ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 12\11\2014 بهايێ دراڤى ل بازارێن پارێزگهها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1207 |
| 1 يۆرۆيێ ئه‌ورۆپى | 1505 |
| 1 ليرێ توركى | 535 |
دۆلار بلند بوو و يۆرۆ هات خوار
نووترين نووچه
- سەرۆكێ حوكمەتێ و قونسلێ فلستینێ دووماهی پێشهاتێن رەوشا غەزە گەنگەشەكرن
- د. خەلیل غازی: داهاتێ دەزگەهێن حوكمەتا ئیراقێ بۆ گەنجینەیا وەلاتی ناچن
- هەكە دۆزێن مللەتان د هندەك ویستگەهاندا تووشی راوەستییانێ ژی ببن، چو جاران ب دووماهی ناهێن
- مەسرور بارزانی و پاتریاركێ كەنیسەیا ئاشۆرییا رۆژهەلاتی دوپاتیێ ل پێشڤەبرنا كەلتوورێ پێکڤەژیانێ دكەن
- پارتی ل گەل ئێك لیستییێ یە ل دەڤەرێن كوردستانی یێن ل دەرڤەی ئیدارەیا هەرێمێ
- لەیلا قاسم نموونەیا قەهرەمانییا كچا كوردە و سیمبۆلا ئازادیخوازیێیە
- نێچیرڤان بارزانی: پێشوازیێ ل خوە هەلوەشاندنێ و چەكدانانا پەكەكێ دكەین
- نێچیرڤان بارزانی و مەسرور بارزانی پیرۆزباهیێ ل بنگەهێ لالشێ دكەن
- مەسرور بارزانی: پشتەڤانییا حوكمەتێ بۆ ب هێزكرنا ژێرخانەیا ئابۆری دێ بەردەوام بیت
- بنگەهێ لالش خزمەتەكا بەرچاڤ یا جڤاكێ ئێزدیاتیێ كریە
سهرهكى نوچێن گرنگ
ئاگه‌هداريه‌ك بۆ ده‌رچوويێن پۆلا 12 ئاماده‌يى
ئه‌ڤرۆ نيوز:
ناڤه‌ندا وه‌رگرتنێ ل وه‌زاره‌تا خواندنا بلند و ڤه‌كۆلينێن زانستى ل حوكمه‌تا هه‌رێما كوردستانێ داخوازێ ژ قوتابيێن پۆلێن 12ى ئاماده‌يى دكه‌ت كو ل ده‌مێ هه‌بوونا هه‌ر كێشه‌كێ د پڕكرنا داخوازيێن خوه يێن زانكۆلاين و سه‌ره‌دانا مه‌لبه‌ندێ شيره‌تكاريێ بكه‌ن.
د ڤێ راگه‌هاندنا وه‌زاره‌تا خواندنا بلند و ڤه‌كۆلينێن زانستى ل حوكمه‌تا هه‌رێما كوردستانێ يا كو دانه‌ك بۆ ئه‌ڤرۆ نيوز هنارتى هاتيه: رێڤه‌به‌ريا ناڤه‌ندا وه‌رگرتنێ ل وه‌زاره‌تا خوێندنا بلند و ڤه‌كۆلينێن زانستى ئاگه‌هداريا هه‌موو قوتابيێن پۆلا 12 دكه‌ت كو ل ده‌مێ پێشكێشكرنا فورمێن زانكۆلاين و روو ب رووى بوونا هه‌ر كێشه و ئاريشه‌كێ، سه‌ره‌دانا مه‌لبه‌ندێ شيره‌تكاريى بكه‌ن.
ئاشكه‌را ژى كريه كو بۆ ڤێ مه‌ره‌مێ 13 مه‌لبه‌ندێن شيره‌تكاريى ل زانكۆيێن هه‌رێمێ بۆ ب كارئاسانيكرن و برێڤه‌چوونا كارێن قوتابيان هاتينه دانان كو ئێدى پێدڤى ب وێ چه‌ندێ ناكه‌ت سه‌ره‌دانا ديوانا وه‌زاره‌تێ و ناڤه‌ندا وه‌رگرتنێ بكه‌ن.
بريتانيا بۆ جارا ئێكێ دربێن ئه‌سمانى وه‌شاندنه داعش
ئه‌ڤرۆ نيوز:
وه‌لاتێ بريتانيا بۆ جارا ئێكێ هێرش ب رێيا فرۆكێن بێ فرۆكه‌ڤان كره سه‌ر داعش ل عيراقێ ب گۆره‌ى داخۆيانيه‌كا وه‌زاره‌تا به‌ره‌ڤانيا بريتانى.
بريتانيا ب رێيا فرۆكا بێ فرۆكه‌ڤان ژ جۆرى “ريبر” هێرش كره سه‌ر باژێرێ بێجى ئه‌وا زێده‌تر پالاوگه‌هێن په‌ترۆلێ لێ د داناين.
وه‌زاره‌تا به‌ره‌ڤانيا بريتانى راگه‌هانديه كو هێرشا وان يا فرۆكيێن بێ فرۆكه‌ڤان هێرش ب سه‌ركه‌فتيانه ئه‌نجام دايه ل دژى وان چه‌كدارێن دڤيا ته‌قه‌مه‌نيان بچينن.
