ئەڤرۆ:

ل سنورێ پارێزگەھا دھۆکێ د سالا ٢٠١٣ ێ دا پتر ژ ٥٨٠٠ وەلاتیان مامەلە بۆ وەرگرتنا پێشینەیا خانوبەران برێڤەبرینە و ئەڤە ماوەکێ درێژ د سەر ڤێ چەندێ را دەربازدبیت و ھێشتا پێشینە وەرنەگرتیە. وەلاتی ژی دبێژن خانیێن مە یێن ماینە نیڤەرو و مە پێ چێ نابیت ب دووماھی بینین و ھەتا نو کە ئەو چاڤەریێ وەرگرتنا پێشینێ نە. بانکا خانوبەران ژی ل دھۆکێ دیار کر، نھا چو مامەلە ژبلی یێن قەرزێ خوە دزڤرینن ناھێنە برێڤەبرن و ھەکە پارە ھاتن دێ وەلاتیێن مامەلێن خوە برێڤەبرین وەرگرن.
ل دور ڤێ چەندێ وەلاتی ھەژار ئەحمەد دبێژیت: ئەڤە نێزیکی دو سالانە ڤەدیتن بۆ خانیێ مە ھاتیە کرن و ھێشتا پێشینە نەھاتیە، ئەم نەشێین تەمام بکەین ھەتا پێشینێ وەرنەگرین، چونکو ل بەراھیێ ھەر کەسەکێ بۆ خوە دەست ب چێکرنا خانیەکی کربایە ب ھیڤیا پێشینەیا خانی ڤە بوو و گۆت: ھەکە ب ڤی دەست و داری بیت کەس ژ مە نەشێت بچیتە د خانیەکی ڤە و نزانین دێ گەنکی ئەڤ بابەتە چارەبیت. نافع عەبدوللا رێڤەبەرێ بانکا خانوبەران ل دھۆکێ ل دور بابەتێ پێشینەیا ئاڤاھیان دیار کر، ل ھەیڤا ١٢-٢٠١٣ یا ھاتیە راگرتن و ھەتا نوکە ب تنێ ئەو مامەلە دھێنە برێڤەبرن کو وەلاتی قستێ خوە بۆ بانکێ ڤەدگەرینن و قستێ خوە بدەت و گۆت: نھا ١٩٠٨ مامەلێن وەلاتیان ل بەردەستن و ھاتینە وەرگرتن و ل دووڤ رێنمایێن وەزارەتا درایی یا حوکمەتا ھەرێما کوردستانێ ڤەدیتن بۆ ھاتینەکرن و پارە بۆ نەھاتیە خەرجکرن و ئەو پارچێن تاپۆکری یێن ل سەنتەرێ باژێران و ھندەک ژ وان ھێشتا ئاڤاھی تەمام نەکرینە، لەورا ڤەدیتن بۆ نەھاتیەکرن و دیسا یێن کۆمەلگەە و گوندان ژی ھژمارا وان ٣٦١٨ مامەلە بووینە، ئانکو ھەموو دبنە ٥٨٢٦ نھا ل بەر دەستن و پارە بۆ نەھاتینە خەرجکرن. رێڤەبەرێ بانکا خانوبەران ل دھۆکێ گۆت ژی: دەربارەی دانا قستا و بەری ئەڤ قەیرانا دارایی پەیدا ببیت، وەلاتیان پێگێری ب زڤراندنا قستان دکر و مە پارەکێ باش وەردگرت، لێ نوکە کێم خەلک جارەکا دی قەستا بانکا مە دکەن و قستێ خوە ددەن. ل ڤێرێ پتریا خەلکێ مە مووچە خورن و وەختێ مووچێ وان ژ لایێ حوکمەتێ ڤە نەھێتە دان، ل وی دەمی ئەو ژی نەشێن قستێن خوە بدەن و نھا رێژا دانێ گەلەک یا کێمە. نافعی گۆت ژی: بەری نوکە ھەکە ب سەر ماوێ دانا قستێ ئێکی ڤە چووبا مە پەیوەندی پێ دکر دا کو قستێ خوە بدەت، لێ نھا دەمێ ب سەر ڤە ژی بچیت ئەم نەشێین بێژینێ بۆچی تە نە ئینا. دەربارەی پێشمەرگەی ئەگەر ١٥ رۆژان ژی ب سەر وەختێ دانا قستێ وی ڤە بچیت چو نینە و زێدەیی ناچیتە سەر، بەلێ نەک زێدەتر و گۆت: دێ بۆ پێشمەرگەی ھەولدەین ل گەل لایەنێن پەیوەندیدار دانا قستێ وان بھێتە پاشخستن ھەتا کو ئەڤ کاودانە دروست ببیت. ئەو چەند ژی دیار کر کو وان پێشنیاز کریە ئەو پێشمەرگێن د شەرێ تیروستێن داعش دا ھاتینە شەھید کرن و بەری ھینگێ پێشینا خانوبەران وەرگرتبیت، خێزانێن وان ژ دانا قستی بھێنە لێبوورین و گۆت: ئەڤ چەندە یا ھاتیە جێ بەجێ کرن، لێ ھێشتا ب فەرمی چو بۆ وان نەھاتیە و بۆ وەلاتیان ژی ئەگەر د وەخت دا نەئینن زێدەیی دچیتە سەر پارێ وان. دەربارەی دانا قستێ پێشینەیێ وان وەلاتیێن مامەلێن خوە ژی برێڤەبرین رێڤەبەری گۆت: بریار یا وەزارەتا دارایی یە و ھەکە گۆتن دەست پێ بکەن، ئەم ژی دێ دەینە وەلاتیان، ئەگەر نە مە چو دەستھەلات نینە پارەی بدەینە خەلکی.