ئەڤرۆ نیوز، زنار توڤی:
عەبدولعەزیز محەمەد تاھر رێڤەبەرێ ھوبا چاندنێ ل کانی ماسێ بۆ ئەڤرۆ نیوز راگەھاند: د ٢٤ دەمژمێرێن بوری دا پێلەکا بەفرێ دەڤەرا کانی ماسێ ڤەگرت و د ئەنجامدا چار سەنتیمێن بەفرێ ل سەنتەرێ ناحیا کانی ماسێ بارین و سەقایێ دەڤەرێ گەلەک ساربوو یە.
ھەروەسا گۆتژی: “ل دەڤەرێن چیایی و خالا گومرکا سەر زێری پتر ژڤێ رێژێ باریە”، دا زانين ژى كو سەرجەمێ گشتی یێ بارانێ د ئەڤ سالەدا گەھشتیە 538 ملیمان ل كانى ماسێ.
ئەڤرۆ نیوز:
دەزگەھێ ڤەکۆلینێ بۆ جینۆساید و ئەنفالان ل ھەرێما کوردستانێ د بەیاننامەکێ دا دیار دکەت کو 17 گۆرین ب کۆم ل شنگالێ ھاتینە دیتن و داخواز دکەت وەلاتی دەست نەدەنە وان گۆرێن ب کۆم.
دەزگەھێ ڤەکۆلینێ بۆ جینۆساید و ئەنفالان ھەروەسا جھێ وان گۆران دیار دکەت کو ئێک ل پێش مالا دەخیل عیسایە، ئێکی ژی ل پێش مالا بەشار خەشمان و ئاوس مستویە، گۆرەک ژی ل نێزیک مالا تابووریە، گۆرەکی ل بەراھیا مالا سەعید کالویی یە و ئێک ژێ ل باغچێ دارستانا سلێمان ئامانە ل رۆژھەلاتی، گۆرەک ژی د ناڤ باغچەی دا یە، گۆرەک ل باغچێ عەتویە و ئێک ژی ل یێ کالو عەلی ئامانە، گۆرەک ژی ل قوتابخانا کوجو یا عەرەبی یە و ئیک ژی ل باغچێ عەباس قاسمە و ئێک ژی ل تەنشت گۆندێ بسکی یە، گۆرەک ل دولا موراد بەسێ یە، گۆرەکێ ب کۆم یێ زارۆیان ل سەر تەلە و ئیک ژی د ناڤ باغچێ دواناڤنجیا کوجویە.
د بەیاننامێ دا داخوزا ژی کریە کو ئەڤ گۆرێن ب کۆم بھێنە پاراستن ھەتا لژنە کارێ خوە ل سەر دکەن و پلانەکا باش بۆ پاراستنا وان دھێتە دانان.
قائیمقامێ قەزا شنگالێ میەسەر حەجی بۆ ئەڤرۆ گۆت ئەم دخوازین دەمێ وەلاتی گۆرەکێ ب کۆم دبینن خوە ژێ دوور بکەن و نە کۆلن ھەتا لایەنێن شولەژێ کاری ل سەر دکەن، داکو ھەموو گۆر ببنە بەلگەنامە بۆ لژنا جینۆساید ناساندنا کارەساتا شنگالێ، ئەو ژی دیارکر کو رەنگە گەلەک گۆرێن ب کۆم بھێنە دیتن چونکو گەلەک وەلاتی ھەتا نوکە دبێ سەروشوونن و چارەنڤیسێ وان نەیێ دیارە.
ئه‌ڤرۆ نبوز:
رێڤەبەرێ ناحیا سنوونێ دیار کر کو ل کۆمەلگەھا خانەسۆرێ یا سەر ب ناحیا سنوونێ ڤە پێنج دانعەمرێن کوردێن ئێزدی ب ساخی د ناڤ مالەکێ دا ھاتنە دیتن و ژیێ وان سەر ٧٠ سالیێ دایە کو تیرۆرستان گەلەک دانعەمرێن ئێزدیان ئەوێن نەشیان خوە قورتال بکەن کوشتینە.