بريتانيا ئێكه ژ 40 وه‌لاتێن پشكدار د شه‌رێ دژى داعش دا، ئه‌وا گه‌له‌ك روويێ عيراق و سوريا داگير كرى.
ئه‌ڤ هێرشه هاتن پشتى ره‌زامه‌نديا په‌رله‌مانێ وى وه‌لاتى ژ لايێ پشكداريا سه‌ربازى ڤه ب چار رۆژان.
هه‌ر ديسا وه‌لاتێ بريتانيا راهێنه‌رێن سه‌ربازى ژى يێن هنارتينه عيراقێ بۆ هه‌ڤكاريكرنا له‌شكرێ عيراقێ ل دژى چه‌كدارێن داعش.
ژێده‌تر: BBC
هه‌تا پێڤه‌رێن ئاڤی نه‌هێنه دانان وه‌لاتی ژ دانا پاره‌ی ناهێنه لێبۆرین
دهۆك، له‌زگین جۆقی:
رێڤه‌به‌رێ ئاڤێ ل پارێزگهها دهۆكێ بۆ ئه‌ڤرۆ دیاركر كو هێشتا چو بریارێن فه‌رمی نه‌هاتینه دان بۆ لێبۆرینا وه‌لاتیان ژ دانا پارێ ئاڤێ بۆ ماوێ چار هه‌یڤان، گۆت ژی ئه‌م ل گه‌ل وه‌لاتیان تووشی ئاسته‌نگان دبین ل ده‌مێ وه‌رگرتنا پارێ هه‌یڤانه یێ ئاڤێ، كو هنده‌ك وه‌لاتی وه‌سا تێدگه‌ن كو نوكه یێن هاتینه لێبۆرین ژ دانا پاره‌ی.
جه‌لال جه‌میل رێڤه‌به‌رێ ئاڤێ ل پارێزگهها دهۆكێ ئه‌و ژی دیاركر كو هه‌تا پیڤه‌ر نه‌هێنه دانان و وه‌زاره‌تا دارایی و ئابووری بریارێ ل سه‌ر نه‌ده‌ت وه‌لاتی ناهێنه لیبۆرێن ژ دانا پارێ ئاڤێ، لێ نوكه ب تنێ كار یێ دهێته كرن و هیشتا پیڤه‌ر نه‌هاتینه دانان، ئاماژه دا وێ چه‌ندێ ژی كو ل هه‌ر پارێزگه‌هه‌كی دێ 100 هزار پیڤه‌ر هێنه دانان و هێشتا به‌رهه‌ڤ نه‌بووینه، هێشتا ل چو پاریزگه‌هان ده‌ست پێ نه‌هاتیه كرن.
ئاشكرا ژی كر كو ده‌مێ ده‌ست ب كاری دهێته كرن دێ نڤیسینگه‌هێن كۆمپانیێن جێبه‌جێكار هێنه ڤه‌كرن، گۆت ژی هه‌ر ژ مێژوویا پێڤه‌ر بۆ مالان دهێنه دانان ل وێ مێژوویێ وه‌لاتی دێ ژ دانا پاره‌ی بۆ چار هه‌یڤان هێنه لێبۆرین، گرێبه‌ست ل گه‌ل كۆمپانیان یێن هاتینه گرێدان د ماوێ دو سالان دا پیڤه‌ر بهێنه دانان لێ هێشتا رۆژا دانانا پیڤه‌ران نه‌یا دیاره.
پرۆژه ژ 50 وه‌به‌رهێنه‌ران هاتیه ستاندن
ئه‌ڤرۆ، ره‌وان نهێلی:
ژ ئه‌گه‌رێ بجهنه‌ئینانا پرۆژان زێده‌تر ژ 50 وه‌به‌رهێنه‌ر راده‌ستی دادگه‌هێ هاتینه كرن و پرۆژێن وان ژێ هاتینه ستاندن و ئه‌ندام په‌رله‌مانه‌ك ل لژنا نه‌زاهێ ل په‌رله‌مانێ كوردستانێ دیاركر كو گه‌له‌ك وه‌لاتی ژ پرۆژێن ل هه‌رێما كوردستانێ دهێنه ئه‌نجام دان نه درازی نه و گازندان دكه‌ن.
د كۆنفرانسه‌كی دا كو لژنا نه‌زاهێ ل په‌رله‌مانێ كوردستانێ ئه‌نجام دابوو رژدی ل سه‌ر پێدڤیا راگرتنا هه‌ڤسه‌نگیێ هاته كرن ل ناڤبه‌را وه‌لاتیان و خودانێن پرۆژێن وه‌به‌رهێنانێ كو پێدڤیه پرۆژه زێده‌تر د خزمه‌تا وه‌لاتیان دابن، هه‌روه‌سا دڤێت چاڤدێریا پرۆژان بهێته كرن بۆ تمام كرنا وان ب باشترین كۆالێتی.
