ئه‌ڤرۆ نيوز:
فاتح مه‌وله‌وى په‌يڤدارێ وه‌زاره‌تا په‌روه‌ردێ راگه‌هاند كو رۆژا 5 شه‌مبى كو سالڤه‌گه‌را سه‌رهلدانا كوردستانێ يه، دێ بيته بهێنڤه‌دان بۆ په‌روه‌ردێ ژى وه‌كو هه‌موو وه‌زاره‌تێن دى يێن حوكمه‌تا هه‌رێما كوردستانێ و گۆت: بهێنڤه‌دانا پێنجشه‌مبيێ ناڤه‌ندێن خواندنێ ييێن پارێزگه‌ها دهۆك ڤه‌ناگريت، ژبه‌ر گيروبوونا خواندنێ ل وێ پارێزگه‌هێ.
ئه‌ڤرۆ نیۆز، قائید میرۆ
فه‌رمانده‌كێ پێشمه‌رگه‌ی ل محیوه‌رێ خازر دیاركر، ره‌وشا چه‌كدارێن داعش زۆر خراب بوویه و لسه‌ر دیوارێن باژێرێ مووسل كه‌سێن نه‌نیاس گه‌فان ل چه‌كدارێن داعش دكه‌ن. سه‌ید هه‌ژار، جێگرێ فه‌رماندێ فه‌رمانده‌یا زێره‌ڤانی ب مالپه‌ڕێ ئه‌ڤرۆ نیۆز راگه‌هاند” ئه‌ف هێرشێن ڤێ دووماهیێ داعش دكه‌ته سه‌ر هێزێن پێشمه‌رگه چو كاریگه‌ری لسه‌ر ره‌وشا پێشمه‌رگه‌ی نه‌بوویه و د هه‌موو هێرشاندا چه‌كدارێن داعش شكه‌ستن ئینایه و ب ده‌هان كه‌س هاتینه كوشتن. سه‌ید هه‌ژاری گۆتژی” نوكه زانیاریێن دروست مه لسه‌ر ره‌وشا ناڤا باژێڕێ مووسڵ هه‌نه و گه‌فێن زۆر ل چه‌كدارێن داعش دهێنه‌كرن و داعش هه‌ست بڤێ مه‌ترسیێ كریه و لسه‌ر دیوارێن باژێڕی گه‌ف ل داعش دهێنه‌كرن و ژبه‌رڤێ چه‌ندێ داعش د ره‌وشه‌كا خراپدایه.
ئه‌ڤرۆ نيوز:
ب مه‌ره‌ما ئاماده‌كاريان بۆ رزگاركرنا مووسل، سوبه‌هى رۆژا چارشه‌مبى رێكه‌فتى 4\3\2015 وه‌زيرێ به‌ره‌ڤانيا توركيا، عسمه‌ت به‌لماز دێ سه‌ره‌دانا عيراقێ و هه‌رێما كوردستانێ كه‌ت.
مه‌ره‌م ژ سه‌ره‌دانا وه‌زيرێ به‌ره‌ڤانيا توركيا نيشادانا ئه‌ماده‌يا وه‌لاتێ وى يه بۆ پشكداريكرن د ئۆپه‌راسيۆنێن دژى داعش دا ژ بوو رزگاركرنا باژێرێ مووسل.
عسمه‌ت يه‌لماز د كۆنگره‌كێ رۆژنامه‌ڤانى دا ل ناڤ په‌رله‌مانێ توركيا گۆت: “دێ ل گه‌ل سه‌رۆكێ وه‌زيران و وه‌زيرێ به‌ره‌ڤانيێ و سه‌رۆكێ ده‌سته‌يا ئه‌ركانێن سۆپايێ عيراقێ و سه‌ركرداتيا هه‌رێما كوردستانێ كۆم بم”.
گۆتژى: “كۆمبوونێن من ل به‌غدا و هه‌ولێر دێ ل دۆر هه‌ڤكاريا پرۆسا رزگاركرنا مووسل بن، ته‌كست كر كو توركيا پشته‌ڤانيا وێ هه‌ڤپه‌يمانيێ دكه‌ت ئه‌وا ب سه‌ركرداتيا ئه‌مريكا بۆ ژ ناڤبرنا داعش هاتيه پێكئينان”.