نایف سەیدو رێڤەبەرێ ناحیا سنوونێ بۆ ئەڤرۆ گۆت “زێدەتر ژ چار ھەیڤان پێنج دانعەمر کو دو ژ وانا زەلامن و سێ ژی ژنن ل خانەسۆرێ د ناڤ خانیەکی دا ھاتینە حجزکرن وەسا دیارە تیرۆرستان رەڤاندینە، لێ نە کوشتینە و د وی خانی دا ئاسێ کرینە داکو ژ برسا و تێھنا دا بمرن، لێ وان یا خوە ب خودانکری ب ھەر حالێ ھەبیت ژیانا خوە یا ب رێڤەبری ھەتا کو ھێزێن پێشمەرگێ کوردستانێ کونترۆل ل سەر خانەسۆرێ کر و پاشی ھەر پێنج دانعەمران شیان خوە دیار بکەن و نوکە ب سلامەتن و دێ ھێنە رەوانەکرن بۆ نەخۆشخانێ داکو پشکنینێن پێدڤی بۆ بھێنە ئەنجامدان بۆ پشتراستبوونێ ژ ساخلەمیا وان”.
نایف سەیدو گۆت ژی “ل سەرانسەری ناحیا سنوونێ پێشمەرگێن ئێزدی و ھێزێن پێشمەرگەی زۆر ھاتینە بەلاڤکرن و نوکە رەوش زۆرا ئارامە و چ دەنگێ تەقەیان ناھێتە بھیستن، ب ئاوایەکی ل شەڤا بۆری گەلەک وەلاتی ل ناڤ مالێن خوە نڤستبوون ل خانەسۆری و دوکرێ و گەلەک گوند و دەڤەرێن دی، ئەڤجا ئەم داخوازێ دکەین وەلاتی لەزێ نەکەن بۆ ناڤ مالێن خوە ھەتا کو تیمێن ئەندازیاری کارێ خوە ئەنجام بدەن و بۆمبێن تیرۆرستان رادکەن”.
ئه‌ڤرۆ نیۆز:
پشتى ب بڕیاره‌كا ئه‌نجومه‌نى وه‌زیران، به‌رى چه‌ند سالان، به‌لاڤكرنا پارچێن ئه‌ردى ل سه‌ر فه‌رمانبه‌ران هاتیه راگرتن، وه‌زیرا باژێرڤانیان راگه‌هاند كو حوكمه‌ت د بزاڤا دیتنا شوینگره‌كێ دایه كو قه‌یرانا ئاكنجیبوونێ كێم ببیت.
نه‌وروز مه‌ولود وه‌زیرا باژێرڤانی و گه‌شت و گوزارێ ل حكومه‌تا هه‌رێما كوردستانێ دیاركر كو حوكمه‌تا هه‌رێمێ خوه به‌رهه‌ڤكریه بۆ شوینگرێ به‌لاڤنه‌كرنا پارچێن ئه‌ردى په‌یدا بكه‌ت كو ئه‌وژى دروستكرنا ده‌سته‌یا ئاكنجیبوونێ یه كو پرۆژه قانوونه‌ك ب ناڤێ ده‌سته‌یا ئاكنجیبوونێ هاتیه به‌رهه‌ڤكرن و به‌حسێ دابینكرنا پارچێن ئه‌ردى و دروستكرنا شوقان هاتیه كرن كو ب وێ مه‌ره‌مێ قه‌یرانا ئاكنجیبوونێ بهێته چاره‌كرن و گۆت ( بۆ پرسا دابینكرنا ئه‌ردى، ئه‌م ل گه‌ل وه‌زاره‌تا چاندنێ ژى ئاخفتى نه).
