ئه‌ڤرۆ نيوز:
ب گۆره‌يى به‌لاڤبوونا وێنه‌كى ل تۆرێن جڤاكى ديار دبيت كو ئێك ژ وان كه‌سێن پشكدارى د سه‌ربڕينا شه‌هيد هوجام سورچى دا كرى، هاتيه كوشتن.
هه‌ر چه‌نده چو لايه‌نێن فه‌رمى پشت راست نه‌ركريه، ب گۆره‌يى ڤى وێنه‌يى، يێ كو ل تۆرێن جڤاكى هاتيه به‌لاڤكرن ئه‌و كه‌سێ ل هنداف شه‌هيد هوجام راوه‌ستيايى هه‌ر ئه‌وه يێ د وى وێنه‌يى دا ب كوشتى هاتيه ديتن.
ئه‌ڤرۆ نيوز:
جێگرێ فه‌رماندێ گشتى يێ هێزێن چه‌كدارێ ل هه‌رێما كوردستانێ د ئاگه‌هداريه‌كێ دا، وێراى ده‌ستخۆشيێ ل هێزێن پێشمه‌رگه‌يى بۆ سه‌ركه‌فتنێن وان يێن به‌رده‌وام، داخوازێ ژ هه‌موو پێشمه‌رگه‌يى دكه‌ت كو گرێدايى رێنمايێن شه‌رى بن و ب چو ره‌نگان ژێ ده‌رنه‌كه‌ڤن و يێ گرێدايى وان رێنما نه‌بيت دێ ب دژوارى هێته سزادان.
ئه‌ڤه ژى ده‌قێ وێ ئاگه‌هداريێ يه:
ئاگادارییه‌ك له كۆسره‌ت ره‌سوڵ عه‌لی
جێگری فه‌رمانده‌ی گشتی هێزی پێشمه‌رگه‌ی كوردستانه‌وه
پێشمه‌رگه گیانله‌سه‌رده‌سته‌كانی كوردستان،پارێزه‌رانی خاك و نه‌ته‌وه، وێڕای دوباره ده‌ستخۆشیمان له‌و به‌رگریی و هه‌ڵمه‌ته قاره‌مانانه‌تان بۆ پاراستنی بست به بستی خاكی كوردستان له شه‌مشه‌مه كوێره‌كانی تاریكی و پارێزه‌رانی نه‌ریتی وه‌حیشگه‌ری تیرۆریستانی داعش، به‌ڵام له دوایین هێڕشی ئه‌وان و تێكشكاندنی له‌لایه‌ن ئێوه‌وه، له تۆڕه كۆمه‌ڵایه‌تیه‌كاندا دیارده‌یه‌كی نوێی قێزه‌ونی دور له كه‌لتورو نه‌ریت و ئاكاری كوردانه‌و كورده‌واری بڵاوبۆته‌وه، كه سه‌ربڕینی داعشێكه، به راستی ئه‌و كاره دژو پێچه‌وانه‌ی ئاكاری شۆڕشگێڕانه‌ی پێشمه‌رگه‌ی كوردستانه، به درێژایی ده‌یانساڵی به‌رگری و مقاوه‌مه‌تی ئه‌م گه‌له سته‌مدیده‌یه له‌پێناو مانه‌وه‌یدا، ئه‌وه یه‌كه‌مجاره له یاساو رێساو نه‌ریته‌كانی ئه‌م گه‌له جوامێره‌دا ئه‌و كاره رووبدات، به درێژایی مێژوی شوڕش و به‌ره‌نگارییه‌كانمان ئێمه یاساكانی جه‌نگمان پاراستوه‌و به گوێره‌ی بنه‌ماكانی كه‌لتورو ئاینه‌كانمان هه‌ڵسوكه‌وتمان له‌گه‌ڵ كوژراوه‌كانی دوژمنانمان كردوه‌و به گوێره‌ی یاسا په‌یڕه‌وكراوه نێوده‌وڵه‌تیه‌كانیش رێزمان له دیله‌كان گرتوه، هه‌رچه‌نده ئه‌وان دڕنده‌و بێبه‌زه‌یش بووبن.
