ئه‌ڤرۆ نیوز:
ئه‌حمه‌د عه‌بدولره‌حمان په‌یڤدارێ وه‌زاره‌تا دارایى یا حكومه‌تا هه‌رێما كوردستانێ راگه‌هاند هه‌تا كو كێشا دارایى یا به‌رده‌وام بیت، بودجه ب حزبان ناهێته دان.
ئه‌ڤه دده‌مه‌كێ دا كو پرانیا حزبێن كوردستانى به‌رى نوكه هه‌یڤانه بودجه ژ حكومه‌تا هه‌رێمێ وه‌ردگرت، به‌لێ پشتى قه‌یرانا دارایى چێبووى، ئه‌ڤه بۆ ماوێ سال و نیڤانه، چ بودجه‌یه‌ك ژ ئالیێ حكومه‌تێ ڤه بۆ نه‌هاتیه مه‌زاختن.
ئه‌ڤرۆ نيوز:
د روونشتنا ئه‌ڤرۆ يا په‌رله‌مانێ كوردستانێ دا، 20 ئه‌ندامێن لژنا 21 كه‌سى يا دستوورى هاتنه په‌سه‌ند كرن و ب تنێ ئێك كه‌س مايه كو ئه‌و ژى نوونه‌رێن هه‌ر چار لايه‌نێن “بزاڤا ئيسلامى، شيوعلا، سوشاليست و ئاراسته‌يێ سيێ” يه.
د روونشتنا ئه‌ڤرۆ رۆژا چارشه‌مبى رێكه‌فتى 20ى گۆلانا 2015ێ يا په‌رله‌مانێ كوردستانێ دا كو برگه‌ك يا تايبه‌ت بوو ب په‌سه‌ندكرنا لژنا 21 كه‌سى يا يا ئاماده‌كرنا دستوورێ هه‌رێما كوردستانێ، هاته ئه‌نجام دان و تێدا 20 ئه‌ندام هاتنه په‌سه‌ند كرن و ژ به‌ر ئێكلانه‌بوونا لايه‌نێن “بزاڤا ئيسلامى، شيوعلا، سوشاليست و ئاراسته‌يێ سيێ” ئێك ئه‌ندام مايه و نه‌هاتيه په‌سه‌ندكرن.
لژنا 21 كه‌سى يا ئاماده‌كرنا دستوورى ب گۆره‌يى سيسته‌مێ سانتليگۆ يێ جيهانى د ناڤبه‌را فراكسيۆنێن ناڤا په‌رله‌مانى دا هاتينه دابه‌شكرن ب ره‌نگه‌كى پارتى حه‌فت كه‌س و گۆران وئێكه‌تيێ چار كه‌س و يه‌كگرتوو دو كه‌س و هه‌ر ئێك ژ كۆمه‌لا ئيسلامى و توركمان و مه‌سيحيان ژى كورسيه‌ك و چار لايه‌نێن “بزاڤا ئيسلامى، شيوعلا، سوشاليست و ئاراسته‌يێ سيێ” كورسيه‌ك.
محه‌مه‌د عه‌لى ياسين ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز راگه‌هاند بوو كو حه‌فت نوونه‌رێن پارتى د پێكهاتى نه ژ هه‌ر ئێك ژ ژ حاكم نه‌مر كه‌چۆ كو نوونه‌رێ ئێكانه يێ ئێزديه د لژنێ دا و ل سه‌ر به‌هرا پارتيه و د. ڤالا فه‌ريد و د. فه‌رسه‌ت سوفى يێن په‌رله‌مانتار و سيروان زه‌هاوى شارازه‌يێ وارێ دستوورى و ئه‌ندامێ به‌رێ يێ جڤاتا نوونه‌رێن عيراقێ و عوسمان وه‌يسى و عه‌بدولحه‌كيم خسرۆ عه‌بدولفتاح عه‌بدولره‌زاق مامۆستايێن زانكۆيێ و تايبه‌تمه‌ندێن دستوورى”.
ئه‌ڤرۆ نيوز، ئه‌ياد به‌روارى:
رێڤەبەریا گشتی یا گەشناسیێ و پیڤەلەرزێ ل ھەرێما کوردستانێ راگەھاند، ل رۆژا شەمبیێ ٢٣ گۆلانا ٢٠١٥ ھەرێما کوردستانێ دێ کەڤیتە بن کاریگەریا فشارێن نزم يێن ده‌ريا ناڤه‌راست کو بایەکێ ھین د گەل دایە و دێ پلێن گەرمێ نزم بن و ھەتا رۆژا چارشەمبیا بھێت ٢٧ى گۆلانێ دێ یا بەردەوام بیت.
