ئەڤرۆ نیوز، سالار دۆسکی:
د روونشتنا دویێ یا تایبەت و ب کۆبانێ ڤە، ئەڤرۆ ل پەرلەمانێ کوردستانێ شەرەدەڤ د ناڤبەرا ئەندامێن پەرلەمانێ کوردستانێ یێن فراکسیۆنا زەر و شین دا پەیدا بوو.
ئەندامەکێ پەرلەمانێ کوردستانێ ژ فراکسیۆنا گۆڕان ب ناڤێ ئەنوەر قادر ب چەندین گۆتنا ھێرش کرنە سەر پارتی، ھەر ئێک ژ ئومێد خوشناو و ئامینا زکری سەرۆک و جێگرێن فراکسیۆنا پارتی بەرامبەر ڤی ئەندام پەرلەمانێ گۆڕان راوستیان و ژ سەرۆکاتیا پەرلەمانی خواستن ئەڤ ئەندام پەرلەمانە داخواز لێبورینێ ژ پارتی بکەت، سەرۆکێ پەرلەمانی بۆ (١٠) خولەکان کۆمبوون راوستاند.
ھەڤدەم دلشاد شەعبان غەفار ئەندامێ پەرلەمانێ کوردستانێ ژ فراکسیۆنا زەر بۆ ئەڤرۆ نیوز گۆت: “ڤی ئەندام پەرلەمانی بەری نوکە ژی زێدەگاڤی ل سەر مام جەلال، سەرۆک کۆمارێ بەرێ یێ عیراقێ کربوون، ئەڤرۆ ژی زێدەگاڤی ل سەر پارتی کرن”.

دلشاد شەعبان غەفار گۆتژی: “پشتی ڤێ چەندێ فراکسیۆنا گۆڕان سەردانا فراکسۆنا پارتی کریە و لێبۆرین خواستیە و دیار کریە ئەڤە دەربڕینێ ژ ھەلۆیستێ تەڤگەرا گۆڕان و فراکسیۆنێ ناکەت، دیسا دێ د روونشتنێ ژی دا ب فەرمی فراکسیۆنا گۆڕان لێبورینێ ژ فراکسیۆنا پارتی خوازیت”.
ئەندامێ پەرلەمانێ کوردستانێ ئاماژە دا وێ چەندێ ژی کو ئەڤ کێشە نابنە ئەگەر کێشە د ناڤبەرا دو فراکسیۆنێن کوردستانیێن پەرلەمانی چێ بن و ئەڤە د کەسوکی نە و گۆت: “دبیت ئەڤە یێ نەخۆش بیت وەکو دەروون”.

ناڤبری ئاشکرا ژی کر کو ئەڤرۆ دێ کۆمبوونا پەرلەمانی ل سەر کۆبانێ ب دووماھی ھێت.

ئه‌ڤرۆ نيوز:

ده‌سته‌يا گشتى يا ده‌ستپاكيا هه‌رێما كوردستانێ راگه‌هاند كو بۆ پركرنا ميلاكێ خوه‌ يێ دێ ده‌رچوويێن سالا 2013 يێن زانكۆ و په‌يمانگه‌هان دامه‌زرينيت.

به‌رى ئه‌ڤرۆ نيوز به‌لاڤكربوو كو ده‌سته‌يا گشتى يا ده‌ستپاكيێ ل هه‌رێما كوردستانێ پێدڤى ب فه‌رمانبه‌رايه‌ و بۆ ڤێ مه‌ره‌مێ دێ فه‌رمانبه‌رێن ده‌رچوويێن زانكۆ و په‌يمانگه‌هان دامه‌زرينيت ل دۆر مه‌رجان كو چه‌ند پشكه‌كێن تايبه‌ت ده‌ستنيشان كربوون.

ئه‌ڤرۆ ده‌سته‌يا ناڤبرى د راگه‌هاندنه‌كێ دا به‌لاڤ كر كو ئه‌و يا رژده‌ ل سه‌ر دامه‌زراندنا وان فه‌رمانبه‌ران، به‌لێ ئه‌و كه‌سێن دێ دامه‌زرينن، پێدڤيه‌ خه‌لكێ سنورێ پارێزگه‌ها هه‌ولێر بن، ب به‌هانه‌يا وێ چه‌ندێ كو پێدڤيا وان يا كارى ل وى سنورێ ده‌ستنياشنكرى يه‌.

