ئه‌ڤرۆ نيوز:

سه‌رۆكێ لژنا وزێ و ژێده‌رێن سرۆشتى ل په‌رله‌مانێ كوردستانێ راگه‌هاند كو بودجێ پترۆدۆلار بۆ هه‌رێما كوردستانێ ديار نه‌كريه‌ كو پێدڤيه‌ ل به‌رامبه‌ر هنارتنا هه‌ر به‌رمليه‌كا په‌ترۆلێ پێنج دولاران بۆ بدانن.

شێركۆ جه‌وده‌ت، سه‌رۆكێ لژنا وزێ و ژێده‌رێن سرۆشتى ل په‌رله‌مانێ كوردستانێ بۆ تۆڕا ده‌نگوباسێن سلێمانيێ راگه‌هاند ژ بودجێ 2015 يێ عيراقێ ب تنێ 17% بۆ هه‌رێما كوردستانێ هاتيه‌ جوداكرن، ژبلى مه‌زاختنێن پۆستێن بلند، پێدڤيه‌ ژ بودجێ پترۆدۆلار ژى بۆ هه‌رێما كوردستانێ بودجه‌ك بهێته‌ هژمارتن.

ب گۆره‌يى رێكه‌فتنا د ناڤبه‌را هه‌ولێر و به‌غدا دا، پێدڤيه‌ هه‌رێما كوردستانێ رۆژانه‌ 300 هزار به‌رميلێن كه‌ركووك كو ژ ده‌رڤه‌يى ئيدارا هه‌رێمێ يه‌ و 250 هزار به‌رميلێن ناڤخوه‌يا هه‌رێمێ ب رێيا كۆمپانيا سۆمۆ ره‌وانه‌يى توركيا بكه‌ت و به‌رامبه‌ر وێ ژى حوكمه‌تا عيراقێ دێ 17% ژ بودجا عيراقێ ده‌ته‌ هه‌رێمێ ل گه‌ل مووچێ پێشمه‌رگه‌يى.

بودجێ پترۆدۆلار بۆ هه‌ر به‌رميله‌كا په‌ترۆلێ پێنج دولارن و ب ڤێ چه‌ندێ ژى پێدڤيه‌ رۆژانه‌ دو مليۆن و 750 هزار دولاران بۆ هه‌رێمێ بدانن.

ئه‌ڤرۆ نيوز:

وه‌زاره‌تا دارايى و ئابوورى ل حوكمه‌تا هه‌رێما كوردستانێ راگه‌هاند كو ل ده‌سپێكا سالا بهێت ئه‌و دێ چاڤخشاندنه‌كێ د فه‌رمانبه‌رێن گرێبه‌ست دا كه‌ن و ب بڕياره‌كێ چاره‌نڤيسێ وان ديار كه‌ن.

ب گۆره‌يى نڤيساره‌كا وه‌زاره‌تا دارايى كو ل 15\11\2014 ب ئيمزايا وه‌زيرێ دارايى و بۆ وه‌زاره‌ت و فه‌رمانگه‌هان ده‌رچوويه‌ و كۆپيه‌كا وێ ب ده‌ست باس كه‌فتيه‌، هاتيه‌: “ل ده‌سپێكا سالا 2015 بڕياره‌كا نوو دێ ل دۆر فه‌رمانبه‌رێن گرێبه‌ست و گرێبه‌ستێن وان هێته‌ دان”.

وه‌زيرێ دارايى رۆهن ژى كر كو ژ به‌ر په‌سه‌ند نه‌كرنا ميلاكێ 2014 نێزيك بوو ژ دووماهيا سالێ ئه‌وان بڕيار دا: “راگرتن و لادانا فه‌رمانبه‌رێن گرێبه‌ست ل هه‌موو وه‌زاره‌تان، ل ده‌سپێكا سالا 2015 بڕياره‌كا نوو دێ د وى ده‌رباره‌يى دا هێته‌ دانان”.

دلێر تارق، ئاخفتنكه‌رێ ب ناڤێ وه‌زاره‌تا دارايى و ئابوورى ل حوكمه‌تا هه‌رێما كوردستانێ د داخۆيانيه‌كێ دا بۆ باس راگه‌هاند، سه‌ره‌رايى بوونا قه‌يرانا دارايى د حوكمه‌تێ دا، به‌لێ حوكمه‌تا هه‌رێما كوردستانێ بڕيار نه‌دايه‌ كو گرێبه‌ستێن فه‌رمانبه‌ران نوو نه‌كه‌ت.

دلێر تارق گۆتژى: “هه‌موو فه‌رمانگه‌هێن وه‌زاره‌تان دشێن گرێبه‌ستێن خوه‌ بۆ سالا داهاتى نوو بكه‌نه‌ڤه‌”، ئاماژه‌ ب وێ چه‌ندێ ژى كر كو ل ده‌سپێكا سالا داهاتى دێ بڕياره‌كا نوو بۆ وان فه‌رمانبه‌ران ده‌رچيت.

ب گۆره‌يى ئاماره‌كا وه‌زاره‌تا دارايى كو ب ده‌ست باس كه‌فتيه‌، داموده‌زگه‌هێن هه‌رێما كوردستانێ زێده‌تر ژ 22 هزار كارمه‌ندێن گرێبه‌ست هه‌نه‌. ماوێ گرێبه‌ستان د ناڤبه‌را شه‌ش هه‌يڤ هه‌تا ساله‌كێ دايه‌ و مووچێ وان ژى ژ 200 هزار ديناران هه‌تا 800 هزار دينارايه‌.

جينه‌ر خه‌فاف، رێڤه‌به‌رێ گشتيێ كارگێرى و دارايى ل سه‌رۆكاتيا جڤاتا وه‌زيران ب باس راگه‌هاند كو دووماهى بڕيارا حوكمه‌تا هه‌رێمێ ئه‌وه‌ گرێبه‌ستا كارمه‌ندێن خوه‌ نوو بكه‌ن و گۆت: “سه‌رۆكاتيا جڤاتا وه‌زيران چو كێشه‌ ل سه‌ر نووكرنا گرێبه‌ستان نينه‌، به‌لێ هووريا ئه‌وى كارى دێ ژ لايێ وه‌زاره‌تا دارايى مينن، ئه‌و دێ بڕيارا پێدڤى ده‌ركه‌ن”.

سەرۆکێ حوکمەتا ھەرێما کوردستانێ د ھەڤدیتنەکێ دا ل گەل کەنالێ (بی بی سی) یێ بریتانی راگەھاند، بەغدا بێی ھەرێما کوردستانێ نەشێت پەترۆلا کەرکووکێ بھنێریتە دەرڤە و دیارکر نۆکە ل عیراقێ و ھەرێما کوردستانێ پرسا سەرەکی ئەوە کا چاوان شەڕێ داعش بھێتە کرن.

نێچیرڤان بارزانی بۆ کەنالێ ناڤبری گوت ژی”نۆکە حوکمەتەک و سەرۆک وەزیرەکێ نوو  ل بەغدا یێن ھەین و د سیاسەتا مەژی دا بوویە کو کاری ل گەل حوکمەتا نوو یا عیراقێ بکەین”

ل دۆر ھنارتنا پەترۆلا کەرکووکێ دبێژیت”ب راستی و ب شێوەکی پراکتیکی، عیراق بێی حوکمەتا ھەرێما کوردستانێ نەشێت پەترۆلا کەرکووکێ بھنێریت”.