ئەڤرۆ:

 ئێک ژ ئاریشە و گازندێن گەلەک وەلاتی دکەن گیروبوونا پرۆژێن خزمەتکاری نە، ل گەل ھندێ ژی حوکمەتا ھەرێما کوردستانێ ھەموو بزاڤان دکەت بەلێندەرێن خەمساریێ د کار و پرۆژێن خوە دا دکەن سزا بدەن و جارنا ژی گەھشتیە وی رادەی بەلێندەری زیندان بکەت. ئەندامەکێ پەرلەمانێ کوردستانێ راگەھاند، ل گۆر قانوونێ حوکمەتێ مافێ ھەی بەلێندەرێ خەمسار بدەتە دادگەھێ و پاشی بھێتە زیندانکرن.

بەلێندەرەکێ پارێزگەھا دھۆکێ دیار کر، گەلەک جاران گیروبوونا پرۆژان نە سووچێن بەلێندەرانە، بەلکو حوکمەت ژی یا خەمسارە و گۆت: پرۆژە ھەنە حوکمەت د دەمێ پێدڤی دا نەشێت ھەموو پارێن پرۆژەی خەرج بکەت یان ژی ل نیڤا دەمێ ئەنجامدانا پرۆژەی دێ نەخشە و دیزاینا وێ گوھۆریت، ئەڤە ژی دێ بیتە ئەگەر کو خەمساری پەیداببیت و پرۆژە د دەمێ خوە یێ پێدڤی دا ب دووماھی نەھێت.

بەیار دوسکی، ئەندامێ لیژنا باژێرڤانیان ل پەرلەمانێ کوردستانێ بۆ ئەڤرۆ دیار کر، ھندەک رێنما ھەنە کو تێدا ھاتیە، ھەکە بەلێندەر کارێ خوە ب دروستی جێبەجێ نەکەت، دێ تووشی پێرابوونێن قانوونی بیت و پرۆژە ژێ ھێتە کێشان و رەوانەی بەلێندەرەکێ دیتر بیت و ھەر زیانەکا ب حوکمەتێ یان جھێ پەیوەندیدار کەڤتی لایەنێ سەرپێچار دێ ژێ بەرپرس بیت و گۆت: گەلەک جاران حوکمەت پرۆژەی نادەتەڤ بەلێندەرەکێ خودان شیان و ئەڤە دبیتە ئەگەر کو خەمساری پەیداببیت و پرۆژە گیروبیت.

دوسکی خویاژی کر، بێگومان ھەکە بەلێندەری خەمساری کر و ھەموو تشت ل سەر وی ئاشکرابوون، دێ تووشی دادگەھا سڤیل بیت و رەنگە حالەت بەر ب ھندێ ژی بچیت کو ئەو بەلێندەرە بھێتە زیندانکرن و گۆت ژی: گەلەک جاران پرۆژە گیرو دبن و پێرابوونێن دروست ژی ل گەل بەلێندەران یان ژی لایەنێ خەمسار ناھێنە وەرگرتن.

ڤەمان فەیسەل، ئەندامێ لیژنا قانوونی ل پەرلەمانێ کوردستانێ بۆ ئەڤرۆ خویا کر، ل گۆرەی قانوونا بەلێندەرایەتی کو گرێدای قانوونا مەدەنی یە مادێن ٨٧٠ و ٨٧١ و ٨٧٢، ھەکە بەلێندەر خەمساری د کارێ خوە دا بکەت دێ تووشی پێرابوونێن قانوونی بیت و گۆت: ل گۆرەی وێ قانوونێ، ئەندازیار دێ نەخشێ پرۆژەی دانیت، بەلێندەر بەرپرسە ژ ھەر خەمساریەکا د پرۆژەی دا دھێتە کرن.

مافپەروەر ئەحمەد سەبری، بەرپرسێ پشکا قانوونێ ل رێڤەبەریا ئاڤا دەوروبەرێن پارێزگەھا دھۆکێ دیار کر، ھەکە بەلێندەر پرۆژەی گیروبکەت و ژ ماوێ دەستنیشاکری ببووریت، کا چەند رۆژ گیروبوون دێ رۆژانە سزا چیتە سەر بەلێندەری، بەلێ ھەکە حیلە و تەشقەلە د پرۆژەی دا بھێنە بکارئینان، بێگومان دێ گەھیتە وی ئاستی کو بەلێندەر بھێتە رەوانەکرن بۆ دادگەھێ و دادگەە دێ بریارا خوە دەت، چونکو مالێ گشتی پووچ دبیت و کارتێکرن ل بەرژەوەندا گشتی بیت.

