ئه‌ڤرۆ نيوز، نيوار محه‌مه‌د سه‌ليم:

ب گۆره‌يى به‌لاڤكريه‌كا په‌رله‌مانێ كوردستانێ بڕياره‌، په‌رله‌مان سوبه‌هى سپێدێ روونشتنا خوه‌ يا 18 ل خولا ئێكێ يا ئه‌ڤ ساله‌ بگێريت و وێرايى به‌رده‌وامى دان ب دانوستاندنێ ل سه‌ر ره‌وشا چاندنێ ل هه‌رێما كوردستانێ ب ئاماده‌بوونا وه‌زيرێ چاندنێ دێ خواندنا ئێكێ بۆ چه‌ند پرۆژه‌ قانوونان هێته‌ كرن.

ب گۆره‌يى ڤێ به‌لاڤكريا په‌رله‌مانێ كوردستانێ بڕياره‌ خواندنا ئێكێ بۆ حه‌فت پرۆژێن قانوونا بهێته‌ كرن كو پێكهاتينه‌ ژ هه‌ر ئێك ژ پرۆژێ قانوونا راستڤه‌كرنا ئێكێ يا قانوونا هژماره‌ دو يا سالا 2013 يا زانكۆيێن تايبه‌ت ل هه‌رێما كوردستانێ- عيراق و پرۆژێ قانوونا پشتراستيا جڤاكى ل هه‌رێما كوردستانێ- عيراق و پرۆژێ قانوونا ئازاكرنا پێشمه‌رگه‌ و هێزێن ناڤخۆ و ئاسايشێ ژ سولفا هه‌ڤژينيێ و ئاڤاهيان.

ديسا پرۆژێ بڕيارا ئازاكرنا شه‌هيد و پێشمه‌رگه‌ و هێزێن ناڤخۆ ژ پێشينه‌يا ئاڤاهيان و هه‌ڤژينيێ و پرۆژێ بڕيارا هێلانا ب تنێ ئێك مووچه‌ بۆ ئه‌وێن زێده‌تر ژ ئێك مووچه‌يى وه‌ردگرن و پرۆژێ بڕيارا پاراستنا سه‌روه‌ريا كوردستانێ- عيراق.

هه‌ر ب گۆره‌يى ڤێ به‌لاڤوكا په‌رله‌مانێ كوردستانێ دێ ته‌وه‌رێ سيێ ژى ژ كۆمبوونا سوبه‌هى يا په‌رله‌مانێ كوردستانێ يا تايبه‌ت بيت ب دانوستاندنا ل سه‌ر ره‌وشا كاره‌بێ ب ئاماده‌بوونا وه‌زيرێ كاره‌بێ.

ته‌وه‌رێ چارێ و دووماهيێ ژى دێ يێ تايبه‌ت بيت ب دانوستاندنا ل سه‌ر پرۆژێ قانوونا راستڤه‌كريا ئێكێ يا وه‌زاره‌تا خواندنا بلند و ڤه‌كۆلينێن زانستى يا هژماره‌ 10 يا سالا 2008 ب گۆره‌يى مادێن 72 و 74 و 75 ژ په‌يره‌وێ ناڤخۆ يێ په‌رله‌مانێ كوردستانێ يێ هژماره‌ ئێكێ راستڤه‌كريێ سالا 1992ێ.

ئەڤرۆ نیوز، رەزوان رۆژبەیانی:

د روودانەکا ھاتنوچوونێ دا ل سەر رێیا گشتی یا د ناڤبەرا قەزا بەردەرەش  و ناحیا کەلەک دا دو کەسان جانێ خوە ژ دەست دا و سیێن دی بریندار بوون.

کۆمیسەر حازم محه‌مه‌د ژ راگەھاندنا ھاتنوچوونا قەزا بەردەرەش بۆ ئەڤرۆ نیوز گۆت: “دوهى ب مه‌غره‌ب ل رێکەفتێ 21\12\2014 ل دەمژمێر 5:20 د روودانەکا ھاتنوچوونێ دا ل سەر رێیا گشتی یا د ناڤبەرا قەزا بەردەرەش و ناحیا کەلەک نێزیک گوندێ قادسی پێنج کەس بوونە قوربانی کو زەلامەک و ژنه‌كان جانێ خوە ژ دەست دا و دو زەلام و زارۆیەک ژی بریندار بوون”.

زێده‌تر گۆت: “برینا زەلامەک و زارۆيى يا دژوارە و ھاتینە رەوانە کرن بۆ نەخوشخانا تەنگاڤیا ل ئاکرێ”.

دا زانين ژى کو روودان د ناڤبەرا دو ترۆمبێلێن ژ جۆرێ کەیا سالۆن فۆرت سالون دا په‌يدا بوويه‌ و گۆت: “ئەگەرێ پێگرينه‌كرنێ بوويه‌ ب رێنمايێن هاتنوچوونێ”.

