ئەڤرۆ، سەرجان مەحمود:

ھەڤسەرۆکێ پارتا دیمۆکراسیا گەلان (HDP) د داخویانیەکی دا راگەھاند کۆ ئەو رێککەڤتنا ل دھۆکێ یا د ناڤبەرا ئالیێن رۆژئاڤا دا گەلەک گرنگ دبینن و یەکگرتنا کوردان سەرکەڤتنێ و ئازادیێ گەرەنتی دکەت و بەرخوەدانا ل کۆبانێ و شنگالێ بۆ جیھانێ سەلماند کو گەلێ کورد ئێدی ژ بلی ژیانەکا ئازاد و ب رومەت چ تشتەکا دی قەبوول ناکەت.

سەلاحەدین دەمیرتاش ھەڤسەرۆکێ پارتا دیمۆکراسیا گەلان (HDP) د ھەڤپەیڤینەکی دا تایبەت بۆ رۆژناما ئەڤرۆ ل سەر کۆمبوون و رێککەڤتنا دھۆکێ یا د ناڤبەرا ئالیێن رۆژئاڤایێ کوردستانێ دا، شەرێ ل کۆبانێ و قۆناغا ئاشتیێ ل باکورێ کوردستانێ و تورکیا داخۆیانیێن گرنگ دان و راگەھاند کو گەلێ کورد تێکۆشینا ئازادیێ و پاراستنا دەستکەڤت و پیرۆزیێن خوە دکەت و تێکۆشینەکا ب رومەت و دیرۆکیە و دڤێت د دەستپێکێ دا تورکیا و ھەموو وەلاتێن جیھان ئێدی ماف و راستیا کوردان ل رۆژھەلاتا ناڤین قەبوول بکەن.

دەمیرتاش سەبارەت ب کۆمبوونا دھۆکێ یا ب دەستپێشخەریا بەرێز مەسعود بارزانی سەرۆکێ ھەرێما کوردستانێ د ناڤبەرا ئالیێن سیاسیێن رۆژئاڤایێ کوردستانێ دا ھاتە پێکئینان و د ئەنجامدا ھەر دو ئالی گەھشتنە رێککەڤتنەکی، راگەھاند کو ئەو رێککەڤتنا دھۆکێ ل ھەڤھاتنەکا دیرۆکی دبینن و گۆت: (رێککەڤتنا دھۆکێ دلێ ھەموو کوردان خوەش کر و د دەمەکی ھەری گرنگ دا بو پشتەڤانەکا مەزن بۆ بەرخوەدانا کۆبانێ و تێکۆشینا ئازادیا کوردان و دڤێت ئەڤ رێککەڤتن ئێدی ببیتە بنگەھێ رێککەڤتنا مەزنا نەتەوا کورد و ئەز باوەر دکەم ژ ھەر دەمی زێدەتر باوەریا ب ئازادیێ و یەکگرتنێ د ناڤ گەلێ کورد دا زێدە بوویە و دل و روحێ بەرخوەدانڤانێن کۆبانێ و شنگالێ شاد کریە و ھێز و شیانا بەرخوەدانێ بلند کریە).

ھەڤسەرۆکێ HDP ل سەر رەوشا کۆبانێ و ھێرشێن داعشێ ژی راگەھاند کو رۆژ ب رۆژێ بەرخوەدانا کۆبانێ مەزنتر دبیت و پەیوەندیێن مە بەردەوام ل گەل بەرپرسێن کانتۆنا کۆبانێ ھەنە و ب وان را د ناڤ گەنگەشێ داینە و گۆت: (ب تایبەت پشتی گەھشتنا چەکێن باشورێ کوردستانێ ب رێیا فرۆکێن ئەمریکا ورەیا شەرڤانێن یەکینەیێن پاراستنا گەل و خەلکێ باکور و رۆژئاڤا گەلەک ب ھێزتر کریە و بەرپرسێن کۆبانێ بەرھەڤن ب رەنگەکی گەرم پێشوازیێ ل ھێزێن پێشمەرگە یێن کوردستانێ بکەن و چوونا پێشمەرگەیان دێ ھێزا شەری مەزنتر بکەت و دێ روحیا تیرۆرستان تێک شکینیت، چاوا یەکینەیێن پاراستنا گەل ل گەل برایێن خوە یێن پێشمەرگە ل کەرکووک، شنگال، مەخمور و رەبیعە شەرێ تیرۆرست و داگیرکەران کرن، ب ھەمان رەنگی ل کۆبانێ ژی بەرخوەدانا پێکڤە یا پێشمەرگە و شەرڤانێن کورد دێ سەرکەڤتنێ گەرەنتی بکەت).