زیرەک تاھر دوسکی، سەرۆکێ ئێکەتیا بەڵێندەرێن کوردستانێ لقێ دھۆکێ بۆ رۆژناما ئەڤرۆ دیار کر، نھا پتر ژ ٦٠٠ بەڵێندەران ل ئێکەتیا مە د تۆمارکرینە بەلێ ئەوێن ب رژدی کار دکەن ٥٩١ بەڵێندەرن و کارێ خوە دروست دکەن و زێدەتر بۆ ئەڤرۆ دبێژیت: ژ بەر نەبوونا پارەی ٨٠% ژ پرۆژان ھاتینە راگرتن.

دەمێ پرۆژەک دھێتە دەستپێکرن، ماوەکێ دەستنیشانکری بۆ دھێتە دانان کو د وی دەمی دا ب دووماھی بھێت، بەلێ ئەڤ سالە ژ بەر تێکچونا رەوشا ھەرێمێ رەنگە ماوە ھەموو نەھێتە ھژمارتن. زیرەک دوسکی گۆت: ھەر ژ دەستپێکا پەیدابوونا ڤێ قەیرانا ئابووری ل سەر ھەرێما کوردستانێ مە ھەموو بزاڤکرینە کو چو پرۆژە نەھێنە راگرتن و گەلەک ژ بەلیندەران ژی ل سەر کیستێ خوە بەردەوامی داینە پرۆژێن خوە و ب دووماھی ژی ئیناینە و ھەتا نوکە ژی پارە وەرنەگرتینە و گەلەک پرۆژە ژی ھەبووینە ژ ھێزا بەلیندەری مەزنتر بووینە کو بەردەوامیێ پێ بدەت، لەوما ھاتینە راگرتن.

ل دووڤ پێزانینێن ئەڤرۆ ب دستخۆڤە ئیناین حوکمەتا ھەرێما کوردستانێ نێزیکی چار ملیار دولاران قەردارا بەڵێندەرێن ھەرێما کوردستانێ یە

ئه‌ڤرۆ:
رێڤەبەرێ گشتیێ پلان و دووڤچوونێ ل وەزارەتا چاندن و ژێدەرێن ئاڤێ ل حوکمەتا ھەرێما کوردستانێ بۆ ئەڤرۆ دیار کر، وەزارەتا چاندنێ بڕیارەک بۆ ھەموو دامودەزگەھێن حوکمەتا ھەرێمێ ھنارتیە، کو دەست ب تۆمارکرنا سکالان ل دادگەھێن ھەرێما کوردستانێ ل سەر وان کەسێن زێدەگاڤی ل سەر ئەردێ چاندنێ کرین بکەن و گۆت “ھەتا نوکە دۆرین 600 سکالان ھاتینە تۆمارکرن و ئەم حەز دکەین ھەموو دامودەزگەە سکالان تۆمار بکەن”.
د. ئەنوەر عومەر قادر، رێڤەبەرێ گشتیێ پلان و دووڤچوونێ ل وەزارەتا چاندن و ژێدەرێن ئاڤێ ئاشکرا کر، زێدەگاڤی ل سەر 24 ھزار و نێزیکی 300 دونەمێن ئەردێ چاندنێ ھاتیە کرن و گۆت: “پتریا وەلاتیان ل جھێن گەشتیاری یێن نێزیک رێیێن سەرەکی زێدەگاڤی کرینە و رووپیڤانەکا نوو بۆ دەستنیشانکرنا رووبەرێ ئەردێ چاندنێ یێ زێدەگاڤی ل سەر ھاتیە کرن دێ کەین”.
ئاماژە ب وێ چەندێ ژی کر، ل پارێزگەھا دھۆکێ دەست ب کاری ھاتیە کرن و ب رژدی کار یێ دھێتە کرن بۆ رێگریکرن ل وان زێدەگاڤیێن ل سەر ئەردێ چاندنێ دھێنە کرن و گۆت “ھەتا نوکە 600 سکالا ھاتینە تۆمارکرن و ھژمارا تۆمارکرنا سکالایان دێ گەلەک زێدەبیت، چونکو ل ھەرێما کوردستانێ گەلەک زێدەگاڤی ھاتینە کرن، پتریا سکالایێن ھاتینە تۆمارکرن ژی ل گەرمیان و سلیمانیێ بوون، ئەم د وێ باوەریێ داینە ڤێ جارێ رێگری ل زێدەگاڤیان دێ ھێتە کرن و کەسێن سەرپێچی ژی کرین، پیرابوون دێ د گەل دا ھێنە کرن”.
رێڤەبەرێ گشتیێ پلان و دووڤچوونێ ل وەزارەتا چاندنێ خویا ژی کر، ل گۆر شەش قانوون و چەند رێنمایێن تایبەت ب نەھێلانا زێدەگاڤیان ڤە سەرەدەری دێ د گەل سەرپێچیکاران ھێتە کرن، د دەمەکێ نێزیک دا لیژنێن دووڤچوونێ ل ھەموو دەڤەران دێ دەست ب کارێ خوە کەن.

