ئه‌ڤرۆ نيوز:
ب گۆره‌يى ژێده‌رێن رۆژنامه‌ڤانى ئه‌ڤرۆ ل جڤاتا نوونه‌رێن عيراقێ پشتى ده‌نگدانێ ل سه‌ر په‌سه‌ندكرنا وه‌زيرێ پێشه‌سازى، شه‌ر د ناڤبه‌را هه‌ڤپه‌يمانيا ئه‌حرار و په‌رله‌مانتاره‌كێ سه‌ربه‌خۆ دا روودا.
سومه‌ريه نيوز به‌لاڤكريه كو پشتى پتريا ئه‌ندامێن جڤاتا نوونه‌رێن عيراقێ ره‌زامه‌ندى ل سه‌ر محه‌مه‌د ده‌راجى وه‌كو وه‌زيرێ پێشه‌سازى ده‌ربڕى، په‌رله‌مانتارێ سه‌ربه‌خۆ كازم سه‌يادى، نه‌رازيبوونا خوه دياركر ل دۆر سيسته‌مێ ده‌نگدانێ كو ب ره‌نگه‌كێ نه‌يێ قانوونى هاتيه كرن.
ئاماژه ب وێ چه‌ندێ ژى كر كو هه‌ڤپه‌يمانيا ئه‌حرار دلگرانيا خوه ل سه‌ر نه‌رازيبوونا سه‌يادى ده‌ربڕيه و ئه‌ڤه ژى بوويه ئه‌گه‌رێ شه‌ره‌ك د ناڤبه‌ر وان دا و پاشان ژى په‌رله‌مانتارێن دى ژى چوونه ناڤ بابه‌تى و سه‌يادى ده‌رخسته ژ ده‌رڤه‌يى هۆلا په‌رله‌مانى.
دايه زانين ژى به‌ر ڤێ شه‌رێ په‌يدا بووى، سه‌رۆكێ جڤاتا نوونه‌ران بۆ ماوێ ده‌مژمێره‌كێ روونشتنا جڤاتێ پاشخست ئه‌وا ئه‌ڤرۆ رۆژا سێشه‌مبى ب مه‌ره‌ما ده‌نگدانێ ل سه‌ر وه‌زيره‌كێ نوو يێ حوكمه‌تا مالكى ب ئاماده‌بوونا 218 په‌رله‌مانتاران هاتيه ئه‌نجام دان.
ئه‌ڤرۆ نيوز:
سه‌رۆكێ هه‌رێما كوردستانێ راگه‌هاند، سۆپايێ عيراقێ يێ بوويه سۆپايه‌كێ تايفى و ئه‌ڤه ژى بوويه ئه‌گه‌رێ ئيرادا پارێزگاريكرنا وه‌لاتى نه‌مينيت.
مه‌سعود بارزانى سه‌رۆكێ هه‌رێما كوردستانێ د چاڤپێكه‌فتنه‌كێ دا ل گه‌ل كه‌نالێ سى ئێن بى سى يێ ئه‌مريكى راگه‌هاند: سۆپايێ عيراقێ نه‌شيايه پارێزگاريێ ل باژێرێ رومادى و ده‌ڤه‌رێن دى يێن عيراقێ بكه‌ت، چونكو تايفه‌گه‌رى رێگربوو د وى سۆپايى دا كو ئيرادا پارێزگاريكرنا وه‌لاتى نه‌مينيت.
ئاماژه ب وێ چه‌ندێ ژى كر كو ئه‌و كێشا كو د سوپايێ عيراقێ دا هه‌يه، بۆ رژێما به‌رێ يا ڤى وه‌لات ڤه‌دگه‌ريت كو ژينگه‌هه‌كا وه‌سان دروست كريه تێدا له‌شكرێ نشتيمانى يێ عيراقێ كريه له‌شكره‌كێ تايفى و ئه‌ڤێ ژى وه‌كريه كو كونترۆلكرن و پاراستنا وه‌لاتى يا سه‌ركه‌فتى نه‌بيت.
ئه‌ڤرۆ نيوز:
فه‌رماندێ هێزێن هه‌ڤپشكێن عيراقێ، كو ژ سۆپا و پۆليسێن فيدرال و حه‌شه‌د شه‌عبى ئۆپه‌راسيۆنێن كونترۆلكرنا ئه‌نبار راگه‌هاند.
