ئه‌ڤرۆ نيوز:
نڤیسینگه‌ها حه‌یده‌ر عه‌بادى، ئاماژه ب كومبوونا ئه‌ڤرۆ یا سه‌رۆكێ حوكمه‌تا هه‌رێما كوردستانێ و سه‌رۆك وه‌زیرێن عیراقێ دكه‌ت و د وێ باوه‌رێ دايه كو ئه‌نجامێن باش دێ هه‌بن.
رافید جبورى به‌پرسێ نڤیسینگه‌ها تایبه‌ت یا حه‌یده‌ر عه‌بادى، سه‌رۆك وه‌زیرێن عیراقێ دیاركر كو پشتى چه‌نده‌كا دى دێ به‌یاننامه‌كێ ل دۆر ئه‌نجامێن كومبوونێ ده‌رێخن كو ئه‌نجامێن باش دێ هه‌بن.
ئه‌ڤرۆ نیوز:
ل سه‌لاحه‌دین سه‌رۆك بارزانى پێشوازیا شانده‌كێ هه‌ڤپشكێ سه‌ربازى و سیاسى یێ ئه‌مریكا كر كو پێكهاتبوون ژ جه‌نه‌رال ژوزێف ڤوتیل فه‌رماندێ ئوپه‌راسیونێن تایبه‌ت یێن سوپایێ ئه‌مریكا و ستیوارت جونز بالیوزێ ئه‌مریكا ل عیراقێ و ژوزێڤ پێنینگون قونسلولێ ئه‌مریكا ل هه‌ولێر.
فه‌رماندێ ئوپه‌راسیونێن تایبه‌ت یێن سوپایێ ئه‌مریكا خوه‌شحالیا خوه ب سه‌ركه‌فتنێن پێشمه‌رگه‌ى راگه‌هاند و گۆت: باره‌كێ گرانێ د شه‌رێ دژى تیرورى دا ل سه‌ر ملێن پێشمه‌رگه‌یه، له‌وماژى یا دشیانێن سوپایێ ئه‌مریكا دا بیت دێ هاریكاریا پێشمه‌رگه‌ى كه‌ت.
ئه‌ڤرۆ نیوز:
ل ناڤ ئاخا كوردستانێ و ل سنورێ پارێزگه‌ها هه‌له‌بجه، پاسدارێن ئیرانێ، لیواییه‌كێ خانه‌شین یێ پارتى ب ناڤێ ” سه‌ید به‌هائه‌دین سه‌ید محه‌مه‌د” ل گه‌ل دو زێره‌ڤانێن وى ب ناڤێ ( عه‌بدولا محه‌مه‌د ) و ( كوسار عوسمان) كو كورێ شه‌هیده، هاتنه گرتن و بۆ باژێرێ پاوه ل رۆژهه‌لاتێ كوردستانێ دهێته ڤه‌گوهاستن.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێمێ راگه‌هاند كو ژ رێكه‌فتى 2015.2. 17 رۆژا سێشه‌مبى هه‌رێم دێ كه‌ڤيته به‌ر پێله‌كا دى يا به‌فر و بارانان.
د نڤيساره‌كێ دا كو دانه‌ك ب ده‌ست ئه‌ڤرۆ نيوز كه‌فتيه پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێمێ هاتيه: “ل رێكه‌فتى 2015.2. 17 رۆژا سێشه‌مبى هه‌رێم دێ كه‌ڤيته به‌ر فشارێن نزمێن ده‌ريا ناڤه‌راست و ده‌ريا سۆر و ژ ئه‌نجامێ ئێكگرتنا فشارێن ڤان هه‌ردو فشاران دێ باران ل هه‌موو ده‌ڤه‌رێن هه‌رێما كوردستانێ باريت”.
