ئه‌ڤرۆ نيوز:

ئه‌ڤرۆ سپێدێ نه‌وشيروان مسته‌فا، رێكخه‌رێ ته‌ڤگه‌را گۆڕان سه‌ره‌دانا پيرمام كر ب مه‌ره‌ما كۆمبوونێ ل گه‌ل مه‌سعود بارزانى، سه‌رۆكێ هه‌رێما كوردستانێ.

ب گۆره‌يى پێزانينێن ئه‌ڤرۆ نيوز به‌رى نيڤرۆيا ئه‌ڤرۆ رۆژا دوشه‌مبى رێكه‌فتى 2015.2.23 سه‌رۆكێ هه‌رێما كوردستانێ  و نه‌وشيروان مسته‌فا رێكخه‌رێ ته‌ڤگه‌را گۆڕان كۆمبوون و پشتى كۆمبوون ب دووماهى دهێت دێ به‌لاڤكريه‌كا هه‌ڤپشك به‌لاڤ كه‌ن.

بۆچوون به‌ر ب هندێ دچن كو سه‌رۆك بارزانى و نه‌وشيروان مسته‌فا ره‌وشا نوكه‌ و ئه‌و كێشێن د ناڤبه‌را هه‌رێمێ و به‌غدا دا گه‌نگه‌شه‌ بكه‌ن ب تايبه‌ت ژى پشتى سه‌رۆكێ هه‌رێما كوردستانێ چوويه‌ ژ ده‌رڤه‌يى وه‌لاتى و ڤه‌گه‌ريايى كو ئه‌ڤه‌ كۆمبوونا وى يا ئێكێ يه‌ ل گه‌ل سه‌ركرده‌كێ حزبى، ل حه‌فتيا بۆرى ژى ل گه‌ل شاندێ دانوستاندكارێ هه‌رێما كوردستانێ كۆمبوو ئه‌وێ چوويه‌ به‌غدا ل سه‌ر ئاستێ حكومى.

ئه‌ڤرۆ نيوز:

ژ بوو پتر خزمه‌تكرن و مفاوه‌رگرتنێ ژ نووچێن مالپه‌رێ ئه‌ڤرۆ نيوز و رۆژناما ئه‌ڤرۆ ژێده‌رێن هه‌وه‌يێن ده‌نگوباسان، مالپه‌رێ ئه‌ڤرۆ نيوز خزمه‌تا SMS ان راگه‌هاند.

مه‌ره‌م ژ ڤێ خزمه‌تا SMS ان ئه‌وه‌ كو هه‌كه‌ هوون دوورى ئه‌نترنێت ژى بى بشێى مفايى ژ نووچێن مه‌ وه‌رگرى ب رێيا نامێن مۆبايلێ كو دێ ژماره‌ 1 شوڕتكودێن كوڕه‌ك 2279 يان ئاسيا سێل 4593 هنێرێ دێ رۆژانه‌ گرنگترين و گه‌رمترين نووچه‌ گه‌هنه‌ هه‌وه‌يێن هێژا.

ئه‌ڤ خزمه‌ته‌ دێ رۆژانه‌ گه‌رمترين و نووترين نووچان ب رێيا نامێن مۆبايلێ SMS گه‌هينيته‌ هه‌وه‌ كو دێ ژ لايێ ئه‌ڤرۆ نيوز ڤه‌ و گرنگيا بابه‌تان هێنه‌ هه‌لبژاتن و بهايێ هه‌ر كورته‌ نامه‌كێ ژى دێ ب تنێ 60 دينارێن عيراقى بن.

ئه‌ڤرۆ نيوز بكه‌ ژێده‌رێ خوه‌ يێ پێزانينان دا به‌رده‌وام نووياتيان بخوينى.

ئەڤرۆ:

 رێڤەبەریا گشتیا پەروەردا پارێزگەھا دھۆکێ ب تنێ چار رۆژێن ئادارێ دێ بۆ مامۆستا و قوتابیان کەتە بێھنڤەدان و ئەندامەکا پەرلەمانێ کوردستانێ بۆ ئەڤرۆ دیار کر، وەزارەتا پەروەردێ ماف دایە رێڤەبەرێ گشتیێ دھۆکێ کا چەند رۆژان بکەتە بێھنڤەدانا مامۆستا و قوتابیان.

