ئه‌ڤرو نیوز:
وه‌زاره‌تا سامانێن سروشتى ئه‌گه‌رێ گیروبوونا مووچه‌ى ئاشكرا دكه‌ت و رادگه‌هینیت ” وه‌زیرێ دارایى كو سه‌ر ب گۆران ڤه‌یه ژبه‌ر ته‌وجیهاتێن حزبى سه‌ره‌دانا هالك بانك یا توركى نه‌كریه كو پارێ نه‌فتا هه‌رێمێ ل وێ بانكێ ل ئه‌نقه‌ره هاتیه دانان و ژبه‌ر هندێ مووچێ فه‌رمانبه‌ران گیربوویه”.
ئه‌ڤرۆ وه‌زاره‌تا دارایى د به‌یاننامه‌كێ دا ره‌خنه ژ وه‌زاره‌تا سامانێن سروشتى گرتن كو پارێ فروتى یێ نه‌فتێ نه‌ئێخستیه سه‌ر حسابا وه‌زاره‌تا دارایى بۆ به‌لاڤكرنا موچێ هه‌یڤا شه‌ش یێ فه‌رمانبه‌رێن هه‌رێمێ.
ئه‌ڤرۆ نیوز:
هێمن سلێمان رێڤه‌به‌رێ راگه‌هاندن و په‌یوه‌ندیێن پۆلیسێن پارێزگه‌ها دهۆك ئه‌ڤرو د كونگره‌كێ رۆژنامه‌ڤانى دا دیاركر كو ئه‌و شیاینه تاوانبارەکى دەستەسەر بكه‌ن پشتی د رویدانەکێ دا، ب ترومبێلێ کەسەکی دکوژیت و ئێکێ دى بریندار دکەت و درەڤیت.
هه‌روه‌سا 4 تاوانبارێن دى ژى دەستەسەرکر بكه‌ن پشتی هەول داین شوفێرەکی برەڤینن و بکوژن و ترومبێلا وی بفروشن.
هێمن سلێمان دیاركر كو دڤەکولینان دا هەر 5 تاوانباران دان ب تاوانێن خو کرینە و لدیف یاسایێ دێ گەهنە سزایێ خو.
ئەڤرۆ نیوز:
ئیتایا، ئەلمانیا و ئەمریکا بەری کۆمبوونا (ناتۆ) داخواز ژ تورکیا کرن ئۆپەراسیۆنێن ل سەر گەریلایان راوەستینیت و بەرێ خوە بدەتە رێکخستنێن تیرۆرست یێن وەک داعشێ و ئەلنوسرە یا سەر ب قاعیدە و ژ پەکەکێ ژی خواست کو ھێرشێن خوە بدەتە راگرتن و بێی مەرج ڤەگەریتە سەر مێزا دانوستاندنان بۆ چارەکرنا پرسگرێکا کوردی.
رۆبێرتا پینۆتی وەزیرا بەرەڤانیێ یا ئیتالیا ل باژێرێ رۆمایێ پایتەختێ وی وەلاتی پرێس کۆنفرانسەک سازکر و تێدا ل سەر تێکۆشینا ل دژی رێکخستنێن تیرۆرست ل عیراقێ و سووریێ و رەوشا شەرێ ل تورکیا و بەرنامێ ھەڤپەیمانیا نێڤدەولەتی و ھەڤپەیمانیا ئەتلانتیک (ناتۆ) راوەستیا و راگەھاند کو ھەڤپەیمانا نێڤدەولەتی یا رژدە د نەھێلانا رێکخستنێن تیرۆرستی د عیراق و سووریێ دا و گۆت: (بەری کۆمبوونا ناتۆ یێ دڤێت ئەم ھەموو وەلاتێن ئەندام ھەلویستێن خوە یەک ئالی بکەین و ب تایبەت ژی تورکیا، ژ بەر کو نھا بەرنامەیا سەرەکی یا ناتۆ و ھەڤپەیمانیا نێڤدەولەتی ژناڤبرنا داعشێ و ئەلنوسرە یە، نابیت بەرەیێ شەری بھێتە پارچەکرن و بۆمبەبارانکرنا قەندیلی و ئۆپەراسیۆنێن ل دژی گەریلا نە د بەرژەوەندا ئاشتیا ھەرێمێ دایە و دڤێت تورکیا رژدبوونا خوە د ئاشتیێ و دیالۆگێ دا نیشا بدەت و پرسگرێکا کوردی چارە بکەت و د ھەمان دەمی دا ئەم ھێرشێن پەکەکێ بۆ سەر دەولەتا تورکیا ژی ب تەمامی رەت دکەین و دڤێت بێی مەرج ھێرشێن خوە بدەتە راوەستاندن).
