ئه‌ڤرۆ نیوز:
فره‌نسا داخواز دكه‌ت هێرشێن هه‌ڤپه‌یمانێن نێڤده‌وله‌تى دژى رێكخراوا تیرورستیا داعش به‌رفره‌هتر لێ بهێن.
لۆران فابیۆس وه‌زیرێ به‌ره‌ڤانیا فره‌نسا راگه‌هاند : پێدڤیه چالاكى و هێرشێن هه‌ڤپه‌یمانیا نێڤده‌وله‌تى ل دژى داعش ل سوریا و عیراقێ به‌فره‌هتر لێ بهێت داكو هه‌ر زوو سنوره‌ك بۆ هێرش و كومه‌لكوژیێن داعش ل ده‌ڤه‌رێ بهێته دانان.
لۆران فابیۆس وه‌زیرێ به‌ره‌ڤانیا فره‌نسا ره‌خنه ژى ل حكومه‌تا حه‌یده‌ر عه‌بادى گرتن كو سوپایێ ولاتى وى تووشى شكه‌ستنێن مه‌زن دبیت.
ئه‌ڤرۆ نیوز: ڤه‌ده‌ر ره‌شاڤایی:
به‌ربژێره‌كێ پارتا كوردی ل توركیا، پارتا گه‌ل یا دیموكرات هه‌ده‌پێ ره‌خنێن توند ئاراسته‌ی ره‌جه‌ب ته‌ییب ئه‌ردوگان سه‌رۆك وه‌زیرێن توركیا ژبۆ بكارئینانا قورئانێ د بانگه‌شا هه‌لبژارتنان دا .
ئاده‌م ئوزجانده‌ر ژ باژێرێ وانێ گۆت كو كه‌سایه‌تیێن دینی ل باكۆرێ كوردستانێ قۆرئان ته‌فسیر كریه ژبۆ وێ یه‌كێ كورد پتر تێبگه‌هن لێ ئه‌ردوگان ده‌ستێن خوه دا دئینیت و دبه‌ت و بلند دكه‌ت بۆ بده‌ستڤه‌ئینانا پشته‌ڤانیێ د هه‌لبژارتنان دا بتنێ بۆ مه‌ره‌مێن سیاسی.
داخازا ته‌فسیركنا قورئانێ ژ ئاليێ كوردێن موسلمان ڤه هاتبوو به‌رهه‌ڤكرن ل باكۆر و بۆ چه‌ندین جاران ژ سالا 1990 هه‌یا ده‌مێ به‌لاڤكرنێ بۆ كارۆبارێن ئایینی ل توركیا هاتبوو پێشكێشكرن.
لدووڤ گۆتنا ناڤهاتی هه‌ده‌پێ داخازا به‌لاڤكرنا چاپا ته‌فسیرا قورئانێ بكوردی كریه لێ ده‌زگه‌هێ كارۆبارێن ئایینی ل توركیا ئه‌ڤ یه‌ك وه‌ك ده‌ستكه‌فتی بۆ ئه‌ردوگان پێشكێشكریه كو د بانگه‌شا هه‌لبژارتنان دا بكاردئینیت.
ئه‌ڤرۆ نیوز:
ئه‌ندامه‌كێ جڤاتا نوونه‌رێن عیراقێ ئاماژه ب وێ یه‌كێ دكه‌ت د كومبوونا وان دا ل گه‌ل وه‌زیرێ نه‌فتا عیراقێ، وه‌زیرێ نه‌فتێ ئاخافتنێن خوه‌ش ڤێ بوون و دێ ڤێ هه‌یڤێ به‌غدا پاره‌كێ زور هنێریت و قه‌ره‌بوویا هه‌یڤا چوار ژى كه‌ت كو هه‌یڤا 4 به‌غدا پاره‌كێ كێم بۆ هه‌رێما كوردستانێ هنارتبوو.
“د.تاریق گه‌ردى”، ئه‌ندامێ په‌رله‌مانێ عیراقێ بۆ باسنیوز دیاركر كو ئه‌ڤرۆ لژنا نه‌فت و غازى ل په‌رله‌مانى ل گه‌ل عادل عه‌بدولمه‌هدى كومبوویه، و وه‌زیرێ نه‌فتێ دیاركر كو هه‌یڤا چوویى شاشیه‌كا هونه‌رى هه‌بوو ل دور هنارتنا نه‌فتا هه‌رێمێ و راده‌ستكرنا وێ ژ ئالیێ كومپانیا سوموڤه و ڤێ هه‌یڤێ دێ هه‌رێم هێته قه‌ره‌بووكرن و پارێ ڤێ هه‌یڤێ ژى دێ بۆ هه‌رێمێ هێته هنارتن ل دووڤ نه‌فتا راده‌ستى كومپانیا سومو كرى.
ئه‌ڤرۆ نیوز:
كامیرێن چاڤدێریكرنێ یێن خوارنگه‌هه‌كێ دیمه‌نێ هێرشكرنا وه‌لاتیه‌كى ل سه‌ر ئه‌لیف دوغان تركمان به‌ربژێرا به‌رهنگارا توركیا ژ حزبا (CHP) بۆ هه‌لبژارتنێن بهێت یێن توركیا به‌لاڤ كرن.
ئه‌ڤ به‌ربژێره بریندار دبیت پشتى كو ئه‌ڤ كه‌سێ نه‌نیاس گولله‌یان ل پێن وێ وه‌ردكه‌ت ل خوارنگه‌هه‌كا توركیا و پاشان ئه‌ڤ به‌ربژێره بۆ نه‌خوشخانێ دهێته ره‌وانه‌كرن و پولیس ژى ژ ئالیێ خوه‌ڤه ل تومه‌تبارى دگه‌رن.