برزو مه‌جید ئه‌ندامێ لژنا ده‌ستپاكیێ ل په‌رله‌مانێ كوردستانێ سه‌باره‌ت ئارمانجا كۆنفرانسی گۆت وه‌لاتیان سكالا ل سه‌ر پرۆژان هه‌بوون، له‌وما ئه‌ڤ كۆنفرانسه هاتیه ئه‌نجامردان و ل دووڤ ئامارێن ده‌سته‌یا وه‌به‌رهێنانێ ل سالا 2006 و هه‌تا نوكه مۆله‌ت ب دروستكرنا 143 هزار یه‌كه‌یێن ئاكنجیبوونێ هاتیه كرن، د به‌رامبه‌ر دا زێده‌تر ژ 50 وه‌به‌رهێنه‌ر ژی ژ ئه‌گه‌رێ بجهنه‌ئینانا پرۆژان و هه‌بوونا كێماسیان د پرۆژان دا هاتینه سزادان و روو ب روو دادگه‌هێ بووینه و پرۆژێن وان هاتینه هه‌لوه‌شاندن.
رۆژناما شه‌فه‌ق یا توركیا: ئه‌مریكا ل گه‌ل ئیران و سووریێ رێككه‌ڤتیه
رۆژناما یێنی شه‌فه‌ق یا توركیا د راپۆرته‌كا خوه دا به‌حسێ ڤێ یه‌كێ دكه‌ت كو هه‌فتیا بۆری ل باژارێ به‌غدا شانده‌كێ پایه‌بلند یێ ئه‌مریكا ل گه‌ل به‌رپرسێن ئیرانێ كۆمبوونه‌ك دروست كرینه و به‌حسێ شه‌رێ دژی داعشێ و رۆلێ كوردان ژی هاتیه كرن و ئه‌مریكا دیار كریه ئه‌و دێ هاریكاریا كوردان كه‌ن و ژ ئیرانێ ژی هاتیه خواستن كو رۆله‌كێ سه‌ره‌كی بۆ ژناڤبرنا داعشێ ب گێریت و ئیرانێ ژی هنده‌ك مه‌رجێن خوه دیار كرینه.
ئه‌ڤرۆ، هۆشه‌نگ:
رۆژناما یێنی شه‌فه‌ق یا توركیا د راپۆرته‌كێ دا دیار دكه‌ت كو به‌رپرسێن ئه‌مریكا د هه‌فتیا بۆری دا ل باژارێ به‌غدا جودا جودا ل گه‌ل شاندێن رژێما سووریێ و به‌رپرسێن ئیرانێ كۆمبوون دروست كرینه كو د كۆمبوونێ دا قاسم سلێمانی نوونه‌راتیا شاندێ ئیرانێ كریه و د كۆمبوونێ دا به‌حسێ شه‌رێ دژی داعشێ هاتیه كرن و ئه‌مریكا ژ ئیرانێ خواستیه كو رۆله‌كێ سه‌ره‌كی بۆ ژناڤبرنا داعشێ ب گێریت و به‌رپرسێ ئیرانی ژی داخواز كریه كو ئه‌مریكا سزایێن ئابووری ل سه‌ر ئیرانێ سڤك بكه‌ن و د به‌رنامێ ئه‌تۆمی دا ژی هاریكاریا ئیرانێ بكه‌ن.
ل گۆر راپۆرتا هه‌مان رۆژنامێ ل كۆمبوونا د گه‌ل شاندێ رژێما سووریێ ژی ئه‌مریكا بۆ وان دیار كریه كو نها كورد ب ره‌نگه‌كێ ئه‌كتیڤ شه‌رێ داعشێ دكه‌ن و ئه‌مریكا دێ به‌رده‌وام هاریكاریا كوردان بكه‌ت و دڤێت سووریه ژی مافێ كوردان بده‌ته وان و شاندێ رژێما سووریێ ژی دیار كریه كو وان پرۆژه‌ك بۆ چاره‌كرنا پرسا كوردی ل وه‌لاتێ خوه ئاماده كرینه لێ ئه‌و ب چو ره‌نگه‌كێ رازی نابن كو كورد ژ سووریێ جودا ببن و وان دڤێت پرسا كوردی د چارچۆڤێ سووریایه‌ك نوو دا بهێته چاره‌كرن.
د به‌رده‌وامیا راپۆرتێ دا هاتیه دیار كرن كو هه‌ر سێ وه‌لات رێككه‌ڤتنه‌ك د ناڤبه‌را خوه دا دروست كرینه و ل گۆر وێ رێككه‌ڤتنێ دێ هه‌ر سێ وه‌لات پێكڤه شه‌رێ داعشێ بكه‌ن و ئه‌مریكا ژی نها چو تشته‌كێ ل دژی رژێما سووریێ ناكه‌ت و هنده‌ك داخوازیێن ئیرانێ ژی دێ هێنه بجه ئینان، چونكو ئارمانجا سه‌ره‌كی یا ئۆباما ژناڤبرنا داعشێ یه و ژ بۆ وێ یه‌كێ ژی ئه‌مریكی ب هه‌موو ره‌نگه‌كێ بزاڤێ دكه‌ن كو ئیران رازی بیت هاریكاریا وان بكه‌ت.
د پشكه‌كا دی یا راپۆرتێ دا هاتیه دیار كرن كو شاندێ ئه‌مریكی ل گه‌ل به‌رپرسێن كوردێن سووریێ ژی هه‌ڤدیتن كرینه و بۆ وان دیار كرینه كو هه‌كه ئه‌و د ناڤا خوه دا ئێكگرتی بن ئه‌مریكا دێ ب هه‌موو ره‌نگه‌كێ بۆ شه‌رێ دژی داعشێ هاریكاریا وان بكه‌ت.