رۆبێرتا پینۆتی وەزیرا بەرەڤانیێ یا ئیتالیا ھەروەسا دیار ژی کر کو د قۆناغا نھا دا پشکەک گەلەک مەزن ژ ئاخا سووریێ و عیراقێ د بن کۆنترۆلا تیرۆرستێن داعشێ و ئەلنوسرە دایە و گۆت: (ھەڤپەیمانیا مە دێ ب دژواری بنگەھێن تیرۆرستان بۆمبەباران بکەت و د ناڤ ئاخا سووریێ دا ب ھێزێن دیمۆکراتیک و یەکینەیێن پاراستنا گەل را د ناڤ خەباتەکا ھەڤپشک داینە و ل عیراقێ ژی ل گەل ھێزێن پێشمەرگەیێن کوردستانێ و سوپایێ عیراقێ پێکڤە کار دکەین و گەلەک ئاشکرایە بارێ شەری ب کریاری زێدەتر ل سەر ملێ کوردایە و دڤێت ئەم د ھەر واری دا ھەڤکاریا کوردان بکەین).
وەزیرا بەرەڤانیێ ل سەر رۆلێ کوردان د شەرێ داعشێ دا ژی دیار کر کو رۆلێ پێشمەرگە و شەرڤانان د شەرێ ل دژی تیرۆرستان دا جھێ سەربلندیا ھەموو جیھانێیە و گۆت: (ھەکە کوردا د بەرەیێ پێشی دا نەبان راوەستاندنا داعشێ دا گەلەک زەحمەت بیت و بۆ ڤێ چەندێ ژی ئەم چەند ھاریکاری و ھەڤکاریا کوردان بکەین ھێشتا کێمە و کورد ھەڤپەیمانێ سەرەکی یێ ھەڤپەیمانا نێڤ دەولەتی نە).
وەزیرا بەرەڤانیا ئیتالیا د پشکەکی دی یا ئاخڤتنا خوە دا ژی رەخنە ل ھەلویستێ حوکمەتا تورکیا گرت و راگەھاند کو ھەتا نھا وەک پێدڤی تورکیا د شەرێ ل دژی داعشێ و ئەلنوسرە دا ئەرکێن خوە بجە نە ئینایە و گۆت: (دڤێت تورکیا و ھەمو وەلاتێن ئەندام د ناڤا ھەڤپەیمانیێ دا ڤێ یەکێ باش بزانن کو ئەم ب رێکخستنێن نە مرۆڤی یێن تیرۆرستی را روو ب روو ماینە و مەترسیا وان نە ب تنێ ل سەر عیراقێ، سووریێ و کوردایە بەلکو ل سەر ھەموو جیھانێیە و رۆژ ب رۆژێ ژی مەترسیا وان زێدەتر دبیت، بۆ ڤێ چەندێ ژی ئەرکەکی مەزن دکەڤیتە سەر تورکیا دا کو سنۆرێن خوە بپارێزیت و نەھێلیت چەکدارێن تیرۆرست ژ ئاخا وێ دەربازی عیراقێ و سووریێ ببن و تێکۆشینا ل دژی تیرۆرێ لاواز نەکەت).
د داویا ئاخڤتنا خوە دا ژی دیار کر کو دڤێت ئۆپەراسیۆنێن تورکیا بۆ سەر بنگەھێن پەکەکێ ل ھەرێما کوردستانێ د زووترین دەم دا بھێنە راگرتن و گۆت: (بۆمبەبارانکرنا قەندیلی و دەڤەرێن چیایی یێن باکورێ کوردستانێ خزمەتا ئاشتیا ھەرێمێ و تورکیا ناکەت و دژواربوونا شەری تێکۆشینا مە یا ل ھەمبەر داعشێ و ئەلنوسرە لاواز دکەت و بۆ ڤێ چەندێ داخواز ژ تورکیا دکەین کو ئۆپەراسیۆنێن سەربازی و سیاسی ل دژی کوردان راوەستینیت و دڤێت پەکەکە ژی ھێرشێن خوە یێن ل سەر تورکیا ب تەمامی بدەتە راگرتن و بێی مەرج ڤەگەریتە سەر مێزا دانوستاندنێ و ل تورکیا ب تەمامی خەباتەکا سیاسی برێڤە ببەت).