به‌رى چه‌ند رۆژان ژى بومبه‌ك ل هه‌مبه‌ر ئاڤاهیا (HDP) هاته په‌قاندن و د ئه‌نجامدا 4 كه‌س بریندارببوون.
ئه‌ڤرۆ نیۆز، سالار دۆسكى:
بریارده‌رێ لژنا به‌ره‌ڤانیى و ئاسایشێ ل په‌رله‌مانێ عیراقێ بۆ مالپه‌رێ ئه‌ڤرۆ نیۆز ئاشكراكر كو لژنا وان چو پێزانین ل سه‌ر پێكئینانا گرێبه‌ستێن كرینا چه‌كى ژ وه‌لاتێ روسیا نین و ناڤبرى ئه‌ڤ چه‌نده ب نه‌قانوونى ل قه‌له‌م دا.
شاخه‌وان عه‌بدوللا ئه‌ندامێ په‌رله‌مانێ عیراقێ ژ فراكسیۆنا پارتى دیموكراتى كوردستان زێده‌تر ئاشكراكر كو چوونا سه‌رۆك وه‌زیرێن عیراقێ بۆ وه‌لاتێ رۆسیا بۆ ئه‌نجامدانا چه‌ندین گرێبه‌ستێن كرینا چه‌كى بوویه و هه‌تا نوكه لژنا به‌ره‌ڤانیێ و ئاسایشێ ل په‌رله‌مانێ عیراقێ چو پێزانین ل سه‌ر گرێدانا ئه‌ڤان گرێبه‌ستان نین، بتنێ مه پێزانین هه‌نه چه‌ند گرێبه‌ستن و ئێك هاتیه راگرتن و په‌رله‌مانى مه خواستیه چوونا شاندان بۆ ده‌رڤه و ئیمزاكرنا گرێبه‌ستان پێدڤیه نوونه‌رێن په‌رله‌مانى ل گه‌ل دا هه‌بن.
شاخه‌وانى گۆت ژى: بریارا كونگرێسێ ئه‌مریكى بۆ هنارتنا چه‌كى راسته‌وخۆ بۆ كوردستانێ و سوونێن عیراقێ بۆ سالا 2016 یه و ئه‌ڤێ نوكه دهێت هاریكارى نه.
ئەڤرۆ نیۆز، سالار دۆسکی:
ئەندامەکا کورد ل پەرلەمانێ عیراقێ ئاشکراکر کو ب مەرەما گەشەکرن و خورتکرنا بزاڤا ئابووری ل بانکێن ئەھلی ل ھەرێما کوردستانێ، داخاز ژ بانکا ناڤەندی یا عیراقێ کریە کو قەرزان بدەتە بانکێن ھەرێمێ ژی.
نەجیبا نەجیب ئەنداما کورد ل پەرلەمانێ عیراقێ ژ فراکسیۆنا پارتی دیموکراتی کوردستان زێدەتر بۆ ئەڤرۆ نیۆز گۆت: “بەری دو حەفتیا بانکا ناڤەندی یا عیراقی بریار دابوو پێنج ترۆیلۆن دینارێن عیراقی بدەتە، بانکێن چاندنێ و پیشەسازی و عەقاری مفا 1% ئەڤە دێ دەنە وەلاتیان بۆ پرۆژێن بچووک و ناڤەندی”.
نەجیبایێ گۆت ژی: “ئێك ملیار دۆلار ب زێدەھی دایە بانكان ب مەرەما بھێز خستنا کارێ وان، ئێک ترليۆن دینارێن عیراقی داینە بانکێن ئەھلی کو زێدەر ژ 40 بانکێن ئەھلی يێن عیراقێ ھەنە، ئەڤە ژی ب ھەمان مەبەست، بۆ ئەنجامدانا پرۆژان و ب ھێزکرنا بھایێ دینارێ عیراقی”.
ئەوێ ئەنداما پەرلەمانی گۆت: “من داخواز ژ بانکا ناڤەندی یا عیراقێ کریە کو بانکێن ھەرێمێ ژی ڤی کوژمەی وەربگرن، پارێزگەھێ بانکا ناڤەندی ئاشکرا کریە کو چ رێگر نین قەرزان بدەتە بانکێن هه‌رێما كوردستانێ، چونکە قەرزە، دیسان کاری ل سەر دکەین ب وێ مەرەمێ کو ڤێ داخازیێ نەکەنە سیاسی”.
نەجیبایێ گۆت: “چو رێگرێن قانوونی نینن و بانکا ناڤەندی رێگر نینە و ئەڤ کارە ھەکە ھاتەکرن دێ بانکێن ھەرێمێ ژی مفادار بن”.
ئه‌ڤرۆ نيوز:
د داخۆيانيه‌كا رۆژنامه‌ڤانى، چاڤدێرێ سياسى، ئيحسان ئامێدى بۆ راديۆيا دهۆك ئاماژه ب وێ چه‌ندێ كر كو گه‌له‌ك جاران حوكمه‌تا هه‌رێمێ ده‌ستپێشخه‌رى بۆ چاره‌كرنا كێشان كرينه و شاند ژى ره‌وانه‌يى به‌غدا كرينه، به‌لێ وه‌سا دياره حوكمه‌تا ناڤه‌ندى، ئيرادا چاره‌كرنا كێشێن ناڤبه‌را هه‌ولێر و به‌غدا نينه و دڤێت بڕياران هه‌موويان د چارچۆڤێ خوه دا بده‌ت و بڕيار ب تنێ يا وێ بيت.
نيشاندان