د دووماهیا راپۆرتێ دا هاتیه دیار كرن كو به‌رپرسێن توركیا ژ وێ رێككه‌ڤتنێ گه‌له‌ك دلگرانن و هه‌كه ئه‌و رێككه‌ڤتن بگه‌هیته ئه‌نجامه‌كا باش ئێدی توركیا نه‌شێت وه‌ك جاران ل ده‌ڤه‌رێ ببیته خوه‌دان رۆله‌ك مه‌زن و دێ ئیران ل گه‌ل سووریێ و ب هاریكاریا عیراقێ رۆله‌ك سه‌ره‌كی ب گێرن و ره‌نگه د رۆژێن داهاتی دا شانده‌كێ توركیا سه‌ره‌دانا ئه‌مریكا بكه‌ن و سه‌باره‌ت ب وێ به‌رنامێ هه‌ڤدیتنان ل گه‌ل به‌رپرسێن ئه‌مریكا ساز بكه‌ن، لێ هه‌تا نها ژی سه‌باره‌ت ب ڤێ رێككه‌ڤتنێ چو به‌رپرسه‌كێ ئیرانێ داخۆیانیێن فه‌رمی نه‌داینه و به‌رپرسێن توركیا ژی هه‌روه‌سا چو هه‌لویسته‌ك فه‌رمی دیار نه‌كرینه و بزاڤه‌كا مه‌زن ل پشت په‌رده‌ی دا دهێته كرن.
ده‌رمانێن تایبه‌ت بۆ ئاواران دێ هێنه دابین كرن
ئه‌ڤرۆ:
ژ بۆ دووڤچۆنا ره‌وشا ساخله‌میا ئاواران بریكارێ وه‌زاره‌تا ساخله‌میا عیراقا فیدرال د. خه‌میس ئه‌لسه‌عه‌د سه‌ره‌دانا رێڤه‌به‌ریا گشتیا ساخله‌میا پارێزگهها دهۆكێ كر و گه‌نگه‌شه ل دۆر ساخله‌میا ئاواران هاته كرن.
رێڤه‌به‌رێ گشتیێ ساخله‌میا پارێزگهها دهۆكێ د. نزار عسمه‌ت دیاركر كو ده‌مێ ئاواره ژ قوتابخانان بۆ كه‌مپان د هێنه ڤه‌گوهاستن ره‌نگه بنگه‌هێن ساخله‌میێ ل ده‌مێ خوه ب دووماهی نه‌هێن، له‌ورا ساخله‌میا دهۆكێ پێدڤی ب ده‌ه كلینیكێن گه‌رۆك هه‌یه ژ بۆ ساخله‌میا ئاواران و گۆت یا گرنگه وه‌زاره‌تا ساخله‌میێ ل عیراقا فیدرال ره‌وشا ساخله‌میێ و مرۆڤایه‌تی ل به‌ر چاڤ وه‌ربگریت و ده‌رمان و پێدڤیێن نوشداری ل دووڤ پێدڤیێن ئاواران دابین بكه‌ت، نه‌خاسمه نوكه وه‌رزێ زڤشتانێ یه و دێ پێدڤی ب گه‌له‌ك جۆرێن ده‌رمانان بین.
خواست ژی ئه‌و نوشدار و كارمه‌ندێن ساخله‌میێ یێن ئاواره‌ی دهۆكێ بووین ب رێیا ساخله‌میا دهۆكێ سه‌ره‌ده‌ری ل گه‌ل بهێته كرن و بكه‌ڤنه كاری داكو بشێن به‌رده‌وامیێ ب كارێ خوه بده‌ن و مفا ژ شیانێن وان بهێته وه‌رگرتن و گۆت هه‌ر ژ نوكه پێدڤیه ئه‌م خوه ئاماده بكه‌ین بۆ دابین كرنا پێدڤیێن ساخله‌میێ یێن ل ده‌ڤه‌رێن ل ژێر ده‌ستێ داعش دهێنه رزگار كرن، چونكو گه‌له‌ك كارتێكرن ل ده‌زگه‌هێن ساخله‌میێ هاتیه كرن و دێ پێدڤی ب ده‌رمان و كه‌رستێن نوشداری بن.
بریكارێ وه‌زاره‌تا ساخله‌میا عیراقێ دیاركر كو هه‌لویستێن ساخله‌میێ یێن دیرۆكی بووینه ل گه‌ل ئاوارن و گۆت پشته‌ڤانیا مه نه ل ئاستێ پێدڤی بوویه و ئه‌گه‌ر ژی بۆ رێك و هنده‌ك جارا هه‌لویستێن سیاسی ڤه‌دگه‌رن و پێدڤیه وان كێماسیان قه‌ره‌بوو بكه‌ین، كو پێدڤیه ده‌رمانێن تایبه‌ت بۆ ئاواران بهێنه دابین كرن و جودا ژ یێن دی داكو پاراستنا ساخله‌میا وان بهێته كرن و چاڤدێریه‌كا دروست بۆ هه‌بیت.
