسيا رێكخراوا تيرۆرستى يا داعش گه‌هشته به‌ر ده‌رگه‌هێ به‌غدا يا پايته‌خت، داخواز ژى كر كو هه‌موو ل دۆر سۆپايى كۆم ببن دا كو پێش بێخن.
د. رۆژ نورى شاويس، جێگرێ سه‌رۆك وه‌زيرێن عيراقێ، د چارچۆڤێ كۆنگرێ داڤۆس دا كو ل ئوردن ب رێڤه دچيت گۆت: “مه‌ترسيا رێكخراوا تيرۆرستى يا داعش گه‌هشتيه به‌غدا يا پايته‌خت و پێدڤيه هه‌موو روويى ل پێشڤه‌برنا سۆپايى دا بكه‌ن”.
ته‌كست ژى ل سه‌ر وێ چه‌ندێ كر كو پێدڤيه چه‌كدارێن حه‌شه‌د شه‌عبى د چارچۆڤێ له‌شكرێ عيراقێ دا بهێنه كۆمكرن و گۆت: “پێدڤيه سۆپايێ عيراقێ به‌رپرساتيا به‌ربه‌ستێن ئه‌منى يێن روو ب روو عيراقێ دبيت بێخيته ستوويێ خوه و ئه‌ڤه ژى بێى سۆپا ناهێته ديتن”.
ئه‌ڤرۆ نيوز:
ل ده‌ڤه‌رێن كێله‌شين يا ل سه‌ر سنورێ ناڤبه‌را باشوور و رۆژهه‌لاتێ كوردستانێ، گه‌ريلايێن پارتا كرێكارێن كوردستانێ “په‌كه‌كه” ژماره‌كا پێشمه‌رگێن حزبا ديموكراتا كوردستانا ئيرانێ ئابلوقه دان و ئاخفتنكه‌رێ ب ناڤێ پارتا كرێكارێن كوردستانێ ژى راگه‌هاند كو ئه‌و دێ بزاڤێن چاره‌كرنا كێشێ كه‌ن.
ماوێ دو رۆژايه ژماره‌كا پێشمه‌رگێن حزبا ديموكراتا كوردستانێ ل ئيرانێ، ب مه‌ره‌ما ئه‌نجامدانا چه‌ند بزاڤێن سياسى و له‌شكرى چووينه ده‌ڤه‌را كێله‌شين، ئه‌وا دكه‌ڤيته سه‌ر سنورێ باشوور و رۆژهه‌لاتێ كوردستانێ و نێزكى باژێرێ شنۆ يێ سه‌ر ب پارێزگه‌ها ورمێ ڤه‌يه، ل وێرێ ژى ژ لايێ چه‌ند گه‌ريلايێن په‌كه‌كێ ڤه رێگرى لێ هاتيه كرن و ئابلۆقه داينه.
ئه‌ندامه‌كێ كۆميتا ناڤه‌ندى يا حزبا ديموكرات كو وه‌كو وى گۆتى “دا كێشه مه‌زنتر نه‌بيت”، ناڤێ خوه ئاشكه‌را نه‌كر بۆ باسنيوز راگه‌هاند: “به‌لێ ئه‌و پێشمه‌رگه هاتينه ئابلۆقه دان، نوكه بزاڤێن وێ چه‌ندێ دكه‌ن كو ئه‌و و په‌كه‌كه بگه‌نه چاره‌كێ بۆ وێ كێشێ”.
ده‌رباره‌يى هه‌لويستێ حوكمه‌تا هه‌رێما كوردستانێ بۆ ناڤگريێ د ناڤبه‌را وان و په‌كه‌كێ دا گۆت: “هه‌تا نوكه حوكمه‌تا هه‌رێما كوردستانێ نه‌بووينه ناڤگر بۆ چاره‌كرنا ڤێ كێشێ و گۆت: “مه نه‌ڤێت كێشه ئالوز ببيت، ژ به‌ر هندێ داخۆيانيان بۆ ده‌زگه‌هێن راگه‌هاندنێ ناديه‌ن”.