ده‌رباره‌يى باران بارينێ ژى د نڤيساره‌كێ دا كو ئه‌ڤرۆ نيوز دانه‌ك ب ده‌ست خوه خستيه ئاماژه ب وێ چه‌ندێ كريه كو ب تنێ ل پارێزگه‌ها دهۆكێ دێ باران باريت و ل ده‌مێ باران بارينێ ده‌ليڤا وێ چه‌ندێ يا هه‌يى بريسى ژى ل گه‌ل بهێن.
ئەڤرۆ نیۆز، قائید میرۆ:
ئەندامەکێ لیژنا سامانێن سرۆشتی یا پەرلەمانێ کوردستانێ ئاشکرا کر، ھێشتا ھەرێمێ چو پلانێن پێگوهۆڕ بۆ فڕۆتنا پترۆلێ نینە و پەرلەمان د گەل سەربخۆیا ئابووریە.
فائیق مستەفا ئەندامێ لیژنا سامانێن سرۆشتی بۆ ئەڤرۆ نیۆز گۆت: “لیژنا سامانێن سرۆشتی چو دانوستان د گەل وەزارەتا سامانێن سرۆشتی نەکرینە بۆ فڕۆتنا پترۆلێ ب شێوەیەکێ راستەوخۆ بێی بەغدا، چونکو دڤێت ڤه‌كۆلينا بابەتی بھێتەکرن و ھەرێم خوە ئێکلا بکەت، کو ئایا ب ڤی شێوەی یا رازیە ب ڤی پارێ بەغدا فڕێکەت بۆ ھەرێما کوردستانێ”.
فائیق گۆتژی: “پەرلەمان ھەر ژ دەستپێکێ د گەل ڤێ چەندێ بوویە، ھەرێم ژ لایێ ئابووری ڤە یا سەربخوە بیت و ئەگەر بشێت پتڕۆل راستەوخۆ بفرۆشیت کارەکێ باشە، بەلێ دڤێت ڤه‌كۆلين ل سه‌ر ڤێ پێنگاڤێ بهێته كرن و نابیت ب زیان بۆ خەلکێ ھەرێمێ دووماھی بھێت”.
ئەڤرۆ نیۆز، قائید میرۆ:
بڕیاردەرێ لیژنا ئاسایش و بەڕەڤانیا پەرلەمانێ عێراقێ تەکەزکر، پڕۆسا کۆنتڕۆلکرنەڤا باژێڕێ مووسل دێ پاشکەڤیت و دەمەکێ زۆر پێدڤیە بۆ گرتنا مووسل نەک ئەف ژڤانێ دیاریکری.
شاخەوان عەبدولا، بڕیاردەرێ لیژنا ئاسایش و بەڕەڤانیا پەرلەمانێ عێراقێ ب ئەڤرۆ نیۆز گۆت: “پشتی گرتنا رومادی ژ لایێ تیرۆرستێن داعش کاریگەری کریە سەر کۆنتڕلکرنا باژێڕێ مووسل و گرتنا مووسل دێ پاشکەڤیت”.
شاخەوانی گۆتژی: “ھەر ژ دەستپێکێ دانا پلانا گرتنا مووسل یا شاش بوویە و چو بەرھەڤی نەھاتینەکرن، ھەتا ئەمریکا ب خوە ڤێ راستیێ دزانیت، ژ بەر کو چەکدارکرنا سونیێن مووسل و ھەماھەنگیا د گەل ھێزێن پێشمەرگە و راھێنانا خۆوه‌بەخشا تنێ ناف بوویە و بەرھەڤی بۆنەھاتیەکرن”.
ئه‌ڤرۆ نيوز:
ئاخفتنكه‌رێ ب ناڤێ سه‌رۆك وه‌زيرێن عيراقێ راگه‌هاند ژ ئه‌گه‌رێ قه‌يرانا دارايى ل سالا 2015ێ چو فه‌رمانبه‌ر ب ره‌نگێ گرێبه‌ست ناهێنه دامه‌زراندن.