پشتى ماوێ حه‌فتيه‌كێ ژ گرتنا باژێرێ رومادى سه‌نته‌رێ پارێزگه‌ها ئه‌نبار، ژ لايێ چه‌كدارێن داعش ڤه، ئه‌ڤرۆ رۆژا سێشه‌مبى رێكه‌فتى 26ى گۆلانا 2015ێ فه‌رماندێ هێزێن هه‌ڤپشكێن عيراقێ ئوپه‌راسيۆنا كونترۆلكرنا ئه‌نبار راگه‌هاند.
ب گۆره‌يى ئه‌و پێزانينێن ده‌زگه‌هێن راگه‌هاندنا عيراقى به‌لاڤ كرين، ئه‌ڤ ئۆپه‌راسيۆنه ژ 20 هزار چه‌كدارێن حه‌شه‌د شه‌عبى و 15 هزار له‌شكرێن سه‌ر ب هێزێن ئه‌منى ڤه پێك دهێت.
ئه‌ڤرۆ نیوز: ره‌وان نهێلى :
ل ڤێ دووماهیێ ل هندێ گه‌له‌ك گرنگى ب قوربانیێن روودانێن هاتن و چوونێ دهێته دان، ب تایبه‌ت پشتى كو سه‌لمان خان ستێرا بولیوود ژبه‌ر سه‌رخوشیێ، د ده‌مێ هاژوتنا ترومبێلێ وه‌لاتیه‌ك كوشتى.
پشتى دادگه‌ها هندێ سه‌لمان حوكمكرى، هه‌ر زوو ب كه‌فاله‌ت هاته به‌ردان و به‌ردانا وى بۆ ئه‌گه‌رێ نه‌رازیبوونا پرانیا خه‌لكێ هندێ ژبه‌ر كو قانوون كارێ خوه ناكه‌ت و گازندێن خه‌لكى ئه‌وبوون، دده‌مه‌كێ دا شوفێرێن سه‌رخوه‌ش، دڤێت بگه‌هنه سزایێ خوه.
رۆژناما Quartz India، نڤیسیه: ل جادێن هندێ، سالانه زێده‌تر ژ 20 هزار سه‌لمان خان یێن هه‌ین و سالانه ب هزاره‌هان وه‌لاتى دهێته كوشتن سه‌را روودانێن هاتن و چوونێ.
به‌لێ سه‌ره‌راى ڤێ چه‌ندێ هند نه ژ وه‌لاتێن ئێكێ یه كو روودانێن هاتن و چوونێ لێ په‌یدا دبن، به‌لكو سالانه ب ڤى ره‌نگێ وه‌لاتى سه‌را روودانان دمرن و ب ڤێ رێزبه‌ندیا ل خوارێ:
1- صین 275983
2- هند 231027
3- نیجیریا 53399
4- برازیل 43869
5- إندونیسیا 42434
6- ئه‌مریكا 35490
7- پاكستان 30131
8- روسیا 26567
9- تایلاند 26312
10- ئیران 25224
ئه‌ڤرۆ نيوز:
وه‌زيرێ كاروبارێن شه‌هيدان رادگه‌هينيت كو ژ ئه‌گه‌رێ كێ مته‌رخه‌ميا وه‌زاره‌تا پێشمه‌رگه‌يى، هه‌تا نوكه چو پێشمه‌رگێن شه‌رێ داعش ب شه‌هيد ژ لايێ حوكمه‌تێ ڤه نه‌هاتينه هژمارتن.
مه‌حمود حاجى سالح وه‌زيرێ كاروبارێن شه‌هيدان و ئه‌نفالكريان ل حوكمه‌تا هه‌رێما كوردستانێ بۆ حه‌فتيناما باس راگه‌هاند كو هه‌تا نوكه چو پێشمه‌رگێن شه‌رێ داعش يێن شه‌هيد بووين ل لايێ حوكمه‌تێ نه‌هاتينه تۆماركرن.
ل دۆر ئه‌گه‌رێ ژى ئاشكه‌را كر كو ژ وه‌زاره‌تا پێشمه‌رگه‌يى، چونكو هه‌تا نوكه دوسيێ ئه‌و پێشمه‌رگێن خۆبه‌خش يێن ل لايێ وه‌زاره‌تا پێشمه‌رگه بۆ وان ره‌وانه نه‌كرينه.