ئه‌ڤرۆ نيوز، ناجی به‌ده‌ل:
قادر عیدو چاڤدێرێ سیاسی بو ئه‌ڤرۆ نیوز راگه‌هاند: دڤێت هه‌موو پارتین سیاسی ل شنگال ل گه‌ل ده‌زگه‌هێن سازیێن حكومی ب هشیاری كار بكه‌ن هه‌ر كیماسیه‌كا په‌یدا بیت دێ بیته ئه‌گه‌رێ خوین رێتنێ ژ ئه‌نجامێ كارڤه‌دانێن ئه‌وێ ده‌رده‌ریا هاتیه سه‌رێ كوردێن ئیزدی و ب ده‌ستێن ئه‌و عه‌ره‌بێن ل وێ ده‌ڤه‌ری دژین.
ناڤبری ئه‌و چه‌نده ژی دیاركر دڤێت حكومه‌ت له‌زێ نه‌كه‌ت ل ڤه‌گه‌راندنا وه‌لاتیێن شنگال هه‌تا زه‌مینه بهێته خوشكرن بو ئه‌وان ب شین وه‌ك جاران د ره‌وشه‌كا ئارام و ته‌نا دا بژین.
قادر عیدو ئه‌و چه‌نده ژی دیاركر د نها دا خولێن ره‌وشه‌نبیریێ بو كه‌سێن كه‌مپان ب هێنه ڤه‌كرن دا كو ته‌قه‌بلا پێكڤه ژیانێ بكه‌ن ل گه‌ل ئه‌وان عه‌ره‌بێن ده‌ستێن وان ب خوینێ نه سور و دلسوزی و خه‌موخوریێ بو ئاریشه‌یان بهێته‌كرن.
ناڤبری ئه‌و چه‌نده ژی دازانین كو چه‌ندین كه‌س توشی نه‌خوشی و گریێن ده‌رۆنی بوینه چاره بو بهێته‌كرن و هژمارا قورابانیان بهێته هژمارتن و هه‌مویان ب شه‌هید ل قه‌له‌م بده‌ن و ب فعلی یا شه‌رڤانێن ئیزدی وه‌ك پێشمه‌رگه سه‌ره‌ده‌ری ل گه‌ل هبێته‌كرن .
ئه‌ڤرۆ نيوز، ناجی به‌ده‌ل:
د. ئاری عارف عه‌بدولعه‌زیز ماموستایێ زانستێن سیاسی ل زانكۆیا دهۆكێ بۆ ئه‌ڤرۆ نیوز راگه‌هاند: ده‌رگه‌هـ ڤه‌كرنا شه‌رێ كوردان ل گه‌ل داعش ب ده‌ستێ خوه قه‌برێ خوه بۆ خو ه‌كولا و ئه‌و ئیرادا پێشمه‌رگه‌يی هه‌يی، ل ده‌مه‌كێ زورێ كێم دا شیا ب سه‌دان كیلومه‌تران ل ده‌ڤه‌را شنگال رزگار بكه‌ت.
د. ئاری ئه‌و چه‌نده ژی دیاركر كو سه‌ركه‌فتنێن پێشمه‌رگه‌يی ڤه لڤینه‌ك خسته د گیانێ لایه‌نێن دی یێن عیراقێ كو ئه‌و ژی وه‌كو پێشمه‌رگه‌يی بكه‌ن و ده‌ست ب ئازادكرنا باژێرێ مووسل، لێ نه‌شێن و نه د شیانێن وان ژی دایه ب تنێ بشێن تشته‌كی بكه‌ن چونكو ئه‌و ئیرادا پێشمه‌رگه‌يی هه‌يی هێزا عیراقێ ئه‌و ئیراده نینه.
ناڤبری ئه‌و چه‌نده ژی دیاركر كو سه‌ركه‌فتنێن شنگال گه‌رماتیه‌ك بۆ لایه‌نێن دی ژی چێبوویه، به‌رهه‌ڤیان دكه‌ن بۆ شه‌ری داعش دا كو جهێ تبلێن وان ژی د ژناڤبرنا داعش دا هه‌بیت هاريكاره‌كێ بهێزێ ده‌روونی و له‌شكریى ژى بۆ هێزێن عیراقێ و داعش ئه‌و هێز نینه كو به‌ریا نها هزر بۆ دهاته كرن و ئه‌و ترسا بۆ دهاته كرن نها نه‌مایه.