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ په‌رله‌مانێ كوردستانێ ئاماژه ب وێ چه‌ندێ كر كو نێچيرڤان بارزانى ل كۆمبوونا لژنا بلندا نه‌فت و غازێ ل گه‌ل په‌رله‌مانێ كوردستانێ چو به‌حسێ چوونا خوه بۆ به‌غدا نه‌كريه و ئه‌ندامه‌كێ جڤاتا نوونه‌ران ژى ئاماژه ب وێ چه‌ندێ دكه‌ت كو چو ژڤان بۆ چوونا شاندێ هه‌رێمێ بۆ به‌غدا نينن.
به‌يار دوسكى، ئه‌ندامێ لژنا وزێ و سامانێن سرۆشتى ل په‌رله‌مانێ كوردستانێ بۆ ئه‌ڤرۆ نيوز گۆت: “د كۆمبوونا شاندێ دانوستاندكارێ حوكمه‌تا هه‌رێما كوردستانێ ل گه‌ل په‌رله‌مانێ كوردستانێ روونى به‌حس ل رێكه‌فتنا د ناڤبه‌را به‌غدا و هه‌رێمێ دا هاته كرن و ئاماژه ب وێ چه‌ندێ ژى كر حوكمه‌تا هه‌رێما كوردستانێ يا پێگيره ب وێ رێكه‌فتنا د ناڤبه‌را هه‌رێم و به‌غدا دا”.
زێده‌تر گۆت: “سه‌رۆكێ حوكمه‌تێ و شاندێ ل گه‌ل ب هوورى به‌حس ل خالێن رێكه‌فتنێ و چوونا وان بۆ به‌غدا ل جارا پێشيێ كر، به‌لێ چو به‌حس نه‌كرن كو ئه‌و دێ ل ڤى ده‌مى دووباره سه‌ره‌دانا به‌غدا كه‌ن”.
ژ لايێ خوه ڤه ئه‌ندامێ لژنا دارايى و ئابوورى ل جڤاتا نوونه‌رێن عيراقێ، حاكم سه‌رحان سلێڤانه‌يى، بۆ ئه‌ڤرۆ نيوز گۆت: “هه‌تا نوكه په‌رله‌نتارێن كورد ل سه‌ر سه‌ره‌دانا شاندێ هه‌رێمێ بۆ به‌غدا نه‌هاتينه ئاگه‌هدار كرن”.
زێده‌تر گۆت: “د كۆمبوونا لايه‌نێن كوردى ل گه‌ل عه‌بادى ژى دا ب هوورى به‌حس ل ڤێ رێكه‌فتنێ هاتيه كرن، به‌لێ چو به‌حس ل دووباره چوونا شاندێ هه‌رێمێ بۆ به‌غدا نه‌هاتيه كرن”.
زێده‌ترى ساله‌كێ يه حوكمه‌تا عيراقێ پشكا هه‌رێما كوردستانێ ژ بودجێ نه‌هنارتى و هه‌ردو لايه‌ن ئێكدو ب پابه‌ند نه‌بوون ب رێكه‌فتنا هه‌ولێر و به‌غدا دا تاوانبار دكه‌ن، د دووماهى داخۆيانيا خوه ژى دا ل گه‌ل فراكسيۆنێن كوردى، عه‌بادى گۆتيه هه‌رێم چه‌ند په‌ترۆلێ بهنێريت دێ هند بودجه‌يى بۆ هنێرين.
به‌رامبه‌ر ڤێ چه‌ندێ حاكم سه‌رحان دبێژيت: “نه‌هنارتنا بودجا هه‌رێمێ نه‌يا قانوونى يه و پێدڤيه بودجا هه‌رێما كوردستانێ بهێته هنارتن”.