گۆتژى: “دڤێت دوسيێن وان ب رێكخراوه‌يى بهنێرن و دو پله ژى ب هه‌ر پێشمه‌رگه‌كێ شه‌هيد بهێنه دان، پاشان مووچه و ئمتيازاتێن شه‌هيدى دێ بۆ بنه‌مال و كه‌سوكارێن وان هێنه ده‌رخستن”.
ب گۆره‌يى حوكمه‌تا هه‌رێما كوردستانێ خێزانا هه‌ر پێشمه‌رگه‌كێ ل شه‌ر داعش شه‌هيد دبيت، دێ شه‌ش هه‌يڤا مووچێ وى يێ پێشمه‌رگاتيێ وه‌رگريت و پاشان ژى دێ وه‌كو شه‌هيد ل وه‌زاره‌تا كاروبارێن شه‌هيد و ئه‌نفالكريان مووچه بۆ هێته دابينكرن، به‌لێ وه‌زيرێ كاروبارێن پێشمه‌رگه‌يى دبێژيت: “هنده‌ك پێشمه‌رگه ئه‌ڤه ساله‌كه شه‌هيد بووين، ژ به‌ر بێخه‌ميا وه‌زاره‌تا پێشمه‌رگه نه‌شياينه مووچه‌يى بۆ كه‌سوكارێن وان دابين بكه‌ين”.
ئه‌ڤرۆ نيوز:
بڕياره ئه‌ڤرۆ رۆژا سێشه‌مبى رێكه‌فتى 26ى گۆلانا 2015ێ ب ئاماده‌بوونا جێگرێ سه‌رۆكێ حوكمه‌تێ و دو وه‌زيران روونشته‌كا ئاسايى يا په‌رله‌مانێ كوردستانێ بهێته ئه‌نجام دان.
محه‌مه‌د عه‌لى ياسين ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز گۆت: “ده‌سته‌يا سه‌رۆكاتيا په‌رله‌مانى بڕيار دايه كو روونشتنا ژماره 12 يا خولا بهارێ ژ خولا هه‌لبژارتنێن چارێ يا په‌رله‌مانێ كوردستانێ ل ده‌مژمێر 11:00ى به‌رى نيڤرۆيا ئه‌ڤرۆ رۆژا سێشه‌مبى رێكه‌فتى 26ى گۆلانا 2015ێ بيت”.
ئاماژه ب وێ چه‌ندێ كر كو دێ د ڤێ كۆمبوونێ دا دانوستاندن ل سه‌ر راكێشانا مايه د رێيا قه‌ركرنێ ل هه‌رێما كوردستانێ ب گۆره‌يى ماددێن 72، 74 و 75 ژ په‌يره‌وێ ناڤخۆ يێ په‌رله‌مانێ كوردستانێ ژماره 1 يا سالا 1992ێ يێ راستڤه‌كرى.
ئەڤرۆ:
دارا ناتق ئەندامێ سەرکردایەتیا پارتی دیموکراتی کوردستان- ئیران بۆ رۆژناما ئەڤرۆ دیار کر کو پشتی شەرەکێ د ناڤبەرا پێشمەرگێن وان ل گەل PKK نھا بەرپرسێن PKK داخواز ژ مە دکەن کو ئەم دەڤەرێ کەلەشینێ چۆل بکەین و ڤەگەرینە بنگەھێن خوە ل کۆیێ و دبێژین ھەکە ئەو یەک بھێتە کرن ئەو دێ بەرھەڤ بن کو دەست ب دانوستاندنان بکەن و ھەتا نھا ژی چو دانوستاندنەک راستەوخوە د ناڤبەرا مە و PKK دا دروست نەبوویە و گۆت: (مە ب رێیا ھندەک دۆستێن خوە بۆ بەرپرسێن PKK دیار کریە کو ئەم ب چو رەنگەکێ وێ دەڤەرێ چۆل ناکەین، چونکو ب سالان ھێزێن مە ل وێرێ بووینە و بەری ھاتنا PKK ب دەھان بنگەھێن مە ل کەلەشین و گەلەک دەڤەرێن دیتر ھەبوون و ئەو نەشێن بێژنە مە کو دڤێت ھوون ژ وێرێ بچن و ژ بەر ھندێ ژی ئەو داخوازیا PKK ژ ئالیێ پارتیا مە ڤە ھاتیە رەت کرن).
