ئه‌ڤرۆ نیوز:
حوكمه‌تا هه‌رێما كوردستانێ كوشتنا 21 وه‌لاتیێن مه‌سیحیێن مسرى یێن قیبتى ل لیبیا ل سه‌ر ده‌ستێ داعش شه‌رمزار دكه‌ت و د راگه‌هاندنه‌كێ دا دیاركریه: ئه‌ڤ تیرورسته، دوژمنێن مروڤایه‌تیێ نه، له‌وما ئه‌ڤرۆ هه‌موو جیهان به‌رامبه‌ر دیرۆكێ به‌رپرسیارن كو ب ئه‌ركێ خوه رابن و هه‌بوونا ڤان تیرورستان و هه‌ڤشێوێن وان ژناڤ ببه‌ن.
حوكمه‌تا هه‌رێمێ سه‌ره‌خوشى ئاراسته‌ى خێزانێن ڤان 21 وه‌لاتیێن مسرى كرینه و رژدى ل سه‌ر وێ یه‌كێ كریه كو تیرورست دێ باجا ڤان تاوانان ده‌ن.
ئه‌ڤرۆ نیوز:
سه‌رۆكێ هه‌رێما كوردستانێ ئه‌ڤرۆ گه‌هشته باژێرێ كه‌ركووكێ و د كومبوونه‌كێ ل گه‌ل فه‌رماندێن گشتى ئاماژه ب ره‌وشا كه‌ركووكێ و ده‌ڤه‌رێ دا و راگه‌هاند ” بێى رازیبوونا مه ناهێلێن چ هێزه‌ك بهێنه ناڤ كه‌ركووكێ”.
جه‌بار یاوه‌ر كو پشكدارى كومبوونێ بوو، بۆ باسنیوز دیاركریه: سه‌رۆك بارزانى د كومبوونێ دا دیاركر كو هه‌ر كه‌سێ بخوازیت شه‌رى داعش بكه‌ت، ئه‌م هه‌ڤپه‌یمانیێ ل گه‌ل ئه‌نجام دده‌ین، به‌لێ پێدڤى ب چ هێزان ناكه‌ت بهێنه ناڤ كه‌ركووكێ، هاتنا هه‌ر هێزه‌كا دى بۆ كه‌ركووكێ پێدڤیه ب داخوازى و فه‌رمى بیت و پێدڤیه ئه‌م رازى بین و دیسا جڤاتا پارێزگه‌ها كه‌ركووكێ داخواز بكه‌ت، ل ده‌رڤه‌ى ڤێ رێكارێ چ هێزه‌كا دى قه‌بوول ناكه‌ین.
ئه‌ڤرۆ نيوز:
سه‌رۆك عه‌شيره‌ته‌كێ عه‌ره‌ب كو ناڤگريێ د ناڤبه‌را چه‌كدارێن داعش و پێشمه‌رگه‌يى دا بۆ ئازادكرنا ئێخسيرێن پێشمه‌رگه‌يى دكه‌ت، ئاماژه ب وێ چه‌ندێ كريه كو داعش رازيبوويه ئێخسيرێن پێشمه‌رگه‌يى ئازاد بكه‌ت به‌رامبه‌ر ئازادكرنا ئێخسيرێن خوه يێ دده‌ستێ پێشمه‌رگه‌يى دا.
شێخ يه‌عقوب لهێبى، سه‌رۆك عه‌شيره‌تێ لهێب كو پێشنيازا داعش گه‌هانديه هێزێن پێشمه‌رگه‌يى بۆ هاولاتى گۆت: “داعش گۆتيه من 18 پێشمه‌رگه ل لايێ مه‌نه، هه‌كه پێشمه‌رگه‌يى ژى 18 ئێخسيرێن مه ل ده‌ف هه‌بن، ئازاد بكه‌ن، ل وى ده‌مى ئه‌م ژى دێ ئێخسيرێن پێشمه‌رگه‌يى ئازاد كه‌ين”.
گۆتژى: “داعش داخوازا وان چه‌كداران كريه يێن ل بيستانێ خه‌بازه يێ په‌ترۆلێ و گۆندێ ئيسحاق كريه كو پێشمه‌رگه ئازاد بكه‌ت”.