ئه‌ڤرۆ نيوز:
سه‌رۆك وه‌زيرێن توركيا و جێگرێ وى، ب دژوارى هێرشێ دكه‌نه سه‌ر سه‌لاحه‌دين ده‌ميرتاش هه‌ڤسه‌رۆكێ هه‌ده‌پێ و ب رێگرى كرن ل هه‌مبه‌ر قووناغا ئاشتيێ دده‌نه زانين.
ئه‌حمه‌د داود ئۆغلۆ، سه‌رۆك وه‌زيرێن توركيا، د ماوێ پێشكێشكرنا گۆتاره‌كێ دا ل به‌رامبه‌ر لايه‌نگرێن پارتيا خوه، راگه‌هاند جودايه‌ك هه‌يه د ناڤبه‌را رۆهنكرنێن په‌رله‌مانتارێن هه‌ده‌پێ و سه‌لاحه‌دين ده‌ميرتاش، ژ به‌ر هندێ پێدڤيه بهێته چاره كرن و ئێگ گۆتار هه‌بيت.
ئۆغلۆيى گۆتژى: “رۆژا 28ى شياتێ قووناغه‌كا نوو ل توركيا ده‌سپێكر كو قووناغا ئاشتيێ و دانانا چه‌كى يه، ژ به‌ر هندێ پێدڤيه ده‌ميرتاش رۆهنكرنێن 28ى شياتێ تێك نه‌ده‌ت”.
ژ لايه‌كێ دى ژى ڤه، بۆلند ئارنج، جێگرى سه‌رۆك وه‌زيرێن توركيا و ئاختنكه‌رێ حوكمه‌تا توركيا، ره‌خنه ئاراسته‌يى گۆتنێن ده‌ميرتاش گرتن و گۆت: “هه‌ڤسه‌رۆكێ هه‌ده‌پێ، ل سه‌رێ وان هه‌موو كه‌سان دهێت يێن رێگريێ ل قووناغا ئاشتيێ و چاره‌سه‌ريێ دكه‌ن”.
زێده‌تر گۆت: “ده‌ميرتاش كه‌سه‌كێ نيه‌ت پاقژ نينه و نه‌ڤێت قووناغا چاره‌سه‌ريێ ب گه‌هيته ئاشتيێ، ژ به‌ر هندێ هيڤى دكه‌ين بزاڤێن تێكدانا قووناغێ نه‌كه‌ت”.
هێرشێن حوكمه‌تا توركيا بۆ سه‌ر ده‌ميرتاش پشتى وێ چه‌ندێ دهێن پشتى هه‌ڤسه‌رۆكێ هه‌ده‌پێ راگه‌هاندێ ئه‌و قووناغا نوكه گه‌هشتينێ بزاڤا ئاكه‌پێ بوو نه‌يا هه‌ده‌پێ.
ئه‌ڤرۆ نيوز:
سه‌رۆكا فراكسيۆنا ئێكه‌تيێ ل په‌رله‌مانێ عيراقێ دبێژيت: د دانوستاندنێن دو رۆژێن بۆرى دا ل گه‌ل سه‌رۆك وه‌زيرێن عيراقێ، بۆ وان ديار بوويه كو عه‌بادى نه‌ڤێت سياسه‌تا مالكى به‌رامبه‌ر هه‌رێما كوردستانێ دووباره بكه‌ت.
دا زانين ژى كو ده‌رباره‌يى بودجه‌يى ژى گۆتيه كو هه‌رێم چه‌ند په‌ترۆلێ بهنێريت دێ هند پاره‌يى بۆ ره‌وانه كه‌ن.
ژێده‌ر: KNN
ئەڤرۆ:
نەبوونا چو قانوونێن پاراستنا بەرھەمێ ناڤخۆ و بیاڤێ پیشەسازی، بوویە ئەگەر کو ھەتا نوکە پتریا پێدڤیێن وەلاتیان ژ دەرڤەی وەلاتی بھێتە د ناڤ ھەرێمێ دا و ئەو بەرھەمێ ل ناڤخوە و خومالی ژی پەیدا دبیت بھێتە فەرامۆشکرن و وەلاتیەک ژی دبێژیت: حەیف ئەم د وەلاتەکی دابیت مە مریشکێن خۆمالی ھەبن کەس نەخۆش و مریشک بۆ مە ژ بەرازیلێ بھێن.
