ئه‌ڤرۆ نيوز:

ئه‌مريكا راگه‌هاند كو د 48 ده‌مژمێرێن بۆرى دا، 40 جاران ئه‌وان دربێن ئه‌سمانى وه‌شاندينه‌ داعش و چالاكڤان ژى وێ چه‌ندێ دده‌نه‌ زانين كو زێده‌ترى 600 كه‌سان هاتينه‌ كۆشتن.

ئه‌مريكا راگه‌هاند كو ئه‌وێ د 48 ده‌مژمێرێن بۆرى دا، 40 جاران دربێن ئه‌سمانى وه‌شاندينه‌ چه‌كدارێن ده‌وله‌تى ئيسلامى و ئه‌ڤێ چه‌ندێ ژى رێ ل پێشڤه‌چوونێن وان گرتيه‌ و نه‌شياينه‌ پێشڤه‌چوونێ بكه‌ن و ب ڤێ چه‌ندێ ژى شه‌رڤانێن يه‌په‌كێ شياينه‌ هنده‌ك ده‌ڤه‌رێن خوه‌ دووباره‌ ڤه‌گه‌رينن.

ده‌وله‌تا ئيسلامى دخوازيت كۆنترۆلێ ل سه‌ر كۆبانێ بكه‌ت دا كو جهێ خوه‌ ل باكوورێ سوريا خوه‌ش بكه‌ت، پشتى شيايى كۆنترۆلێ ل سه‌ر روويێن مه‌زن يێن عيراق و سوريا بكه‌ت.

ل د ڤێ ده‌ربارێ دا، ئه‌ندامێ نوو يێ مافێن مرۆڤى ل نه‌ته‌وێن ئێكگرتى زه‌يد ره‌عد حسێن گۆت: “رێكخستيا ده‌وله‌تا ئيسلامى رێكخستيه‌كا شه‌يتانى يه‌ و بزاڤه‌كه‌ بۆ نه‌هێلانا مرۆڤان”.

چالاكڤانێن ڤى وارى ژى ئاماژێ ب وێ چه‌ندێ دكه‌ن كو ئه‌ڤه‌ ژ ده‌سپێكا هێرشا ل سه‌ر كۆبانێ وه‌ره‌ نێزێكى 600 كه‌سان هاتينه‌ كۆشتن.

شێوازه‌كێ تايبه‌ت يێ ل ده‌ف چه‌كدارێن داعش كو ئه‌و رادبن ب ته‌كنيكێن هه‌مه‌جى وه‌كو بنبڕكرن و سه‌ربڕينا سه‌رباز و رۆژنامه‌ڤانان.

ئه‌ڤرۆ نيوز:

وه‌زاره‌تا به‌ره‌ڤانيێ يا ئه‌مريكا “په‌نتاگۆن” راگه‌هاند كو نوكه‌ ژى باژێرێ كۆبانێ يێ ل ژێر گه‌فێن كه‌فتنێ ژ لايێ چه‌كدارێن ده‌وله‌تا ئيسلامى يا داعش ڤه‌.

جۆن كيرى ئاخفتنكه‌رێ ب ناڤێ په‌نتاگۆنێ گۆت: “تشتێ گرنگيێ دده‌ته‌ كۆبانێ ئه‌وه‌ كو ده‌وله‌تا ئيسلامى وێرێ دڤێت”.

دا زانين ژى كو چه‌ند ڤيانا وان بۆ وێرێ زێده‌ دبيت، قه‌بارێ هێزا وان و پێدڤيێن شه‌رى ل وێرێ زێده‌ دبن ژ بوو ب ده‌ستڤه‌ئينانا ڤێ ئارمانجێ، ئه‌ڤه‌ ژى ئارمانجێن هه‌ڤپه‌يمانا يێن دربێن ئه‌سمانى زێده‌ت دكه‌ت.