سەلاحەدین دەمیرتاش ل سەر رەوشا قۆناغا ئاشتیێ ل تورکیا و باکورێ کوردستانێ ژی راگەھاند کو قۆناغا ئاشتیێ د رەوشەکا ھەستیار دایە و ھەتا نھا ژی حوکمەتا تورکیا نەخشا چارەکرنا پرسا کوردی و ئاشتیێ زەلال نەکریە و گۆت: (ئەز دشێم ب رحەتی بێژم کو حوکمەتا تورکیا نھا بەرھەڤیێ بۆ ھەلبژارتنێن بھێت یێن پەرلەمانێ دکەت و ھەموو ئاخڤتن و کریارێن حوکمەتێ نھا ل دژی پارتا مە یە و پرۆپگاندا رەشکرنا من و پارتیا مە برێڤە دبەن و سیاسەتا خاپاندنێ یا حوکمەتێ بەردەوام دکەت، ئەز ژ بەر ڤێ چەندێ جارەکا دی ژی بۆ حوکمەتێ دبێژم کو کریار و ئاخڤتن و سیاسەتا ھەوە قۆناغا ئاشتیێ دخیتە مەترسیێ و رێکا دەستپێکرنا شەری ڤەدکەت).

دەمیرتاش د دووماھیا ئاخڤتنا خوە دا ژی راگەھاند کو حوکمەتا تورکیا ئەڤ نێزیکی دو ھەیڤن ھەموو سیاسەت و بەرھەڤیێن خوە ل گۆر بنکەڤتنا کوردان ل شنگال و کۆبانێ دروست کریە و دخواستن کو کۆبانێ بکەڤیتە دەستێ داعشێ و دەستکەڤتێن گەلێ کورد ل رۆژئاڤایێ کوردستانێ ژناڤ بچیت، لێ بەرخوەدانا شەرڤانێن کورد و خەلکێ کۆبانێ ھەموو بەرھەڤی و سیاسەتا تورکیا یا ل دژی کۆبانێ و شنگالێ ڤالا دەرخستیە و گۆت: (پشتی پلانا حوکمەتا تورکیا ل کۆبانێ ڤالا دەرکەڤت نھا ژی دخوازیت ب ئاستەنگیێن گەھاندنا ھاریکاریا بۆ کۆبانێ تۆلا خوە ژ بەرخوەدانڤانێن کۆبانێ ڤەکەت و ل دووڤ پلانەکا نوو کەڤتیە و ئەو پلان ژی دەربازکرنا ١٣٠٠ چەکدارێن سوپایێ ئازاد یێن ل حەلەبێ بۆ کۆبانێیە و دخوازیت ب ئینانا سوپایێ ئازاد ل ژێر ناڤێ ھەڤکاریا بەرخوەدانا کۆبانێ بەرخوەدانا کوردان ژ پشتڤە بشکینیت، لێ ئەڤ پلانا وێ ژی ئاشکرا بوویە و ئەز باوەر دکەم ھەموو جیھان ژی ئێدی ژ فێل و یاریێن تورکیا بێزار بووینە. دیسان ھەر دەمێ پێدڤی بوو ھێزێن پێشمەرگە دشێن دەربازی کۆبانێ ببن و ھاریکاریا برایێن خوە بکەن و پێدڤی ب ھێزەکا دی نینە و ژ خوە چەند کۆمێن سەر ب سوپایێ ئازاد یێ سووریێ ل ژێر بورکان فرات ل گەل شەرڤانێن کورد شەرێ تیرۆرستان دکەن و ل دووماھیێ ژی ئەز ب ھیڤیەکا مەزن دبێژم سەرکەڤتن یا کۆبانێ و ھەموو گەلێ کوردستانێیە).