سه‌ركرده‌كێ ئێكه‌تيێ: به‌رهه‌م سالح پشكداریێ د چالاكیێن ئێكه‌تیێ دا ناكه‌ت
هه‌ڤدیتن: قائید میرۆ
فه‌رید ئه‌سه‌سه‌رد ئه‌ندامێ جڤاتا سه‌ركردایه‌تیا ئێكه‌تی نیشتیمانی كوردستان د هه‌ڤدیتنه‌كا رۆژناما ئه‌ڤرۆ دا،به‌حسێ ره‌وشا نوكه یا ئیكه‌تیێ و بوچوونا ئێكه‌تیێ ل دۆر پرسێن گرنگ مینا راستڤه‌كرنا پرۆژێ قانوونا دستوورێ هه‌رێمێ و ئاریشێن دناڤ حزبا خوه دا دكه‌ت و دبێژیت، ژ به‌ری هه‌لبژارتنان دكتۆر به‌رهه‌م سالح پشكداریێ د چالاكیێن ئێكه‌تیێ دا ناكه‌ت و یا خوه ته‌جمید كری.
ئه‌ڤرۆ: بۆچی پاشه‌رۆژا ئێكه‌تیێ گه‌هشته ڤێ چه‌ندێ كو هه‌ر كه‌سه‌ك ب خوه بڕیارێ بده‌ت و بوچوونێن جودا هه‌بن؟
فه‌رید ئه‌سه‌سه‌رد: دیارده‌یه‌كێ ل ناڤ ئێكه‌تیێ سه‌رێ خوه هه‌لدایه ئه‌وژی دیاردا به‌رفره‌هبوونا سه‌نته‌رێ بڕیاردانێ، مخابن ئه‌ڤه ئێكه ژ ئاریشێن دناڤا ئێكه‌تیا نیشتیمانی دا و ئه‌م نه‌شیاینه چاره‌سه‌ربكه‌ین، ئه‌ڤه ژی بۆ وێ چه‌ندێ ڤه‌دگه‌ڕیت ژلایێ دیرۆكی ڤه ئێكه‌تی وه‌كی به‌ره‌یه‌كی به‌رفه‌ره پێكهاتبوو و پێدڤی بوو ببنه ئێك بوچوون، به‌لێ به‌رۆڤاژی لێهات، فره جه‌مسه‌ری ل ناڤ حزبێن سوسیال هه‌بوویه و نوكه ژی هه‌یه.
ئه‌ڤرۆ : به‌لێ ئێكه‌تیێ رێككه‌فتن دگه‌ل پارتی هه‌یه و دڤێت پێگریێ پێ بكه‌ت؟
فه‌رید ئه‌سه‌سه‌رد: ئه‌ڤه راسته، گه‌له‌ك جاران هه‌بوویه جڤاتا سه‌ركردایه‌تیێ بۆچوونه‌ك هه‌بیت ل دۆر پرسه‌كێ، به‌لێ جڤاتا ناڤه‌ندی بۆچوونه‌كا جودا هه‌بوویه و هه‌ردو لایه‌نان ب ئاشكرا نێڕینا خوه گۆتیه.
ئه‌ڤرۆ : تو نابینی نوكه ئێكه‌تی وه‌كی ئۆپۆزسیۆنێ یا كار دكه‌ت؟
فه‌رید ئه‌سه‌سه‌رد: نه‌خێر ئه‌م پشكه‌كین ژ حوكمه‌تێ و مه پۆستێن گرنگ هه‌نه دناڤا حوكمه‌تا هه‌رێما كوردستانێ دا، لێ په‌رله‌مانتارێن ئێكه‌تیێ ئازادن ژ ده‌ربڕینا هه‌لویستێ خوه دناڤا په‌رله‌مانی دا، به‌لێ وه‌زیرێن ئێكه‌تیێ به‌رنامه‌یه‌ك نینه ژ ده‌رڤه‌ی به‌رنامێ جڤاتا وه‌زیران بیت.
ئه‌ڤرۆ : كی ده‌ربڕینێ ژ سیاسه‌تا راسته‌قینه‌یا ئێكه‌تیێ دكه‌ت؟
فه‌رید ئه‌سه‌سه‌رد: ب تنێ مه‌كته‌با سیاسی یا ئێكه‌تیا نیشتیمانیا كوردستانێ نوونه‌رایه‌تیا ئێكه‌تیێ دكه‌ت.
ئه‌ڤرۆ : درێژكرنا ده‌مێ سه‌رۆكایه‌تیا سه‌رۆكێ هه‌رێما كوردستانێ به‌ر ب دووماهیێ ڤه دچیت، هه‌لویستێ ئێكه‌تیێ چیه ل دۆر ڤێ چه‌ندێ؟
فه‌رید ئه‌سه‌سه‌رد: نوكه ئه‌ڤ پرسه ل به‌ر ده‌ستێ په‌رله‌مانێ كوردستانێ یه و په‌رله‌مانی ده‌مێ ویلایه‌تا سه‌رۆكێ هه‌رێما كوردستانی درێژكریه و نامه‌كا سه‌رۆكێ هه‌رێمێ ژی هه‌یه و داخوازێ ژ په‌رله‌مانی دكه‌ت، ده‌ست ب راستڤه‌كرنا دستوورێ هه‌رێما كوردستانێ بكه‌ت.
