ئەڤرۆ نیۆز، قائید میرۆ

بەرپرسەکێ پارتی ل قەزا مەخموور دیارکر، ھژمارەک ئەندامێن ئێکەتیێ ب تۆمەتا بەلافکرنا پڕۆپاگندەیان تێکدانا رەوشا دەڤەرێ ھاتینە دەستەسەرکرن.

بەرپرسەکێ پارتی دیموکراتی کوردستان ل قەزا مەخموور ب ئەڤرۆ نیۆز راگەھاند، ئەف ئەندامێن ئێکەتیا نیشتیمانی کوردستان یێن بەری چەند رۆژان ژلایێ ھێزێن ئەمنی ل مەخموور ھاتینە گرتن، ب تۆمەتا بەلافکرنا پڕۆپاگندەیان بۆیە، چونکو چەند کەسەک کو ناڤدا ئەندامێن ئێکەتیێ ھەبوون، پڕۆپاگندەیێن ڤێ چەندێ بەلافکرن ژبەر تێکچوونا رەوشا دەڤەرێ خەلک ئاوارەببیت و مەخمووری چولکەن.

ئەڤی بەرپرسێ پارتی گۆتژی” مە بەلگە ھەنە ئەڤان ئەندامێن ئێکەتیێ ل دەرگەھێن خەلکیدایە و گۆتیێ، رەوشا مەخمووری یا ئالۆزە و بڕەڤن، ھێزێن ئەمنیژی ئەف کەس دەستەسەرکرینە.

ئەڤرۆ:
لیژنا پەیوەندی و رەڤەندا کورد ژ دەرڤە ل پەرلەمانێ کوردستانێ ھاتە دامەزراندن، زانا عەبدولرەحمان وەک سەرۆکێ لیژنێ و ڤیان عەباس وەک جێکر و سھام عومەر وەک بریاردەر ھاتنە ھەلبژارتن.
ڤیان عەباس جێگرا سەرۆکێ لیژنا پەیوەندی و رەڤەندا کوردی بۆ ئەڤرۆ دیار کر دوھی 19\1\2015 پشتی پێکھاتنا لیژنێ ئێکەم کۆمبوون ساز کر و دانوستاندن ل سەر دانانا بەرنامەکێ رێکوپێک بۆ دانانا میکانیزمەکا کاری ھاتەکرن و گۆت “ژبەرکو ئەڤ لیژنە یا نوویە و چ ئەرشیف ل بەردەستێ مە نینە دڤێت کاری بکەین بۆ کۆمکرنا داتا و پێزانینان”.
ڤیان خانێ بۆ خویا ژی کر بۆ کۆمکرنا پێزانینان دێ مفای ژ ئەندامێن کورد د لیژنا پەیوەندیان یا پەرلەمانێ عیراقا فیدرال دا وەرگرن و ل دۆر ئەرکێ ڤێ لیژنێ گۆت “دروستکرنا پەیوەندیان دگەل پەرلەمانێن جیھانێ و دووڤچوونا کارێ فەرمانگەھان پەیوەندیێن حوکمەتا ھەرێما کوردستانێ یە، ب رێیا نوونەرێن مە ژ دەرڤە دیسان ئەو قونسولخانێن ل کوردستانێ ھەین”.

