ئه‌ڤرۆ نيوز:

ژ به‌ر نه‌بوونا ده‌رچوويێن كوليژێن په‌وه‌رده‌يى وه‌كو پێدڤى، وه‌زاره‌تا په‌روه‌ردێ راگه‌هينيت كو ئه‌و دێ ده‌رچوويێن دژى يێن پيشه‌يێ وان ب كێرى په‌روه‌ردێ دهێت دامه‌زرينن.

د رۆهنكرنه‌كێ دا وه‌زاره‌تا په‌روه‌ردێ ل حوكمه‌تا هه‌رێما كوردستانێ كو دانه‌ك بۆ ئه‌ڤرۆ نيوز ره‌وانه‌ كريه‌ هاتيه‌: “نوكه‌ هژماره‌كا گرێبه‌ستان ل سنورێ هنده‌ك په‌روه‌ردێن هه‌رێما كوردستانێ ب به‌تالى ماينه‌ بۆ هه‌موو ده‌رچوويێن كوليژێن دى يێن نه‌ يێن په‌روه‌رده‌يى وه‌كو زانست و زمان و زانستێن مرۆڤايه‌تى و چه‌ند كوليژێن دى كو دشێن پشكداريێ د قووناغا داهاتى يا ده‌مه‌رزاندنێ ب ره‌نگێ گرێبه‌ست دا بكه‌ن”.

ئاماژه‌ ب وێ چه‌ندێ ژى كر كو چو ده‌مان وه‌زاره‌تا په‌روه‌ردێ ب ره‌هايى به‌حس ل وێ چه‌ندێ نه‌كريه‌ كو دێ ده‌رچوويێن كوليژێن په‌روه‌رده‌يى ب تنێ دامه‌زرينيت كو ب گۆره‌يى قانوونا هژماره‌ چار يا سالا 1992 يا راستڤه‌كرى، هه‌كه‌ ده‌رچوويێن كوليژێن په‌روه‌ردێ يان په‌وه‌ردا بنه‌ره‌ت يان ئه‌و پشكێن دياركرى كێمتر بوون ژ وان پشكێن خواستى، ژ وان چار هزار گرێبه‌ستان دێ ده‌رچوويێن كوليژێن دى ژى وه‌رگرن ب مه‌رجه‌كى كو مه‌شقا پێدڤى ب وان بهێته‌ كرن.

