ئه‌ڤرۆ نیوز:

ل دور ھەلویستێ جڤاتا سەرکردایەتیا ئیکگرتوو ل بەھدینان و دەست ژ کارکێشانا دیندار نەجمان دوسکی پشتی پشکداریا ئێکگرتوو د کومبوونا دوھی یا پەرلەمانێ کوردستانێ دا، ھندەک کەس و لایەن شینا وێ چەندێ کو بەحسێ ناکوکیێن کویرێن ئێکگرتوویێن دھۆکێ و سلێمانیێ بکەن، بزاڤێ دکەن وێ چەندێ نیشا بدەن کو ئەڤ ھەلویستێ جڤاتا سەرکردایەتیا دھۆکێ و دیندار نەجمانی بۆ پشتەڤانیا پارتی یە، لێ راستیا وێ وەسا نینە بەلکو ئێکگرتوو یێن بەھدینان دەمەکە داخوازێ ژ مەکتەبا سیاسیا خو دکەن کو ئێدی سەنگا بەھدینان د بریارێن ستراتیژی یێن ئێکگرتوو دا ل بەرچاڤ بھێتە وەرگرتن.
ب حوکمێ کارێ خو یێ رۆژنامەڤانی و وێ تێکەلیا من ل گەل چەند بەرپرس و کادر و ھەڤالەکێن ئێکگرتوو ل بەھدینان ھەی، دەمەکە گەھشتیمە وێ باوەریێ کو ئێدی ئێکگرتوو ب ڤی رەنگی بەردەوام نابیت.
بەری حەفت ھەیڤان ھەڤالێ رۆژنەمەڤان Hemin Lihony پرسیارا بۆچوونا من کر ل دوور پاشەرۆژا ئێکگرتوو ل بەھدینان، ل وی دەمی ئەڤە بەرسڤا من بوو بۆ کاک ھێمنی: “ئەگەر ئێکگرتوویێن بەھدینان باشتر رۆلێ د دانانا سیاسەتا گشتی یا حزبێ دا نەبینن و ئێکگرتوو ب رەنگەکێ گشتی ژ گۆڕان دوور نەکەڤیت، ئێکگرتوویێن بەھدینان دێ جودا بن.”
نوکە ژی ل سەر ھەمان بۆچوونێ مە ب پشت بەستن ل سەر ڤان خالێن خوارێ ھاتینە رێزکرن.
١- د ھەلبژارتنێن سالا ٢٠٠٥ یێن پەرلەمانێ عیراقێ دا، ئێکگرتوویێن بەھدینان و بەشەکێ ھەولێرێ ل گەل ھندێ نەبوون ئێکگرتوو ب لیستەکا سەربەخو پشکداری ھەلبژارتنان بیت د دەمەکی دا کو ھەموو کورد ب ئێک لیست پشکدار بوون، لێ ب حوکمێ پرانیا سادە (٥٠+١) یا سەرکردێن سلێمانیێ د ناڤ ئێکگرتوو دا بریار ھاتە دان ب لیستەکا سەربەخو پشکدار بن و د ئەنجام دا ئێکگرتوو یێن بەھدینان بوونە قوربانی و بارەگایێن وان ھاتنە سوتن و کادرێن وان ھاتنە کوشتن، ژ بەر کو سەرکردێن سلێمانیێ واقعێ دھۆکێ نەدزانی و گوھداریا بۆچوونێن سەرکردێن دھۆکێ ژی نەکر.
٢- د پێکئینانا کابینەیا شەشێ یا حکوومەتا کوردستانێ دا، دیسا پرانیا سەرکردێن ئێکگرتوویێن بەھدینان و د گەل دا چەند سەرکردەکێن ھەولێرێ ژی کو ئێک ژ وان (محەمەد رەئوف) کو د کونگرێ شەشێ دا ئێک بەربژێرێن ب ھێز بوو ب بیتە ئەمیندارێ گشتی و نوکە سەرۆکێ جڤاتا سەرکردایەتیا ئێکگرتوویە د گەل ھندێ بوون ئێکگرتوو پشکداری حکوومەتێ بیت، لێ دیسا ب پرانیا سادەیا سەرکردێن ئێکگرتوو ل سلێمانیێ و ل ژێر کاریگەریا گۆتارا گۆڕان جڤاتا سەرکردایەتیا ئێکگرتوو بریار دا پشکداری کابینەیا شەشێ نەکەت یا کو ل وی دەمی ب سەرۆکاتیا د. بەرھەم سالح ھاتیە پێکئینان.
٣- د خونیشادانێن ١٨ی شواتێ دا، سەرکردایەتیا ئێکگرتوو یا سلێمانیێ ب رەنگەکێ کەفتە بن کارگەریا تەڤگەرا گۆڕان و ل سەرایێ سلێمانیێ ھندەک گۆتارێن وەسا زڤر د دان کو ب چو رەنگان ل گەل مەبادئێن ئێکگرتوو ل سەر ھاتیە ئاڤاکرن نەدگونجیا و ھەروەسا ب چو رەنگان ل گەل سرۆشتێ سەرکردە و کادرێن ئێکگرتوو یێن بەھدینان نەدگونجیا.