سه‌رۆك عه‌شيره‌تێ لهێب ئاماژه ب وێ چه‌ندێ ژى كر كو داعش رازيبوويه ته‌رمێن پێشمه‌رگه‌يى ژى ب ده‌ته ده‌ست ب مه‌رجه‌كى پێشمه‌رگه ژى ته‌رمێن وان ب ده‌ته ده‌ستێ وان.
ده‌رباره‌يى مه‌رجێن دژى وه‌كو پێدانا كاره‌بێ ب مووسل و حه‌وێجه و ڤه‌كرنا رێيا كه‌ركووك حه‌وێجه، شێخ يه‌عقوب لهێبى گۆت: “هه‌تا نوكه داعش چو تشتێن وه‌سا نه‌گۆتينه”.
ل شه‌رێ 2015.1.30 هژماره‌كا پێشمه‌رگه‌يى ب ئێخسيرى كه‌فتنه ده‌ستێ چه‌كدارێن داعش، پاشان ژى گرته‌كا ڤيديۆيى به‌لاڤكر كو پێشمه‌رگه ب ئێخسيرى د ناڤ قه‌فه‌سان دانه و د ناڤ بازارێن حه‌وێجه دا دگێرينن.
دوهى رۆژا دوشه‌مبى نێچيرڤان بارزانى سه‌رۆكێ حوكمه‌تا هه‌رێما كوردستانێ راگه‌هاند كو ئه‌و يێ بزاڤێن رژد دكه‌ن بۆ ئازادكرنا پێشمه‌رگه‌يێن ئێخسير د ده‌ستێ داعش دا.
ئه‌ڤرۆ نيوز:
كۆمبوونا د ناڤبه‌را سه‌رۆكێ هه‌رێما كوردستانێ و شاندێ دانوستاندكارێ هه‌رێمێ يێ چوويه به‌غدا ب سه‌رۆكاتيا نێچيرڤان بارزانى ل پيرمام ده‌سپێكر.
ئه‌ڤرۆ رۆژا سێشه‌مبى 2015.2.17، مه‌سعود بارزانى سه‌رۆكێ هه‌رێما كوردستانێ پێشوازى ل شاندێ دانوستاندكارێ هه‌رێمێ يێ چوويه به‌غدا ب سه‌رۆكاتيا نێچيرڤان بارزانى ل پيرمام ده‌سپێكر.
شاندێ هه‌رێما كوردستانێ كو بۆ مه‌ره‌ما كێشا د ناڤبه‌را هه‌رێما كوردستانێ و به‌غدا دا و ب تايبه‌ت ژى بۆ وێ رێكه‌فتنا د ناڤبه‌را هه‌ردو لايان دا يا گرێدايى په‌ترۆلێ و بودجا هه‌رێما كوردستانێ سه‌ره‌دانا به‌غدا كربوو، به‌لێ يێ بێ مفا بوو ب گۆره‌يى داخۆيانيا سه‌رۆكێ حوكمه‌تا هه‌رێما كوردستانێ نێچيرڤان بارزانى ده‌ما بۆ ده‌زگه‌هێن راگه‌هاندنێ گۆتى: “عيراق يا پابه‌نده ب رێكه‌فتنێ، به‌لێ پاره نينن ب هنێريت”.
ئه‌ڤه ژ ده‌مژمێر 11:00 وه‌ره كۆمبوون يا به‌رده‌وامه و بڕياره شاندێ دانوستاندكار بۆچوونا سه‌رۆكێ هه‌رێمێ د ڤى وارى دا وه‌رگرن و سوبه‌هى ژى كۆمبوونا جڤاتا وه‌زيران بۆ ڤێ مه‌ره‌مێ بهێته گێران كا چ باشه بهێته كرن.
كۆمبوون هێشتا يا به‌رده‌وامه و بڕياره سه‌رۆكێ هه‌رێما كوردستانێ ژى هه‌لويستێ خوه بۆ شاندنێ هه‌رێما كوردستانێ يێ پێكهاتى ژ نێچيرڤان بارزانى، سه‌رۆكێ حوكمه‌تا هه‌رێما كوردستانێ و قوباد ته‌له‌بانى جێگرێ سه‌رۆكێ وه‌زيران و ئاشتى هه‌ورامى وه‌زيرێ سامانێن سرۆشتى و رێباز محه‌مه‌د حه‌ملان وه‌زيرێ دارايى و عه‌لى سندى وه‌زيرێ پلاندانانێ بده‌ته دياركرن.
