ئه‌ڤرۆ نيوز:

ئه‌ڤرۆ كۆمبوونا نه‌ئاسايى يا په‌رله‌مانێ كوردستانێ ل هه‌له‌بچه‌ هاته‌ ئه‌نجامدان و پشتى دانوستاندنه‌كا زۆر، بڕيار دا هه‌له‌بچه‌ ژى ب فه‌رمى ببيته‌ پارێزگه‌هـ.

د كۆمبوونا ئه‌ڤرۆ دا ب ئاماده‌بوونا هژماره‌كا زۆر ژ وه‌زير و به‌رپرسێن حكۆمى و ئيدارى و حزبى قانوونا ئيدارا پارێزگه‌ها هه‌له‌بچه‌ هاته‌ په‌سه‌ندكرن و بوو پارێزگه‌ها پێنجێ يا باشوورێ كوردستانێ.

ب گۆره‌يى رێكه‌فتنه‌كێ د ناڤبه‌را ئێكه‌تى و گۆڕان دا، پۆستێن پارێزگه‌ها هه‌له‌بچه‌ و سلێمانێ دێ هه‌ر دو سالان بۆ لايه‌نه‌كى بن، ب ره‌نگه‌كى دو سالێن ئێكێ يێن پارێزگه‌ها هه‌له‌بچه‌ دێ بۆ گۆڕان بن و دو سالێن دويێ دێ بۆ ئێكه‌تى نشتيمانى كوردستان بن.

ب ڤێ چه‌ندێ ژى هه‌رێما كوردستانێ ب بڕيارا په‌رله‌مانێ خوه‌ نه‌خشه‌يێ حوكمه‌تا عيراقێ گوهۆڕى و 18 پارێزگه‌هان بوو 19 پارێزگه‌هـ .

ئه‌ڤرۆ نيوز:

ب مه‌ره‌ما ئێكلاكرنا پۆستێن حوكمه‌تا خۆجهى يا پارێزگه‌ها سلێمانيێ ئه‌ڤرۆ به‌رى نيڤرۆيا رۆژا پێنجشه‌مبى كۆمبوونا وه‌ڤدێ دانوستاندنكارێ گۆڕان و ئێكه‌تيێ ل گه‌ل ليستا خزمه‌ت “كۆمه‌ل و ئێكگرتوو” ل مه‌كۆيا سه‌ره‌كى يا بزاڤا گۆران ده‌سپێكر.

دكتور ئاسۆ مه‌حمود، ئه‌ندامێ وه‌ڤدێ دانوستاندكارێ بزاڤا گۆڕان بۆ سبه‌ى گۆت: “گۆڕانكارى يێ د جۆر و شێوازێن پۆستان دا هاتينه‌ كرن ب ره‌نگه‌كى، لايه‌نێن سياسى د رازى بن د پشكداريكرنا حوكمه‌تا خۆجهيا پارێزگه‌ها سلێمانيێ دا.

زێده‌تر گۆت: “دێ ل گه‌ل هه‌موو لايه‌نان كۆم بيت و د چه‌ند رۆژێن داهاتى دا، دێ به‌رسڤا دووماهيێ يا ناما لايه‌نێن دى ده‌ين”.

وه‌ڤدێ گۆڕان ژ عومه‌ر سه‌يد عه‌لى، جه‌لال جه‌وهه‌ر، دكتۆر ئاسۆ مه‌حمود، ئاسۆ ره‌حيم، د. ئاكۆ حه‌مه‌ كه‌ريم و وه‌ڤدێ ئێكه‌تيێ ژى ژ له‌تيف شێخ عومه‌ر و شوره‌ش ئيسماعيل و حاكم قادر پێكهاتينه‌.

وه‌ڤدێ ليستا خزمه‌تێ ژى پێكهاتينه‌ ژ محه‌مه‌د ئه‌حمه‌د و محه‌مه‌د حه‌كيم و رێبوار حه‌مه‌ و عومه‌ر محه‌مه‌د.

ئه‌ڤرۆ نيوز:

په‌رله‌مانێ كوردستانێ د روونشتنا ئه‌ڤرۆ دا ل باژێرێ هه‌له‌بچه‌ دێ پۆستێن ئيدارى يێن وێ پارێزگه‌هێ ئێكلاكه‌ت.