ئەڤرۆ نیوز:
رۆژناما واشنتۆن پۆست د راپۆرتەکێ دا دیار کر کو روسیا بزاڤێ دکەت کو پشتی رێککەڤتنا د ناڤبەرا ئیرانێ ل گەل وەلاتێن زلھێز دا مفایێ ژ پەیوەندیێن ئیرانێ و رۆژئاڤا وەربگریت و ب تایبەتی ژی موسکۆ چاڤەرێ وێ یەکێ دکەت پشتی رابوونا سزایێن ل سەر ئیرانێ بشێت چەکێن گران بدەتە ئیرانێ و مفایەکێ باش یێ ئابووری وەربگریت و بەرپرسێن ئەمریکا ژی دلگرانیا خوە ل ھەمبەر وێ یەکێ دیار دکەن و داخواز ژ سەرۆکێ ئەمریکا دکەن کو روسیا تەنگاڤ بکەت دا کو ئەو وەلاتە جارێ چەکان نەدەتە ئیرانێ.
د پشکەکا دی یا راپۆرتێ دا ھاتیە دیار کرن کو ئەمریکا دخوازیت گەشەپێدانا ئابووری یا ئیرانێ د ژێر چاڤدێریەکا توند دا بیت و رێ بۆ ئیرانێ نەھێتە دان دا کو بشێت ل گۆر دلێ خوە چەکێن گران ژ روسیا یان ھەر وەلاتەکێ دی بکریت، ژ بەر ھندێ ژی ئەوا کو روسیا دخوازیت بکەت دێ زیانەکا مەزن گەھینتە بەرژەوەندیێن ئەمریکا، چونکو سەرۆکێ ئیرانێ چەندین جاران دیار کریە کو پشتی رێککەڤتنێ ئەو دێ پتر ھاریکاریا وان پارت و ئالیێن سیاسی ل رۆژھەلاتا ناڤین کەن یێن کو بەرەڤانیێ ل خەلکێ خوە دکەن و پرانیا وان ئالیان ژی د لیستا تیرۆرێ دانە، یان ژی دژبەریا ئەمریکا و ئیسرائیلێ دکەن.
ل ئالیێ دی ئاژانسا رویتەرز ژی د راپۆرتەکێ دا دیار کر کو رێککەڤتنا ئیرانێ ل گەل ئەمریکا و وەلاتێن دی دشێت ناکۆکیێن د ناڤبەرا روسیا و ئەمریکا دا توندتر بکەت، چونکو روسیا خوە دبینیت وەک ھەڤالێ نێزیکی ئیرانێ د رۆژێن زەحمەت دا و ھەردەم ژی پشتەڤانی ل ئیرانێ کریە و نھا ژی دخوازیت پشتی راکرنا سزایان و باشبوونا رەوشا ئابووری یا وی وەلاتی ئەو مفادارێ یەکێ بیت و ئەمریکا و وەلاتێن رۆژئاڤا ژی د دلگرانن و ناخوازن کو روسیا ب کارەکێ وەسا ئالۆزیێن نوو ل دەڤەرێ دروست بکەت.
ل ئالیێ دی دەزگەھێن راگەھاندنا ئیرانێ ژی دیار کرن کو ب دەھان کۆمپانیێن مەزنێن روسیا د ماوەیێ ھەفتیا بۆری دا سەرەدانا ئیرانێ کرینە و گرێبەستێن مەزن د بیاڤێن جودا جودا ل گەل بەرپرسێن ئیرانێ ئیمزا کرینە و دێ دەست ب کارێن مەزن د بیاڤێ ئابووری و ب تایبەتی ژی د بیاڤێ نەفتێ دا کەن.