نەبوونا چو قانوونان بۆ پووتەدان ل بەرھەمێ خۆمالی و فەرامۆشکرنا وێ بوویە ئەگەر کو پتریا وەلاتان قەستا ھەرێما کوردستانێ بکەن و کەرەستە و کەل و پەلێن خوە ب ستوویێ وان ڤەدەن و ھەموو وەلاتی ب کوردستانێ خنێ بوون، چونکو دزانن ھەر تشتەکێ بینن دێ شێن فرۆشن و ب تنێ چاڤێ خەلکی ل کەرەستێن دەرڤەیە. وەکو وەلاتیەک ژی دبیتَژیت: ھەر ژ پێلاڤ و گۆرە و ھەتا قات و ریبات و جلکێن زارۆ و ژنا و ھەتا ھەموو جۆرێن خوارنێ و فێقی و ھەموو پێدڤیێن ژیانا مە یا رۆژانە ژ دەرڤەی وەلاتی دھێن، د سەر ھندێ را ژی مانە حەیفە مە ل وەلاتێ خوە مریشکێن خۆمالی ھەبن کەس نەخۆش و مریشک بۆ مە ژ بەرازیلێ بھێن و ئەو پتر ژ مریشکێن خۆمالی بھێنە فرۆتن.
بەری چەند رۆژەکان وەزیرێ بازرگانی ل ھەرێما کوردستانێ د داخویانیەکێ دا راگەھاند، ژ بەر نەبوونا چو قانوونان د بیاڤێ پیشەسازی و ھاتنا بەرھەمێ بیانی دا، نھا نێزیکی ٩٠% پێدڤیێن ھەرێمێ ژ دەرڤەی وەلاتی دھێن و گۆت: حوکمەتا ھەرێمێ ژی چو گرنگی ل پیشەسازیا ناڤخۆ نەدایە و چو وەلات پێشناکەڤن ھەکە حوکمەت گرنگیێ ب کەرتێ ناڤخۆ و پیشەسازیێ نەدەت، لەوما کار دھێتە کرن بۆ ھندێ ١٦ کارگەھێن بەرھەمئینانا بەرھەمێ خۆمالی دھێنە دروستکرن.
شێرکو جەودەت، سەرۆکێ لیژنا پیشەسازی و ووزە و ژێدەرێن سرۆشتی ل پەرلەمانێ کوردستانێ بۆ ئەڤرۆ دیار کر، لیژنا وان یا د بزاڤێ دا ب ھەماھەنگی ل گەل وەزارەتا پیشەسازی بۆ ھندێ پێداچوونی د کەرتێ پێشەسازی دا بکەن و قانوونەکا نوو بۆ پێشخستنا کەرتێ پیشەسازی بھێتە دەرکرن و گۆت: نھا کار بۆ نڤێسینا قانوونا کانزایانن و ب رێیا ڤێ قانوونێ ژێرخانا پیشەسازیا ھەرێمێ ب ھێز بکەڤیت.
شێرکو ئاشکرا ژی کر، د وێ قانوونێ دا ھزرا ھەموو لایێن کەرتێ پێشەسازی دھێتە کرن و دێ دووڤچوونا ھندێ ھێتە کرن کا چو جە بۆ پیشەسازیێ یێ گونجایە و چو کارگەە بھێنە ڤەکرن و گۆت: دێ ھەموو بزاڤان کەین ژێرخانا پیشەسازی ل ھەرێمێ ب ھێز بێخین و بونیاتەکێ موکوم بۆ بدانین.
خویاژی کر، پتریا قانوونێن کەرتێ پیشەسازی دکەڤنن و چو پێشکەفتن تێدا نینە، لەوما بزاڤێن دھێنە کرن سەر ژ نوو بھێنە دانان، بۆ ھندێ گرنگی ب بەرھەمێ ناڤخۆ بھێتە دان و گۆت: پارێزگەھا سلێمانیێ ل سەر ئاستێ عیراقێ یا پێشکەفتیە.