ئەندامێ سەرکردایەتیا پارتی دیموکراتی کوردستان- ئیران د بەردەوامیا ئاخڤتنا خوە دا ئەو یەک ژی دیار کر کو نھا شەر ھاتیە راگرتن و چو شەرەک د ناڤبەرا ھێزێن مە ل گەل یێن PKK دا نینە و مە دوھی ژی ب رێیا ھندەک دۆستان داخواز ژ وان کریە کو ئەم ھەڤدیتنەکێ دروست بکەین و ئاریشێن خوە ب رێیا دانوستاندنێ چارە بکەین و وەک نیەت پاکیەک ژی ئەو گەریلایێن کو ژ ئالیێ مە ڤە ھاتبوونە دەستەسەر کرن مە ئازاد کر، لێ جھێ داخێ یە کو ھەتا نھا ژی بەرپرسێن PKK بەرھەڤ نینن کو ل گەل مە دانوستاندنان بکەن و ئەو داخوازا وان ژی ژ ئالیێ مە ھاتیە رەت کرن و گۆت: (ئەو شەرێ کو دروست بوویی تشتەکێ گەلەک خراب بوو، پێدڤی بوو کو وان تشتەک وەسا نەکربا،بەس گەلێ کورد و ھەموو پارت و ئالیێن سیاسی یێن ھەر چار پارچێن کوردستانێ دژبەریا خوە ل ھەمبەر وێ ھێرشا PKK دیار کرن و داخوازا چارەکرنا وێ ئالۆزیێ کرن و مە بەری نھا ژی دیار کریە کو ئەم بەرھەڤین ب دانوستاندنان وێ ئالۆزیێ چارە بکەین و ھەتا نھا ژی وان بەرھەڤیا خوە بۆ وێ یەکێ دیار نەکریە).
دارا ناتق د دووماھیا ئاخڤتنا خوە دا ئەو یەک ژی نەڤەشارت و راگەھاند کو PKK نە دۆژمنێ مە یە، بەلکو دۆژمنێ مە کۆمارا ئیسلامی یا ئیرانێ یە و ژ بەر ھندێ نابیت PKK ئاستەنگیان ل ھەمبەر خەباتا مە ل رۆژھەلاتێ کوردستانێ دروست بکەت، چونکو نھا ل رۆژھەلاتێ کوردستانێ ژی رەوش ھاتیە گوھۆرین و خەلکێ مە چاڤەرێ ئێکەتیا ھەموو ھێزێن کوردستانێ دکەت و ژ بەر ھندێ ژی ھەر ژ رۆژا کو ئالۆزی دروست بوویی ھەتا نھا پارتیا مە ب داخۆیانی و ب رێیا ھەڤال و دۆستان بزاڤ کریە کو شەر روو نەدەت و گۆت: (وان داخوازا مە یا بۆ دانوستاندنێ و چارەکرنێ رەت کر و ھێرشی مە کر و پێشمەرگەک مە شەھید بوو و سێ ژی بریندارن، ئەم جارەکا دی داخواز ژ PKK دکەین دەستان ژ وی ھەلویستێ خوە بەردەت یێ کو تنێ د خزمەتا دۆژمنێ کوردستانێ دایە، شەرێ کورد ل گەل کوردی چ دەمەکێ د بەرژەوەندا کوردان و چو پارتەکا کوردستانی دا نەبوویە و نینە و ئەم ھیڤیدارین کو بەرپرسیارێن PKK ب رەنگەکێ ھەستیار سەرەدەریێ ل گەل ڤێ ئالۆزیێ بکەن دا کو ئەم بشێین ب رێیا دانوستاندنان وێ پرسێ چارە بکەین).
ئه‌ڤرۆ نیوز:
ل دووڤ دووماهى راپرسی ل توركیا، ئاكه‌په د هه‌لبژارتنێن 7 خزیرانا ئه‌ڤ ساله دا، دێ پرانیا په‌رله‌مانى ژ ده‌ست ده‌ت.
ل دووڤ دووماهى راپرسی ل توركیا كو ئاژانسا رویته‌رز به‌لاڤكریه د هه‌لبژارتنێن 7 خزیرانا ئه‌ڤ ساله دا، دێ پرانیا په‌رله‌مانى ژ ده‌ست ده‌ت و هه‌ده‌په دێ به‌ربه‌ستا 10% ده‌رباز كه‌ت و ئاكه‌په كو نوكه پارتا ده‌ستهه‌لاتداره دێ پرانیا په‌رله‌مانى ژ ده‌ست ده‌ت و ب تنێ دێ 41% یا ده‌نگان بده‌ستڤه ئینیت.
نيشاندان