ئه‌ڤرۆ نيوز:
بڕياره ئه‌ڤرۆ رۆژا دوشه‌مبى حه‌يده‌ر عه‌بادى، سه‌رۆك وه‌زيرێن عيراقێ سه‌ره‌دانا هه‌ه‌ولێر بكه‌ت و ل گه‌ل مه‌سعود بارزانى، سه‌رۆكێ هه‌رێما كوردستانێ كۆم ببيت.
ژێده‌ره‌كى ژ جڤاتا وه‌زيران راگه‌هاند: بڕياره ئه‌ڤرۆ ده‌مژمێر چارى ئێڤارى حه‌يده‌ر عه‌بادى، سه‌رۆك وه‌زيرێن عيراقێ، بگه‌هيته هه‌رێما كوردستانێ و دێ ژ لايێ نێچيرڤان بارزان سه‌رۆكێ حوكمه‌تێ ڤه هتێه پێشوازيكرن.
هه‌ر ب گۆره‌يى ڤى ژێده‌رێ خه‌ندان، پشتى ده‌مژمێر پێنجى ئێڤارى سه‌رۆك وه‌زيرێن عيراقێ دێ ل گه‌ل مه‌سعود بارزانى سه‌رۆكێ هه‌رێما كوردستانێ كۆم بيت و ب گۆره‌يى زانياريان دبيت ل دۆر په‌يوه‌نديێن ناڤبه‌را هه‌رێم و به‌غدا و سه‌ركه‌فتن و پێشڤه‌چوونێن پێشمه‌رگه‌يى بهێنه به‌حسكرن.
بڕياره رۆژا پێنجشه‌مبى ژى سه‌رۆك وه‌زيرێن عيراقێ حه‌يده‌ر عه‌بادى سه‌ره‌دانا وه‌لاتێ توركيا بكه‌ت و ل گه‌ل به‌رپرسێن وى وه‌لاتى كۆم ببيت.
ئەڤرۆ نیوز، ھەیفا دۆسکی:
شڤێدی دەمژمێر 10:30 ژنەک ب ناڤێ (و. خ. خ) د ژیێ 25 ساليێ دا ژ ئەگەرێ قوتانەکا دژوار ل کۆمەلگەھا مسێریکێ ب دەستێ ھەڤژینێ خوه هاته كوشتن.
ئاسيا يا دوتماما ڤێ ژنێ بۆ ئەڤرۆ نيوز گۆت: “ئەڤ زەلامێ نیاسیارێ مە ژ ئالیێ سەرەدەریێ ڤە نەیێ دروستە و رۆژانە ھەڤژینا خوه د ئێشاند، لەورا ژی وێ ژنا گیانێ خوە ژ دەست دایی گەلەک جاران کێشا خوە گەھاندیە خێزانێن خوە، بەلێ کەسێ بۆ چ نەکریە و د گۆتێ نابیت داخازا ژێکڤەبوونێ ژێ بکەيی ب به‌هانه‌يا وێ چه‌ندێ كو شەرمە”.
زێده‌تر گۆت: “ناڤبرى شڤێدی ھندی یا ھاتیە قوتان د دەستێن ھەڤژینێ خوە دا گیانێ خوە ژ دەست دا، زەلام ژی یێ ھاتیە دەستەسەکرن و دانپێدان کریە کو ھەڤژینا خوە ب قوتاتێ کۆشتیە”.
ئه‌ڤرۆ نيوز، نيوار محه‌مه‌د سه‌ليم:
ب گۆره‌يى به‌لاڤكريه‌كا په‌رله‌مانێ كوردستانێ بڕياره، په‌رله‌مان سوبه‌هى سپێدێ روونشتنا خوه يا 18 ل خولا ئێكێ يا ئه‌ڤ ساله بگێريت و وێرايى به‌رده‌وامى دان ب دانوستاندنێ ل سه‌ر ره‌وشا چاندنێ ل هه‌رێما كوردستانێ ب ئاماده‌بوونا وه‌زيرێ چاندنێ دێ خواندنا ئێكێ بۆ چه‌ند پرۆژه قانوونان هێته كرن.