ئه‌ڤه‌ ژى ده‌قێ رۆهنكرنا وايه‌:

رونكردنەوەیەك لەبارەی دامەزراندن لەدەستەی دەسپاكی هەرێمی كوردستان

دەستەی دەسپاكی هەرێمی كوردستان بۆ پركردنەوەی میلاكەكانی ساڵی 2013 دەرچوانی زانكۆ و پەیمانگاكان دادەمەزرێنێت، بەڵام ئەم دامەزراندنە تەنها پارێزگای هەولێر دەگرێتەوە چونكە ئەو فەرمانبەرانە پێویستن بۆ دیوانی دەستەكە.

بۆ ئاگاداری زیاتری سەرجەم هاوڵاتیان . لەگەڵ ڕێزدا

ھەولێر، قائید میرۆ:

جێگرێ سەرۆکێ رێکخراوا سەلامەتی و رەوشەنبیریا ھاتن و چوونێ راگەھاند ل نەە ھەیڤێن بۆری یێن ئەڤ سالە روودانێن ھاتن و چوونێ ھەڤبەری ل گەل سالا بۆری زۆر زێدە کریە.

یوسف بازیانی جێگرێ سەرۆکێ رێکخراوا سەلامەتی و رەوشەنبیریا ھاتن و چوونێ بۆ رۆژناما ئەڤرۆ دیارکر کو ل نەە ھەیڤێن بۆری یێن ئەڤ سالە نێزیکی ٧٥٠ کەسان ب ئەگەرێ بۆیەرێن ھاتن و چوونێ گیانێ خوە ژ دەست دایە و پتر ژ ھەشت ھزاران ژی بریندار بووینە و بووینە کێم ئەندام و ب ملیۆنان دیناران زیانێن ماددی گەھشتینێ.

 گۆت ژی ئەگەرێ زۆربوونا بۆیەرێن ھاتن و چوونێ ژ بۆ نەبوونا ھشیاریا ھاتن و چوونێ ڤەدگەڕیت، چونکو نوکە ل وەلاتێن پێشکەفتی بزاڤێن نەھێلانا بۆیەرێن ھاتن و چوونێ دھێنە کرن، ئەڤە ژی ب رێیا تێگەھاندنا تاکێن ناڤا جڤاکی و ب تایبەتی شوفێران، کو چاوا شەھرەزابن ب قانوونێن ھاتن وچوونێ و رێنمایێن د ڤی بیاڤی دا دھێنە دەرکرن، ھەتا بزانن چاوا رێک و پرا بکار بینن، نوکە شەڕەکێ بەردەوام یێ رێک و پرا ھەیە و پێدڤیە بەڕەڤانیێ ژ خوە بکەین.

بازیانی گۆت ژی ھەڤبەرکرن ل گەل سالا بۆری رێژا بۆیەرێن ھاتن و چوونێ ئەڤ سالە زۆر زێدەکریە و کێم نەبوویە، پشتی دو ھەیڤێن دی دێ بۆ مە دەرکەڤیت چەند زێدەبوویە و جھێ پرسیارێ یە، ئەگەرەکێ دی یێ زێدەبوونا ڤان بۆیەران گەنجن لەوڕا پێدڤیە گەنج پتر پێگیریێ ب رێنمایێن ھاتن وچوونێ بکەن.

ئامێدیێ، مەحمود نھێلی

رێڤەبەرێ پەروەردا قەزا ئامێدیێ بۆ رۆژناما ئەڤرۆ دیار کر کو تەڤایا قوتابخێن دەڤەرا ئامێدیێ ژ دەربەدەران ھاتنە ڤالاکرن و نھا دەوما فەرمی ل سەر سەرجەم قوتابخانا ھاتە کرن.

ناسر محەمەد سەعید رێڤەبەرێ پەروەردا قەزا ئامێدیێ دیار کر پشتی گەلەک بزاڤان ژ پێخەمەت بەردەوامیدان ب پرۆسا خواندنێ ل دەڤەرێ و ھەروەسا چارەکرنا ئاریشا جھێ ئاکنجیبوونا دەربەدەران نھا تەڤایا قوتابخانێن سنوورێ پەروەردا ئامێدیێ ھاتنە چولکرن.

رێڤەبەرێ پەروەردا قەزا ئامێدیێ دیار کر ژی ل دەڤەرا ئامێدیێ دورێن ١٠٠ قوتابخانە پر بوون ژ دەربەدەران و گۆت “ل سنوورێ پەروەردا ئامێدیێ ١٦٠ قوتابخانە ھەنە ژ وانا ٩٩ دەربەدەر تێدا ھاتبوونە ئاکنجیکرن”