زێده‌تر هاتيه: “پاشان ل رۆژا چارشه‌مبى رێكه‌فتى 2015.2.18 دێ رێيا ڤان هه‌ردو فشارێن نزم هێته گوهۆڕين بۆ فشارێن نزمێن وه‌لاتێ توركيا كو هه‌وايه‌كێ گه‌له‌ك سار ل گه‌لدايه و ژێده‌رێ وێ ژى ژ ناڤه‌راستا رۆسيايه، دێ ل هنده‌ك ده‌ڤه‌ران باران باريت و ل ده‌ڤه‌رێن چيايى ژى به‌فر باريت”.
ئاماژه ب وێ چه‌ندێ ژى كريه كو رۆژا پێنجشه‌مبى ژى دێ ئه‌سمان ب ته‌مامى ئه‌ور بيت و باران باريت و ل ده‌ڤه‌رێن چيايى ژى به‌فر دێ باريت و رۆژا پاشتر ژى دێ ئه‌سمان ب ته‌مامى ئه‌ور بيت و هنده‌ك جاران ژى بيته ساهى و رۆژا شه‌مبى ژى دێ هنده‌ك ده‌مان باران بيت و ل ده‌ڤه‌رێن چيايى ژى به‌فر باريت.
ل دانێ سپێدێ يێ رۆژا ئێكشه‌مبى ژى ب گۆره‌يى ڤێ نڤيسارێ دێ به‌فر ل ده‌ڤه‌رێن چيايى باريت و پاشان هێدى هێدى كارتێكرنا ڤان شه‌پۆلا ل سه‌ر هه‌رێما كوردستانێ ب دووماهى هێت.
ئاماژه ب وێ چه‌ندێ ژى كريه كو ل رۆژا پێنجشه‌مبى رێكه‌فتى 2015.2.19 ژ ئه‌نجامێ بارينا بارانێ دێ پلێن گه‌رمێ گه‌له‌ك نزم بن و ل هنده‌ك ده‌ڤه‌ران هێنه د بن سفرێ دا و بۆ ماوێ چه‌ند رۆژان د به‌رده‌وام بن و مه‌ودايێ ديتنێ ژى ل هنده‌ك ده‌مان دێ كێمتر بيت ژى پێنج كيلۆمه‌تران.
ئه‌ڤرۆ نيوز:
وه‌زاره‌تا ره‌وشه‌نبيرى ل حوكمه‌تا هه‌رێما كوردستانێ بڕيارا راگرتنا كه‌نالێ NRT بۆ حه‌فتيه‌كێ دا و رێڤه‌به‌ريا كه‌نالى ژى راگه‌هاند كو ئه‌و ب وێ بڕيارێ د پابه‌ند نابن.
ب گۆره‌يى ئه‌و پێزانينێن NRT به‌لاڤكرين به‌رپرسه‌كێ وه‌زاره‌تا ره‌وشه‌نبيرى ل حوكمه‌تا هه‌رێما كوردستانێ ب فه‌رمى داخواز ژ كه‌نالێ ناڤبرى كريه كو هه‌ر ژ رۆژا 16ى ڤێ هه‌يڤێ ده‌مژمێر 8 كه‌نالێ خوه ب راگرن و ل 23 ڤى هه‌يڤێ هه‌مان ده‌مژمێر كه‌نالى ڤه‌كه‌ن.
د ڤێ نڤيسارێ دا كو مێژوويا 15 شياتێ ل سه‌ره، ئيمزا هه‌لگۆرد جنديانى رێڤه‌به‌رێ گشتيێ راگه‌هاندێ ل سه‌ره و ئاماژه ب ئه‌گه‌رێ داخستنا كه‌نالى نه‌هاتيه كرن.
كه‌نالێ NRT ژى راگه‌هاند كو ئه‌و پابه‌ند نابيت ب بڕيارێ ب به‌هانه‌يا وێ چه‌ندێ كو كه‌نالى چو قانوونێن هه‌رێما كوردستانێ يێن گرێدايى ڤى كه‌رتى بن پێ نه‌كرينه.
