ئه‌ڤرۆ نيوز:

جه‌نرال مارك هارتلنگ شرۆڤه‌كارێ له‌ىشكرى ل CNN راگه‌هاند كو بزاڤا ره‌ڤاندنا سه‌ركرده‌كێ ديارێ سۆپايێ ئازاد ژ توركيا بۆ سوريا و دانه‌ ده‌ست داعش ژ لايێ مافيا توركيا ڤه‌، هندێ دگه‌هينيت كو داعش دشێن ب رێيا داهاتێ خوه‌، بگه‌هيته‌ گرۆپێن تاونابارى ل توركيا و ئه‌ڤه‌ ژى مه‌ترسيێ ل سه‌ر هێزێن ئه‌مريكى ل ئه‌ورۆپا زێده‌ دكه‌ت.

هارتله‌نگ ل دۆر بابه‌تێ ره‌ڤاندنا سه‌ركرده‌كى سۆپاسيێ ئازاد، يێ ناڤدار ب كۆژه‌كێ درێژێ داعش، گۆت: “دودلى هه‌رده‌م يا ل سه‌ر سنورێن توركيا ل گه‌ل عيراق و سوريا هه‌يى، مه‌ ژى هه‌مان كێشه‌ ل سالێن 2007 و 2008 هه‌بوو، ل ده‌مێ گه‌له‌ك ژ شه‌ركه‌رێن قاعيده‌ د رێيا سنوران را هاتنوچوون دكر، چ پێ نه‌ڤێت ئه‌و ناسنامێن خوه‌ ژى ديار ناكه‌ن، به‌لكو ب رێيا پاسپۆرتين خوه‌ ژ خالێن سنورى ب ره‌نگه‌كێ ئاسايى ده‌رباز دبن”.

زێده‌تر گۆت: “وه‌سان هزر دكه‌م كو هه‌ڤبه‌ندى د ناڤبه‌را داعش و گرۆپێن تاوانبار ل توركيا يا گرنگه‌، ژ به‌ر هندێ ژى داعش ب ره‌نگه‌كێ گه‌له‌ك مه‌زن پشت به‌ستنێ ل سه‌ر داهاتێ په‌ترۆلێ دكه‌ت دا كو گرتيێن خوه‌ پێ به‌رده‌ت و هه‌ڤبه‌نديێ ژى ل گه‌ل ماڤيا توركى دروست بكه‌ت، ئه‌ڤه‌ ژى كارێ ئه‌مريكا ب زه‌حمه‌تتر لێ دكه‌ت، خوه‌ ل ئه‌ورۆپا ژى”.

ده‌رباره‌ى ل به‌رنه‌كرنا جلێن سه‌ربازى ژ لايێ له‌شكرێ وان ڤه‌ ل ئه‌ورۆپا، جه‌نرالى گۆت: “ئه‌ڤه‌ نه‌ جارا ئێكێ يه‌ ئه‌ڤ بڕياره‌ دهێته‌ دان، ده‌ما ئه‌ز ل ئه‌ورۆپا ژى، مه‌ بڕيارێن ژ ڤى ره‌نگى بۆ سلامه‌تيا سه‌ربازێن خوه‌ دده‌ن ب تايبه‌ت ژ ده‌رڤه‌ى بنگه‌هێ سه‌ربازى”.

ئه‌ڤرۆ نيوز:

بڕياره‌ ئه‌ڤرۆ گه‌لێ تونس په‌رله‌مانێ خوه‌ يێ ئێكێ يێ ديموكراتى د ناڤا كاودانێن دژوار يێن ئه‌منى دا ب هه‌لبژێريت ژ مه‌ترسيا روودانا كاودانێن توندوتيژيێ.

ئه‌ڤرۆ رۆژا ئێكشه‌مبى گه‌لێ تونس دێ چنه‌ به‌ر سندوقێن ده‌نگدانێ چن بۆ هه‌لبژارتنا په‌رله‌مان و حوكمه‌تێن خودان ده‌سته‌لات كو ب گۆره‌ى دستوورێ وه‌لاتى په‌رله‌مانى و حوكمه‌تێ ده‌سته‌لاتێن زێده‌ترى سه‌رۆك كۆمارى هه‌نه‌.