چاڤدێرێن سیاسی دیار دکەن کو پشتی رێککەڤتنا ل گەل ئیرانێ گەلەک وەلاتێن رۆژئاڤا ژی دخوازن کو د بیاڤێ نەفتێ و گەلەک بیاڤێن دیتر دا کارێ وەربەرھێنانێ ل ئیرانێ بکەن و روسیا وەک وەلاتێ سەرەکی دەست ب کارەکێ وەسا کریە و دلگرانیا ئەمریکا ژی ژ ھندێ یە کو ئیران ب ھێز بیت و ئاریشێن نوو بۆ رۆژئاڤا دروست بکەت.
ئەڤرۆ نیوز:
ل دۆر خرابوونا ھەردو جھێن گەشتیاری، سیلاڤا شەرانشێ و شکەفتا بھێرێ جڤاتا پارێزگەھا دھۆکێ راپۆرتەک بەرھەڤکریە. گەشت و گۆزار ژی دبێژیت: ژ بەر ئەو جە ل بەر ماستەر پلانا گەشتیاری دکەڤن، ل دووڤ پێشبینیان، نێزیکی ٢٠ ملیۆن دۆلار دێ لێ ھێنە مەزاختن، لەورا چو پرۆژێن دی بۆ وان جھان نینن. رێڤەبەرێ گەشت و گۆزارێ ل زاخۆ دیار کر، سیلاڤا شەرانشێ پرۆژە دیزاین ژی بۆ ھاتیە دانان، ل دووڤ پێشبینیان، د پلانا مە یا ستراتیژی دا، نێزیکی ٢٠ ملیون دۆلاران دێ لێ ھێنە مەزاختن.
دلمان سندی بریاردەرا لژنا باژێرڤانیا و خزمەتکاریان ل پارێزگەھا دھۆکێ بۆ ئەڤرۆ دیار کر، مە سەرەدانا شکەفتا بھێرێ و شەرانشێ کریە، ب راپۆرت و دکیۆمێنت بۆ جڤاتا پارێزگەھا دھۆکێ دێ ھێتە رەوانەکرن و گۆت: ئێدی ژ گلێشی سەرەدەری ل گەل ڤان ھەردو جھێن گەشتیاری ناھێتەکرن، دلێ مە پێ دسۆژیت، ھەکە جھێن پەیوەندیدار نکارن ئاڤا بکەن و خزمەتکاریا گەشتیاری بگەھینن، قەبارەیێ مەزنێ گلێشی بۆ ھەبیت.
چیا ئەمین، رێڤەبەرێ گەشت و گۆزارێ ل زاخۆ بۆ ئەڤرۆ دیار کر، پاقژیا وێ بەردەوام دھێتە کرن، لێ زوو پیس دبیت، ژ بەر جھەک پێدڤی ب نووژەنکرنێ یە، نۆکە ب تنێ د پلان دایە پێسترکێن وێ چوونا ناڤ سیلاڤێ دا بھێنە دانان، ژ بەر ل گۆرەیی گۆتنێن چیایی ھەر جھەکێ ماستەر پلانا گەشتیاری بۆ بکەڤیت ب دەھان پرۆژێن گەشتیاری تێدا دھێنە ڤەکرن، لەورا نکارین چو پرۆژە و نووژەنکرنان بگەھیننە وان، ل بەر ماستەر پلانا گەشتیاری دکەڤیت.
گۆت ژی: سیلاڤا شەرانشێ پرۆژە دیزاین ژی بۆ ھاتیە دانان، ل دووڤ پێشبینیان، د پلانا مە یا ستراتیژی دا، نێزیکی ٢٠ ملیۆن دۆلاران دێ لێ ھێنە مەزاختن، پرۆژێ سیلاڤێ دێ شکەفتا بھێری ژی پێکڤە گرێدەت، کو ھندی جھێ کەسکاتی ئەو نێزیکی ١٣٠ دۆنەمێن ئەردی یە دێ ب بەرکەڤیت، دێ ئۆتێل و مۆتێل و مەلەڤانگەە و خوارنگەە تێدا ھێنە دانان، ھەروەسا نێزیکی ٤٠ خانۆیێن گەشتیاری دانین، سیلاڤ ب خوە ژی دێ ھێتە نووژەنکرن، ھەر دیسا جھێن ترۆمبێلێن گەشتیاری یێن بێ پانزین تێدا ھێنە دانان.