ب گۆره‌يى ڤێ به‌لاڤكريا په‌رله‌مانێ كوردستانێ بڕياره خواندنا ئێكێ بۆ حه‌فت پرۆژێن قانوونا بهێته كرن كو پێكهاتينه ژ هه‌ر ئێك ژ پرۆژێ قانوونا راستڤه‌كرنا ئێكێ يا قانوونا هژماره دو يا سالا 2013 يا زانكۆيێن تايبه‌ت ل هه‌رێما كوردستانێ- عيراق و پرۆژێ قانوونا پشتراستيا جڤاكى ل هه‌رێما كوردستانێ- عيراق و پرۆژێ قانوونا ئازاكرنا پێشمه‌رگه و هێزێن ناڤخۆ و ئاسايشێ ژ سولفا هه‌ڤژينيێ و ئاڤاهيان.
ديسا پرۆژێ بڕيارا ئازاكرنا شه‌هيد و پێشمه‌رگه و هێزێن ناڤخۆ ژ پێشينه‌يا ئاڤاهيان و هه‌ڤژينيێ و پرۆژێ بڕيارا هێلانا ب تنێ ئێك مووچه بۆ ئه‌وێن زێده‌تر ژ ئێك مووچه‌يى وه‌ردگرن و پرۆژێ بڕيارا پاراستنا سه‌روه‌ريا كوردستانێ- عيراق.
هه‌ر ب گۆره‌يى ڤێ به‌لاڤوكا په‌رله‌مانێ كوردستانێ دێ ته‌وه‌رێ سيێ ژى ژ كۆمبوونا سوبه‌هى يا په‌رله‌مانێ كوردستانێ يا تايبه‌ت بيت ب دانوستاندنا ل سه‌ر ره‌وشا كاره‌بێ ب ئاماده‌بوونا وه‌زيرێ كاره‌بێ.
ته‌وه‌رێ چارێ و دووماهيێ ژى دێ يێ تايبه‌ت بيت ب دانوستاندنا ل سه‌ر پرۆژێ قانوونا راستڤه‌كريا ئێكێ يا وه‌زاره‌تا خواندنا بلند و ڤه‌كۆلينێن زانستى يا هژماره 10 يا سالا 2008 ب گۆره‌يى مادێن 72 و 74 و 75 ژ په‌يره‌وێ ناڤخۆ يێ په‌رله‌مانێ كوردستانێ يێ هژماره ئێكێ راستڤه‌كريێ سالا 1992ێ.
ئه‌ڤرۆ نيوز:
رێڤه‌به‌ريا پۆليسێن پارێزگه‌ها دهۆكێ راگه‌هاند كو دو دزيكه‌رێن ترۆمبێلان ل ناحيا قه‌سرۆكێ هاتنه ده‌سته‌سه‌ركرن و دێ بۆ دادگه‌هێ هێنه ره‌وانه‌كرن.
نه‌قيبێ مافپه‌روه‌ر هێمن سلێمان، به‌رپرسێ راگه‌هاندنا پۆليسێن پارێزگه‌ها دهۆكێ راگه‌هاند: “پشتى دو كه‌س رابووين ب دزينا ترۆمبێله‌كا پيك ئاپ دێر ره‌نگێ سپى ژ كۆمه‌لگه‌ها دێره‌لۆكێ و بريه ناحيا قه‌سرۆكێ سه‌ر ب ناحيا شێخان ڤه، ده‌ملده‌ست پۆليسێن مه ل ناحيا قه‌سرۆكێ يێن رابووين ب ده‌سته‌سه‌ركرنا ڤان هه‌ردو تاوانباران”.
گۆتژى: “ئه‌ڤ هه‌ردو كه‌سه خه‌لكێ دێره‌لۆكێ نه و ل ده‌مێ ده‌سته‌سه‌ركرن دان ب تاوانا خوه كريه و دوزا وان بۆ دادگه‌ها ڤه‌كۆلينێ ل ناحيا دێره‌لۆكێ هاتيه ره‌وانه‌كرن”.
نيشاندان