ئه‌ڤرۆ نيوز:
ئه‌ميندارێ گشتيێ وه‌زاره‌تا پێشمه‌رگه‌يى راگه‌هاند كو پێنج هزار پێشمه‌رگێن بريندار يێن هه‌ين و هنده‌ك ژ وان پێدڤى ب چاره‌سه‌ريێ ل ژ ده‌رڤه‌يى وه‌لاتى هه‌يه ژ به‌ر هندێ ژى داخوازێ ل وه‌لاتيان و هه‌ڤپه‌يمانان و حوكمه‌تا عيراقێ و خێرخوازان دكه‌ت ل ته‌وارا وان بچن.
د راگه‌هاندنه‌كێ دا، فه‌ريق جه‌بار ياوه‌ر ئه‌ميندارێ گشتيێ وه‌زاره‌تا پێشمه‌رگه‌يى ل حوكمه‌تا هه‌رێما كوردستانێ راگه‌هاند كو داخوازێ ژ وه‌لاتێن هه‌ڤيه‌يمانان ب گشتى و حوكمه‌تا ناڤه‌ندى و حوكمه‌تا هه‌رێمێ و خێرخوازان دكه‌ت ل ته‌وارا بريندارێن پێشمه‌رگه‌يى بچن.
فه‌ريق جه‌بار ياوه‌ر دبێژيت: “ژ به‌ر ڤان پێنج هزار پێشمه‌رگان نه‌خۆشخانێن هه‌رێما كوردستانێ پێدڤى ب پێدڤيێن نوشدارى هه‌يه”.
پشتى خزيرانا 2014 هه‌تا نوكه ژ ئه‌نجامێ رووى ب روويبوونێن پێشمه‌رگه‌يى ل چه‌كدارێن داعش، زێده‌ترى هزار پێشمه‌رگان شه‌هيد بووينه و زێده‌ترى پێنج هزاران پێشمه‌رگان ژى بريندار بووينه.
ئەڤرۆ:
ئەندامەکێ پەرلەمانێ عیراقێ ئاماژێ ب وێ چەندێ ددەت کو پتریا قانوونێن ھاتینە پەسەندکرن ناھێنە بجھئینان، دیسا ل دووڤ زانیاریێن دەست ب پەرێ قانوونیێ ئەڤرۆ کەفتین، ل خۆلا بۆری یا پەرلەمانێ عیراقێ 180 قانوون ھاتبوونە دەرکرن و بتنێ ئەو ھاتبوونە بجھئینان یێن ل دووڤ زەوقا حوکمەتێ.
نڤیسکار و روشەنبیر، بابێ دێرکی، ل وەلاتێ نەرویژ دبێژیت: گەلەک قانوون ژ پەرلەمانێ عیراقێ و دیسا کوردستانێ ژی دەرکەفتینە و نەھاتینە بجھئینان و ئەڤە د دەمەکی دایە کو دەرکەفتنا قانوونێ بۆ خزمەتکرنا وەلاتیانە و بۆ خەلکی دەرکەفتی نە و دڤێت بھێنە بجھئینان، لێ ھەتا نوکە ئەگەرێن بجھئینانێ نەھاتینە زانین، و ئەز وەسا دبینم دووڤچوون ل سەر بجھئینانا قانوونان گەلەک یا لاوازە و بتنێ ھندەک لژنە ناڤن.
بابێ دێرکی ئاماژە کرە وێ چەندێ ژی کو دەرکەفتنا قانوونان بۆ یەکسانبوونێ یە دناڤبەر مرۆڤان دا، ھەروەسا بجە نەئینانا قانوونان، لەنگاتیەکێ پەیدا دکەت و نەداد پەروەری چ دبیت، دیسان رۆلێ پەرلەمانی ژی دھێتە لاوازکرن.
