ئه‌ڤرۆ نيوز، نيوار محه‌مه‌د سه‌ليم:

وه‌زاره‌تا خواندنا بلند و ڤه‌كۆلينێن زانستى راگه‌هاند كو پشتى راگه‌هاندنا ئه‌نجامێن وه‌رگرتنا قوتابيێن پۆلا 12 ئاماده‌يێ ل زانكۆ و په‌يمانگه‌هێن هه‌رێما كوردستانێ، وه‌زاره‌تا خواندنا بلند و ڤه‌كۆلينێن زانستى 740 قوتابيێن دى ژ ده‌رچوويێن ئاماده‌يى و په‌يمانگه‌هێن پيشه‌يى و ئيسلامى و نابينان ل زانكۆيێن هه‌رێما كوردستانێ وه‌رگرتن.

د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه‌ كريه‌ دايه‌ زانين كو پشت به‌ست ب كۆمبوونا لژنا بلندا خواندنێ و پلانا وه‌رگرتنێ كو ژ لايێ جڤاتا وه‌زاره‌تا خواندنا بلند و ڤه‌كۆلينێن زانستى هاتيه‌ په‌سه‌ندكرن، رێڤه‌به‌ريا ناڤه‌ندا وه‌رگرتنێ ب پشت به‌ستن ب رێنمايێن وه‌رگرتنێ ل زانكۆيێن هه‌رێما كوردستانێ بۆ سالا 2014-2015 بڕيارا وه‌رگرتنا 470 قوتابيێن دى يێن ده‌رچوويێن ئاماده‌يى و په‌يمانگه‌هێن پيشه‌يى و نابينان ل زانكۆ و په‌يمانگه‌هێن هه‌رێما كوردستانێ دا.

ئاشكه‌را ژى كريه‌ كو سه‌باره‌ت وه‌رگرتنا ده‌رچوويێن ئاماده‌يێن پيشه‌يى بۆ سالا خواندنێ 2014-2015، بڕيار هاته‌ دان ب وه‌رگرتنا 552 قوتابيان كو ده‌رچوويێن ئاماده‌يێن پيشه‌يى نه‌ ل زانكۆ و په‌يمانگه‌هێن هه‌رێما كوردستانێ.

ده‌رباره‌يى وه‌رگرتنا ده‌رچوويێن ئاماده‌يى و په‌يمانگه‌هێن ئيسلامى يێن سه‌ر ب وه‌زاره‌تا په‌روه‌ردێ و ئه‌وقاف و كاروبارێن ئاينى بۆ سالا خواندنێ 2014-2015، هاتيه‌ كو بڕيار هاته‌ دان ب وه‌رگرتنا 176 قوتابيان ل زانكۆيێن هه‌رێما كوردستانێ. ل دۆر نابينان ژى ل زانكۆيێن هه‌رێما كوردستانێ بۆ ئه‌ڤ ساله‌ بڕيار دا، 12 قوتابى ژ ده‌رچوويێن پۆلا 12 بۆ درێژى دان ب خواندنا خوه‌ ل زانكۆيێن هه‌رێما كوردستانێ بهێنه‌ وه‌رگرتن.

ئه‌ڤرۆ نيوز، ره‌مه‌زان رێكانى:

ل ژێر ناڤێ پێکڤە ژ بۆ رزگار کرنا زارۆک و ژن و کچێن ئێزدی ژ دەستێن داعش زانکۆیا دھۆک ل رۆژا 7\12\2014 ل ھۆلا خانی رێورەسمەک ب ڤێ ھەلکەفتێ ساز کر.

