ئه‌ڤرۆ نيوز:
سه‌ليم جبورى سه‌رۆكێ په‌رله‌مانێ عيراقێ شكاندن و تێكدانا په‌يكه‌رێن موزه‌خانا ديروكى يا مووسل شه‌رمزاركر و ئاماژه ب وێ يه‌كێ دا كو داعش ب ڤێ كريارێ نه‌شێت ديرۆكا باژێرى ژ ناڤ ببه‌ت.
جبورى دياركريه كو مێژوويا مووسل، نموونه‌كه ژ شارستانيا مروڤايه‌تيێ، گروپه‌كێ ژ رێ ده‌ركه‌تى، نه‌شێت ديرۆكا وى باژێرى ژ ناڤ ببه‌ت، و روونشتڤانێن وى باژێرى چاڤه‌رێى پاقژكرنا باژێرێ خوه دكه‌ن ژ هه‌موو بيانيه‌كێ كو چووينه د ناڤدا.
ئه‌ڤرۆ نیوز،زنار توڤى:
دلاوه‌ر ئاژگه‌یى نوونه‌رێ حكومه‌تا هه‌رێما كوردستانێ ل ئێكه‌تیا ئوروپا بو ئه‌ڤرۆ نیوز راگه‌هاند كو ب هه‌ڤكاریا شانده‌كێ، وان سه‌ره‌دانا سێناتا به‌لجیكا كر ل باژێرێ بروكسل، و ل ئاڤاهیێ سێناتێ ژلایێ سیناتور(ئه‌لێن دێسته‌كه)هاتنه پێشوازى كرن، د دیداره‌كێ دا به‌حسێ په‌یوه‌ندیێن دناڤبه‌را حكومه‌تا هه‌رێما كوردستانێ و وه‌لاتێ به‌لجیكا هاتنه كرن و داخواز ژێ هاته كرن كو به‌لجیكا هاریكاریێن زێده‌تر یێن سه‌ربازى بو پێشمه‌رگه‌ى ره‌وانه بكه‌ت،ئه‌وژى برێكا هنارتنا چه‌ك و ته‌قه‌مه‌نیان بیت،یان ژى وه‌رگرتنا بریندارێن پیشمه‌رگه‌ى بیت بو چاره‌سه‌ریێ ل وه‌لاتێ به‌لجیكا،هه‌روه‌سا داخواز ژێ هاته كرن ب ڤه‌كرنا نه‌خوشخانه‌یه‌كا ده‌مكى ل به‌روكێن شه‌رى بو پێشمه‌رگه‌ى.
دلاوه‌رى گوت:سیناتور دێسته‌كه وه‌ك نوژداره‌كى ئه‌و پێشنیاره وه‌رگرت و سوز دا كو ڤێ پرسێ بگه‌هینیته سێناتا به‌لچیكا و ڤان داخوازیان بێخیته به‌رده‌ست لایه‌نێن په‌یوه‌ندیدار یێن وه‌لاتێ به‌لجیكا.
دێسته‌كه كه‌سه‌كێ ناڤدارێ وه‌لاتێ به‌لجیكایه و د رێكخراوێن جیهانى دا پێگه‌هێ خو هه‌بوویه،ل سالێن 1997_2000 سكرتێرێ گشتى یێ رێكخراوا پزیشكێن بێ سنوور بوو،چه‌ند سالان سه‌روكێ رێكخراوا قه‌یرانا نێڤده‌وله‌تى بوو،هه‌روه‌سا نوكه نوونه‌رێ به‌لجیكایه ل رێكخراوا(ده‌بلیو ئێف ئو)،هه‌روه‌سا ئه‌ندامێ ئه‌نجومه‌نێ راوێژكاریا رێكخراوا ناتویه و ده‌مێ كوچا ملیونى یا سالا 1991 سه‌ره‌دانا هه‌رێما كوردستانێ كریه و ل كه‌مپێن باكورێ كوردستانێ هاریكاریا بریندار و لێ قه‌وماوان كریه.
ئه‌ڤرۆ تیرۆریستێن داعشێ ب به‌لاڤكرنا ڤیدیویه‌كێ موزه‌خانه‌یا موسلێ تێكدایه، د ڤى بياڤى دا حه‌سه‌ن ئه‌حمه‌د قاسم رێڤه‌به‌رێ شونوواران ل پارێزگه‌ها دهۆكێ بو ئه‌ڤرۆ نیوز دیاركر موزه‌خانه‌یا باژێرێ موسل ب یا دووێ دهێته دانان ل سه‌ر ئاستێ عیراقێ ژلایێ زه‌نگینی و مه‌زناتیا خوڤه و بده‌هان هه‌زار پارچێن شونواران لێ هه‌بوون و هه‌ر ژ چه‌رخێن به‌رینی هه‌تا چه‌رخێ ئیسلامێ .