٤- ل دووماھیا سالا ٢٠١١ دەمێ بۆ جارا دووێ بارەگەھێن ئێکگرتوو ل بەھدینان ھاتینە سوتن، سەرکردێن ئێکگرتوو یێن بەھدینان و یێن سلێمانیێ دو دنیا بینیێن تمام ژێک جودا ھەبوون بۆ وان روودانان، ب رەنگەکێ یێن دھۆکێ د داخویانی و لڤینێن خو دا بزاڤ دکر رەوشێ ئارام بکەن، بەرامبەر وان سەرکردێن سلێمانیێ بزاڤ دکرن رەوشێ ئالۆزتر لێ بکەن. چەند رۆژەکان پشتی سۆتنا بارەگەھان سەرکردەکێ ئێکگرتوو ل دھۆکێ گۆتە من ھەکە مە گوھێ خو دا بوو رێنما و گۆتارێن سەرکردێن ئێکگرتوو ل سلێمانیێ و مە ژی وەکی وان رەفتار کر بوو، دا ل دھۆکێ خوین ل جوکا چیت!!!
٦- د دابەشکرنا پۆستێن ھەر دو حکوومەتێن ھەرێمێ و بەغدا دا، پرانیا پۆستان بەر ب کادر و سەرکردێن سلێمانیێ کەفتینە و د بابەتێ وەرگرتنا پۆستێ وەزیرێ کوچ و کوچبەرێن عیراقێ دا کو د ھاتە چاڤەرێکرن ب سەرکردەکێ بەھدینان یێ ئێکگرتوو بھێتە دان، د خولەکێن دووماھیێ دا ئەمیندارێ گشتیێ ئێکگرتوو داگێران بۆ تەڤگەرا گۆڕان کر و ئەو پۆست ب وان ھاتە دان کو ل وی دەمی ھندەک کادر و ئەندامێن ئێکگرتوو د گۆت بتنێ کو بەربژار بەھدینی بوو لەوما ئەمیندارێ ئێکگرتوو داگێران کریە.
ب مەرەما وێ چەندێ کو سیاسەتا گشتی یا ئێکگرتوو و ھەلویستێن وێ د کێشێن ھەرێمێ دا و ھەروەسا د دانا بریارێن ستراتیجی دا رەنگڤەدانا بوچوونێن سەرکردێن سلێمانیێ بتنێ نەبیت، د کونگرێ شەشێ یێ ئێکگرتوو دا ماددەک ھاتە پەسەند کرن کو بریارێن جڤاتا سەرکردایەتیا ئێکگرتوو ب 3/2 بھێنە دان کو بەری کونگرەی ب ٥٠+١ د ھاتنە دان. پشتی کونگرەی سەرکردەکێ ئێکگرتوو گۆتە من پشتی ڤێ بریارێ ئەزێ گەشبینم کو ئێدی بۆچوونێن سلێمانیێ بتنێ د زال نابن بەلکو دێ ئێکگرتوویێن بەھدینان ژی رۆل د دارێشتنا سیاسەتا گشتی یا ئێکگرتوو دا ھەبیت، لێ دیارە ئەو گەشبینی یا د جە دا نەبوو ژ بەر کو بەری حەفت ھەیڤان سەرکردێن دھۆکێ یێن ئێکگرتوو نەرازیبوونەکا توند ل دژی مەکتەبا سیاسیا ئێکگرتوو و ئەمیندارێ گشتی نیشان دا کو ھەکە رێز ل ئیرادە و رێژەییا دەنگێن ئێکگرتوویێن دھۆکێ نەھێتە گرتن، ئەو دێ ھەلویستی وەرگرن، وی دەمی سەرکردایەتیا ئێکگرتوو کومبوو و سۆزدا کو رێژەیا دھۆکێ پێش چاڤ بھێتە وەرگرتن و ئێدی بریارێن گرنگ و ستراتیجی یێن ئێکگرتوو ب لھەڤھاتن یان ژی ب 3/2 دەربچن، لێ د کومبوونا دوھی یا پەرلەمانی دا دەرکەفت کو ئەو سۆز نەھاتە بجھئینان و ل بن کاریگەریا گۆتارا گۆڕان و گڤاشتنێن وان پەرلەمانتارێن ئێکگرتوو یێن سلێمانیێ و هه‌ولێرێ پشکداری کومبوونا پەرلەمانی بوون بێی کو رێزێ ل ئیرادا دەنگدەر و سەرکردێن ئێکگرتوو یێن دەڤەرا بەھدینان بگرن کو بەری وەخت سۆز پێ ھاتبوو دان بریارێن گرنگ و ستراتیجی ب لھەڤھاتنێ (سازانێ) د ناڤ جڤاتا سەرکردایەتیا ئێکگرتوو دا بھێنە دان.
ئەڤا ل سەری ھاتیە رێزکرن وێ چەندێ نیشا د دەت کو کێشەیا ئێکگرتوویێن دھۆکێ ل گەل یێن سلێمانیێ نەیا دوھی و ئەڤرۆ یە بەلکو دەمەکە سەرکردێن بەھدینان وێ گازندێ دکەن.