پێشمه‌رگه قاره‌مانه‌كان: داعشی دوژمنی ئه‌مجاره‌مان، ده‌یانه‌وێت ئێمه له‌گه‌ڵ خۆیاندا یه‌كسان بكه‌ن له توندوتیژی، بۆیه پێویسته ئاگاداری ئه‌و نیه‌ت و مه‌رامه‌یان بن، ئێوه دیفاع له خاك و نه‌ته‌وه‌یه‌ك ده‌كه‌ن، ئێوه به ناوی مرۆڤایه‌تیه‌وه دژی دوژمنانی مرۆڤایه‌تی ده‌جه‌نگن، مرۆڤایه‌تیش ئه‌و كارانه ره‌تده‌كاته‌وه.
بۆیه ئاگادارتان ده‌كه‌مه‌وه له دوباره نه‌بونه‌وه‌ی ئه‌و كارانه‌و ئه‌وه‌شی له به‌رپرس و پله‌دارو پێشمه‌رگه‌ش ئه‌و كارانه ئه‌نجامبده‌ن، یان رێگه بده‌ن به ئه‌نجامدانی ئه‌و كارانه به تونتدرین شێوه سزا ده‌درێت.
بژین بۆ پاراستنی كوردو كوردستان…
كۆسره‌ت ره‌سوڵ عه‌لی
جێگری فه‌رمانده‌ی گشتی هێزی پێشمه‌رگه‌ی كوردستان
2-2-2015
ئه‌ڤرۆ نيوز:
د كۆنگره‌كێ رۆژنامه‌ڤانى دا، وه‌زيرێ ژ ده‌رڤه يێ نه‌مسا و فه‌لاح مسته‌فا، رێكخه‌رێ فه‌رمانگه‌ها په‌يوه‌نديێن ژ ده‌رڤه يا هه‌رێما كوردستانێ كۆنگره‌كێ رۆژنامه‌ڤانى ل هه‌ولێرا پايته‌خت گرێدا و تێدا نووترين پێشهاتێن سياسى و ئابوورىب به‌حسكرن.
ل ده‌سپێكێ فه‌لاح مسته‌فا به‌حس ل ناڤه‌رۆكا كۆمبوونێ كر و گۆت: “مه ل سه‌ر وان كۆمپانيان ئاخفت يێن نه‌مساوى كو گه‌له‌ك كۆمپانيێن نه‌مسا ل هه‌رێمێ هه‌نه و و ژ لايێ له‌شكرى ڤه مه پێدڤيێن خوه بۆ هه‌رێما كوردستانێ نيشان ده‌ين”.
ئاماژه ب وێ چه‌ندێ ژى كر كو نه‌مسا پشته‌ڤانى و پشتگيريا خوه بۆ ڤه‌كرنا نوونه‌راتيا ئێكه‌تيا ئۆرۆپا ل هه‌رێمێ دياركريه و گۆت: “دانوستاندن ل سه‌ر ڤه‌كرنا قونسلخانا خوه يا گشتى ل هه‌ولێر ژى كر”.
سه‌باستيان گورتيس وه‌زيرێ ژ ده‌رڤه يێ نه‌مسا سۆپاسيا حوكمه‌تا هه‌رێمێ كر بۆ وێ پێشوازيا گه‌رم يا لێكرى و گۆت: “كۆمارا نه‌مسا دێ قونسلخانا خوه يا فه‌خرى ل هه‌ولێر ڤه‌كه‌ت و دێ هێلا ئه‌سمانى ژى بۆ هه‌رێمێ ڤه‌كه‌ين و كۆبه‌نده‌كێ ئابوورى ژى ڤه‌كه‌ين”.
زێده‌تر گۆت: “كوردستان ل جهێ جيهانا ژ ده‌رڤه شه‌رێ دژى تيرۆرێ دكه‌ت، به‌لێ يا ب تنێ نينه و پشته‌ڤانيا هه‌وه دكه‌ين د وى شه‌رى دا ل ئێكه‌تيا ئه‌ورۆپا و ژ لايێ له‌شكرى ژى ڤه”.