ئه‌ڤرۆ نيوز:
ئه‌ندامه‌كێ به‌ره‌يێ نشتيمانى يێ بلندێن كوردێن فه‌يلى دبێژيت: “فرقه‌كا مه‌شقدايى يا كوردێن فه‌يلى كو هژمارا وان پێنج هزار كه‌سن، بۆ پشكداريكرن د حه‌شه‌د شه‌عبى يا شيعان دا، هاتيه ئاماده‌كرن.
له‌تيف محه‌مه‌د ئه‌ندامه‌كێ به‌ره‌يێ نشتيمانى يێ بلندێ كوردێن فه‌يلى، ب مالپه‌رێ عه‌ره‌بى 21 راگه‌هاند: ئه‌و هێزه ژ پێنج هزار كه‌سێن كوردێن فه‌يلى پێكهاتيه، دێ چيته ناڤ حه‌شه‌د شه‌عبى يێ شيعان و ب ڤان نێزيكان دێ ب سه‌ر ده‌ڤه‌رێ دا هێنه به‌لاڤكرن.
نه‌وزاد سه‌باح، شرۆڤه‌كارێ سياسى ژى ب هه‌مان ژێده‌ر راگه‌هاند كو گه‌له‌ك ژ كوردێن فه‌يلى، د ناڤ حه‌شه‌د شه‌عبى دا پۆستێن بلند يێن هه‌ين ب تايبه‌ت ل ده‌ڤه‌رێن نێزيك كه‌ركووك و ديالا و سه‌لاحه‌دين.
ئه‌ڤرۆ نيوز:
ب گۆره‌يى نڤيساره‌كا جڤاتا وه‌زيرێن عيراقێ كو د دووماهى كۆمبوون دا ده‌ركريه، بڕيار دايه كو هه‌موو هه‌يڤان 10 رۆژان پێدانا مووچێن فه‌رمانبه‌رێن عيراقێ بهێته گيرۆ كرن.
د وێ به‌لگێ دا كو وێنه‌ك به‌لاڤ بوويه ل رۆژا 11 شياتێ ده‌رچوويه، جڤاتا وه‌زيران ل عيراقێ بڕيار دايه مووچه‌يێ هه‌موو كارمه‌ند و فه‌رمانبه‌رێن عيراقێ 10 رۆژان گيرۆ بكه‌ت.
ڤێ به‌لگێ ئيمزا د. حامد خه‌له‌ف ئه‌حمه‌د ئه‌ميندارێ گشتيێ جڤاتا وه‌زيرێن عيراقێ ب وه‌كاله‌ت ل سه‌ره ئه‌ڤ بڕياره ب هژماره 65 يا سالا 2015 ده‌ركريه.
ئه‌ڤ ده‌نگوباسه د ده‌مه‌كى دايه كو سه‌رۆك وه‌زيرێن عيراقێ و چه‌ندين په‌رله‌مانتارن ژى ئه‌ڤ ده‌نگۆيه ره‌تكريه.
ئه‌ڤرۆ نيوز:
وه‌زيرێ په‌روه‌ردێ ل حوكمه‌تا هه‌رێما كوردستانێ راگه‌هاند كو هه‌موو ئه‌و قوتابيێن پێشمه‌رگه ژ ئه‌زموونێن ده‌سپێكى هاتنه ئازاكرن.
بڕياره سوبه‌هى ئه‌زمونێن به‌راهيێ يێن هه‌موو قوتابخانێن هه‌رێما كوردستانێ ب رێڤه بچن و ئه‌و قوتابيێن پێشمه‌رگه دێ ژ وان ئه‌زموونان هێنه ئازاكرن.