ئه‌ڤرۆ : ئێكه‌تیێ ب خوه پرۆژێ قانوونا دستوورێ هه‌رێما كوردستانێ په‌سه‌ندكریه و بۆچی نوكه دوباره داخوازا راستڤه‌كرنێ دكه‌ت؟
فه‌رید ئه‌سه‌سه‌رد: ئه‌م ل گه‌ل پارتی رێككه‌فتینه ل دۆر پرسا دستووری، مه دستوور په‌سه‌ندكریه ، به‌لێ ئه‌م وه‌سا دگه‌ل پارتی رێككه‌فتینه كو دستوور بهێته ڤه‌گه‌ڕاندن بۆ په‌رله‌مانی و ل هه‌مبه‌ردا مه دو سال ویلایه‌تا سه‌رۆكێ هه‌رێما كوردستانێ درێژكریه، ئه‌ڤا ل سه‌ر مه بوو، مه ده‌مێ سه‌رۆكێ هه‌رێمێ درێژكر، یا مای ڤه‌گه‌ڕاندنا پرۆژێ قانوونا دستووری یه و پارتی ژی یا رازیه ب ڤێ چه‌ندێ.
ئه‌ڤرۆ : ئه‌رێ راسته ئێكه‌تیێ ته‌كتیكا كاركرنا خوه یا گوهۆڕی ؟
فه‌رید ئه‌سه‌سه‌رد: به‌لێ، مه هه‌موو ته‌كتیكێن خوه یێن گوهۆڕین، گه‌له‌ك یا ب زه‌حمه‌ته بشێین ل سه‌ر میكانزمێن به‌ری هه‌لبژارتنان كار بكه‌ین، مه بزاڤ كرینه شێوازێ كاركرنامه ب شێوه‌كی بیت ل گه‌ل ره‌وشا نوكه بهێته گونجاندن.
ئه‌ڤرۆ : ئه‌رێ راسته هه‌ر كه‌سه‌كێ دناڤ ئێكه‌تیێ دا مه‌یلا مالباتا جه‌لال تاله‌بانی ڤێ نه‌بیت، دژایه‌تیا وی كه‌سی دهێته‌كرن و ناهێلن چو پۆستان وه‌رگریت؟
فه‌رید ئه‌سه‌سه‌رد: ئه‌ڤه زێده‌گاڤیه‌كه دهێته گۆتن د وه‌سفكرنا ره‌وشا ناڤا ئێكه‌تیێ دا، ئه‌ڤه ژی ژ وێ چه‌ندێ هاتیه كو ره‌وشا ناڤا ئێكه‌تیێ شێواندنه‌ك پێڤه دیاره، ئه‌ڤ شێواندن دبیته ئه‌گه‌رێ هندێ خه‌لك وه‌سفێن خراپ بۆ ئێكه‌تیێ بكه‌ت، بێگومان وه‌كی خه‌لك تێگهه‌شتی ره‌وشا ناڤا ئێكه‌تیێ هه‌تا وی راده‌ی یا خراب نینه، ئه‌م ژی ناخوازین ئاریشێن ناڤ ئێكه‌تیێ ب ڤی شێوه‌یێ خراپ بمینیت و به‌رده‌وام بزاڤێن چاره‌سه‌ركرنێ دكه‌ین.
ئه‌ڤرۆ : سه‌رۆكێ جڤاتا ناڤه‌ندی د داخویانیه‌كێ دا دبێژیت به‌رهه‌م سالح دێ ژ ئێكه‌تیێ جودابیت، تو نابینی ئێكه‌تیێ ڤێ دوماهیێ به‌رهه‌م سالح پشتگوه هاڤێتیه؟
فه‌رید ئه‌سه‌سه‌رد: نه‌خێر، ئێكه‌تیێ به‌رهه‌م سالح پشتگوه نه‌هاڤێتیه، دكتۆر به‌رهه‌م هنده‌ك بوچوونێن تایبه‌ت هه‌بوون و په‌یوه‌ندی ب به‌ری هه‌لبژارتنان ڤه هه‌بوون، پشتی راگه‌هاندنا ئه‌نجامێن هه‌لبژارتنێن سالا 2013ێ كو ئه‌نجام بۆ ئێكه‌تیێ كاره‌سات بوون، پرسا كۆنگرێ هاته پێش، كۆنگره‌ژی هه‌ر ب خوه گیرۆببوو، بوچوونا به‌رهه‌م سالحی و هه‌ژماره‌كا كادران ئه‌و بوو ب هه‌ر حالێ هه‌بیت كۆنگرێ ئێكه‌تیێ گرێ ده‌ین، ده‌مێ كۆنگره نه‌هاتیه گرێدان و ئه‌ز ب خوه لگه‌ل ڤێ چه‌ندێ بوم كۆنگره نه‌هێته گرێدان و ده‌مێ كۆنگرێ نه‌بوو، وی ده‌می به‌رهه‌م سالح نامه‌ك هنارت و یا نێزیكبوو ژ ده‌ست كار ڤه‌كێشانێ و وی ده‌می و پێڤه به‌رهه‌م سالح پشكداریێ د چالاكیێن گشتی یێن ئێكه‌تیێ دا ناكه‌ت و یا خوه ته‌جمید كری، به‌لێ ئه‌ڤه رامانا وی َ چه‌ندێ نینه ده‌ست ژ كار به‌ردایه، دكتۆر به‌رهه‌م كه‌سه‌كه ئێكه‌تی دشێت مفای ژ شیانێن وی وه‌ربگریت و دخوازین ڤه‌گه‌ڕیت.