دیندار عه‌بد ئیسماعیل حه‌سه‌ن سه‌رۆكێ لیژنا قانوونى ل جڤاتا پارێزگه‌ها دهۆكێ بۆ ئه‌ڤرۆ نیوز دیاركر كو چو تشتێ فه‌رمى بۆ وان نه‌هاتيه ل سه‌ر ڤه‌گوهاستنا ئه‌و عه‌ره‌بێن ل وان گۆندێن پێشمه‌رگه‌يی رزگاركرین بێنه ناڤ هه‌رێما پارێزگه‌ها دهۆكێ.
ناڤبری ئه‌و چه‌نده ژی دازانین كو ئه‌و وه‌كو ئه‌ندامێ جڤاتێ و سه‌رۆكێ لیژنا قانوونى دبينيت كو هاتنا وان دێ چه‌ندین ئاریشان په‌يدا كه‌ت و گۆت: “ب ره‌نگه‌كێ ئێكجارى ئينانا وان و ئاكنجيكرن ل پارێزگه‌هێ ره‌تدكه‌ين”.
دینداری ئه‌و چه‌نده ژی دازانین كو ره‌وشا ئابووری و دیموگرافیا پارێزگه‌هێ هند دشێت ئاواران وه‌ربگریت و نها فشاره‌كا زوورا هه‌مه‌لایه‌ن ل سه‌ر وه‌لاتیێن پارێزگه‌هێ و دام و ده‌زگه‌هێن وێ هه‌یه، له‌ورا هاتنا هه‌ر ئاواره‌یه‌كێ دی ناهێته قه‌بوولكرن و شیان هند دشێن وه‌ربگرن.
دیندار عه‌بد گۆت: “هاتنا هه‌ر هژماره‌كا ئاواره‌یان ب خوه دروست بوون و په‌یدابوونا چه‌ندین ئاریشێن ئیداری و مرۆڤی یه هه‌تا ب شێی چاره بكه‌يی، ئه‌ڤجا ئينانا هنده‌ك گۆندنشينێن پێشمه‌رگه‌يى گۆندێن وان ئازاد كرين دێ بيته بارگرانى ل سه‌ر پارێزگه‌هێ و مه‌ترسيا ئه‌منى ژى ل سه‌ر پارێزگه‌هێ دێ زێده بيت”.
وه‌كو چاره بۆ ڤێ كێشى سه‌رۆكێ لژنا قانوونى ل جڤاتا پارێزگه‌ها دهۆكێ دبێژيت: “پێدڤيه ل جهه‌كێ دوور ژ به‌رۆكێن شه‌رى وه‌كو كه‌مبه‌كێ بۆ بهێته دروست كرن و ب ره‌نگه‌كێ گه‌له‌ك باش چاڤدێريا وان بهێته كرن”.
ئه‌ڤرۆ نيوز:
سه‌رۆكێ رێكخراوا به‌در گه‌فێن چوونا ناڤ كه‌ركووك دكه‌ت و دده‌ته دياركرن ئه‌و دێ ل دو رۆژێن داهاتى ل ناڤ كه‌ركووك بيت و هيڤى دكه‌ت قاسم سلێمانى فه‌رماندێ فه‌يله‌قا قودس ژى ل وێرێ ئاماده بيت.
هادى عامرى سه‌رۆكێ رێكخراوا به‌در و سه‌رپه‌رشتيارێ مه‌يدانى يێ ميليشياتێن حه‌شه‌د شه‌عبى گه‌فان دكه‌ت ب چوونا هێزێن خوه ڤه بۆ ناڤ كه‌ركووك بۆ ئاگه‌هدار بوون ژ ره‌وشا باژێرى، ژ به‌ر ئه‌و هێرشێن به‌رى دو حه‌فتيان ژ لاىێ چه‌كدارێن داعش ڤه كريه سه‌ر كه‌ركووك ل وێ پارێزگه‌هێ.
ئەڤرۆ نیۆز، قەیس ئیسماعیل:
ماوێ پتر ژ شەش ھەیڤانە کۆمپانیەکی زێدەتری دو ھزار تەختێن خواندنێ داناینە د بن بەنگە و ھولێن پەروەردێن سێمێل و ئامیدیێ ڤە و ھەتا نوکە پەروەردا چو موفا ژێ وەرنەگرتیە.