ئاماژه ب سێ خالان ژى كر كو دڤيا به‌حس بكه‌ت و گۆت: “رێزێ ل وان پێشمه‌رگان دگرين يێن دژى داعش شه‌رى دكه‌ن و پيرۆزباهيا سه‌ركه‌فتنا هه‌وه دكه‌ين د وان شه‌ران دا، يا دويێ ژى دڤێت رێكه‌فتنه‌ك بۆ شه‌رێ داعش د ناڤبه‌را مه و هه‌وه دا هه‌بيت، يا سيێ ژى ئه‌وه ئه‌م دزانين هژمارا ئاواران يا زێده‌يه و ئه‌ركێن هه‌وه د گرانن و وه‌كو هاريكاريێن مرۆڤى ژى مه ميلۆنه‌ك و 250 هزار ل گه‌ل خوه ئيناينه و دێ بزاڤێ كه‌ين هاريكاريێن زێده‌تر ب هنێرين و سۆپاسيا هه‌وه دكه‌ين كو هه‌وه مه‌سيحى و ئێزدى و هه‌موو كێم نه‌ته‌وه پاراستينه”.
ئه‌ڤرۆ نيوز:
بڕياره ئه‌ڤرۆ هه‌ر پێنج پارتێن سه‌ره‌كى يێن هه‌رێما كوردستانێ كۆم ببن.
ژێده‌ره‌كى بۆ باسنيوز راگه‌هاند كومبوون دێ سه‌رۆكاتيا نێچيرڤان بارزانى، سه‌رۆكێ حوكمه‌تێ بيت و د هه‌مان ده‌مان ده‌م دا دێ نوونه‌رێ پارتى ديموكراتى كوردستان بيت و دو ئه‌ندامێن مه‌كته‌با سياسى يا پارتى دێ پشكدارى كۆمبوونێ بن و هه‌ر چار پارتێن دژى دێ ل سه‌ر ئاستێ بلند پشكدارى كۆمبوونێ بن.
ڤى ژێده‌رى گۆتژى: “مه‌ره‌م ژ كۆمبوونێ به‌حسكرنا په‌يوه‌نديێن ناڤبه‌را هه‌ولێر و به‌غدايه و رێكه‌فتنا په‌ترۆلێ ل گه‌ل به‌غدا و شه‌رێ پێشمه‌رگه‌يى به‌رامبه‌ر داعش و چه‌ند پرسێن دى كو دێ د كۆمبوونێ دا به‌حس لێ كه‌ن”.
دوهى سه‌رۆكێ حوكمه‌تا هه‌رێما كوردستانێ ل گه‌ل فراكسيۆنێن ناڤا په‌رله‌مانێ كوردستانێ كۆمبوو و راگه‌هاند كو ئه‌و دێ ل ڤان نێزيكان سه‌رپه‌رشتيا لژنه‌كێ كه‌ت و دێ چنه به‌غدا.
ئه‌ڤرۆ:
سەرۆکێ دەستەیا راوێژکاریا شەبەکان و ئەندامێ جڤاتا نوونەرێن عیراقێ سالم محەمەد جومعە بۆ ئەڤرۆ دیارکر کو فەوجا ئێکێ کوردێن شەبەک دوھی 2015.2.1 دەست ب مەشق و راھێنانێن سەربازی کرن، ھەروەسا گۆت دێ فەوجەکا دیتر ژی ل ڤان نێزیکان دەست ب راھینانان کەت بۆ ھندی دەڤەرێن خوە ب پارێزن.