ژ ئالیێ خوە ڤە پارێزەر رەمەزان عیسا ئەحمەد ژ دادگەھا زاخۆ گۆت: ھندەک قانوون ھەنە ھەر ئێکسەر دھێنە بجھئینان وەک یا بۆدجێ و میزانیێ و ھندەک ھەنە ناھێنە بجھئینان و ب تنێ وەک ناڤ دەرکەتینە وەکو قانوونا رێگرتن ل جگارە کێشانێ ل جھێن گشتی و گەلەک قانوون بڤی رەنگی ھەنە، ھەروەسا قانوون ھەنە 100% دھێنە بجھئینان.
نەجیبا نەجیب ئەنداما پەرلەمانێ عیراقێ ل سەر ھەمان بابەت گۆت: خۆلا بۆری یا پەرلەمانێ عیراقێ 180 قانوون ھاتبوونە پەسەندکرن و قانوونا ل دووڤ زەوقێ حوکمەتێ نەبا نەدھاتە بجھئینان و ھەکە ل دووڤ بۆچوون و زەوقێ ئەوان با، داھێتە بجھئینان، دیسان رێکەفتنامێن نیڤدەولەتی ژی ھەبوون، نەجیبایێ ھێشتا ژی گۆت: ڤێ خولێ قانوونا بۆدجێ ھاتیە پەسەندکرن، لێ چاڤەرێ نە د ڤێ ھەیڤێ دا بھێتە بجھئینان.
ھەڤدەم حاکم سەرحان ئەندامێ پەرلەمانێ عیراقێ ژ ھەمان فراکسیۆن دبێژیت: دەستور مەزنترین قانوونە ل وەلاتی ناھێتە بجھئینان، ئەڤجا قانوون ژی ب ھەمان شێوە سەردەری ل گەل دھێتەکرن، ئەڤ قانوونێن پەرلەمانێ عیراقێ پەسەند دکەت، ژ ئالیێ حوکمەتا عیراقێ ڤە ب ھیچ رەنگان ناھێنە بجھئینان و بتنێ یێن د بەرژوەندیا دەولەتێ دا دھێنە بجھئینان، بۆ نموونە قانوونا میزانیێ چونکو خەلکێ عیراقێ ھەموو پێڤە گرێدایە ناھێتە بجھئینان.
سەرحانی گۆتژی: کارێ پەرلەمانی چاڤدێری یە و ھەکە قانوونەک نەھێـتە بجھئینان، وی دەمی دشێن نڤیسارەکێ ڤرێکەین و بێژینە لایەنێ بەرپرس، بۆچی ڤێ قانوونێ جێبەجێ ناکەی؟، دیسان خەلک دشێت سکالا ل سەر تۆمار بکەت ل دادگەھا دەستوری، دەولەتێن دیموکراتی ب ڤی رەنگی نە و دھێنە برێڤەبرن، لێ د عیراقێ دا دیموکراتیەت نینە و بتنێ پشکەک ژ دیموکراتیا وێ ھەلبژارتنن و ھەر دەمێ ھەلبژارتن ھاتنەکرن دیموکراتیەت نەما.
ل دووماھیێ سەرحانی خۆیاکر، 80% ژ قانوونێن پەرلەمان پەسەند دکەت ناھێنە بجھئینان، ئەڤجا ل ڤێرە ھەکە حوکمەت خوە بدانیت حوکمەتا خەلکی و بزانیت خەلکی دەنگ دایێ و حوکمەتەکا دیموکراتی یە، پێدڤیە چەند قانوونەک ژ پەرلەمانی دەربکەڤیت بھێنە بجھئینان، چونکو ئەڤە بەرپرساتیا حوکمەتێ یە و نەیا پەرلەمانی یە و ئەڤە کارێ حوکمەتێ یە و دەستھەلاتا جێبەجێکارە و حوکمەتا عیراقێ نە وەک حوکمەتێن وەلاتێن پێشکەفتی یە، چ رەنگێن پێشکەفتنێ ل دەف نینن، باشترین نموونە بۆدجا 2015 ھاتە پەسەندکرن و ب ئیمزا سەرۆک کوماری ھاتە پەسەندکرن و ھاتە بەلاڤەکرن د رۆژناما فەرمی دا یا عیراقێ و ھەتا نوکە مادەکێ ڤێ قانوونێ حوکمەتێ بجە نەئیایە.
