ئه‌ڤرۆ نيوز، ره‌مه‌زان رێكانى:

ل ژێر ناڤێ پێکڤە ژ بۆ رزگار کرنا زارۆک و ژن و کچێن ئێزدی ژ دەستێن داعش زانکۆیا دھۆک ل رۆژا 7\12\2014 ل ھۆلا خانی رێورەسمەک ب ڤێ ھەلکەفتێ ساز کر.

د رێورەسمان دا سەرۆکێ زانکۆیا دھۆک ب وەکالەت دکتۆر نزار نعمان گۆت بێ گومان ئەڤ کارەساتا دژی ئێزدیان و ھەمی کەمینە وپێکھاتێن دی ھاتیە ئەنجامدان ژلایێ تیرۆرستێن داعش کارەساتەکا ھوڤانە ب دژی مرۆڤایەتیێ و وژدانا ھەمی جیھانێ ھەژاند، دیار ژی کر کو وەکو ئەرکەکێ مرۆڤایەتی کۆمەکا مامۆستا و قوتابیێن زانکۆیێ ب ئەنجامدانا ڤێ چالاکیێ رابووینە، پێ خەمەت دروستکرنا فشارێ و پشتەڤانیێ ژ بۆ رزگارکرنا ژنێن ئێزدی ئەوێن د دەستێن داعش دا، ھەروەسا بۆ پشتەڤانیا ئەو ژنێن رزگاربوین.
سەرۆکێ زانکۆیا دھۆک ب وەکالەت ھەروەسا گۆت ژی ئەو کریارێن دژی ژنێن کوردێن ئێزدی ھاتینە ئەنجامدان ژلایێ تیرۆرستێن داعش پێدڤیەکارێ بەردەوام ل سەر وان کەیسا بێتە کرن ژ لایێ رێکخراوێن نێڤدەولەتی و تایبەتمەند و دام و دەزگەھێن حکوومی، ژ بەرکو ئەو کەس پێدڤی ب چاڤدێریا تایبەتن، لەورا ئەنجامدانا ڤێ چالاکیێ ژ پێخەمەت وێ چەندێ یە کارێ بەردەوام د ڤی بیاڤی دا بێتە کرن چ ژلایێ دەزگەھێن حکوومەتێ یان یێن رێکخراوێن نێڤدەولەتی کو بەردەوام کاری ل سەر بکەن داکو برێنێن وان قوربانیان ھندەک بھێنە سارێژ کرن.
د بەیاننامەکێ دا کو ب ناڤێ چالاکڤان و ئەکادیمی و قۆتابیێن ئێزدی ل زانکۆیا دھۆک ژ لایێ دکتۆر سەعید خودێدا ڤە ھاتە خواندن ئەوا بۆ رایا گشتی یا جیھانێ و ھەر سێ سەرۆکاتیێن ھەرێمێ (سەرۆکاتیا ھەرێما کوردستانێ، سەرۆکاتیا پەرلەمانێ کوردستانێ، سەرۆکاتیا حکوومەتا ھەرێما کوردستانی) و حکوومەتا فیدرالی ل بەغدا و دام و دەزگەھێن نەتەوێن ئێکگرتی ئاراستە کری تێدا ھاتیە کو
د وی دەمێ ھەموو جیھان بزاڤێن نێڤدەولەتی بو راوستاندنا تۆندوتیژیێ دژی ئافرەتێ دگێریت (16 رۆژ نا بۆ توندوتیژیێ دژی ئافرەتێ) خێزانێن ئێزدی د نەخۆشیێن بەردەوام دا دژین ژ سێی تەباخا 2014 وەرە دەما داعش ھێرش کریە دەڤەرا شنگال و بوویە سەدەما کوشتنا ب ھەزاران خەلکی و تەرمێ گەلەکا ژ وان ھێشتا نەیێ دیارە یان ژی د گۆرێن کۆمەل دانە، و رابوون ب رەڤاندنا پێنج ھزار ژن و زارۆکان و چارەنڤسێ گەلەکا ژ وان نە یێ دیارە، جیھان د دەمەکی دا ل چەرخێ پێشکەفتنتێ و تەکنۆلۆژیا و مافێ مرۆڤی دا د ژیت ئێزدی ب ئێش و ئازار ڤە بەرێ خوە ددەنە بارودۆخێ خوە ژ ئەنجامێ بەردەوامیا تیرۆرستێن داعش بۆ رەڤاندنا ب ھزاران ژن وکچێن وان.
د بەیاننامێ دا ھەروەسا ھاتیە کو بەردەوامیا ڤان ئێش و ئازاران مە نەچار دکەت ئەم داخوازێ ژ ھەموو خێر خواز و دام و دەزگەھێن بەرپرس ل جیھانێ بکەین پشتەڤانیا ئێزدیان د ڤێ کارەساتێ دا بھێتە کرن، ل ڤی جھی بانگەوازەکێ بۆ ھەموو دونیایێ ئاراستە دکەین کو پشتەڤانێن ئێزدیان بن د ڤێ کارەساتێ دا و ھەموو ھەولان بدەن ژ بۆ رزگارکرنا ئافرەت و کچێن ئێزدیان چونکو مانا ئافرەتێن ئێزدیان د دەستێن تیرۆرستێن داعش دا شەرمەزاریەکا مەزنا مرۆڤایەتیێ یە.