ئەڤرۆ:
بەرپرسێ دەزگەھێ خانی یێ رەوشەنبیری و راگەھاندنێ ل دھوکێ دیار دکەت کو پەکەکە نەخشێ ئیرانێ بجە دئینیت و ئێکەتیا نیشتمانی کوردستان ژی پالپشتە بۆ شێعەیێن عیراقێ.
مەحفوز مایی بۆ ئەڤرۆ گوت” پەکەکە و لایەنێن ل پشت وێ د دروستکرنا کانتۆنا شنگالێ دا دێ شکەستنێ ئینن و نەخشێ وان دێ ژناڤ چیت، چونکی خەلکێ شنگالێ نە ل گەل وێ چەندێ یە”.
مایی زێدەتر گوت” پەکەکێ و ئێکەتیێ سەرەدەریا سەروکێ ھەرێما کوردستانێ و پارتی دیموکراتی کوردستان یا نەتەوەیی ب دەلیڤە دیت ل شنگالێ و ئەڤ چەندە بۆ کارێن خوە یێن حزبایەتی ب کارئینا و دەستێوەردان د کاروبارێن شنگالێ دا کر و بوونە ئەگەر کو نەخشی رزگارکرنا شنگالێ بھێتە ھەلوەشاندن”.
ناڤبری ئەو چەندە دیارکر کو پەکەکە مەزناتیێ د ئێخیتە د کارێن خوە دا و گوت” ل دەمێ ھێزێن پەکەکێ چوینە دناڤا شنگالێ دا ب چەند کەسێن کێم و نەخشێ رزگارکرنا شنگالێ ژناڤ بری، راگەھاندنا وێ بۆ خەلکی دیارکر کو نوکە ھێزێن وان شنگال رزگار کر و د بنیات دا چ راستی بۆ نەبون”.
خۆیاکر ژی” سەرۆکێ ھەرێما کوردستانێ شیا دەولەتێن زلھێزێن جیھانێ د ھەوارا کوردان بینیت د شەرێ مە ل گەل داعش و دیسا بۆ رۆژئاڤایێ کوردستانێ چ ب ھنارتنا پێشمەرگەی و چ ب رێیێن خوە یێن تایبەت ھێزێن ھەڤپەیمانان ئینانە سەر خەت بۆ کوبانێ، ئانکو سەرۆک بارزانی سەرکێشیا نەخشێ دەولەتبوونا کوردستانێ دکەت، ژبەر وێ چەندێ ھێرش و رێگری بتنێ ل سەر وی دھێنە کرن”.
ناڤھاتی ئاماژە کرە وێ چەندێ کو ئیرانێ رۆلەکێ سەرەکی یێ ھەی د ڤێ پیلانێ دا و گوت” ئیران شیا دو پارتێن کوردی بێخیتە بن رکێفا خوە کو ئێکەتیا نشتیمانی کوردستانی ل گەل شیعێن عیراقێ و پەکەکەل گەل عەلەویان و حزب اللە و ھەتا حوسیان ل یەمەنێ کو ئیران سەرکێشیا ڤان ھێزان دکەت، ئانکو ھەموو کار بۆ پارچەکرنا کوردستانێ دھێـنە کرن”.
ئەو چەندە دیار کر کو ددیرۆکێ دا ھەر کورد بووینە ئەگەرێ شکەستنا خوە و گوت” ھەر جارەکا کورد گەھشتینە گوپیتکا سەرکەفتنێن خوە ،کوردەکێ دی ھاتیە ئەو سەرکەفتنە ژناڤ بریە، پێدڤیە یا ئەڤێ جارێ ب ھشیاری سەرەدەری بھێتە کرن ژلایێ خەلکێ کوردستانێ ڤە ل ھەر چار پارچان “.
ل دۆر رولێ ئێکەتیا نشتیمانی کوردستانی، بەرپرسێ دەزگەھێ خانی دیار دکەت کو یا بێ سەرە و گوت” ئێکەتی وەکو ھێزەکا مەزن ل باشورێ کوردستانێ ئاریشا وێ یا مەزن ئەوە یا بێ مەزن و خودانە و دناڤا سەرۆکاتیا وێ دا دژاتیکرن یا ھەیی، ھەکە رۆلێ سەروک بارزانی نەبایە د کاروانێ بزاڤا رزگاری خوازا کوردستانێ دا، نوکە ئێکەتی بۆ چەندین پارتان ھاتبا دابەشکرن، دیسا ئێکەتی سیاسەتا دو سەریێ برێڤە دبەت، ژلایەکێ ڤە ناھێلیت رۆلێ شیعێن عیراقێ ژ ناڤ بچیت و ژلایەکێ دویڤە یا نەچارە وەکو پارتەکا خودان خەبات نەشێت خوە ژ داخوزکەرێن دەولەتبوونێ بدەتە پاش”.
مەحفوز مایی ئەو چەندە دا زانین کو ئیران شیایە ئێکەتیێ و پەکەکێ ژ ئالیەکی ڤە بگەھینتە ئێک و گوت” ئیران رۆلێ سەرەکی دگێریت د گەھاندنا پەکەکێ و ئێکەتیێ دا بۆ دژاتیکرنا پێشڤەچونا سیاسی یا سەرۆک بارزانی و پارتی ھەی بۆ باشورێ کوردستانێ کو بەر ب دەولەتبوونێ دبەت”.
ئەو چەندە دیارکر کو سەرۆک بارزانی و پارتی خویکا ھەر تشتەکی یا دای و د دەت بۆ نەتەوا کورد و گوت” چونکی بارزانی و پارتی سەرکێشیا پێشڤەبرنا نەخشێ دەولەتبوونا کوردستانێ دکەن، ھەر جارەکێ خویکا وێ چەندێ دایە و یا بەردەوامە د دانا وێ دا و نە ئاخفتنا وان ژی ھەر ژبەر مللەتێ کوردە، چونکی زەحمەتەکا مەزن ھاتیە دیتن ھەتا کورد گەھاندینە ئەڤا نوکە ھەی”.
دیسا پەکەکێ و ئێکەتیێ ب رێگر دبینیت بۆ دەولەتا کوردی و گوت” ئێکەتی و پەکەکە ئاستەنگن د رێیا دەولەتبوونا کوردستانێ دا و پێدڤیە پێداچونەکێ د سیاسەتا خوە یا نوکە دا بکەن”.
بەرپرسێ دەزگەھێ خانی یێ رەوشەنبیری و راگەھاندنێ ئەو چەندە ئاشکەرا کر کو تورکیا ژی ژبەر بەرژەوەندێن خوە یێن تایبەت رێ ب ھێزێن پێشمەرگێ کوردستانێ دا دناڤ ئاخا وێ دا دەربازی رۆژئاڤایێ کوردستانێ ب بن و پێدڤیە پەکەکە ئەوێ چەندێ بەرچاڤ وەرگریت کو بارزانی ب سیاسەتا خوە شیا ئەوێ چەندێ بکەت و ب ئالایێ کوردستانێ ئەو ھێزە دناڤا ئاخا تورکیا را دەرباز بویە”.