ناڤبری ئه‌و چه‌نده ژی گوت: باژێرێ موسلێ ژلایێ جوگرافی ڤه كوردستانی یه و پرانیا ئه‌وان شونوارێن د ناڤا موزه‌خانه‌یا موسلێ دا گرێدای دیرۆكا كورداڤه نه و ژناڤبرنا وان كاره‌كێ هوڤانه‌یه و دڤێت رێز ل دیرۆك و كه‌لتورێ ئه‌وێ ده‌ڤه‌رێ هاتباكرن .
موزه‌خانه‌یا باژێرێ موسلێ ل سالا 1952 هاتیه دامه‌زراندن و ئێكه ژ كه‌ڤنترین موزه‌خانه‌یێن عیراقێ و پشتی روودانێن سالا 2003 هژماره‌كا شوونوارێن وێهاتبوونه دزین.
به‌رپرسێ به‌رێ یێ لقا شنگالێ يا پارتى ديموكراتى كوردستان كو بو ڤه‌كولینێ هاتبوونه داخوازكرن بو پیرمام ئه‌ڤرۆ رێ پێ هاته‌دان ڤه‌گه‌ریته ناڤ مالا خوه.
سه‌ربه‌ست بابیری به‌رپرسێ به‌رێ یێ لقا شنگالێ و پشتی كاره‌ساتا شنگالێ ب تومه‌تا ئه‌وێ كاره‌ساتێ هاتبو داخوازكرن بو پیرمام بو ڤه‌كولینێ، ئه‌ڤرۆ پشتی بورینا چه‌ندین هه‌یڤا، رێ پێ هاته دان ڤه‌گه‌ریته مال ل باژێرێ دهۆكێ.
ژێده‌ره‌كێ نێزك ژ بابيرى بو ئه‌ڤرۆ دیاركر كو سه‌ربه‌ست بابیری ده‌مژمێر 4:00 ئیڤاری گه‌هشتیه مالا خهوه ل باژێرێ دهۆكی، پشتی بورینا چه‌ندین هه‌یڤان مانا وى ل پیرمام .
ژێده‌ری ئه‌و چه‌نده ژی دیار كر وه‌ك كه‌سه‌كێ ئاسایی ڤه‌گه‌ریايه و تا نها چ پله و پوست بۆ نه هاتینه دیاركرن.
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێما كوردستانێ داخوازا جڤاتا بلندا نه‌فت و گازێ ل هه‌رێما كوردستانێ په‌سه‌ندكر و برياردا بهايێ پانزينێ بهێته كێمكرن.
ئامانج ره‌حيم سكرتێرى ئه‌نجومه‌نێ وه‌زيران راگه‌هاند كو بهايێ پانزينێ بۆ 700 ديناران هاته كێمكرن و گۆت: بۆ ترۆمبێلێن تايبه‌ت دێ بهايێ ئێك لتر ب 700 ديناران بيت و بۆ ترۆمبێلێن ته‌كسى ژى ب 500 ديناران بيت و 1-3-2015 دێ ئه‌ڤ برياره كار پێ هێته كرن.
ئه‌ڤرۆ نيوز:
ناسناما چه‌كدارێ رێكخستیا داعش كو ب ماسك ڤه د ڤیدیۆیا سه‌ربرینا بارمتێن رۆژئاڤایی دده‌ستێن داعش دا ده‌ركه‌ڤتبوو هاته ئاشكرا كرن.
ئه‌ڤ كه‌سه ب جۆن جیهادی دهێته نیاسین و سه‌ربرێ سه‌ره‌كیێ بارمتێن داعشه، ناسناما وی یا دروستی ئاشكرابوو كو ئه‌و ژی موحه‌مه‌د ئه‌موازی یه ب ره‌گه‌ز كوێتی یه و ژ دایكبوویێ بريتانیا یه ژ رۆژئاڤا له‌نده‌ن. بۆ ئێكه‌م جار جۆن د ڤیدیویا سه‌ربرینا رۆژنامه‌ڤانێ ئه‌مریكی جه‌یمس فۆلی دا ده‌ركه‌ڤتبو و ماسكه‌كی سه‌رۆچاڤێن خوه گرتبوون ل ته‌باخا سالا 2014 ێ و لدووڤدا ل چه‌ندین ڤیدیۆیین دی یێن سه‌ربرینێن كه‌سێن ئه‌مریكی و ئه‌ورۆپی دا ده‌ركه‌ڤتبۆ و گه‌ف ل ئه‌مریكا و ئه‌ورۆپا دكرن .