سالم محەمەد جومعە گۆت ژی ھەموو فەوجێن دھێنە پێکئینان دێ سەر ب وەزارەتا پێشمەرگێ کوردستانێ ڤە بن و ل دووڤ بریار و رێنمایێن وەزارەتا پێشمەرگەی کار کەن، دیار ژی کر کو ئەڤ فەوجە یا پێکھاتیە ژ 650 کەسان، داخواز ژی ژ ھەموو گەنجێن شەبەک کر ب زووترین دەم خوە بگەھینە بارەگایێن مەشق و راھێنانێ بۆ ھندێ باش بھێنە مەشقدان دا کو پاراستنا دەڤەرێن خوە بکەن و ئاخا خوە ژ دەستێن دوژمنان قورتال بکەن.
ئەو ژی خۆیاکر کو حوکمەتا ھەرێمێ یا بزاڤێن مەزن دکەت بۆ پاراستنا ھەموو کێم نەتەوان ل عیراقێ و ب ھەموو شیانێن خوە پشتەڤانیا کوردێن شەبەک دکەت بۆ ھندێ گەنجێن شەبەک ژی بشێن پاراستنا دەڤەرێن خوە بکەن مل ب ملێ ھێزێن پێشمەرگێ کوردستانێ.
ئەڤرۆ:
رێڤەبەرێ کۆمپانیا گشتیا ئاھێن خوارنێ ل دھۆکێ بۆ رۆژناما ئەڤرۆ دیار کر کو پشتی ھەشت ھەیڤان ژ نەھاتنێ شەکر ھاتەڤە و دێ ل سەر وەلاتیان ھێتە بەلاڤکرن و گۆت “سالا بۆری ب بریارەکا پەرلەمانێ عیراقێ ئەو کەرستێن نەھاتی جھێ وی پارە ھاتیەدان”.
ئەحمەد تەھا رێڤەبەرێ کۆمپانیا گشتی یا ئاھێن خوارنێ ل پارێزگەھا دھۆکێ بۆ رۆژناما ئەڤرۆ گۆت “پێشتر کەرەستێن ژ ئاھێن خوارنێ نەھاتین پارە پێشڤە ھاتبوو دان و ھەتا نوکە ھندەک کەرستە ب دروستی نەگەھشتینە و بەحس ھەیە پارە پێشڤە بھێتە بەلاڤکرن و ھەتا نوکە چ تشتێ فەرمی نینە، وەک شەکر و برنج و شیرێ زارۆیان”.
ئەحمەد تاھا دیار کر ژی کو نوکە شەکر ھێدی ھێدی یا دگەھیتە عومبارێن ئاھێن خوارنێ ل پارێزگەھێ، لێ دێ گیرۆ بیت ھەتا ھەموو دگەھیت و دیسان برنج و زەیت ژی یێ دگەھن و گۆت “ژ نیسانا سالا بۆری ھەتا نوکە شەکر نەھاتیە، کو ھەیڤانە دو ھزار تەن و ٣٠٠ کیلۆیێن شەکرێ تێرا خەلکێ دھۆکێ ھەنە و ل گەل خەلکێ شنگال دبنە ٣ ھزار تەن و ھەر کەسەکی ٢ کیلۆ ژێرا دھێنەدان”.
ئەڤرۆ:
نوونەرێ وەلاتێن ئێکەتیا ئورۆپا ل تورکیا ل گەل ھەڤسەرۆکێ پارتیا دیموکراتی یا گەلان HDP کۆمبوونەک ساز کرن و د کۆمبوونێ دا نوونەرێن وەلاتێن ئێکەتیا ئورۆپا بۆ سەلاحەدین دەمیرتاشی دیار کرن کو ستراتیژیا ھەلبژارتنان یا HDP شاشە و دێ زیانەکا مەزن گەھینتە چارەکرنا پرسا کوردی ل تورکیا، چونکو ھەکە HDP وەک پارتی پشکداریێ د ھەلبژارتنان دا بکەت نەشێت بەندێ ١٠% یێ ھەلبژارتنان دەرباز بکەت و ھەکە نوونەرێن کورد ل پەرلەمانێ تورکیا دا نەبن دێ ئاستەنگیێن مەزن ل ھەمبەر چارەکرنا پرسا کوردی ل تورکیا دروست بیت و ژ بەر ڤێ یەکێ ژی دڤێت HDP دیسان وەک جارا بەرێ ب رێیا نوونەرێن سەربخوە پشکداریێ د ھەلبژارتنان دا بکەت.