محەمەد نەعیم، کەسەک بوو ژ گەشتیارێن عەرەب ھاتیە سیلاڤێ کو ئەو نیڤ دەمژمێر بوو، ل جھەکێ دگەریا ل گەل خێزانا خوە تێدا بروونن ل گۆرەیی گۆتنێن وی چو جە بدەست نەکەفتن و سیلاڤ بجە ھێلا بوو و بۆ ئەڤرۆ گۆت: تشتێ مە ھزر دکر کو حوکمەتا ھەرێمێ ھەرێمەکا سەربخوەیە، نۆکە ب دەھان جھێن گەشتیاری ھەنە، بۆ مە ژی مەرەق بوو ببینین.
رێڤەبەرێ گەشت و گوزارێ ل زاخۆ دا زانین ژی، سێ پرۆژێن ستراتیژی یێن گەشتیاری د ماستەر پلانا گەشتیاری دا ھەنە، کەشان و سیلاڤا شەرانشێ، ھەردوو دێ بنە دەڤەرێن گەشتیاری، ھەروەسا پرۆژێ سیێ ل ھنداڤ پرا دەلال ژی ل وارگەھێ دەلال دێ کۆمەلگەھا گەشتیاری ھێتە دانان و گۆت: ژ بەر قەیرانا دارایی و کارتێکرنێن ڤی شەرێ دووماھیێ یێن سۆپایێ تورکیا ل گەل گەریلایێن پەکەکێ، کارتێکرن ل رەوشا جھان وان کریە.
سەبارەت سیلاڤێ و شکەفتا بھێری ئەردێ وان یێ خەلکێ گۆندایە رێڤەبەرێ گەشت و گوزارێ ل دووماھیێ گۆت: کێشا خەلکێ وان گۆندێن ب بەر ماستەر پلانێ کەڤن، رەزامەندیا وان ھاتیە وەرگرتن بۆ ھندێ پشتی دکەڤنە بەر پرۆژەی خەلکێ وان گۆندێن زیانێن ئەردی بەر دکەڤن ب رێیێن قانوونی بھێنە قەرەبووکرن.
ئه‌ڤرۆ نيوز:
د بەردەوامیا تۆببارانکرنا دەڤەرداریێن ھەرێمێ ژ لایێ فرۆکێن شەرکەرێن تورکیا کۆ د ھەمان دەم دا بارەگایێن پارتیا کارکەرێن کوردستانێ، لێ د جھنشینن، لەورا ھەتا نھا چەندین زیانێن گیانی و ماددی ل پاش خوە ھێلاینە. ئەندامەکێ پەرلەمانێ کوردستانێ بۆ ئەڤرۆ گۆت: ب مەرەما ھایداریا خەلکێ زیان گەھشتیێ ب تۆپبارانێن فروکێن تورکیا، شاندەکێ پەرلەمانێ کوردستانێ سەرەدانا دەڤەرا ئامێدیێ کریە، ژ بەر کۆ چەندین بارەگەھێن پەکەکێ ل نێزیکی گوندێن دەڤەرا نەھلێ و نێروە و رێکان ھەنە.
عەبدوللا میکائیک وەلاتیێ دەڤەرا نێروە و رێکان بۆ ئەڤرۆ گوت: ب درێژاھیا تۆپبارانێن فروکێن شەرکەرێن تورکیا، ھەتا نھا رێژەکا بەرچاڤ ژ مال و سامانێ مە ژ ناڤ چوویە و زیانەکا مەزن گەھاندیە خەلکێ دەڤەرێ، چونکو ھەموو سالەکێ ئەم رادبین ب ئاڤەدانکرن و چاندنا بەروبومێن خوە، لێ د وەرزێ چنینا بەرھەمێن مە دا فروکێن تورکیا دھێن و سلاڤێ ل بەرھەمێ مە دکەن بەری کۆ سلاڤا مە بگەھیتێ.
دیارکر ژی: سەرەرای سۆتنا باخ و بیستان و ئاقارێن وی ژی، لێ ھەتا نھا پتری ژ ١٥٠ مێشێن وی یێن ھنگڤینی ژی ھاتنە سۆتن و ژ ناڤبرن و گۆت: خەلکێ دەڤەرێن مە ھەموو بێ مووچە و بێ کارن، لەورا ژین و ژیارا وان یا رۆژانە ل سەر ب چاندنا زەڤی و باخ و بیستانێن خوەنە، لەورا ھیڤیا مە ژ جھێن شولەژێ ئەوە ھەر ب زوو ئاگەھی ل سەر رەوشا مە ھەبیت و ھەموو شیانێن خوە بێخنە کار ژ پێخەمەت ئارامکرنا دەڤەرێن مە.