عەبد یوسف، رێڤەبەرێ گشتیێ پەروەردا پارێزگەھا دھۆکێ دیارکر کو وەکو پەروەردا پارێزگەھا دھۆکێ وان ٥٠ ھەتا ٦٠ ھزار تەختێن خواندنێ داخواز کرینە و تنێ پەروەردێن سێمێل و ئامێدیێ وەرگرتینە و یێن دی ھاتینە رەتکرن ژ لایێ وەزارەتێ، پشتێ ل دووڤ وان ساخلەتا نەھاتینە چێکرن یێن د گرێبەستێ دا ھاتنە نیشادان بۆ وەزارەتێ و گۆت: “لەوا ھاتنە رەتکرن و ئەڤە مافەکێ قانوونی یێ وەزارەتێ یە”.
ناڤبری دیارکر کو نوکە کەنگەشە د ناڤبەرا وەزارەتێ و وێ کۆمپانیێ دا دھێتە کرن بۆ راستڤەکرنا گرێبەستێ ل دووڤ ئەو ساخەلتێن دەسپێکێ ھاتینە دەستنیشانکرن بۆ وان تەختا و بۆ ڤێ مەرەمێ، وەزیری پەروەردێ لژنەک یا دورستکری بۆ دیارکرنا باشترین چارەسەری بۆ ڤێ بابەتی چونکو وێ کۆمپانیێ وەزارەت یا خاپاندی و ل دووڤ وان نمونێن دەسپیکێ تەختێن خواندنێ نە ئیناینە.
هه‌ڤپه‌يمانيا هێزێن نشتيمانى و هه‌ڤپه‌يمانيا نشتيمانى و چه‌ند په‌رله‌مانتارێن سونه ل جڤاتا نوونه‌رێن عيراقێ كارێن خوه راوه‌ستاندن وه‌كو نه‌رازيبوون ل سه‌ر كوشتنا سه‌رۆكێ عه‌شيره‌تا جونابى و ره‌ڤاندنا ئه‌ندامه‌كێ په‌رله‌مانى يێ سونى ل شه‌ڤا ئه‌ينى.
پشتى چه‌ند چه‌كدارێن نه‌نياس كاروانێ ترۆمبێلێن په‌رله‌مانتار زياد جنابى راوه‌ستاندين كو مامێ وى ژى شێخ قاسم ل گه‌ل بوو ب مه‌ره‌ما پشكنينى ل باشوورێ به‌غدا، شێخ قاسم جنابى و كوڕێ وى محه‌مه‌د ب فيشه‌كان هاتنه كوشتن ل گه‌ل شه‌ش ژ زێره‌ڤانێن وان ب كێمى و زياد جنابى ره‌ڤاند و پاش پشتى ماوه‌كى ئه‌و به‌ردا.
وه‌زاره‌تا ناڤخۆ ژى راگه‌هاند كو ئه‌و دێ ڤه‌كۆلينێ د كێشێ دا كه‌ن، به‌لێ ئه‌ڤه گه‌له‌ك بۆچوونان ل پاش خوه دهێليت ب تايبه‌ت پشتى د ماوێ بۆرى دا هێزێن ئێمناهيێ ل ناڤ به‌غدا هاتينه كێمكرن و ب شه‌ڤ رێ ب هاتنوچوونێ هاتيه دان ل ناڤ باژێرى.
ئه‌حمه‌د مه‌سارى د به‌ياننامه‌كێ دا، ژ هه‌ڤپه‌يمانيا هێزێن نشتيمانى و هه‌ڤپه‌يمانيا نشتيمانى راگه‌هاند كو ئه‌وان پشكداريا خوه د جڤاتا نوونه‌رێن عيراقێ دا ژ ئه‌ڤرۆ و پێڤه هه‌لپسارد.