كريارا ده‌نگدانێ دێ ل ده‌مژمێر 9ى سپێدێ ده‌ستپێكه‌ت و 8ى شه‌ڤێ ب دووماهى هێت ب گۆره‌ى ده‌مێ كوردستانێ و ل وه‌لاتيێن ده‌رڤه‌ى يێن دێ هه‌لبژارتن لێ هێنه‌ كرن ل ده‌مژمێر 8ى سپێدێ هه‌تا شه‌شى ئێڤارى ب گۆره‌ى ده‌مێ وان وه‌لاتان.

نێزێكى 13 هزار به‌ربژێران دێ هه‌ڤركيێ ل سه‌ر 217 كورسيان كه‌ن و ژ وان 199 ژ 27 بازنێن هه‌لبژارتنان ژ ناڤا تونس و 18 ئه‌ندام ژ شه‌ش بازنێن هه‌لبژارتنا ژ ده‌رڤه‌ يا تونس.

به‌رى نوكه‌ په‌رله‌مانه‌كێ به‌روه‌خت ل 23\10\2011 هاتبوونه‌ كرن هه‌ر ژ به‌ر سه‌ربه‌خۆيا تونس ل سالا 1956 و هه‌تا نوكه‌.

1327 ليست كو 1230 ل ناڤ تونس و 97 ژ ده‌رڤه‌ى تونس ل سه‌ر 33 بازنێن هه‌لبژارتنان هاتينه‌ به‌لاڤكرن كو 27 ل ناڤ تونس و 6 ژ ده‌رڤه‌ ب گۆره‌ى كۆمسيۆنا بلندا سه‌ربه‌خۆيا هه‌لبژارتنان.

ئه‌ڤێن دێ مافێ ده‌نگدانێ هه‌ين پێنج مليۆن و 285 هزار و 136 كه‌سن، ژ وان 359 هزار و 530 دێ ل وه‌لاتێن بيانى ده‌نگێن خوه‌ ده‌ن ب گۆره‌ى داتايێن كۆمسيۆنا وى وه‌لاتى.

ئەڤرۆ:

پشتی ھێرشەکا چەکداری یا ل دژی سەربازێن مسرێ ل بیابانا سینا کو د ئەنجام دا ٣٣ سەربازێن وی وەلاتی جانێ خوە ژ دەست دابوون وەزارەتا دەرڤە یا ئەمریکا د داخۆیانیەکا فەرمی دا دیار کر کو ھەکە ھێزێن ئێمناھیێ یێن مسرێ پێرابوونێن باش ل ھەمبەر وان ھێرشان وەرنەگرن رەنگە مسر ژی وەک لیبیا و عیراقێ بەر ب شەرەکی ناڤخوەیی یێ دژوار ڤە بچیت و ژ بەر وێ یەکێ ژی دڤێت مسر ئامادەکاریێن باش بۆ رێگری گرتن ل چالاکیان گرۆپێن توندرەوێن ئیسلامی بکەت.

چاڤدێرێن سیاسی دیار دکەن کو گرۆپێن چەکداری یێن سەر ب ئیخوان ل دەمێ دەستھەلاتا مورسی دا شیابوون ل بیابانا سینا و گەلەک دەڤەرێن دی چەکێن باش بدەستڤە بینن و خوە ب ھێز کرینە و ژ بەر وێ یەکێ ژی دھێتە چاڤەرێ کرن کو ھێرشا ل بیابانا سینا دەستپێا شەرەکی دژوار ل مسرێ بیت و ژ بەر وێ یەکێ ژی ب فەرمانا سەرۆک کۆمارێ وی وەلاتی سێ مەە وەک رەوشا نەئاسایی ل مسرێ ھاتیە راگەھاندن.

ھەفتیا بۆری بریتانیا و ئەلمانیا دیار کربوون کو زانیاریێن تەمام ل بەر دەستێ وان ھەنە کو ئیخوان بزاڤێ دکەن ل ئورۆپا جارەکا دی خوە ب رێکخستن بکەن و ھاریکاریا بۆ گرۆپێن چەکداری ل مسرێ رەوانە بکەن و ژ بەر وێ یەکێ ژی ئەو نھا ب توندی چاڤدێریا چالاکیێن وان دکەن و ناھێلن ئەو جارەکا دی خوە ب رێکخستن بکەن.