ئەڤرۆ:

پشتی حوکمەتا ھەرێمێ ھەردو وەزارەتێن پەروەردێ و خواندنا بلند سەرپشککرین ل سەر بڕیار دانا بھێنڤەدانا رۆژا پێنجشەمبیا بھێت، رێڤەبەرێ گشتیێ پەروەردا دھۆکێ دیار کر کو ئەڤرۆ 22\12 جڤاتا وەزارەتا پەروەردێ دێ ل سەر ڤێ چەندێ کۆم بیت و بڕیارێ دەت کا ب بیتە بھێنڤەدان یان نە و گۆت: “بۆچوونا مە ئەوە، نەبیتە بھێنڤەدان”.

عەبد یوسف، رێڤەبەرێ گشتیێ پەروەردا دھۆکێ ئاشکرا کر، ھەر چەندە بڕیار دان ل سەر بھێنڤەدانا رۆژا پێنجشەمبی نە د دەستێن مە دایە، بەلکو جڤاتا وەزارەتا پەروەردێ بڕیارێ دێ ل سەر دەت، بۆ ڤێ چەندێ ژی ئەڤرۆ 22\12\2014 ل ھەولێر جڤاتا وەزارەتا پەروەردێ دێ کۆم بیت و بڕیارەکێ ل سەر دەت و بۆ ئەڤرۆ گۆت: “وەکو پەروەردا دھۆکێ، مە دڤێت رۆژا پێنجشەمبیا بھێت 25\12 بۆ کەرتێ پەروەردێ نەبیتە بھێنڤەدان، لێ ئەگەر 1\1\2015 ب بیتە بھێنڤەدان ئاریشە نینە”.

دوھی پەیڤدارێ حوکمەتا ھەرێما کوردستانێ راگەھاند، ب ھەلکەفتا ژ دایکبوونا حەزرەتێ مەسیح سلاڤ لێ بن، رۆژا پێنجشەمبیا بھێت و یا د دووڤ دا ژی سەرێ سالا نوو یا زایینی بھێنڤەدانە ل ھەموو دامودەزگەھێن ھەرێما کوردستانێ، لێ ھەردو وەزارەتێن پەروەردێ و خواندنا بلند ل گۆرەی بەرنامێ خوە یێ سالا خواندنێ دێ بڕیارێ ل سەر وان بھێنڤەدانان دەن.

ئەڤرۆ:
ڕێڤەبەرێ گشتیێ کاروبارێن مەسیحیان ل وەزارەتا ئەوقافێ و کاروبارێن ئایینی یا حوکمەتا ھەرێما کوردستانێ دیار کر وەکو ڕێزگرتن ل پێشمەرگێن شەھید بووین، ئەڤ سالە مەسحیێن ھەرێما کوردستانێ ئاھەنگان ب ھەلکەفتا ڕۆژا کریسمس ناگێڕن.
خالد جەمال ئەلبێرت ڕێڤەبەرێ گشتیێ کاروبارێن مەسیحیان ل وەزارەتا ئەوقافێ و کاروبارێن ئایینی یا حوکمەتا ھەرێما کوردستانێ بۆ مالپەرێ (باس نیوز) دیار کر ژبەر رەوشا ھەرێما کوردستانێ ھەبوونا شەھید و برینداران د ناڤ رێزێن پێشمەرگەی دا ئەڤ سالە ئاھەنگێن کریسمس ناھێنە گێران و ھەموو رەوشا کوردستانێ دزانن کو ژ بلی ھەبوونا شەھید و برینداران ژمارەکا زۆرا ئاوارەیان ژی ھەنە و ل ھەمان دەمی مەسیحی ژی دەربەدەر بووینە و گۆت “لەورا مە بریار دا کو جەژن و ئاھەنگان ساز نەکەین، بەلکو ب تنێ دێ رێورەسمێن ئایینی د ناڤ دێرو کەنیسان دا گێرێن”.
ئەلبێرت تێکەست ژی کر کو زێدەتر ژ ٢٠ ھزار ئاوارێن مەسیحی ل باژێرێن کوردستانێ ھەنە و چەندین شەھیدێن مەسیحی ژی ھەنە و گۆت “پەتریارکێ مەسیحیێن کوردستانێ ھەمی ئالی ھایدار کرینە کو ئەڤ سالە ئاھەنگێن ژ دایکبوونێ و سەرێ سالێ ل کوردستانێ ناھێنە گێران، بەلکو ب تنێ دێ ڕێوڕەسمێن ئایینی ھێنە سازکرن و خەلات و دیاریان ب سەر زارۆیان دا بەلاڤ کەن”.