ل دور دەست ژ کار کێشانا دیندار نەجمان دوسکی ژی، راستە دیندار یێ تورەیە ژ بالا دەستیا سلێمانیان ل سەر بریارێن ئێکگرتوویا ئیسلامی، لێ د گەل وێ چەندێ دا دیندار گەلەک جودایێن بنەرەتی یێن دی ژی ھەنە و وی گەلەک گازندە ل شێوازێ کارێ ئێکگرتوو ھەنە ب تایبەتی د بابەتێ جوداکرنا دەعوێ و سیاسەتێ دا و وەکی من ژ وی گوە لێبووی حةتا ئەو د گەل ھندێ دا نینە پاشگرێ ئیسلامی ب ناڤێ ئێکگرتوو ڤە بمینیت.

ژ فێسبوكێ رۆژنامه‌ڤان ( ڤەگێر سەعدوللا ) هاتیه‌ وه‌رگرتن

ڤه‌گێر سه‌عدولا

ئه‌ڤرۆ نیوز:

نێچیرڤان بارزانى سه‌رۆكێ حكوومه‌تا هه‌رێما كوردستانێ پێشوازى ل بالیوزێ ئه‌مریكا ل عیراقێ و شاندێ ل گه‌ل دا كر.
نێچیرڤان بارزانى سه‌رۆكێ حكوومه‌تا هه‌رێما كوردستانێ دیاركر ئه‌گه‌ر به‌غدا پابه‌ندى رێككه‌فتنێ نه‌بیت، وى ده‌مى حكومه‌تا هه‌رێما كوردستانێ دێ هه‌موو بزاڤان كه‌ت پێدڤیێن وه‌لاتیێن هه‌رێما كوردستانێ دابین بكه‌ت ب تایبه‌تى چاره‌كرنا كێشا مووچه‌ و دابینكرنا پێدڤیێن پێشمه‌رگه‌ى.