ئه‌ڤرۆ نيوز:

وه‌زيرێ به‌رێ يێ راگه‌هاندنێ ل ئوردن راگه‌هاند گز ژ ئه‌گه‌رێ وێ چه‌ندێ كو سه‌رۆكێ هه‌رێما كوردستانێ وه‌كو ئاسته‌نگه‌كێ يه‌ ل هه‌مبه‌ر پلانێن ئيرانێ، ئيرانێ پلانان دژى بارزانى ددانيت:

سالح قه‌لاب وه‌زيرێ به‌رێ يێ راگه‌هاندنێ ل ئوردن د گۆتاره‌كێ دا كو ل مالپه‌رێ “الشرق الاوسط” به‌لاڤ بوويه‌، مه‌سعود بارزانى سه‌رۆكێ هه‌رێما كوردستانێ، ب به‌رقراركه‌رێ راسته‌قينه‌ يێ هه‌ستا نه‌ته‌وايه‌تى يا كوردى وه‌سفكريه‌ و ئاماژێ ب وێ چه‌ندێ دده‌ت كو دده‌مێ راپۆرى دا سه‌رۆكێ هه‌رێما كوردستانێ ئاماده‌ نه‌بوويه‌ ببيته‌ پشكه‌ك ژ وێ ستراتيژيه‌تا ئيرانێ يا ل ده‌ڤه‌رێ هه‌يى. سه‌رۆكێ هه‌رێما كوردستانێ ره‌تكريه‌ كو ببيته‌ رێيه‌ك بۆ پێكڤه‌گرێدانا ته‌هران و ديمه‌شقێ و ئاماده‌ نه‌بوويه‌ كو خواستا ئيرانێ بجهـ بينيت، ل ده‌مێ داخواز ژێ هاتيه‌ كرن كو سه‌ره‌دانا ديمه‌شقێ بكه‌ت و چاڤ ب به‌شار ئه‌سه‌د سه‌رۆكێ سوريا بكه‌ڤيت، به‌لێ بارزانى ره‌تكريه‌، ئاماده‌ نه‌بوويه‌ ديدارێ ل گه‌ل وه‌ليد موعه‌لم ژى وه‌زيرێ ده‌رڤه‌ يێ سوريا ئه‌نجام بده‌ت.

ئه‌ڤى وه‌زيرێ عه‌ره‌ب ئه‌و چه‌نده‌ ژى دايه‌ زانين كو د ماوێ بۆرى دا “قاسم سوله‌يمانى” فه‌رماندێ هێزا قودس يا ئيرانى ل قه‌لاچولان ل سلێمانيێ كۆمبوون ل گه‌ل هێرۆ ئيراهيم ئه‌حمه‌د، هه‌ڤژينا سكرتێرێ گشتيێ ئێكه‌تى نشتيمانى كوردستان و هه‌ر ئێك ژ مه‌لا به‌ختيار و به‌رهه‌م سالح ئه‌نجام دايه‌ و داخواز ژێ كريه‌ مه‌سعود بارزانى ژ پۆستێ وى لاده‌ن و د نێزيكترين ده‌رفه‌ت دا خوه‌ ژێ قورتال بكه‌ن، به‌لێ د كۆمبوونێ دا كوسره‌ت ره‌سۆل و به‌رهه‌م سالح ئاماده‌ نه‌بووينه‌ پشته‌ڤانيێ ل ڤێ هزرێ بكه‌ن.

سالح قه‌لاب وه‌زيرێ به‌رێ يێ راگه‌هاندنا ئوردن دا زانين كو به‌رى نێزيكى حه‌فتيه‌كێ ل سلێمانيێ كۆمبوونه‌كا د ناڤبه‌ر قونسۆلێ ئيرانێ ل هه‌ولێرێ ل گه‌ل سه‌رنڤيسكارێن چار رۆژنامێن سه‌ر ب ئێكه‌تيێ و نوونه‌رێ هێرۆ ئيبراهيم ئه‌حمه‌د، هه‌ڤژينا سكرتێرێ گشتيێ ئێكه‌تى نشتيمانى كوردستان و جه‌ميل بايك هه‌ڤسه‌رۆكێ كۆنسه‌يا رێڤه‌به‌ر ل كۆما جڤاكێن كوردستانێ “كه‌جه‌كێ” هاتيه‌ ئه‌نجام دان و چه‌ندين بڕيار ده‌ركرينه‌ دا كو كار ل سه‌ر وێ چه‌ندێ بكه‌ن جادا كوردى دژى بارزانى راكه‌نه‌ سه‌ر خوه‌ دا دووباره‌ وه‌كو سه‌رۆكێ هه‌رێمێ نه‌هێته‌ هه‌لبژارتن.

ل دووماهيێ ژى دبێژيت: “هه‌كه‌ ئيران د ده‌ست گرتنا سه‌ر عيراقێ دا سه‌ركه‌فت دێ ئێكسه‌ر رووى كه‌ته‌ سه‌ر هه‌رێما كوردستانێ و دوور نينه‌ بزاڤێ بكه‌ت شه‌رێ ناڤخۆيى روو بده‌ت وه‌كو يێ ل سالا 1996 روو دايى.