ئەڤرۆ:

دو پارچێن ئەردی یێن بەرفرەە ل بەرامبەر قوتابخانا سەردەم یا ئەھلی ل تاخێ ماسیکێ ل جادا برا ھەنە کو ئێک ژ وان دێ بیتە داینگەە بۆ زارۆیان و یا دی ل گۆرەی گۆتنێن ئەو خانیێن ل بەرامبەر وێ پارچە ئەردی ل دەستپێکێ گۆت بوو دێ بیتە باخچەیێ زارۆیان، بەلێ نھا ئەو پارچە ئەردێ مەزن دایە ھندەک کەسان وەکو قەرەبوو و دێ بیتە شووقە و جھێن بازرگانی. باژێرڤانیا دھۆکێ ژی ڤان گلەیان رەت دکەت و دیار دکەت کو ئەو پارچە ئەرد ھەر ل دەستپێکێ ب تنێ خزمەتگۆزاری بوو و چو تشتێ دی د نەخشێ وێ دا نەھاتبوو نەخشەکرن.

جەعفەر عەلی سەعدوللا، ئێک ژ سەرۆک خێزانێن بەرامبەر وێ پارچە ئەردێ ل جادا برا یا تاخێ ماسیکا٢ بۆ رۆژناما ئەڤرۆ دیار کر، دەمێ وان د وەختی دا پارچە ئەردەک ل وی جھی بۆ خوە کری و ئاڤاکری، ئەو ھوسا ھاتبوونە ئاگەھدارکرن کو ئەو ھەردو پارچە ئەردێن ل بەرامبەر مالا وان ئێک دێ بیتە داینگەە بۆ ساڤایان و یا دی دێ بیتە باخچە بۆ زارۆیان، ژ بەر ھندێ وان پارچە ئەردێن خوە دوقات گرانتر کرینە و ب بھایەکێ مەزن ل سەر وان راوەستیاینە و گۆت: ئەم نێزیکی حەفت مالان ل بەرامبەر وان پارچە ئەردان دژین و نھا دوور نینە ب ڤێ بریارا نوو غەدر ل مە بھێتە کرن.
ناڤبری دیار کر، پشتی بوورینا چەند سالان و نە ئاڤاکرنا وێ پارچە ئەردی، ژ نوو مە زانی باژێرڤانیا دھۆکێ ئەو پارچە ئەردێ مەزن یێ دایە ھندەک کەسان وەکو قەرەبوو و چو باخچە ل سەر وێ پارچە ئەردێ ناھێنە ئاڤاکرن و گۆت: ئەڤ پارچە ئەردە دێ بیتە شووقە و جھێن بازرگانی و غەدرەکا مەزن دێ ل مە ھەر حەفت مالان ھێتە کرن.
جەعفەر ئاماژە دا وێ چەندێ، ل ھنداڤی جادا مە دێ بنە ئاڤاھی و شووقە و جادا مە ب تنێ یا ١٠ مەتری یە، رەنگە دۆرێن ٤٠ خێزانان تێدا بژین، ئەرێ یا رەوایە نێزیکی ٤٠ خێزانان ل سەر جادەکا بچووک یا ١٠ مەتری بژین، ل لایێ دی ژی یێ جادێ رەنگە ببنە جھێن بازرگانی و ئاڤاھیێن مەزن و خانیێن مە دێ د ناڤبەرا وان ئاڤاھی و شووقان دا بەرزەبن و گۆت: مە بەلگە ل بەر دەست ھەنە کو ل دەستپێکێ ئەڤ پارچە ئەردە دا بیتە باخچێ زارۆیان و نە جھێن بازرگانی و شووقە و ئاڤاھی.
ئەندازیار ئلیاس سادق عەبدوللا، بەرپرسێ نەخشێن بنیاتی ل سەرۆکاتیا باژێرڤانیا دھۆکێ بۆ ئەڤرۆ دیار کر، ئەو پارچا ئەردا وەلاتی گازندا ژێ دکەن د رەگەز و رەسەناتیا نەخشەی دا خزمەتگۆزاریە و ھاتبوو پەسەندکرن و ھەر ل دەستپێکێ ھاتبوو تەرخانکرن بۆ قەرەبووکرنا وەلاتیان، بەلێ نەھاتبوو دابەشکرن و بەلاڤکرن و نەھاتبوو ئاڤاکرن و گۆت: ئەڤ پارچە ئەردە دێ بیتە نێزیکی پێنچ پارچە ئەردان.
بەرپرسێ نەخشێن بنیاتی ل سەرۆکاتیا باژێرڤانیا دھۆکێ خویاژی کر کو ئەو پارچە ئەردێ د سەر وێ دا ئانکو ئەوێ ل بەرامبەر قوتابخانا سەردەمی دێ بیتە داینگەە و پارچەک ژێ دێ بیتە قەرەبوو و گۆت: گازندا ھندێ کو پارچە ئەرد ژ کەسکاتیێ یان ژ خزمەتگۆزاریێ بھێتە ڤەگوھاستن بۆ قەرەبوویێ یان تشتەکێ دی گەلەک ژ لایێ خەلکێ دھۆکێ ڤە دھێتە کرن و پشتی دووڤچوونێ ھوسا ئاشکرا نابیت.
ئەندازیار ئلیاس سادق ئاماژە دا وێ چەندێ کو نە ھەر پارچەکا ئەردی نەھاتبیتە ئاڤاکرن پشتی چەند سالان خەلک دێ بێژیت ئەڤە باخچەیە، بەلکو رەنگە خودانی نەڤیایە بۆ خوە ئاڤابکەت و گۆت ژی: ل گۆرەی قانوونێ گوھۆرینا رەگەزێ ئەردەکێ کەسکاتی باژێرڤانیێ شیان نینن بکەت و ب چو رەنگان ناھێتە گوھۆرین، ب تنێ ب رێیەکێ نەبیت کو ئەو جھە پێدڤی ب خواندنگەھێ یان جھەکێ خزمەتگۆزاری بیت بۆ بەرژەوەندا گشتی نەکو یا کەسوکی.

