ژبه‌ر ترسا داعه‌ش ده‌مێ ره‌ڤینێ برایى خوه ل براى نه‌دكره خودان بتنێ هه‌ركه‌سه‌كى خوه قورتاڵ دكر، ئه‌حمه‌د نائیف ئه‌حمه‌د، چیروكا هه‌رپێنج براێن خوه ڤه‌دگۆهێزیت كا چه‌وا براێن وى ل پێش چاڤێن وى هاتینه كوشتن برازایا وێ ژی ئاشكه‌را دكه‌ت كو 30 كچێن ئێزدى ژچه‌كدارێن داعه‌ش ب دووگیانن چه‌كدارێن داعه‌ش پێكولێ دكه‌ن زاروكێ خوه یێ نه‌شه‌رعى ژناڤ ببه‌ن.
ئه‌ڤرۆنیوز، هه‌رهین محه‌مه‌د:
زه‌لامه‌كێ بناڤێ ئه‌حمه‌د نائیف ئه‌حمه‌د نوكه ئاكنجیه د قوتابخانه‌كێ ڤه ل زاخو چیرۆكا خوه ڤه‌دگێرت كا چه‌وا پێنچ براێن وى دگه‌ل دو برازاێن وى ل پێش چاڤێن وى هاتینه كۆشتن وگۆت: ده‌مێ ئه‌م ژشنگالێ ره‌ڤین ده‌مژمێر هه‌شتى سپێدێ بوو چه‌كدارێن داعه‌ش ب سه‌رشنگالێ دا گرت، هه‌موو كه‌س دره‌ڤین قه‌ستا چیایێ شنگالێ دكرلێ گه‌له‌ك كه‌س هه‌بوو تورمبێل نه‌بوون، ب ده‌واران زاروێن خوه لێ سواردكرن ودره‌ڤاندن، لێ مالا برایێ من چ تورمبێل وده‌وارنه‌بوون خوه ژده‌ستێ چه‌كدارێن داعه‌ش قورتال بكه‌ن ل وى ده‌مى بتنێ من زاروكێن خوه وهه‌ڤژینا خوه قورتالكرن لێ من ب چاڤێ خوه دیتن ده‌مێ چه‌كدارێن داعه‌ش هه‌رپێنچ براێن من دگه‌ل دو برازاێن من كو قوتابێن كولیژا نوشدارى بوون كوشن، هه‌روه‌سا سێ برازاێن من ێن كچ دگه‌ل چار ژن براێن من چه‌كدارێن داعه‌ش ب زۆرى دگه‌ل خوه برن، هه‌تا نوكه هه‌ڤده زاروكێن براێن من دده‌ستێن چه‌كدارێن داعش دانه هه‌تا نوكه چو ژوان نزانین.
ئه‌حمه‌دى هه‌روه‌سا گۆت: روژه‌كێ ژ روژان برازایه‌كامن ب ناڤێ (غالیا) په‌یوه‌ندى ب من كر من ده‌ستپیكێ گۆتێ هوین ل كیڤه‌نه گۆتى نوكه ئه‌م دگرتینه ل ته‌له‌عفه‌ر و من ئه‌ڤ ئه‌له‌فونه یا ژچه‌كدارین داعه‌شێ دزیه، وهه‌تا من شیاى په‌یوه‌ندیێ ب وه بكه‌م به‌لێ چه‌كدارێن داعه‌ش گه‌له‌ك زۆریێ ل كچا ماما من جیلانێ كریه دبێژنێ دڤێت مۆسلمان بى و هه‌روه‌سا نڤێژان پێ ده‌نه‌كرن دبێژن دڤێت هوین بهێنه مزگه‌ڤتێ نڤێژان بكه‌ن، روژه‌كێ چه‌كدارێن داعه‌ش گۆته جیلانێ دڤێت تو سه‌رێ خوه بشوى چونكو پشتى تو نڤێژى دكه‌ى تو بۆ ئه‌میره‌كێ مه‌یى ده‌مێ (جیلانێ) گۆته چه‌كدارێن داعه‌ش ده‌لیڤێ بده‌نه من ئه‌ز سه‌رێ خوه بشوم پاشى ئه‌ز دێ دگه‌ل وه هیمه مزگه‌فتێ، جیلان چوو دسه‌رشویێ ڤه پرته‌كا شیشێ دگه‌ل خوه بره دسه‌رشویێ ڤه رهێن ده‌ستى َ خوه قه‌تاندن هه‌تا هه‌موو خویناوێ چووى چه‌كدارێن داعه‌ش گه‌له‌ك مانه ل هیڤیا جیلانێ به‌لێ جیلان ژ سه‌رشویێ ده‌رنه‌كه‌فت پشتى گه‌له‌ك ماینه ل هیڤیێ چه‌كدارێن داعه‌ش رابوون ده‌رگه‌هێ سه‌رشویێ شكاند چوونه دناڤ سه‌رشویێ دا دیتن كو وێ یاخوه كوشتى چه‌كدارێن داعه‌ش ته‌رمێ وى وه‌سا كره‌دبن ئه‌ردى ڤه، غالیا زیده‌تر دبێژیت گه‌له‌ك جاران چه‌كدارێن داعه‌شێ هه‌وده‌ن كۆ ده‌ست درێژیا سكسى دگه‌ل من بكه‌ن ده‌مێ قه‌ستا من دكه‌ن ئه‌ز خوه گێژدكه‌م خوه تێخمه ئه‌رى هنده جاران ژی خوه دین ژی دكه‌م به‌س دا كارێ كریت دگه‌ل من نه‌كه‌ن، به‌لێ چه‌كداره‌كێ داعه‌ش دوكچ ب خوه ب زۆرى برینه ئه‌و هه‌ردو كچه خویشكێن ئێكن ده‌ست درێژى ژی دگه‌ل وان هاتیه كرن، غالیایێ ئاشكه‌راكر كو ده‌مێ چه‌كدارێن داعه‌ش به‌رده‌وام كچ ب خوه دبرن ده‌ست درێژیا سكسى دگه‌ل كر نوكه دورێن (30) كچان ژ چه‌كدارێن داعه‌ش ب دوگیانن و لێ چه‌كدارێن داعه‌ش ئه‌ڤ زاروكه نه‌ڤێن و بزاڤان دكه‌ن كو ئه‌ڤ زاروكه نه‌هێنه سه‌ردونیایێ.
غالیایێ گۆتژى: نوكه ئه‌م دگرتینه وژیانه‌كا نه‌خوه‌ش دبورینن ئه‌گه‌ر هنده‌ك چه‌ك هه‌با دبیت مه‌ژى خوه كوشتبا چونكو گه‌له‌ك زورى ل مه دهێته كرن ول هه‌موو جهان زێره‌ڤان داناینه كه‌س نه‌شێت چو كاران بكه‌ت.
نيشاندان