ئەڤرۆ نیوز:
د راپۆرتەکا رۆژناما ئەڤرۆ دا کو قائید میرۆیی ئامادەکریە ئاماژە ب وێ چەندێ کریە کو پشتی دەرچوونا بڕیارا پارێزگەھا بوونا ھەلەبجە، لایەنێن سیاسی یێن ھەلەبجە د ناڤبەرا خوەدا گەھشتنە رێککەفتنێ، پۆستێن پارێزگەھێ گۆرەی ئەنجامێن ھەلبژارتنێن بۆری بھێنە بەلاڤکرن و بۆ ڤێ مەرەمێ ژی چەندین کۆمبوون ھاتنە گرێدان، بەلێ بزاڤا گۆڕان و ئێکەتیێ ددەمێ رێککەفتین ل سەر پۆستێن پارێزگەھا سلێمانیێ چو بەھا نەدانە رێککەفتنا ھەلەبجە و پۆستێن پارێزگەھا ھەلەبجە ژی ل سەر خوە بەلاڤکرن، لایەنێن سیاسیێن ھەلەبجە ژی دلگرانیا خوە نیشادان و ئاماژێ ب وێ چەندێ دکەن، ئەو رازینابن ب ڤی شێوەی حوکمەتا ناڤخوەیا ھەلەبجە بھێتە پێکئینان و رۆژنامەڤانەک ژی دبێژیت، رێککەفتنا گۆڕان و ئێکەتیێ کۆدەتایەکا سپی بوو ب سەر ھەلەبجە ھاتیەکرن.
ئارام بامۆکی، ئەندامێ لقا ھەلەبجە یا سەندیکا رۆژنامەڤانێن کوردستانێ بۆ رۆژناما ئەڤرۆ گۆت” ئەو ھەڤڕکیا د ناڤبەرا بزاڤا گۆڕان و ئێکەتیێ دا ل سەر پۆستێن پارێزگەھا سلێمانیێ گەھشتیە سلێمانیێ و بەری نۆکە ب ھەڤکاریا ھەموو لایەکی، مە گڤاشتن کرینە سەر لایەنێن سیاسیێن پارێزگەھا ھەلەبجە د ناڤبەرا خوەدا رێکبکەڤن، ب خوەشحالی ڤە ھەموو لایەنێن سیاسی یێن بەرێ ئۆپۆزسیۆن و دەستھەلاتدار رێککەفتن وەکی ھەلەبجەیی گەھشتنە رێککەفتنێ و پۆستێن پارێزگەھێ دناڤا خوەدا بەلاڤکرن و چو ئاریشە نەمابوون، ھەتا سەرۆکایەتیا جڤاتا وەزیران چاڤەڕێی لایەنێن ھەلەبجە بوون کو حوکمەتا ناڤخوەیا ھەلەبجە بکەڤیتە کاری، بەلێ جارەکادی ل سەر رێککەفتنا بەرێ، ئێکەتی و گۆڕان ل سەر پۆستێن ھەلەبجە رێککەفتنەکا دی کر و رێککەفتنا بەرێ پشتگوە ھاڤێت، ئەڤ چەندە ژی بوویە جھێ دلگرانیا لایەنێن سیاسی و ھەموو تەخێن پارێزگەھێ، چونکی ب دیتنا من ئێکەتیێ و گۆڕان کۆدەتایەکا سپی ب سەر ھەلەبجە داکر و چو حساب بۆ رێککەفتنا بەرێ نەھاتە کرن”.
ئارامی گۆت ژی” رێککەفتنا ئێکەتیێ و گۆڕان دێ کارڤەدانێن خراپ ھەبن ل سەر ئیدارەیا پارێزگەھا ھەلەبجە، چونکی ھەلەبجە تایبەتمەندیا خوە ھەیە و مە دخواست وەکی ھەلەبەجەیی نەکەڤینە ناڤا ھەڤڕکیێن سیاسی و خەلکێ پارێزگەھێ ب خوە حوکمەتا ناڤخوە پێکبینن”.
فازل بەشارەتی، بەرپرسێ لقا 12 یا پارتی دیموکراتی کوردستان ل ھەلەبجە دبێژیت” بەری نۆکە ئەم دگەل لایەنێن سیاسی ل سەر بەلاڤکرنا پۆستێن پارێزگەھا ھەلەبجە رێککەفتبووین، بەلێ گۆڕانێ و ئێکەتیێ ئەڤ رێککەفتنە شکاند و جارەکادی پۆستێن پارێزگەھێ ل سەر خوە بەلاڤکرن، کۆمبوونا مە یا دوماھیێ بێ ئەنجام بوویە و نوونەرێن گۆڕان و ئێکەتیێ بڕیارە ل گەل سەرکردایەتیێن خوە ئەڤێ پرسێ گوتوبێژ بکەن و دوبارە کار بۆ رێککەفتنا بەرێ بھێتەکرن، چونکی ب گۆرەی رێککەفتنا بەرێ پۆستێ قایمقامێ ھەلەبجە بەھرا پارتی دیموکراتی کوردستانە و ئەم دەست ژ ئەڤێ داخوازا خوە بەرنادەین، و درژدین ل سەر وەرگرتنا قایمقامێ ھەلەبجە، پارتی رێژەکا دەنگان ل ھەلبژارتنێن بۆری بدەستڤە ئینایە و مافێ مە یێ سرۆشتیە ئەم ئەڤی پۆستێ داخواز بکەین”.
ئەحمەد قەدەفەری، جێگرێ بەرپرسێ مەلبەندێ ئێکەتیێ ل پارێزگەھا ھەلەبجە بۆ رۆژناما ئەڤرۆ گۆت” ئەو رێککەفتنا دھێتە بەحسکرن، کو د ھەیڤا دەھدا ل بارەگەھێ بزاڤا ئیسلامی ھاتیەکرن رێککەفتن نەبوویە، بەلکۆ تنێ لێک تێگەھشتنبوو د ناڤبەرا لایەنێن سیاسی دا، دەمێ رێککەفتن ل دۆر پۆستێن سلێمانیێ ھاتیەکرن، برادەرێن مە ل گەل یێن بزاڤا گۆڕان پارێزگەھا ھەلەبجە ژی ڤەگرت، چونکی ھەلەبجە ژی ھەتا نۆکە ھەر ل سەر سلێمانیێ یە، نۆکە دووماھی کۆمبوون ل بارەگەھێ لقێ پارتی ھاتە گرێدان و تێدا بڕیار ھاتیەدان، بەرپرسێ مەلبەندێ ئێکەتیێ و مەکۆیا گۆڕان، ل گەل لیژنەیا دانوستاندکارا ئێکەتی و گۆڕان کۆمبیت و ھندەک راستڤەکرن بھێتەکرن ل دۆر پۆستێن ھەلەبجە، بەلێ وەکی تەنازول ئەم وەکی ئێکەتی ژ مافێ خوەیێ ھەلبژارتنان خۆشنابین و نادەینە چو لایەنەکی، کەس یێ بەرھەڤ نینە مافێ خوە بدەتە کەسەکێ دی، لەوما ئەم ژی مافێ خوە نادەینە کەسێ”.
ل دۆر پۆستێ قایمقامێ ناڤەندا ھەلەبجە کۆ پارتی دبێژیت مافێ مەیە و دەستا ژێ بەرنادەین، جێگرێ مەلبەندێ ئێکەتیێ دبێژیت” ئەم ژی دەست ژ ڤی پۆستی بەرنادەین و د بەرھەڤ نینین پۆستێ قایمقامێ ھەلەبجە بدەینە پارتی ، بەلێ ھەکە ل سەرکردایەتیێ رێککەفتنەک بھێتە کرن، ئەم ل گەل ڤێ چەندێ نینین، چونکی د دەستھەلاتا مەدا نینە سەرکردایەتی یە، بەلێ ھەکە ئەم وەکی مەلبەند بدەین، ڤی پۆستی نادەینە پارتی و ب مافێ خوە دزانین”.