سه‌عد حه‌ديسى ئاخفتنكه‌رێ ب ناڤێ سه‌رۆك وه‌زيرێن عيراقێ بۆ غه‌د پرێس گۆت: “ب گۆره‌يى قانوونا بودجه‌يى يا سالا 2015ێ يا عيراقێ، رێ ب چو وه‌زاره‌تان ناهێته دان فه‌رمانبه‌ران ب ره‌نگێ گرێبه‌ست ب دامه‌زرينن”.
ئاماژه ب وێ چه‌ندێ ژى كر كو د ئه‌ڤ ساله دا ژبلى چه‌ند شاره‌زايه‌كان چو كه‌س ب ره‌نگێ گرێبه‌ست ناهێته دامه‌زراندن ب تنێ دێ بزاڤ هێته كرن ئه‌و كه‌سێن ماوێ سێ سالان ب سه‌ر دامه‌زراندنا وان ڤه وه‌كو گرێبه‌ست ده‌رباز بووين ب دامه‌زرينن.
ئه‌ڤرۆ نيوز:
به‌رپرسه‌كێ وه‌زاره‌تا به‌ره‌ڤانيا ئه‌مريكا راگه‌هاند كو واشنتۆن بڕيارا دايى هێزه‌كا تايبه‌ت بۆ پشته‌ڤانيكرنا هێزێن عيراقێ نه‌هنێريته به‌ره‌يێن شه‌رى ل سنورێن رومادى كو نوكه ل ژێر ده‌ستێ چه‌كدارێن داعش دانه.
د داخۆيانيه‌كێ دا بۆ CNN به‌رپرسه‌كێ وه‌زاره‌تا به‌ره‌ڤانيا ئه‌مريكا كو داخواز كريه ناڤێ وى نه‌هێته به‌لاڤكرن، راگه‌هانديه كو فه‌رمانده‌يا له‌شكرى چو جۆره داخوازيه‌كا وه‌سان پێشكێش نه‌كريه كو ره‌زامه‌نديێ وه‌ربگرن دا كو هێزێن خوه ل رومادى به‌لاڤ بكه‌ن، ئاماژه ب وێ چه‌ندێ ژى كريه كو نوكه هه‌ست ناكه‌ن تشته‌كێ وه‌سان د رێ دابيت.
به‌رى نوكه كوچكا سپى راگه‌هاندبوو كو هزر ل زێده‌كرنا هه‌ڤكاريێن له‌شكرى بۆ هێزێن عيراقى دكه‌ن د پێناڤى پارێزگاريكرن ل باژێرێ رومادى، د ناڤ دا مه‌شقكرن و هه‌ڤكاريا هێزێن ناڤخۆه يێن رومادى.
ئه‌ڤرۆ نيوز:
سه‌رۆكێ حوكمه‌تا عيراقێ ره‌زامه‌ندى ل سه‌ر ده‌ست ژ كاركێشانا وه‌زيرێ پێشه‌سازى و ژێده‌رێن ئاڤێ ده‌ربڕى و پێشبينى دهێته كرن چه‌ند وه‌زيرێن دژى ده‌ست ژ كاركێشانا خوه ب راگه‌هينن.
ژێده‌ره‌كێ بلند ل حوكمه‌تا عيراقێ بۆ “بغداديهة نيوز” راگه‌هاند: حه‌يده‌ر عه‌بادى، سه‌رۆك وه‌زيرێن عيراقێ ره‌زامه‌ندى ده‌ربڕى ل سه‌ر ده‌ست ژ كار كێشانا “نه‌سير عيساوى”، وه‌زيرێ پێشه‌سازى و “محسن شه‌مه‌رى”، وه‌زيرێ ژێده‌رێن ئاڤێ”.
دا زانين ژى كو بڕياره د كۆمبوونا داهاتى يا جڤاتا نوونه‌رێن عيراقێ دا، دو كه‌سێن دى ل جهێ وان ژ لايێ ليستا ئه‌حرار ڤه بهێنه دياركرن.
ئاماژه ب وێ چه‌ندێ ژى كر كو پێشبينى دهێته كرن “محه‌مه‌د ساحێب ده‌رجى” بۆ وه‌زيرێ پێشه‌سازى و “محه‌مه‌د عه‌مشاوى” بۆ وه‌زيرێ ژێده‌رێن ئاڤێ بهێنه ده‌ستنيشانكرن.
نيشاندان