ئه‌ڤرۆ:

رێڤەبەرێ نەھێلانا توندوتیژیا ل ھەمبەر ئافرەتان ل سنۆرێ قەزا سۆران راگەھاند، ئەڤسالە پتر ژ سالێن بۆری سکالا ژ لایێ ئافرەتان ڤە ھاتینە تۆماکرن و 36 زەلام ژی ب ئەگەرێ توندوتیژیێ ل ھەمبەر ئافرەتان ھاتینە سزادان.
رائید خۆشەوی تەھا، رێڤەبەرێ رێڤەبەریا توندوتیژیا دژی ئافرەتان ل قەزا سۆران بۆ رۆژناما ئەڤرۆ دیارکر، رێژا تۆمارکرنا سکالایان ژ لایێ ژنان ڤە زێدە بوویە و گۆت:”د دەمێ 10 ھەیڤێن بۆری یێن ئەڤسالە دا، رێژا توندوتیژیێ ل سنۆرێ رێڤەبەریا مە کو ھەر چوار قەزایێن سۆران، رەواندز، مێرگەسۆر و چۆمان ب خوە ڤە دگریت، وەکو سالا بۆری یە و زێدە نەکریە، لێ سکالا پتر ھاتینە تۆمارکرن، ب تنێ د دەمێ 10 ھەیڤێن بۆری دا 189 کێشە ھەبووینە و ژوانا 155 سکالا ھاتینە تۆمارکرن”.
گۆتژی: “د ئەڤ سالە دا دو حالەتێن دەستدرێژیا سێکسی ل سنۆرێ رێڤەبەریا مە ھاتینە تۆمارکرن، دو ئافرەتان خوە کوشتیە و دویێن دیژی خوە خەندقاندیە و 28 حالەتێن سۆتنا ئافرەتان ژی ھاتینە تۆمارکرن”.
رائیدی داخویانیا لژنا مافێ مرۆڤی یا پەرلەمانێ کوردستانێ کو بەحسێ زێدەبوونا توندوتیژیێ ل سنۆرێ وان دکەت رەتکر و گۆت: “چو راستی بۆنینە و وەکو سالێن بۆری یە، بەلکو ب تنێ سکالا پتر ھاتینە تۆمارکرن”.
خویا ژی کر، نڤیسینگەھێن نەھێلانا توندوتیژیێ بەردەوام کار بۆ چارەکرنا ئاریشان و سزادانا تاوانباران دکەن و ب تنێ د ئەڤسالە دا 36 زەلام ب تۆمەتا توندوتیژیێ ل ھەمبەر ئافرەتان ھاتینە سزادان و حوکمێ دادگەھێ ب سەردا ھاتیە ب جھئینان.