ئه‌ڤرۆ نيوز، بارزان مزوورى:

ئەفسەرەک ژ یەکەیا ٥٢٥٢ يا ھێزێن پشته‌ڤانيا ئێك ل میحوەرێ ناوەران بۆ ئەڤرو نیوز دیار کر کو یەکەیا ٥٢٥٢ ئەڤروۆ سپێدێ هەتا نھا ١٠ قومبەلێن جورێ D_٣٠_١٢٢ ملم هاڤێتنه‌ بارەگا و جھێن داعش ئەڤرۆ لێ بەرھەڤ بووین ل پارێزگەھا مووسل تایبەت دوو بارەگایێن دەست نیشانکرین ل نێزیک گوندێ خورسەبات و شەلالات ڤان ھەردوو جھان داعش پلانەک دارێشت بوو ھەردو پلان ب بارەگاڤە ھاتن بوردومان کرن.
ناڤبری دیار کر کو ھەر ١٠ قومبەلە ب نیڤا بارەگایێن وان کەفتینە ج ژوان خوسارەت نەبوویە، ل دووڤ پێزانینێن گەھشتینە وان ژمارەکا کوشتیا کەفتینە دەستێن وان دا، ئەو قومبەلێن بۆ وان ھاتینە رەوانەکرن ھەموویا نیشانێ ئینایی ج ژ وانا زیان نەگەھاندینە خەلکێ مووسل.
ناڤبری زێدەتر گۆت: “ئەڤرۆ مە تولا توپێن داعش ڤەکر ئەوێن د دو رۆژێن بوری دا بۆ پایتەخێ ھەرێمێ رەوانەکرین”.

https://www.youtube.com/watch?v=PlRZXehI4gA

ئاکرێ، بێوارحسێن زێباری:
تاھر فازل ئاغا سەرپەرشتێ چالاکیا نەورۆزێ ل ئاکرێ بۆ ئەڤرۆ نیوز گۆت: “ئەڤ سالە ژی وەکو ھەر سال دێ ئاگرێ نەورۆزێ ل ئاکرێ ھێتە ھەلکرن و ب ھاریکاریا کۆمپانیەکێ”.
زێدەتر گۆت: “ئەڤ سالە دێ نەورۆزا ئاکرێ یا جودا بیت د گەل یێن بەرێ ژ بەر ڤان کاودانێن نوکە ب سەر ھەرێمە ڤەھاتی”.
دەربارەی ئاھەنگێ ژی گۆت: ” ئەڤ ئاھەنگە دێ ئاھەنگەکا بچووک بیت، یان ژی دبیت ھەر نەھێتە گێران وەکو سالا بۆری و چو ھونەرمەند ژی نەھاتینە داخواز کرن تنێ سرودێن نەتەوەیی ب رێیا (دی چێ) دێ ھێنە بەلاڤکرن و گرۆپێ ئاکرێ وەکو ھەر سال دێ ئاگری بەنە سەرێ کەلێ”.