ئه‌ڤرۆ : كی یه پۆستێن ئێكه‌تیێ ئێكلا دكه‌ت و بڕیار د ده‌ستێ كێ دایه؟
فه‌رید ئه‌سه‌سه‌رد: ئه‌ڤه ل سه‌ر وی پۆستی رادوه‌ستیت و ب دیتنا من ئه‌ڤه پرسیاره‌كا گشتی یه و نه‌شێم وه‌كی خوه به‌رسڤێ بده‌م.
ئه‌ڤرۆ : ئایا مه‌رجه بۆ ئێكلاكرنا هه‌ر پۆسته‌كی هێرۆ خان یا رازیبیت؟
فه‌رید ئه‌سه‌سه‌رد: مه‌كته‌با سیاسی كۆم دبیت و بڕیارێ ل سه‌ر ئێكلاكرنا پۆستان دده‌ت و هێرۆ خان ئێك ده‌نگه دناڤ چه‌ند ده‌نگێن جڤاتا سه‌ركردایه‌تیی دا.
ئه‌ڤرۆ : بڕیاربوو ئێكه‌تی ده‌ست ب چاكسازیێ بكه‌ت، ئایا ڤێ پرۆسێ ده‌ستپێكریه؟
فه‌رید ئه‌سه‌سه‌رد: مه ده‌ست ب چاكسازیێ كریه و بێگومان دڤێت به‌رفره‌هترببیت، بۆ نموونه گرێدانا كۆنگره‌ی ب خوه چاكسازی بوو، چونكی بڕیار ل سه‌ر هه‌لوه‌شاندنا هژماره‌كا ده‌زگه‌هان هاته‌دان و هنده‌كێن نوو هاتنه دامه‌زراندن، كێمكرنا هژمارا مه‌لبه‌ندێن ئێكه‌تیێ، به‌لێ ئه‌ڤه به‌س نینه بۆ به‌ر ب پێشبرنا حزبه‌كێ، من دڤێت ئێكه‌تی ببیته حزبه‌كا مه‌ده‌نی، مه ل كوردستانێ حزبێن مه‌ده‌نی نینن، و بوچوونا ڤێ حزبا مه‌ده‌نی ره‌نگڤه‌دانێن سوسیال دیموكراتبن.
ئه‌ڤرۆ : به‌لێ ئێكه‌تی پتر حزبه‌كا سه‌ربازیه و چه‌ندین ده‌زگه‌هێن ئه‌منی و سه‌ربازی هه‌نه؟
فه‌رید ئه‌سه‌سه‌رد: ئه‌ڤا ته مه‌ره‌م پێ هه‌ی ئه‌ڤه حوكمه‌ته و په‌یوه‌ندی ب حزبا مه‌ده‌نی ڤه نینه.
ئه‌ڤرۆ : ئێكه‌تیێ ل به‌ر نینه كه‌سه‌كێ دی ل شوونا كوسره‌ت ره‌سول بكه‌ته جێگرێ سه‌رۆكێ هه‌رێمێ؟
فه‌رید ئه‌سه‌سه‌رد: گوهۆڕین نه، به‌لێ مه د كۆمبوونه‌كا ل گه‌ل مه‌سعودبارزانی سه‌رۆكێ هه‌رێما كوردستانێ دا ئه‌ڤ چه‌نده به‌حسكریه، كو پێدڤیه پۆستێ جێگرێ سه‌رۆكێ هه‌رێما كوردستانێ بهێته كاراكرن، مه‌رج نینه بهێته گوهۆڕین، هه‌ر بلا كۆسره‌ت ره‌سول بیت، به‌لێ پتر كارێ خوه بكه‌ت و وه‌كی به‌رێ نه‌بیت.
ئه‌ڤرۆ : ژبه‌ر كو ره‌وشا ساخله‌میا كوسره‌ت ره‌سول وه‌كو پێدڤی نینه و وی ب خوه ژی ته‌كه‌زكریه ساخله‌میا وی رێ ناده‌ت یێ كارابیت، ئایا مه‌كته‌با سیاسی به‌حسێ گۆهۆڕینا وی نه‌كریه؟
فه‌رید ئه‌سه‌سه‌رد: نه‌خێر، به‌حسێ گوهۆِرینا كوسره‌ت ره‌سولی ل مه‌كته‌با سیاسی نه‌هاتیه‌كرن.
حه‌فتیا بهێت فۆرمێن دامه‌زراندنێ دێ هێنه به‌لاڤكرن
ئه‌ڤرۆ، حه‌مۆ محه‌مه‌د:
په‌یڤدارێ وه‌زاره‌تا په‌روه‌ردێ یێ حوكمه‌تا هه‌رێما كوردستانێ بۆ ئه‌ڤرۆ دیار كر كو حوكمه‌تا هه‌رێمێ بڕیار ل سه‌ر دامه‌زراندنا چار هزار مامۆستایان ب شێوێ گرێبه‌ست دایه و د حه‌فتیا بهێت دا دێ فۆرمه هێنه به‌لاڤكرن.