ئه‌ڤرۆ نيوز:

رێڤه‌به‌ريا گشتيا كه‌شناسيێ ل هه‌رێما كوردستانێ راگه‌هاند كو سوبه‌هى ئه‌سمانێ دهۆكێ دێ ساهى بيت ل گه‌ل په‌يدابوونا هنده‌ك ئه‌وران ل هنده‌ك ده‌مێن رۆژێ.

پشكا پێشبينيان ل رێڤه‌به‌ريا گشتيا كه‌شنايا هه‌رێمێ راگه‌هاند كو ژ ئه‌نجامێ به‌رده‌واميا فشارێن باكوورێ رۆژهه‌لاتێ توركيا بۆ سه‌ر هه‌رێما كوردستانێ ئه‌و پێشبينى دكه‌ن كو سوبه‌هى رۆژا چارشه‌مبى رێكه‌فتى 21\1\2015 ئه‌سمانێ دهۆكێ دێ ساهى بيت ل گه‌ل په‌يدابوونا هنده‌ك ئه‌وران ل هنده‌ك ده‌مێن رۆژێ.

رێڤه‌به‌ريا گشتيا كه‌شناسيێ ل هه‌رێما كوردستانێ ئاشكه‌را ژى كريه‌ كو پلا گه‌رماتيێ ژى يا بلند دێ پيچه‌ك بلند بيت و يا نزم دێ هه‌ڤبه‌ركى ل گه‌ل رۆژێن به‌رى نوكه‌ بيت ب ره‌نگه‌كى د ناڤبه‌را 13 بۆ 2 دا.

ل دۆر پێشبينيا رێژا هه‌وايى و مه‌ودايێ ديتنێ ژى دايه‌ زانين كو دێ ئاراسته‌يێ وى دێ باكورێ رۆژهه‌لات بيت ب ره‌نگه‌كى دێ يێ ل سه‌ر خوه‌ بيت د ناڤبه‌را 5 بۆ 10 كلم د ده‌مژمێره‌كێ ماوێ ديتنێ ژى دێ 8 بۆ 10 كلم بيت.