ئەڤرۆ:
پشتی شاندێ ھەرێما کوردستانێ ب سەرۆکاتیا سەروکێ حوکمەتا ھەرێمێ بەر ب بەغدا ڤە چوی, بۆ ھندێ دانوستاندنێ ل گەل بەغدا بکەن بۆ ھنارتنا بودجا کوردستانێ ,لێ دەمێ زڤرینا شاندێ ھەرێمێ ,سەرۆکێ حوکمەتێ د گونگرەکێ رۆژنامەڤانی دا گۆت بەغدا پارە نینە بو ھەرێما کوردستانێ بھنێریت، بسپۆرەکێ قانوونا دەستووری ژی دبێژیت بلا ھەرێم چاڤەرێی بەغدا بیت و پێنگاڤێن سەرخوەبوونا سیاسی نەھاڤێژیت.
بسپۆرەکێ قانوونا دەستووری ل زانکۆیا دھۆکێ دا دیارکرن پێدڤیە ھەرێما کوردستانێ چاڤەریێ بەغدا بیت بۆ ھنارتنا پارەی و چ پێنگاڤێن دی نەھاڤێژیت , ژ بەر کو لێک تێگەھشتنەکا باش د ناڤبەرا حوکمەتا ھەرێمێ و عەبادی دا یا ھەی، لێ ھەکە ھەرێمێ ھەست پێ کر کو نیازا حوکمەتا عیراقێ یا باش نینە ل گەل ھەرێمێ و بگەھیتە وێ ئاستی کو چو جوداھی د ناڤبەرا عەبادی و مالکی دا نەمینن, ل ڤێرە پێدڤیە ھەرێما کوردستانێ پێنگاڤا سەرخوەبوونا سیاسی بھاڤێژیت.
رێنجبەر جەمیل بۆ ئەڤرۆ گوت” بلا ھەرێم نوکە پێنگاڤێن سەرخوەبوونا سیاسی نەھاڤێژیت ,ھەر چەندە مافێ ھەرێما کوردستانێ یە سەرخەبوونا خوە رابگەھینیت، لێ یا باش نابیت، ژ بەر کو ھەرێم نوکە یا د بارودۆخێ شەری دا ل گەل تیرۆرستێن داعشێ و ھەکە ھات و عیراق دابەش بۆ بێ کو سونەیان کیانەک ھەبیت، ل ڤێرە دبیت سونەیێن عیراقێ ژی بکەڤنەد بن کونتڕولا ئیرانێ دا و ئەڤ چەندە ژی د بەرژەوەندا رۆژئاڤا دا نینە ب تایبەتی ئەمریکا ,لەوما دڤێت کورد ب شێوەکێ عەقلانە رەفتارێ ل گەل ڤی بارودۆخی دا بکەن”.
رێنجبەری دیار کر ژی کو ئەڤ بارودۆخێ ل رۆژھەڵاتا ناڤین ھەی کو عیراق ژی پشکەکە ژ وی بارودۆخی، ھەموو د بەرژەوەندا ھەرێمێ دایە و گۆت ” جیھانا دو جەمسەری یا دزڤریتەڤە و یا ئاشکرا دبیت جەمسەرێ رۆژئاڤا زێدەتر د بەرژەوەندا ھەرێمی دایە، بەڵگە ژی راھێنان پێکرنا پێشمەرگەی و ھنارتنا ھاریکاریان ژ وەلاتێن ئیتالیا و ئەمریکا و ئەڵمانیا و فەرەنسا و جەمسەرێ رۆژھەلات ژی روسیا و ئیرانن و ئیرانێ ژی حەزێن وێ د بەرفرەھن و ھاریکاریا رژێما سووریێ دکەت و ھەروەسا ئیران ل گەل حیزبوڵا ب شێوەیەکێ نەراستەوخوە کاردکەن بۆ ھندێ ھەرێما کورستانێ نەبیتە دەولەت”.
بسپۆره‌كێ قانوونى: ھەکە عەبادی یا مالکی دووبارە کەت دڤێت کورد جودا ببن
نيشاندان