يوسف محه‌مه‌د، سه‌رۆكێ په‌رله‌مانێ كوردستانێ د گۆتاره‌كێ دا ل ده‌مێ ڤه‌كرنا روونشتنێ ئاماژه‌ ب وێ چه‌ندێ كر كو جارا ئێكێ يه‌ ده‌زگه‌هێن شه‌رعى يێن هه‌رێما كوردستانێ بڕيارێ ل سه‌ر ب پارێزگه‌هبوونا ده‌ڤه‌ره‌كێ دده‌ن.

بڕياره‌ ئه‌ڤرۆ د روونشتنه‌كا نه‌ئاسايا په‌رله‌مانێ كوردستانێ دا ده‌نگ ل سه‌ر پرۆژێ قانوونا ئيدارا پارێزگه‌ها هه‌له‌بچه‌ بده‌ن.

ئه‌ڤرۆ نيوز، نيوار محه‌مه‌د سه‌ليم:

بڕياره‌ پشتى ده‌مكێ كێم كۆمبوونا دويێ يا نه‌ئاسايى يا ڤى وه‌رزى ل ناڤ ئاڤاهيێ مۆنۆمێنتێ هه‌له‌بچا شه‌هيد بهێته‌ ئه‌نجام دان و دێ ل سه‌ر دو ته‌وه‌ران بيت كو ئێك ژ وان ل دۆر پرۆژێ قانوونا ئيدارا هه‌له‌بچه‌يه‌.

د ڤێ ده‌ربارێ دا، محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر ل په‌رله‌مانێ كوردستانێ بۆ ئه‌ڤرۆ نيوز گۆت: “بڕياره‌ ئه‌ڤرۆ رۆژا پێنجشه‌مبى ل هۆلا مونۆمێنتا ل ده‌مژمێر 11ى سپێدێ په‌رله‌مانێ كوردستانێ ل پارێزگه‌ها هه‌له‌بچه‌ كۆمبوونا خوه‌ يا نه‌ئاسايى يا دويێ ل ڤى وه‌رزى بگێرين”.

زێده‌تر گۆت: “دێ دانوستاندن ل سه‌ر پرۆژێ قانوونا ئيدارا پارێزگه‌ها هه‌له‌بچه‌ هێته‌ كرن كو پێشبينى دكه‌ين بهێته‌ په‌سه‌ندكرن، ژ به‌ر كو لايه‌نێن سياسى چو تێبينيێن مه‌زن ل سه‌ر نينن”.

ئاماژه‌ ب وێ چه‌ندێ ژى كر كو ب گۆره‌يى به‌رنامێ كارى دێ خواندنا ئێكێ بۆ پرۆژێ قانوونا هه‌لبژارتنا قايمقام رێڤه‌به‌رێن ناحيا بيت كو ب گۆره‌يى ڤى پرۆژه‌يى دێ رێڤه‌به‌رێن ناحيا و قايمقام ژ لايێ سه‌رۆكێ جڤاتا پارێزگه‌هان ڤه‌ هێنه‌ هه‌لبژاتن.

ب گۆره‌يى به‌رنامێ كارى كو ل مالپه‌رێ فه‌رمى يێ سه‌رۆكاتيا په‌رله‌مانى به‌لاڤ بوويه‌، دێ كۆمبوون يا ته‌رخانكرى بيت بۆ دانوستاندنێ ل دۆر پرۆژێ قانوونا ئيدارا پارێزگه‌ها هه‌له‌بچه‌ بيت كو روونشتنا نه‌ئاسايى يا حه‌فتيا بۆرى دا خواندنا ئێكێ بۆ هاتيه‌ كرن.

ديسا دێ خواندنا ئێكێ بۆ پرۆژێ قانوونا هه‌لبژارتنا قايمقام و رێڤه‌به‌رێن ناحيان ل هه‌رێما كوردستانا عيراقێ بيت.

تارق جه‌هه‌وه‌ر، شيره‌تكارێ راگه‌هاندنێ ل په‌رله‌مانێ كوردستانێ ئاماژه‌ ب ڤه‌گوهاستنا روونشتنێن په‌رله‌مانى كر و گۆت: “د ده‌مێ پێدڤى دا، دشيان دايه‌ په‌رله‌مان روونشتنێن خوه‌ ببه‌ته‌ ژ ده‌رڤه‌يى هۆلا په‌رله‌مانى و پێشتر حه‌فت جاران ئه‌ڤ كاره‌ كريه‌”.