نوونەرێن وەلاتێن ئێکەتیا ئورۆپا ھۆشداریا وێ یەکێ ژی داینە دەمیرتاشی کو ھەکە HDP نەشیا بچیتە پەرلەمانی دێ سەرکەڤتیێ وێ یەکێ ئاکپارتی بیت، چونکو وی دەمی دێ پارتیا دەستھەلاتدار بشێت پتر ژ سیە کورسیێن دیتر ژی بدەستڤە بینیت و وی دەمی دێ دستوورێ بنگەھین یێ تورکیا ژی ل گۆر دلێ ئاکپارتی ھێتە دروست کرن و ئەو یەک دێ زیانەکا مەزن گەھینتە تورکیا و چارەکرنا پرسا کوردی ژی.
ل ھەمبەر ڤێ یەکێ سەلاحەدین دەمیرتاشی ژی دیار کریە کو وان بریار داینە وەک پارتی پشکداریێ د ھەلبژارتنان دا بکەن و چەندین راپرسی ژی نیشا ددەن کو ئەو دێ بشێن بەندێ ١٠% یێ ھەلبژارتنان دەرباز بکەن، چونکو ھەتا ئەو وەک پارتی نەچنە پەرلەمانێ تورکیا ئەو نەشێن ب ھێزەکا مەزن سیاسەتێ ل تورکیا بکەن و پرسا کوردی ژی وەسا چارە نابیت و ھەکە HDP نەچیتە پەرلەمانێ تورکیا ژی پرۆسا سیاسی و چارەکرنا پرسا کوردی ل تورکیا دێ بەردەوام بیت.
ل ئالیێ دی ھندەک دەزگەھێن راگەھاندنێ ل تورکیا دیار دکەن کو رێککەڤتنەکا نھینی د ناڤبەرا HDP و AKP دا ھەیە و ھەکە دەنگێ پرانیا کوردان بۆ ئاکپارتی بچن ئەو دێ بشێن دستوورەکی نوو ل تورکیا دروست بکەن و ب رێیا وی دستووری ژی کورد دشێن ل تورکیا بگەھنە مافێن خوە، لێ پرانیا سیاسەتمەدار و کەسێن کورد دژبەریا وێ یەکێ دکەن و دبێژن ئەڤە دێ زیانەکا مەزن گەھینتە کوردان، چونکو چو نیەتا حوکمەتا تورکیا نینە کو بڤێت پرسا کوردی چارە بکەت.
ئەڤرۆ:
د دیدارەکێ دا بۆ رۆژناما ئەڤرۆ کو چەکدار ئەترووشی ئامادەکریە ئاماژە ب وێ چەندێ کریە کو پشتی وان ھێرشێن چەند رۆژێن بۆری یێن تیرۆرستێن داعشێ ل میحورێ کەرکووکێ و راگەھاندنا عەرەبی وەسا دیاری کر کو دوان ھێرشان دا ( حەشد ئەلشەعبی) پشکداریەکا کارا ھەبوویە د بەرسنگ گرتنا وان ھێرشان دا، بەرپرسێ میحوەرێ رۆژئاڤایێ کەرکووکێ و دوبز دیاردکەت کو چ بنەما بۆ ڤێ چەندێ نینن و پتریا وان داعشن.
کەمال کەرکووکێ بەرپرسێ میحوەرێ رۆژئاڤایێ کەرکووکێ و دوبز دیار دکەت کو ئەو دان پێدانێ ب چو ھێزان ناکەن پێشمەرگە نەبیت و گوت” ئەو داخۆیانی و گۆتنێن دھێنە کرن ژلایێ حوکمەتا عیراقێ ڤە کو دێ ھێزەکا پێنج ھزار کەسی رەوانەیی کەرکووکێ کەین، ئەم دان پێدانێ پێناکەین و بلا بشێن بەغدا کونترۆل بکەن پاشی د ھەوار کەرکووکێ بھێن”.