د رێورەسمان دا سەرۆکێ زانکۆیا دھۆک ب وەکالەت دکتۆر نزار نعمان گۆت بێ گومان ئەڤ کارەساتا دژی ئێزدیان و ھەمی کەمینە وپێکھاتێن دی ھاتیە ئەنجامدان ژلایێ تیرۆرستێن داعش کارەساتەکا ھوڤانە ب دژی مرۆڤایەتیێ و وژدانا ھەمی جیھانێ ھەژاند، دیار ژی کر کو وەکو ئەرکەکێ مرۆڤایەتی کۆمەکا مامۆستا و قوتابیێن زانکۆیێ ب ئەنجامدانا ڤێ چالاکیێ رابووینە، پێ خەمەت دروستکرنا فشارێ و پشتەڤانیێ ژ بۆ رزگارکرنا ژنێن ئێزدی ئەوێن د دەستێن داعش دا، ھەروەسا بۆ پشتەڤانیا ئەو ژنێن رزگاربوین.
سەرۆکێ زانکۆیا دھۆک ب وەکالەت ھەروەسا گۆت ژی ئەو کریارێن دژی ژنێن کوردێن ئێزدی ھاتینە ئەنجامدان ژلایێ تیرۆرستێن داعش پێدڤیەکارێ بەردەوام ل سەر وان کەیسا بێتە کرن ژ لایێ رێکخراوێن نێڤدەولەتی و تایبەتمەند و دام و دەزگەھێن حکوومی، ژ بەرکو ئەو کەس پێدڤی ب چاڤدێریا تایبەتن، لەورا ئەنجامدانا ڤێ چالاکیێ ژ پێخەمەت وێ چەندێ یە کارێ بەردەوام د ڤی بیاڤی دا بێتە کرن چ ژلایێ دەزگەھێن حکوومەتێ یان یێن رێکخراوێن نێڤدەولەتی کو بەردەوام کاری ل سەر بکەن داکو برێنێن وان قوربانیان ھندەک بھێنە سارێژ کرن.
د بەیاننامەکێ دا کو ب ناڤێ چالاکڤان و ئەکادیمی و قۆتابیێن ئێزدی ل زانکۆیا دھۆک ژ لایێ دکتۆر سەعید خودێدا ڤە ھاتە خواندن ئەوا بۆ رایا گشتی یا جیھانێ و ھەر سێ سەرۆکاتیێن ھەرێمێ (سەرۆکاتیا ھەرێما کوردستانێ، سەرۆکاتیا پەرلەمانێ کوردستانێ، سەرۆکاتیا حکوومەتا ھەرێما کوردستانی) و حکوومەتا فیدرالی ل بەغدا و دام و دەزگەھێن نەتەوێن ئێکگرتی ئاراستە کری تێدا ھاتیە کو
د وی دەمێ ھەموو جیھان بزاڤێن نێڤدەولەتی بو راوستاندنا تۆندوتیژیێ دژی ئافرەتێ دگێریت (16 رۆژ نا بۆ توندوتیژیێ دژی ئافرەتێ) خێزانێن ئێزدی د نەخۆشیێن بەردەوام دا دژین ژ سێی تەباخا 2014 وەرە دەما داعش ھێرش کریە دەڤەرا شنگال و بوویە سەدەما کوشتنا ب ھەزاران خەلکی و تەرمێ گەلەکا ژ وان ھێشتا نەیێ دیارە یان ژی د گۆرێن کۆمەل دانە، و رابوون ب رەڤاندنا پێنج ھزار ژن و زارۆکان و چارەنڤسێ گەلەکا ژ وان نە یێ دیارە، جیھان د دەمەکی دا ل چەرخێ پێشکەفتنتێ و تەکنۆلۆژیا و مافێ مرۆڤی دا د ژیت ئێزدی ب ئێش و ئازار ڤە بەرێ خوە ددەنە بارودۆخێ خوە ژ ئەنجامێ بەردەوامیا تیرۆرستێن داعش بۆ رەڤاندنا ب ھزاران ژن وکچێن وان.
د بەیاننامێ دا ھەروەسا ھاتیە کو بەردەوامیا ڤان ئێش و ئازاران مە نەچار دکەت ئەم داخوازێ ژ ھەموو خێر خواز و دام و دەزگەھێن بەرپرس ل جیھانێ بکەین پشتەڤانیا ئێزدیان د ڤێ کارەساتێ دا بھێتە کرن، ل ڤی جھی بانگەوازەکێ بۆ ھەموو دونیایێ ئاراستە دکەین کو پشتەڤانێن ئێزدیان بن د ڤێ کارەساتێ دا و ھەموو ھەولان بدەن ژ بۆ رزگارکرنا ئافرەت و کچێن ئێزدیان چونکو مانا ئافرەتێن ئێزدیان د دەستێن تیرۆرستێن داعش دا شەرمەزاریەکا مەزنا مرۆڤایەتیێ یە.