ب گۆره‌يى نووچه‌كى كو رووداو به‌لاڤكريه، وه‌زرێ په‌روه‌ردێ دا زانين ژى كو پێدڤيه هه‌ر قوتابيه‌كێ پێشمه‌رگه پشتگيريا وى جهێ ده‌وامێ لێ دكه‌ت ل گه‌ل خوه ببه‌ت
ئه‌ڤرۆ نيوز:
سه‌رۆك وه‌زيرێن عيراقێ حه‌يده‌ر عه‌بادى راگه‌هاند كو ئه‌و يێ خوه به‌رهه‌ڤ دكه‌ن دا كو هێرشێ بكه‌نه سه‌ر مووسل ل دژى داعش و ئاماژه ب وێ چه‌ندێ كر كو به‌رى سالا بهێت ئه‌و دێ وى باژێرى به‌رى سێ سالا بهێت رزگار كه‌ن و ب كێمترين خوساره‌تى.
د ديداره‌كێ دا بۆ BBC حه‌يده‌ر عه‌بادى ئاماژه ب وێ چه‌ندێ كر ئه‌وى هه‌تا راده‌كى هه‌ست ب بێهيڤيبوونه‌كێ دكر ل ده‌سپێكا وه‌رگرتنا وى پۆستى ژ ئه‌گه‌رێ نه‌بوونا پشته‌ڤانيا نێڤده‌وله‌تى ل دژى داعش و گۆت: “نوكه كاودان باشترن ب تايبه‌ت ل ڤان حه‌فتيێن دووماهيێ”.
عه‌بادى دا زانين كو نوكه هێزێن عيراقى خوه ئاماده دكه‌ن و پلانێ ددانن دا ل هه‌يڤێن داهاتى هێرشێ بكه‌نه سه‌ر مووسل و ژڤانێ ڤێ هێرشێ ب دروستى ئاشكه‌را نه‌كر به‌لێ گۆت: “دێ به‌رى سه‌رێ سالا نوو بيت”.
دا زانين ژى كو دێ سه‌ركه‌فتنا مووسل گرێدايى وێ رێكخستنێ بيت يا د ناڤبه‌را له‌شكرێ عيراقى و له‌شكرێ ئه‌مريكى و هێزێن پێشمه‌رگه‌يى دا و گۆت: “مه نه‌ڤێت كێشه د ئازادكرنا مووسل دا په‌يدا ببن، يان ژى ژێكڤه‌بوون ب ڤێ رامانێ”.
عه‌بادى ئاماژه ب وێ چه‌ندێ ژى كر كو دخوازن هێزێن هه‌ڤپه‌يمانان هێرشێن خوه دژوارتر لێ كه‌ن و ل ڤان حه‌فتيێن دووماهيێ باشتره و دوورخست كو ئه‌مريكا ب هێزا په‌ياده پشكدار بيت و گۆت: “ئه‌و دشێن ب ره‌نگه‌كێ دى هاريكاريا مه بكه‌ن وه‌كو چه‌ك و راهێنانان”.
ئەڤرۆ:
بەلاڤبوونا دەنگوباسێ بەلاڤکرنا ھێزا (حەشد ئەلشەعبی) ل پارێزگەھا کەرکوکێ بوویە جھێ دلگرانیا بەرپرس و فەرماندەیێن لەشکری یێن ھەرێما کوردستانێ و سەرکردێ لەشکرێ بەدر ھادی ئەلعامری کو سەرپەرشتیا حەشد ئەلشەعبی دکەت گەفێن وێ چەندێ دکەت کو دێ ل دەمەکێ نێزیک ھێزەکا مەزن بەر ب پارێزگەھا کەرکوکێ ب رێ ئێخیت،ل دۆر ئەڤێ چەندێ فەرماندەکێ لەشکری یێ میحوەرێ کەرکوکێ دبێژیت، ئەڤ چەندە ژ کەسێ ناھێتە قەبوولکرن و ئەم چاڤەریێ ھەلویستەکێ فەرمی یێ کوردستانێ نە.
محەمەد حاجی مەحمود سکرتێرێ گشتی یێ پارتا سۆشیالستا کوردستانێ و دھەمان دەم دا ئێک ژ فەرماندەیێن لەشکری ل میحوەرێ پارێزگەھا کەرکوکێ دیارکر کو حەشد ئەلشەعبی پێگھورێ لەشکرێ عیراقێ یە و بۆ ئەڤرۆ گوت” پشتی لاوازبوون و نەمانا لەشکرێ عیراقێ، حەشد ئەلشەعبی ب ھێز ھاتە دناڤ مەیدانێ دا ل عیراقێ ، ئەڤ ھێزە دەمەکێ درێژە ھەی، لێ نە ب ڤێ ھژمارا مەزن بوو”.