كيرى زێده‌تر گۆت: “من دوهى يا گۆتى و دێ نوكه‌ ژى بێژم، نوكه‌ ژى دبيت كۆبانێ بكه‌ڤيته‌ د ده‌ستێ رێكخستيێ دا، ئه‌م د راستين ده‌ما دبێژين هێزێن مه‌ ل ئه‌سمانى ب تنێ نه‌شێن چو باژێران رزگار بكه‌ن”.

ئه‌ڤ داخۆيانيه‌ د ده‌مه‌كى دا نه‌ كو به‌رى نوكه‌ ده‌زگه‌هێن راگه‌هاندنێ يێن نێزكى شه‌رڤانێن يه‌په‌كێ راگه‌هاند بوو كو ئه‌وان گه‌له‌ك ده‌ڤه‌رێن ڤه‌گه‌راندينه‌ ڤه‌ و ئێدى داعش نه‌شێت ل كۆبانێ پێشڕه‌ويێ بكه‌ت.

ئه‌ڤه‌ ژ 15\9 شه‌ره‌كێ دژوار د ناڤبه‌را هێزێن يه‌كينه‌يێن پاراستنا گه‌ل و چه‌كدارێن ده‌وله‌تا ئيسلامى ژ بوو گرتنا كۆبانێ روودايه‌ و ل ڤى ماوێ بۆرى پشتى كۆنترۆلا پتريا كۆبانێ كرى، جاره‌كا دى ژ ئه‌نجامێ دژواريا دربێن ئه‌سمانى نوكه‌ يه‌په‌گێ هنده‌ك ژ وان ده‌ڤه‌ران جاره‌كا دى ژ ده‌ستێن داعش ده‌رخستينه‌.

ئه‌ڤرۆ نيوز:‌

ژێده‌ره‌كێ هايدار ل پارێزگه‌ها سه‌لاحه‌دين راگه‌هاند كو ئه‌ڤرۆ رۆژا پێنجشه‌مبى چار كه‌س بريندار بوون ژ ئه‌نجامێ ته‌قينا ترۆمبێله‌كا مينرێژكرى ل نێزيك باره‌گايه‌كێ پارتى ديموكراتى كوردستان ل تۆزخۆرماتۆز.

ئه‌ڤى ژێده‌رێ نه‌ڤيايى ناڤێ خوه‌ ئاشكه‌را كه‌ت بۆ شه‌فه‌ق نيوز ئاشكه‌را كر كو ئه‌ڤ ته‌قينه‌ ل نێزيكى ده‌مژمێر شه‌شى سپێده‌هيا رۆژا پێنجشه‌مبى روودايه‌ ل به‌ر ده‌رێ خێزانه‌كا توركمانى ل نێزيك رێڤه‌به‌ريا ئاڤێ و باره‌گايێ پارتى ديموكراتى كوردستان ل تۆزخۆرماتۆز و بوويه‌ ئه‌گه‌رێ برينداربوونا چار كه‌سان و زيانێن ماددى يێن مه‌زن ل دووڤ خوه‌ هێلاينه‌.

ئه‌ڤى ژێده‌رى ئه‌و چه‌نده‌ ژى ئاشكه‌را كريه‌ كو هێزێن ئه‌منى و ئاگرڤه‌مراندن و ترۆمبێلا هه‌وار هاتنێ ل جهێ روودانێ ئاماده‌ بوون و نه‌خۆش بۆ نه‌خۆشخانێ ب مه‌ره‌ما چاره‌سه‌ركرنێ هاتنه‌ ڤه‌گوهاستن.

ب گۆره‌ى زانياريێن چاڤدێران تۆزخۆرماتۆز ئه‌وا ل ده‌رڤه‌ى سنورێ ئيدارا هه‌رێما كوردستانێ د هه‌ڤسه‌نگيه‌كا نه‌يا ئارام يا ئه‌منى دايه‌ ژ ئه‌نجامێ هێرشێن رێكخراوێن تيرۆرستى و ژ وان ده‌ڤه‌رايه‌ يێن دكه‌ڤنه‌ به‌ر ماددێ 140.