ئه‌ڤ راپۆرته‌ ئەمیر ئەترووشی بۆ رۆژناما ئه‌ڤرۆ ئاماده‌كريه‌.

ئەڤرۆ:

شارەزایەکێ لەشکەری، دھەڤدیتنەکێ دا ل گەل رۆژناما ئەڤرۆ بەحسێ رۆلێ پێشمەرگێ کوردستانێ دشەرێ دژی تیرۆرستێن داعشێ دا دکەت و خوەیا دکەت کو دبیت د پاشەرۆژێ دا پێشمەرگە پشکداریێ د ئۆپەراسیۆنێن نێڤدەولەتی دا بکەت.
مەسعود سالح شارەزایێ لەشکری بۆ رۆژناما ئەڤرۆ دیارکر کو پێشمەرگە دپێشڤەچوونەکا باش دایە و شیایە پشتەڤانیەکا نێڤدەولەتی بۆ خوە پەیدا بکەت و سەرکەفتنێن باش بدەستڤەبینت، چونکی شیا ل میحوەرێ (سکرێ مووسلێ بۆ ناڤ مووسلێ و گوێر و مەخموور و میحوەرێ زومار بۆ چیایێ شنگالێ) سەرکەفتنێن باش بدەستڤەبینت و رێیێن سەرەکی ل داعش بگریت وەکو (چاریانا زومار- تلەعفەر و چاریانا وانکێ بۆ تلەعفەر) ئەڤە خالەکا گرنگە کو رێیێن پالپشتیێ ل داعش ھاتینە گرتن، پێشمەرگەی شیا خوە ب سەپینیت کو تاکە ھێزە ل سەر ئەردی شیای شەرێ داعش بکەت و ئەڤە بووچونا شارەزایێن بیانی ژی یە.
مەسعود سالحی زێدەتر گوت” ھەکە ھەردو پارتێن دەستھەلادار ل ھەرێما کوردستانێ ب زووترین دەم پێشمەرگە رێکخست، دێ چەکێ پێشکەفتی کەفتە دەستێ پێشمەرگەی و دێ پشکداری ئۆپەراسیۆنێن نێڤدەولەتی ژی بیت”.
ھەمبەر ئازادکرنا مووسلێ، شارەزایێ لەشکەری گۆت” ئازادکرنا مووسلێ پێدڤی ب سێ ھزار سەربازایە و دڤێت پێشمەرگە ھێزەکا سەرەکی بیت و دەڤەرێن پێشمەرگە دەوروبەرێن مووسلێ رزگار بکەت، ھەتاکو داعش ل سەنتەرێ مووسلێ دھێتە لاوازکرن و دبیتە فشارەکا کاریگەر ل سەر مووسل کو زوترین دەم بھێتـە ئازادکرن، دیسان نوکە داعش وەکو لەشکر ھاتیە ژناڤبرن، چونکە یا کەفتیە بەر لێدان و دربێن لەشکەری یێن گران ل سەر دەستێ پێشمەرگەی، ئەڤە ژی بۆ ئارامیا وان میحوەرانە ئەوێن پێشمەرگەی سەنگەر تێدا داناین، پێشمەرگە شیایە ھێلەکا ئاگری ژ (چیایێ شنگالێ ھەتا ناڤ شنگالێ بۆ زومارێ و رەبیعە و وانکێ و گوێر و مەخموور و ھەتا خانەقین و جەلەلاو و مەندەلی( چێکەت و شیا بدەست خوە ڤەبینیت و ھەر دەمێ دڤێت دشێت بنگەھێن داعشێ دناڤ مووسلێ دا توبباران بکەت بۆ ھەر ھێزەکا بچیتە مووسلێ”.