محەمەد حاجی مەحمود ئاماژە ب وێ چەندێ کر کو بەرفرەھبوونا ئەرکێن حەشد ئەلشەعبی پارچەکرنا عیراقێ یە و گوت” حەشد ئەلشەعبی یا شیعانە و زێرەڤانێن نشتیمانی یا سوننەیانە و پێشمەرگە ژی ھێزەکا کوردستانی نە، ئەڤە ئاماژەکێ ب ھێزە بۆ پارچەبوونا عیراقێ بو سێ پارچان و ھەر مەزھەب و نەتەوەک خوە ب رێڤە ببەت، چونکی بتنێ لەشکرێ عیراقێ دەربرین ژ ھەموو نەتەوەو و مەزھەبان دکر، لێ ئەوژی نەما “.
ناڤبری ئەو چەندە ژی دیارکر کو ھەتا نوکە چو بریارێن فەرمی نینن بۆ حەشد ئەلشەعبی و گوت” ھەتا نوکە ب فەرمی چو بەرپرس یان فەرماندەیێن ڤێ ھێزێ ھەلویستێ خوە بەرامبەر ھاتنا وان بۆ پارێزگەھا کەرکوکێ دیار نەکریە، لێ ھەکە ھاتن دێ مەژی وەکو ھەرێما کوردستانێ بەرسڤا خوە ھەبیت”.
ب دیتنا ڤێ فەرماندێ لەشکریێ کوردستانی، ب چو شێوەکێ رێ بۆ کەسی ناھێتە دان و گوت” نە ب تنێ حەشد ئەلشەعبی، بەلکو بۆ چو ھێزەکێ رێ ناھێتە دان بھێتـە دناڤ پارێزگەھا کەرکوکێ دا، چونکو ئەڤە چەندین سالە پێشمەرگەێن کوردستانێ و ئاسایشا کوردستانێ بێ جوداھی خەلکێ وێ د پارێزیت.
محەمەد حاجی مەحمود دیار دکەت کو ھەتا دووماھی چرکە دێ بەرگریێ ژ کەرکوکێ کەین و گوت” چەوا پێش وەخت بەرگری ژ کەرکوکێ ھاتیە کرن، ل داھاتی ژی دا و ب ھێزتر دێ بەرگری ژ ھەبوونا کەرکوکێ کەین، چونکو کەرکوک کوردستانی یە”.
ل دووماھیێ فەرماندێ لەشکری یێ میحوەرێ کەرکوکێ ئەو چەندە راگەھاند” ھەبوونا ھێزێن ب گەلەک ناڤان جھێ مەترسیێ نە، لێ ئەم وەکو ھێزا پێشمەرگێ کوردستانێ دێ شەرێ خوە دژی داعش ب رێ و تەکتیکێن نوو کەین و دێ سەرکەفتنێن مەزن ھەبن”.
ئه‌ڤرۆ نیوز:
حه‌یده‌ر عه‌بادى سه‌رۆك وه‌زیرێن عیراقێ د په‌یجێ خوه یێ تایبه‌ت یێ تورا جڤاكى یا فێسبووكێ به‌لاڤكریه كو وى رۆژا ئێكشه‌مبى پێشوازى ل شاندێ هه‌رێما كوردستانێ كریه ب سه‌رۆكاتیا نێچیرڤان بارزانى و نڤێسیه” مه گوته شاندێ كوردى كو چاره‌كرنا كێشێن د ناڤبه‌را به‌غدا و هه‌رێمێ د به‌رنامێ حكومه‌تا عیراقێ دایه، ل دووڤ قانوون و دستوورى و مه رژدى ل سه‌ر گرنگیا پابه‌ندبوونا هه‌رێم و به‌غدا ل سه‌ر وان خالێن هه‌ردو ئالى رێككه‌ڤتین كریه”
نيشاندان