کەمال کەرکووکی ئاماژە ب وێ چەندێ کر کو پتریا حەشد ئەلشەعبی داعشن و گوت” داعش ھەبوونا حەشد ئەلشەعبی ب دەلیڤە زانی و کەسێن خوە ھنارتینە دناڤ دا و چەک پێ ھاتیە دان و مە سەربۆر ل گەل وان یێن ھەین و پتریا وان ب خوە داعشن دێ چەوا باوەریا خوە پێ ئینین”.
بەرپرسێ میحورەێ رۆژئاڤایێ کەرکووکێ و دوبز ئەو چەندە دیارکر کو د ھەموو ھێرشێن بۆری دا ب تنێ پێشمەرگەی شەھید داینە و گوت” ھەر ھێرشەکا ھاتبیتە سەر کەرکووکێ و دەورو بەرێن وێ ب تنێ پێشمەرگەیێ کوردستانێ بەرگری کریە و بەلگە ل سەر وێ چەندێ ب تنێ پێشمەرگەی شەھید و بریندار ھەنە و قوربانی داینە”.
ناڤھاتی رۆلێ ھێزین ئێمناھیێ ب بلندی دیارکر و گوت” ھێزێن ئێمناھیێ ل پارێزگەھا کەرکووکێ رۆلەکێ مەزن و کارا د ھەموو ھێرشێن تیرۆرستان دا ھەبوویە”.
کەمال کەرکووکی دیار دکەت کو ب چو رەنگان چو ھێز ناھێنە قەبوولکرن و گوت” ھەر ھێزەکا خوە دیار بکەت کو دێ ھێتە کەرکووکێ، ب چو رەنگان ژێ ناھێتە قەبوولکرن و یا رەتکریە، چونکو بۆ ھەموو لایەکی یا دیارە پێشمەرگە چ رۆل دگێریت بۆ بەرھەنگاربوونا تیرۆرێ”.
ئەو چەندە ئاشکەرا کر کو “ھێزێن پێشمەرگێ کورستانێ ب تنێ ل بن ئالایێ کوردستانێ شەری دکەن و چو ھێزەک نەبوویە بۆ پارتەکێ کربیت”.
ئه‌ڤرۆ نیوز:
نێچیرڤان بارزانى سه‌رۆكێ حكومه‌تا هه‌رێما كوردستانێ پێشوازیا سه‌باستیان كورز وه‌زیرێ ده‌رڤه‌یێ نه‌مسا كر، د دیداره‌كێ دا وه‌زیرێ ده‌رڤه‌یێ نه‌مسا ئاماژه ب سه‌ره‌دانا خوه كر و گۆت” ئه‌ز یێ هاتیم دا ژ نێزیك ئاگه‌هدارى ره‌وشا هه‌رێما كوردستانێ و پێشهاتێن شه‌رێ داعش و ره‌وشا عیراقێ و ده‌ڤه‌رێ ببم و ده‌ستخوشیێ ل هێزا پێشمه‌رگێ كوردستانێ دكه‌م بۆ وان سه‌ركه‌فتێن ل سه‌ر داعش توماركرین و نه‌مسا دێ د هه‌ڤكاریكرنا هه‌رێما كوردستانێ دا یا به‌رده‌وام بیت.
ئه‌ڤرۆ نیوز:
سیناتور كێلى ئاپۆت، ره‌خنه ژ سیاسه‌تا ئوباما گرتینه كو سیاسه‌ته‌كا بهێز ل شه‌رێ دژى داعش نینه و ب ڤێ چه‌ندێ ژى زیان ب ئه‌مریكا دگه‌هیتز
كێلى ئاپۆت دبێژیت: سیاسه‌تا سه‌رۆكێ ئه‌مریكا باراك ئوباما ل شه‌رێ دژى داعش نه یا بهێزه و ره‌خنه ژ ستراتیژیه‌تا ئه‌مریكا گرتن و ب زه‌نگه‌كا مه‌ترسیدار هژمارت.
نيشاندان