ئه‌ندامێن په‌رله‌مانى ديار دكه‌ن كو ئه‌ڤه دێ هه‌موو ئه‌ندامێن په‌رله‌مانى ب خوه ڤه گريت كو هژمارا وان دگه‌هيته 75 ئه‌ندامان كو هنده‌ك ئه‌ندامێن شيعه ژى د ناڤ دانه.
ئه‌ڤرۆ نيوز:
رێكخراوانا چاڤدێريا مافێن مرۆڤى يا نێڤده‌وله‌تى، ئه‌ڤرۆ رۆژا ئێكشه‌مبى راگه‌هاند ل ڤان هه‌يڤێن دووماهيێ ل هنده‌ك ده‌ڤه‌رێن سونى بنپێكرنا مافێ مرۆڤى ژ لايێ ميليشياتێن هه‌ڤپه‌يمان ل گه‌ل هێزێن ئه‌منى يێن عيراقى د زێده‌بوونێ دايه و ئه‌ڤه بوويه ئه‌گه‌ر كو هنده‌ك ژ خه‌لكێ وان ده‌ڤه‌ران ژ نه‌چارى مالێن خوه ب جهـ بهێلن و هنده‌ك ژى دهێنه ره‌ڤاندن و سێداره‌دان ل سه‌ر جادان د هنده‌ك كاودانان دا.
رێكخراوا “هيومه‌ن رايتس ووچ” د ئێك ژ به‌ياننامێن خوه دا يێن ئه‌ڤرۆ ده‌ركه‌فتين دايه زانين كو ل ده‌ڤه‌رێن ميقداديه ل ديالا نه‌كێمتر ژ 3000 هزار كه‌سان ژ مالێن خوه ره‌ڤينه ژ خزيرانا بۆرى و رێ پێ ناهێته دان ڤه‌گه‌رنه ده‌ڤه‌رێن خوه.
ئاماژه ب وێ چه‌ندێ ژى كر كو ئه‌و يێ ڤه‌كۆلينێ دكه‌ن و ديار دبيت كو “ميليشيات و هێزێن تايبه‌ت” 72 سڤيل يێن ل گۆندێ بروانه يێن دكه‌ڤيته ميقداديه كوشتينه، نه‌ڤه‌شارتيه ژى كو هنده‌ك ژ خه‌لكێ ڤێ ده‌ڤه‌رێ به‌حس ل هێزێن ميليشيات و ئه‌منى يێن هه‌ڤپه‌يمان كرينه كو كێشا بۆ خه‌لكێ ده‌ڤه‌رێن ده‌وروبه‌رێ ميقداديه دروست دكه‌ن، پشتى ده‌مه‌كێ كێم ژ ده‌ركرنا داعش ژ وێ ده‌ڤه‌رێ.
هه‌ر د ڤێ په‌ياننامێ دا هاتيه ژى كو ب گۆره‌يى ديده‌ڤانا ژ چريا ئێكێ يا 2014 كو ئه‌و هه‌يڤه يا پشتى وێ عه‌بادى سه‌رۆك وه‌زيراتى وه‌رگرتى و سۆز دايى ميلشياتێن خه‌له‌ت و يايفه‌گه‌ريێ نه‌هێليت ئه‌وێن ل سه‌ر ده‌مێ به‌رى وى هه‌ين.
ب گۆره‌يى رێڤه‌به‌رێ پشكا رۆژهه‌لاتا ناڤين و باكوورێ ئه‌فريقيا جۆ ستورك، سڤيل ل عيراقى تووشى توندوتيژيا “داعش” و پاشى يا “ميليشياتێن سه‌ر ب حوكمه‌تێ” ڤه دبن، پشتى ئه‌و ده‌ڤه‌ر ژ ده‌ستێ “داعش” دهێنه ده‌ر.
زێده‌تر گۆتژى: “ژ به‌ر يا كو ب ناڤێ ڤاڤارتنا ده‌ڤه‌رێ دهێته كرن، خه‌لكێ وان ده‌ڤه‌ران جهه‌كێ ته‌نا نابينن بۆ خوه قه‌ست بكه‌نێ”.
نيشاندان