ئەڤرۆ نیوز، نەوزاد زادە ھلۆری:
وەزیرێ شەھید و ئەنفالکریێن حوکمەتا ھەرێما کوردستانێ ژمارا پێشمەرگێن شەھیدێن دژی داعشێ بو دەزگەھێن راگەیاندنێ بەلاڤکرن.
مەحموود سالح وەزیرێ شەھید و ئەنفالکریێن حوکمەتا ھەرێما کوردستانێ دیارکر کو پێشمەرگێن خوبەخش ژی د گەل دانە و گۆت: “ل دەستپێکا شەرێ دژی داعش ھەتا نھا نێزیکێ 700 پێشمەرگە و خوبەخشێن پێشمەرگە شەھید بووینە و ئەڤ شەھید بوونە ژی ل ھەموو سەنگەرێن بەرگریێ دانە”.
زێدەتر گۆت: “ھەموو مامەلەیێن ل دەڤ مە ھاتینە تۆمارکرن و مووچە دێ بۆ خێزانێن وان ھێنە دابینکرن”.

ئه‌ڤرۆ نيوز، ناجی به‌ده‌ل:

پشتى ده‌ركه‌فتنا قانوونا كۆمسيۆنا سه‌ربه‌خۆيا هه‌لبژارتنان و راپرسيێن ژ په‌رله‌مانێ كوردستانێ، لژنه‌كا ژ هه‌شت كه‌سى ژ په‌رله‌مانێ كوردستانێ پێكهات و پێشكێشكرنا سيڤيان هاته‌ راگه‌هاندن و پاشان ژى ژ 200 كه‌سێن پێشكێش كرين، نه‌هـ كه‌س بۆ پێكئينانا كۆمسيۆنێ هاتنه‌ هه‌لبژارتن و پێدڤيه‌ د ماوێ 90 رۆژان دا ئه‌و كۆمسيۆن بهێته‌ پێكئينان.

محه‌مه‌د عه‌لى ياسين، ئاخفتنكه‌رێ ب ناڤێ فراكسيۆنا زه‌ر د په‌رله‌مانێ كوردستانێ دا بۆ ئه‌ڤرۆ نيوز گۆت: “پشتى په‌سه‌ندكرنا قانوونێ ب 90 رۆژان، پێدڤيه‌ كۆمسيۆن بهێته‌ دامه‌زراندن، ده‌سته‌يا كۆميسه‌ران ژ 9 كه‌سان بهێت و مه‌رج ئه‌و بوو بۆ ره‌وشا كێمينه‌يان به‌رچاڤ بهێته‌ وه‌رگرتن، به‌لێ جهێ داخێ يه‌، سيڤى هه‌موو به‌رچاڤ نه‌هاتنه‌ وه‌رگرتن و حزبێن سياسى كانديدێن خوه‌ ديار كرن و ل وێرێ هاتنه‌ ئێكلاكرن كا كى بهێته‌ دانان”.

محه‌مه‌د عه‌لى زێده‌تر گۆت: “هه‌ر چه‌نده‌ سيڤى ژ هه‌موو پارێزگه‌هان هاتبوونه‌ پێشكێش كرن و بڕيار بوو ب رێيا سيڤى بيت، به‌لێ ل به‌رچاڤ نه‌هاتنه‌ وه‌رگرتن و ب تنێ كانديدێن پارتێن سياسى هاتنه‌ وه‌رگرتن”.

ئاخفتنكه‌رێ ب ناڤێ فراكسيۆنا زه‌ر د په‌رله‌مانێ كوردستانێ دا زانين ژى كو ئه‌و د ئازاد نه‌بوون د هه‌لبژارتنا كه‌سانێن بسپۆر دا سه‌ره‌رايى ئه‌وان ده‌نگ ل سه‌ر دابوو.