ناڤبری بۆ داوی جار د ڤیدیۆیا سه‌ربرینا رۆژنامه‌ڤانی ژاپۆنی دا ده‌ركه‌ڤتبوو ، لدووڤ راپۆرته‌كا بی بی سی ناڤی وی به‌ری ده‌مه‌كی یه هاتیه زانین لێ ژبه‌ر ئه‌گه‌رێن هه‌والگیری ناڤێ وی نه‌هاتبوو ئاشكراكرن.
ئه‌ڤرۆ نيوز:
ئه‌ڤرۆ به‌رى نيڤرۆ ل پيرمام مه‌سعود بارزانى سه‌رۆكێ هه‌رێما كوردستانێ ل گه‌ل سه‌ركردێن پێنج حزبێن سه‌ره‌كى يێن هه‌رێما كوردستانێ كۆمبوو و بڕياره پشتى نيڤرۆ ل هه‌مان جهـ ل گه‌ل سه‌رۆكێن حزبێن سياسى كۆم ببيت.
ئه‌ڤرۆ به‌رى نيڤرۆ سه‌رۆكێ هه‌رێما كوردستانێ ل گه‌ل حزبێن سياسى يێن پشكدار د حوكمه‌تا هه‌رێما كوردستانێ و نێچيرڤان بارزانى سه‌رۆكێ حوكمه‌تێ كۆمبوو و د ڤێ كۆمبوونێ دا هه‌ر ئێك ژ رێكخه‌رێن بزاڤا گۆڕان و كوسره‌ت ره‌سۆل جێگرێ ئێكێ يێ ئێكه‌تيێ پشكدارى كۆمبوونێ نه‌بوون.
ب گۆره‌يى ئه‌و پێزانينێن ئه‌ڤرۆ نيوز ب ده‌ست خوه خستين ته‌وه‌رێن كۆمبوونێ گرێدايى كاودانێن نوكه چوونا سه‌رۆكێ بۆ ده‌رڤه‌يى وه‌لاتى بوو، پشتى نيڤرۆ ژى دێ ل گه‌ل سه‌ركردێن سياسى يێن ده‌رڤه‌يى حوكمه‌تێ كۆم بيت.
ئه‌ڤرۆ نيوز:
وه‌زيره‌كێ كابينا نوو يا حوكمه‌تا حه‌يده‌ر عه‌بادى سه‌رۆك وه‌زيرێ عيراقێ دبێژيت: “ب گۆره‌يى ئه‌و پێزانينێن ل به‌ر ده‌ست، لژنا ڤه‌كۆلينان ل كه‌يسێ كه‌فتنا مووسل دا، نورى مالكى به‌رپرسێ كه‌فتنا ئه‌وى باژێرى يه”.
مالپه‌رێ ئه‌لعه‌ره‌بى نوو ژ زارێ وه‌زيره‌كێ حوكمه‌تا حه‌يده‌ر عه‌بادى به‌لاڤ كريه كو لژنا ڤه‌كۆلينێ پێزانينێن وه‌سان ل به‌ر ده‌ست هه‌نه ديار دكه‌ن كو نورى مالكى سه‌رۆك وه‌زيرێ به‌رێ يێ عيراقێ يێ به‌رپرسياره د كه‌فتنا مووسل دا.
ئه‌و ئه‌ندامێن د وێ لژنێ دا گه‌هشتينه وى ئه‌نجامى، مالكى يێ هاريكار بوويه كو داعش ده‌ست ب سه‌ر باژێرى دا بگريت، چونكو ل دووڤ ده‌نگێ وان فه‌رماندێن له‌شكرى نه‌چوويه كو د هه‌مان ده‌م دا فه‌رماندێ گشتيێ هێزێن چه‌كدارێن عيراقێ بوويه و د هه‌مان ده‌م دا فه‌رمان ب فه‌رماندێن سۆپا و پۆليسێن فيدرال كريه كو ژ سنورێ سوريا و باژێرێ مووسل خوه ڤه‌كێشن.
ئه‌و وه‌زيرێ عيراقى كو ناڤێ وى ل لايێ ژێده‌رى يێ پاراستيه، ته‌كست ل وێ چه‌ندێ كريه كو پشتى ڤه‌كۆلينه‌كا باش ل گه‌ل فه‌رماندێن له‌شكرى كو ژمارا وان پێنج ئه‌فسه‌رێن بلندن، به‌سن كو بێژن مالكى تۆمه‌تباره نه‌كو وه‌كو ديده‌ڤان ڤه‌كۆلين ل گه‌ل بهێته كرن، ژبلى وى ژى ژ سه‌رجه‌مێ شه‌ش ئه‌ندامێن جڤاتا پارێزگه‌ها نه‌ينه‌وا، كو بۆ ڤه‌كۆلينێ هاتينه گازيكرن دو ئه‌ندامان مالكى تۆمه‌تبار كريه كو كارئاسانى بۆ كه‌فتنا مووسل كريه.
نيشاندان