ئەیسەر جەرجیس حەمید رێڤەبەرێ ناحیا شێلادزێ ل دور ھەمان بابەت بۆ ئەڤرۆ گۆت: د بۆردومانا فروکێن تورکیا بۆ سەر ب دەڤەرێن نێروە و رێکان دا، نھا ٣٢ گۆندێن وان دەڤەران زەرەر و زیانەکا مەزن گەھشتیە وان ژ بەر کۆ باخ و بسیتانێن وان ھەموو ب ئێکجار ھاتینە سۆتن و نێزیکی ١٠٠ ھزار دونەمێن ئەردی ھاتینە سۆتن، ھەر دیسان ھژمارەکا بەرچاڤا مێشێن ھنگڤینی کۆ خەلکێ دەڤەرێ ب خودان دکەن ھاتینە سۆتن و ژناڤرن، لەورا بۆ ھەمان مەبەست شاندەکێ پەرلەمانێ کوردستانێ سەرەدانا دەڤەرێ کریە کۆ ھەر ل نێزبک ئاگەھی ژ رەوشا خەلکێ زیان گەھشتی ھایدار ببن.
ئەیسەر حەمید گۆت ژی: ھەموو گازندە و داخوازیێن خەلکی ل دوور سۆتنا بەروبومێن وان دێ ھێـنە تومارکرن و بۆ ئەنجومەنێ پارێزگەھا دھۆکێ ھێنە ھنارتن ژ بۆ وێ یەکێ ئاگەھی ژ رەوشا وان ھەبیت.
عەبدوللا جاسم رێکانی، ئەندامێ پەرلەمانێ کوردستانێ بۆ ئەڤرۆ گۆت: ھەر ب مەرەما ھایداریا خەلکێ زیان گەھشتیێ ب تۆپبارانێن فروکێن تورکیا، شاندەکێ پەرلەمانێ کوردستانێ سەرەدانا دەڤەرا ئامێدیێ کریە، ژ بەر کۆ چەندین بارەگەھێن پەکەکێ ل نێزیکی گوندێن دەڤەرا نەھلێ و نێروە و رێکان ھەنە. لەورا ھەر ب نێزیک مە ژ رەوشا وان پرسیە و دیمەن و جھێن تۆپبارانکری مە دیتینە، بۆ ھەمان مەبەست مە لیژنەک پێک ئینایە کۆ راپۆرتا خۆە بگەھیننە سەروکاتیا پەرلەمانێ کوردستانێ و ھەکە پێدڤی بیت، د ئامادەینە روونشتنەکا نە ئاسایی ئەنجام بدەین.
عەبدوللا جاسم رێکانی دیار کر ژی: ژ بەر کۆ پەکەکە ل ھەموو دەڤەرێ بەربەلاڤە، لەورا د ھەموو سالەکێ دا زیانەکا مەزن دگەھیتە خەلکێ ڤان ھەموو دەڤەران، ژ بەر کۆ ژین و ژیارا خەلکێ ڤان دەڤەرا ل سەر ئاڤەدانکرن و چاندنا باخ و بیستانێن خوە نە، لەورا دڤێت حوکمەتا ھەرێمێ ل دووڤ شیانێن خوە ھاریکاریا خەلکێ زیان گەھشتی بکەت.
رێکانی نە ڤەشارت ژی: ھەتا نھا چو لیژنەیان سەرەدانا دەڤەرا نێروە و رێکان نەکریە بۆ ھایداریا رەوشا خەلکێ دەڤەرێ ژبلی شاندەکا پەرلەمانتارێن ھەرێمێ، ژ بەر کۆ دەڤەر ھەموو د بارەکێ نە ئاسای دایە و لیژنا ناڤبری چاڤەرێ ئێمناھیا دەڤەرێ یە ژ بۆ وێ یەکێ ب کار و پێرابوونێن خوە راببن.