عەبد یوسف رێڤەبەرێ گشتیێ پەروەردا پارێزگەھا دھۆکێ تایبەت بۆ ئەڤرۆ راگەھاند، ژ بێھنڤەدانێن ئادارێ ب تنێ رۆژا ١١ ئادارێ و ھەرسێ رۆژێن نەورۆزێ دێ بۆ مامۆستا و قوتابیێن پارێزگەھا دھۆکێ بنە بێھنڤەدان و یێن دی ژ وان ناگرن و دەواما قوتابخانێن پارێزگەھا دھۆکێ دێ ب فەرمی ھێتە کرن.

زۆزان سادق تروانشی، ئەنداما لیژنا پەروەردێ ل پەرلەمانێ کوردستانێ بۆ ئەڤرۆ دیار کر، بێھنڤەدانا نیڤا سالێ یا کو سالانە ژ ١١ ھەتا ٢٤ ئادارێ دێ ژ پەروەردێن ھەولێر و سلێمانیێ گریت و بێھنڤەدانا فەرمیە، بەلێ بۆ قوتابخانێن پارێزگەھا دھۆکێ ناھێتە ھژمارتن، ل سەر وێ چەندێ را کو دەواما قوتابخانێن دھۆکێ د وەختێ خوە یێ ئاسایی دا دەست پێ کریە و گۆت “د مەھا ئادارێ دا، پێنچ رۆژ (٥، ١١، ٢١، ٢٢ و ٢٣) بۆ گشت فەرمانبەرێن ھەرێمێ بێھنڤەدانا فەرمینە، ل ھەولێر و سلێمانیێ ژی ژ ١١ ھەتا ٢٤ بێھنڤەدانا فەرمیە بۆ قوتابیان، بەلێ ھوسا دیارە رێڤەبەریا گشتیا پەروەردا دھۆکێ ئەڤ بێھنڤەدانە بۆ قوتابیێن دھۆکێ نەھژمارتیە”.

ئەنداما لیژنا پەروەردێ ل پەرلەمانێ کوردستانێ گۆت ژی “وەزیرێ پەروەردا ھەرێما کوردستانێ سەلاحیەت داینە رێڤەبەرێ گشتیێ پەروەردا دھۆکێ کو ئەو ل گۆرەی پێدڤی رۆژێن بێھنڤەدانێ بۆ پەروەردا دھۆکێ دەستنیشان بکەت و دھۆک ب حالەتەکێ تایبەت ھاتیە ھژمارتن”.