ئەڤرۆ:
رێڤەبەرێ ساخلەمیا زاخۆ راگەھاند، ل زاخۆ ١٧ بنگەھێن نوشداری ھەنە، ژ وان ١١ نوشدار تێدا کار دکەن و شەش بنگەهـ د بێ نوشدارن، ژ ناچاری ھاریکار و برینپێچ برێڤە دبەن و گۆت: بنگەھێ ئەحمەدێ خانێ ژ ٢٠١٤ وەرە مە ئاڤاھی یێ وەرگرتی و کارمەند نینن ڤەکەین.
د. قەرەنی سەعید رێڤەبەرێ ساخلەمیا زاخۆ بۆ رۆژناما ئەڤرۆ دیار کر، چار پشکێن قایشا سۆتنێ و چاڤدێریا چڕ و ڤەژاندنا دلی و قاویشا ھاوار ھاتنێ، ژ بەر نەبوونا کارمەندان ل نەخۆشخانا گشتی یا ٢٠٠ تەختی نەھاتینە ڤەکرن و گۆت: مە پێدڤی ب ٦٠ تا ٧٠ کارمەندان ژ نۆشدارێن نیشتەجێ یێن خۆلاو و دێرین ھەیە، مە شیان نینن ژ بەر نەبوونا کارمەندان بھێنە ڤەکرن”، پێشنیاز ئەوە ھەکە نوشدارێن نیشتەجیێن خۆلاو ھەبن دێ ھەوار ھاتن و دل و ھناڤا و زارۆیان ڤەگۆھێزینە نەخۆشخانەیا ٢٠٠ تەختی، ئەو نەخۆشخانا گشتی یا کەڤن دێ بو ھاوار ھاتنێ مینیت.
نەخۆشخانەیا ٢٠٠ تەختی ل ١٠/٦/٢٠١٢ ل سەر بودجا حوکمەتا ھەرێمێ ب کۆژمێ ٥٢ ملیار دیناران ئاڤاکریە و ئامیر بۆ دابینکرینە، ھەتا نھۆ ل گۆرەی گۆتنێن رێڤەبەرێ ساخلەمیێ چار پشک ژێ نەھاتینە ڤەکرن.
ل دۆر کو ١٠٠ پلێن وەزیفی ب بەر ساخلەمیا زاخۆ کەفتینە، د. قەرەنی سەعید دیار کر ئەو کێشا وان چارەسەر ناکەن، ژ بەر زێدەتریا وان بۆ برینپێچ و کارمەندێن ساخلەمیێ نە و گۆت: ناچاری ل ڤێ دووماھیێ مە بریار دایە پشکا سۆتنێ بھێتە ڤەکرن، دیسا سێ پشکێن دی ناھێنە ڤەکرن.
سەبارەت جھێن پڕی کێشە، ساخلەمی دبینت نەخۆشخانا تەنگاڤیانە”کێشە ئەوە مە سێ نەخۆشخانە ھەنە، ب تنێ ٢٧ نوشدارێن نیشتەجێ یێن خۆلاون، ١٠ ژ وان ل نەخۆشخانا زارۆبوونێ و شەش ژی ل نەخۆشخانا گشتی کار دکەن، ١١ ژی ل نەخۆشخانا تەنگاڤیان، ژ بەر ھندێ ژ کێمیا نوشداران کێشە بۆ مە ژێ دروست دبن.
ل زاخۆ نەخۆشخانا ژیان کلینیکێن تایبەت ھەنە و دو کۆمەلگەھێن نوشداری، ل گەل کلینیکێن تایبەت و ل گۆرەی گۆتنێن ساخلەمیێ، سەندیکا نوشداران چاڤدێریێ ل سەر کارێ وان دکەن، ساخلەمیێ ژی ئاشکراکر د سالا نوو دا ئێک نوشدار و پار سال چار نوشدار ب سزایێن ئیداری کەفتینە.
نيشاندان