ئه‌ڤرۆ نیوز،زنار تۆڤى:
ئه‌ڤرۆ رۆژا سێشه‌مبى 18/8/2015 ب به‌رهه‌ڤبوونا ئه‌ندامێن سه‌ركردایه‌تیا پارتى دیمۆكراتى كوردستان و ئه‌ندامێن په‌رله‌مانێ كوردستانێ و عێراقێ و ئه‌ندام و كادرێن حزبى و حكوومى و مامۆستایێن ئایینى رهسپى و ماقۆل و كه‌سوكار و خێزانێن شه‌هیدان سالیادا شه‌هیدێن شه‌رێ ل دژى داعش ل سنورێ پارێزگه‌ها دهوكێ ل ژێر درۆشمێ (شه‌هید نامرن) ل هۆلا كۆنگران ژلایێ تایێ ئێك یێ پارتى دیمۆكراتى كوردستان ل دهوكێ هاته ساخكرن.
عه‌بدولخالق بابیرى به‌رپرسێ تایێ ئێك یێ پارتى دیمۆكراتى كوردستان د په‌یڤه‌كێ رۆلێ پێشمه‌رگێ كوردستانێ بلند نرخاند كو ب سایا خوراگرى و به‌رخوه‌دانا وان ئه‌ڤرۆ ئه‌م دڤێ ئازادیێ دا دژین و هه‌روه‌سا سه‌ر بلندى بۆ وان شه‌هید و جان فیدایان بن ئه‌وێن جانێ خوه گۆرى ئاخا كوردستانێ كرى،له‌ورا ئه‌م چ جاران شه‌هیدێن خوه ژبیرناكه‌ین و هه‌رده‌م ئه‌و د دلێ ملله‌تێ مه دانه،ساخكرنا ڤێ رۆژێ وه‌فاداریه‌كه بۆ خوینا وان شه‌هیدان.
دهه‌مان ده‌مدا وێنه‌یێن شه‌هیدێن قاره‌مان یێن ل پارێزگه‌ها دهوكێ بۆ به‌رهه‌ڤبوویان هاتنه نیشاندان.
ئەڤرۆ نيوز:
ئەندامەکێ فراکسیۆنا پارتی ل جڤاتا نوونەرێن عیراقێ بۆ ئەڤرۆ دیار کر، پرۆژە قانوونا پاسپۆرتان ھاتە پەسەندکرن، ل دووڤ قانوونێ ژی ئەو وەلاتیێن ھەرێما کوردستانێ یێن پاسپۆرتا خوە بەرزە بکەن یان ب ھەر ئەگەرەکی ژناڤ بچیت، ناچنە بەغدا و بۆ ھەر ئێکی ل پارێزگەھا وی دێ بۆ ھێتە دەرئێخستن.
حاکم سەرحان ئەحمەد، ئەندامێ فراکسیۆنا پارتی ل جڤاتا نوونەرێن عیراقێ خویا کر، دوھی ١٧-٨-٢٠١٥ جڤاتا نوونەرێن عیراقێ کۆمبوونا خوە یا ئاسایی ئەنجام دا و تێدا ب پتریا دەنگان پرۆژە قانوونا پاسپۆرتان ھاتە پەسەندکرن و گۆت: “ڤێ قانوونا پاسپۆرتان مفایەکێ مەزن بۆ ھەموو وەلاتیێن عیراقێ و ب تایبەتی یێن ھەرێما کوردستانێ ھەیە، چونکو ل گۆرەی وێ قانوونێ، ژ نوکە پێڤە دەستھەلات ب رێڤەریێن پاسپۆرتان ل پارێزگەھان دێ ھێتە دان، ئەو وەلاتیێن پاسپۆرتێن خوە بەرزە دکەن یان ب ھەر ئەگەرەکی پاسپۆرتا وان ژ ناڤ دچیت، پێدڤی ناکەت بچنە بەغدا و ل پارێزگەھێن وان پاسپۆرت دێ بۆ ھێتە دەرئێخستن”.
ناڤھاتی ئاماژە ب وێ چەندێ ژی کر، ژ ئەگەرێن ئەمنی ئاریشە بۆ وان وەلاتیێن ھەرێما کوردستانێ دروست دبوو یێن پاسپۆرتا خوە بەرزەکربا یان ب ھەر ئەگەرەکی ژناڤچووبا، ب زەحمەتبوو چووبانە بەغدا ھەتا پاسپۆرت بو خوە دەرئێخستبا، لێ ئەڤ ئاریشە نەما و ھاتە چارەکرن.
نيشاندان