ناڤبری، ئازادکرنا مووسلێ ب دو رێیان دازانین و گۆت” پێدڤیە ھێرشێن ئەسمانی ل سەر بنگەھێن داعشێ دناڤ سەنتەرێ مووسلێ دا بھێنەکرن بۆ ژناڤبرنا عومبارێن چەکی، دیسان رێیێن پالپشتیێ ب توبخانا پێشمەرگەی بھێنە ژناڤبرن، یا دی رێیا ئەردی پێشمەرگە ل گەل لەشکەرێ عیراقێ، ب دیتنا من داعش دێ پرێن مووسلێ ژناڤ بەت دا پێشمەرگە نەگەھیتە لایێ راستێ یێ مووسلێ”.
ھەمبەر سلامەتیا پێشمەرگەی دشەرێ مووسلێ دا ژی، شارەزایێ لەشکری گۆت” پێدڤیە پێشمەرگە پتر بزاڤان بکەت و پتر پشت بەستنێ ل سەر چەکێ پالپشت بیت ئانکو(توبخانە) و جھێن داعش توبباران بکەت و ھەتا ئەو نەھێنە ژناڤبرن، ھێرش نەھێتە دەسپێکرن، دیسا چەکدارێن ھوزێن عەرەبێن سوننە بکەڤنە بەراھیا پێشمەرگەی، چونکە ئەوان شارەزایی یا د دەڤەرێ دا ھەی و دڤێت پێشمەرگە پشت بەستنێ ل سەر ھێرشێن ئەسمانی ب تنێ نەکەت، چونکی داعشێ تەکتیکا خوە یا گوھۆری”.
ل دۆر کۆبانێ گۆت” ئازادکرنا کۆبانێ ب تەمامی مورالا پێشمەرگەی ل باشوورێ کوردستانێ بلندکریە و ھۆکارە پتر پێشڤەبچیت، ئازادکرنا کۆبانێ ب چەکێ قورسێ پێشمەرگەی بوویە و ھەر ب وی چەکی ھەتا(٤٠٠) گوندێن دەوروبەرێن کۆبانێ دێ ھێنە ئازادکرن.”
ل دووڤ بوچوونا ڤی شارەزایێ لەشکری” پشتی ھەموو دەڤەر ب تەمامی دھێنە ئازادکرن قۆناغا ئاڤاکرنێ دێ دەستپێکەت، دبینم دێ رەوش بەر ب ئارامیێ و باشبوونێ ڤە چیت و دبیت پرۆژەک ھەبیت بۆ دەشتا نەینەوا، لێ ئایا شنگال دێ کەڤیتە دچارچۆڤێ پرۆژەی دا، یان نە؟ دبیت دەشتا نەینەوا ببیتە ھەرێمەکا تایبەت”.
خۆیاکر ژی” نوکە ٩٥% ژ دەڤەرێن کوردستانی یێن دەرڤەی ئیدارا ھەرێمێ ھاتینە ئازادکرن و کونترۆلکرن و بتنێ شنگال پیچەک مایە و چەند داعش ل تلەعفەرێ بەر ب لاوازبوونێ ڤە بچن، دێ شنگال زووتر ھێتە کونترۆلکرن و دبینم ھەتا (٤٠) رۆژێن دی ب تەمامی دێ ھێتە ئازاکرن.
ھەمبەر پاراستنا سنۆرێن کوردستانێ ل پاشەرۆژێ، گۆت” پێدڤیە پێشمەرگە باش بھێتە مەشقکرن و ھێزەکا یەدەک ھەبیت و سەنگەرێن بەردەوام ژی بدانیت”.