فاتیح مه‌وله‌وی زاده، په‌یڤدارێ وه‌زاره‌تا په‌روه‌ردێ ئاشكرا كر، پشتی حوكمه‌تا هه‌رێما كوردستانێ د چه‌ند رۆژێن بۆری دا بڕیارا دامه‌زراندنا 4000 مامۆستایان ب شێوێ گرێبه‌ست ده‌رخستی، وه‌زاره‌تا په‌روه‌ردێ ده‌ست ب به‌رهه‌ڤیا كریه بۆ دامه‌زراندنا وان و گۆت “بڕیار ئه‌وه، د حه‌فتیا بهێت دا فۆرمێن دامه‌زراندنێ ب رێیا رێڤه‌به‌ریێن په‌روه‌ردان بهێنه به‌لاڤكرن و رێنمایی یێن د ناڤ فۆرمێ دا”.
خویا ژی كر، هه‌ر چه‌نده وان وه‌كو وه‌زاره‌تا په‌روه‌ردێ د ده‌مێ بۆری دا داخوازا دامه‌زراندنا شه‌ش هزار مامۆستایان كربوو، لێ ژ ئه‌گه‌رێ وێ كێشا دارایی یا ب سه‌ر هه‌رێما كوردستانێ دا هاتی د پێنگاڤا ئێكێ دا دێ چار هزار مامۆستا ب شێوێ گرێبه‌ست هێنه دامه‌زراندن و دو هزار ژی د پێنگاڤا دویێ دا، لێ جارێ دیار نینه كه‌نگی ئه‌و دو هزاره دێ هێنه دامه‌زراندن.
ناڤهاتی ئاماژه دا وێ چه‌ندێ ژی كو دامازراندنا وان مامۆستایان وه‌كو سالێن به‌ری نوكه ب گوتره نابیت، به‌لكو دێ ل دووڤ پێدڤیا په‌روه‌ردان بیت، ئانكو هه‌ر په‌روه‌رده‌كێ پێدڤی ب چ بسپۆری هه‌بیت، ئه‌و دێ بۆ هێنه دامه‌زراندن و گۆت “دامه‌زراندن دێ ب ره‌نگه‌كی بیت، ل هه‌ر ده‌ڤه‌ر و په‌روه‌رده‌كێ كێشا میلاكێ بسپۆر بۆ بابه‌تان هه‌بیت دێ ئه‌و بسپۆریه هێنه دامه‌زراندن”.
په‌یڤدارێ وه‌زاره‌تا په‌روه‌ردێ یێ حوكمه‌تا هه‌رێمێ دوپاتكر كو بڕیاره د ده‌مه‌كێ نێزیك دا ژ لایێ وه‌زاره‌تا دارایی و ئابووریا حوكمه‌تا هه‌رێما كوردستانێ ڤه بودجه بۆ وان مامۆستایێن بڕیاره بهێنه دامه‌زراندن بهێته دابینكرن.
سه‌ۆرك وه‌زیرێن عیراقێ حه‌یده‌ر عه‌بادى رازیبوو
ئه‌ڤرۆنیۆز،ناجی به‌ده‌ل:
حه‌یده‌ر عه‌بادی سه‌رۆك وه‌زیرێ عیراقێ ره‌زامه‌ندی ده‌ربریه ل سه‌ر چه‌كداركرنا هوزێن توخیبێ پارێزگهها ئه‌نبار .
ده‌ربارێ ئه‌وێ چه‌ندێ سه‌باح كه‌رحوت سه‌رۆكێ جڤاتا پارێزگهها ئه‌نبار د داخویانیه‌كا رۆژنامه‌ڤانی دا راگه‌هاندبۆ سه‌رۆك وه‌زیر رازی بوه ل سه‌ر رێكخستنا ئه‌ندامێن هوزان و چه‌كداركرن و بهێزكرنا وان بو ریب ری بونا چه‌كدارێن داعشێ.
ئه‌و بریارا سه‌رۆك وه‌زیرێ عیراقێ پشتی ئه‌وێ ئێكێ هات كو داعشی ب سه‌دان كه‌سێن سه‌ر ب هوزا ئه‌بو نه‌مر هوزێن دی ل سێداره دان كو ئه‌و ژی كارڤه‌دانێن ناڤخوی و ده‌ره‌كی ب ده‌ست خوڤه ئینان.
بریارا عه‌بادی ئه‌وی ده‌می دا بو كو سه‌رۆكی جڤاتا پارێزگهها ئه‌نبار حكومه‌ت تومه‌تبار كر به‌رامبه‌ر ئه‌وێ چه‌ندی كو نه‌ڤێت پشته‌ڤانیا سه‌ربازی پێشكێشی پارێزگه‌هێ بكه‌ت.
چه‌كداركرنا ئه‌ندامێن هوزان مل بملێ هێزێن سوپایێ به‌شداریێ بكه‌ن د رامالینا چه‌كدارێن داعشی و پاراستنا سه‌رۆ ومالێ وه‌لاتیاندێ چه‌ندین ئه‌نجامین ئه‌رینی و نه‌رینی یێن خو هه‌بن وه‌ك چه‌وا سوپایێ عیراقێ توش بوی ل ئه‌ڤێ هه‌یاما چویی ل نه‌شیا خو رابگریت هه‌مبه‌ر داعشێ.
نيشاندان
WP Facebook Auto Publish Powered By : XYZScripts.com