ئەڤرۆ:
ئەندامەکێ لیژنا خزمەتگوزاریێن گشتی ل جڤاتا پارێزگەھا دھۆکێ دیار کر کو گیروبوونا فرۆکخانا دھۆکێ گونەھەکا مەزنە د دەرحەقێ خەلکێ پارێزگەھا دھۆکێ دا ھاتیە کرن، چونکی ھەتا نھا ب تنێ ١٠% پرۆژە ھاتیە بجھئینان و گۆت “ژ نھا پێدا ئەم وەکو جڤات نەشێین دووڤچوونا پرۆژێ فرۆکخانا دھۆکێ بکەین، چونکی ژ دەستێ کارگێریا دھۆکێ ھاتیە دەرێخستن و نھا وەزارەتا پلاندانانێ سەرپەرشتیێ لێ دکەت”.
کەریم چەمانکی ئەندامێ لیژنا خزمەتگوزاریێن گشتی ل جڤاتا پارێزگەھا دھۆکێ بۆ رۆژناما ئەڤرۆ دیار کر پشتی وان وەکو لیژنا خزمەتگوزاریێن گشتی دەربارەی گیروبوون و رەوشا برێڤەچوونا کارێ پرۆژێ فرۆکخانا دھۆکێ دووڤچوون کری بۆ وان دیار بوو کو ئەگەرێن گیروبوونێ کارگێریا پارێزگەھێ بوویە، چونکی ھەتا نھا خەلکێ وان گوندان نەھاتینە قەرەبووکرن و ئەو ژی قەبوول ناکەن بەری قەرەبووکرنێ گوندێن خوە چول بکەن و ناھێلن کۆمپانیێن بجھئینەر کارێ بکەن و گۆت “پێدڤی بوو کارگێریا پارێزەھا دھۆکێ ئاریشا عەردی ل گەل خەلکی ئێکلا کربایە پاشی گرێبەست ل گەل کۆمپانیان ئیمزا کربانە”.
چەمانکی خویا ژی کر کو ئەو نابینن جھێ گونجای بیت بۆ دروستکرنا فرۆکخانێ، چونکی ئاریشا خودانێن عەردی یا مەزنە و پێدڤی گەلەک پارایە و گۆت “زێدەباری وێ ئێکێ ژی جھێ فرۆکخانێ ھەمی کەندوکورن و نەیێ راستە و ئەو ژی پێدڤی گەلەک مەزاختنێ یە ھەتا راستڤە دکەن، ھەروەسا بۆ نموونە کۆمپانی نەچار بووینە کو دو رووباران بۆ ئاڤرێژا دەڤەرێ دروست بکەن و پرا ل سەر وان رووباران دروست بکەن، کو پێدڤی گەلەک مەزاختنێ ھەیە، ل دەمەکی مەرج نینە کو ھەر فرۆکخانەکێ ئەڤ رووبارە بھێنە چێکرن”.
ئەندامێ لیژنا خزمەتگوزاریێن گشتی ل جڤاتا پارێزگەھا دھۆکێ ئاشکرا کر کو سالا (٢٠١٣) گرێبەستا چێکرنا فرۆکخانا دھۆکێ ب (٤٣٠ ملیۆن دۆلاران ل گەل ھەر دو کۆمپانیێن تورکی (ماکیۆل و جەنگیز) مۆر کریە و کۆمپانیا (ئینشون) یا کووری سەرپەرشتیا کارێ وان دکەت، ب ئاوایەکی کو ل سەر رۆبەرێ ٢٤ کیلومەترێن دوجارکی بھێتە دروستکرن و گۆت “گوندێن موقبلێ، موقبلا بنی، باستکێ، رۆکاتێ و بامێرێ ب خوەڤە دگریت”.
کەریم چەمانکی دەربارەی دەمێ پرۆژەی و رێژا بجھئینانێ گۆت “دەمێ پرۆژەی ژ ٢/٢/٢٠١٣ ھەتا تەباخا ئیسال ٢٠١٥ یە، ئانکو (٩٠٠) رۆژن و ھەتا نھا ب تنێ ٨-١٠% ھاتیە بجھئینان و نھا ژ بەر ئەگەرێن مە دیار کرین پرۆژە ھاتیە راوەستاندن و د دەمێ خوە یێ دیارکری دا ب دووماھی ناھیت”.
ناڤبری دیار کر ژی کو نھا ئەڤ پرۆژە ژ دەستێ کارگێریا دھۆکێ ھاتیە دەرێخستن و نھا وەزارەتا پلاندانانێ سەرپەرشتیێ لێ دکەت و نڤیسینگەھا خوە ل دھۆکێ ڤەکریە، داکو راستەوخۆ سەرپەرشتیا ڤی پرۆژەی بکەت، لێ ھەتا نھا چ پێنگاڤێن بەرچاڤ نەھاتینە ھاڤێتن.
ل دووماھیێ کەریم چەمانکی گۆت “ژ نھا پێدا ئەم وەکو جڤات نەشێین دووڤچوونا پرۆژێ فرۆکخانا دھۆکێ بکەین، چونکی کەفتیە د ژێر دەستێ وەزارەتا پلاندانانێ دا و ژ کڤانێ ئەرکێ جڤاتێ دەرکەفتیە، لەورا ھیڤیدارین کو ئەندامێن پەرلەمانێ کوردستانێ (لیژنێن تایبەتمەند) دووڤچوونا ڤی پرۆژەی بکەن”.