ده‌مهات عه‌گيد، ئاخفتنكه‌ر و به‌رپرسێ په‌يوه‌نديێن ده‌رڤه يێن كۆما جڤاكێن كوردستانێ “كه‌جه‌كه” د داخۆيانيه‌كێ دا بۆ باسنيوز گۆت: “ژماره‌كا پێشمه‌رگێن حزبا ديموكراتا كوردستانێ ل ئيرانێ هاتينه ده‌ڤه‌رێ، ئه‌و ده‌ڤه‌ر ژى ماوه‌كێ زۆره ل بن ده‌ستێ مه، پێشمه‌رگێم حزبا ديموكرات بزاڤ كريه خاله‌كا گۆمركى ل وێ ده‌ڤه‌رێ بدانن، مه ژى داخواز كريه كو وێ ده‌ڤه‌رێ چول بكه‌ن، به‌لێ چول نه‌كرينه، هه‌ر ل وێرێ ماينه، نوكه ژى بزاڤێن چاره‌كرنا كێشێ دكه‌ين و مه نه‌ڤێت كێشته ئالۆزتر لێ بهێت”.
ده‌مهات عه‌گيد ته‌كست ل سه‌ر وێ چه‌ندێ كر كو ئه‌و بزاڤ بۆ رێگرتن و تێكدانا كارێن وايه ل وێ ده‌ڤه‌رێ و گۆت: “پێدڤيه ئه‌و كێشه زوو چاره ببيت و ب دانوستاندنێ د ناڤبه‌را مه و وان دووماهيێ ب ڤێ كێشێ بينين”.
ئه‌ڤرۆ نيوز:
شاهێ ئوردن د ديداره‌كێ دا رگه‌هاتد كو ده‌ما ئه‌و ل باكوور و رۆژهه‌لاتان ته‌ماشه دكه‌ن داعش دوژمنێ ژماره ئێكه و ئه‌وان چو هه‌ستێن مرۆڤاتيێ و ئاينى و ژيانێ نينن.
شاهێ ئوردن، عه‌بدولايێ دويێ د ديداره‌كا تايبه‌ت دا بۆ CNN دياركر كو ده‌ما ئه‌و ل باكوور و رۆژهه‌لاتان ته‌ماشه دكه‌ن داعش دوژمنێ ژماره ئێكه
گۆتژى: “مه مليۆنه‌ك و 400 هزار ئاوارێن سورى ل ئوردن يێن هه‌ين، ئه‌ڤه ژى بارگرانيه‌كا مه‌زنه ل سه‌ر وه‌لاتێ مه، هنده‌ك ئاوارێن سورى ل ره‌خێن دى ژى يێن سه‌ر سنورى مه يێن هه‌ين، ئه‌و هه‌تا راده‌كى ده‌ڤه‌ره‌كا ئارام و سه‌قامگيره، دبينم ل سه‌ر هه‌موويان پێدڤيه كار ژ بوو هندێ بكه‌ن ئه‌ڤێ ده‌ڤه‌را باشوورێ سوريا باشتر لێ بكه‌ن كو ژيان لێ هه‌بيت”.
ده‌رباره‌يى وێ چه‌ندێ كو داعش گه‌له‌ك ئاڤاهى و شارستانى ژناڤبرينه، عه‌بدولايێ دويێ گۆت: “ب راستى جهێ دلگرانيێ يه”.
ده‌رباره‌يى ژناڤبرنا جهێن گه‌شتيارى ژى شاهێ ئوردن گۆت: “ده‌رباره‌يى من، ئه‌ز چو ژيواران نابينم كا ئه‌ڤه چاوان هزر دكه‌ن، ئه‌وان چو هه‌ستێن مرۆڤاتيێ و ئاينى و ژيانێ نينن، ئه‌ڤه هوشداريه‌كه بۆ مه هه‌موويان ژى، دا ب رژدى رووى ب رووى ڤێ گه‌فێ ببين”.
نيشاندان