ئەڤرۆ:
پشتی پتر ژ حەفت ھەیڤان ژ ئەنجامدانا ھەلبژارتنێن جڤاتێن پارێزگەھان، دوھی ل سلێمانیێ ئێکەتی نیشتیمانی کوردستان و بزاڤا گۆڕان ل سەر دابەشکرنا پۆستێن پارێزگەھا سلێمانیێ گەھشتنە رێککەفتنێ.
ھەر چەندە د ھەلبژارتنان دا بزاڤا گۆڕان زێدەتر دەنگ ئینا بوون، لێ ئێکەتی ب چ رەنگان یا بەرھەڤ نەبوو پۆستێ پارێزگارێ سلێمانیێ رادەستێ وان ب کەت و د چەندین ھەلکەفتان دا سەرکردێن ئێکەتیێ ب ئاشکرای ئەڤ چەندە بۆ دەزگەھێن راگەھاندنێ بەحس دکر. ئەڤە بۆ ئەگەر کو ئەزموونا پێکئینانا ئێکەم حوکمەتا کوردستانێ پشتی 22 سالان ل سلێمانیێ دووبارە ب بیت ب رەنگەکێ کو پۆستێن پارێزگەھا سلێمانیێ 50 ب 50 د ناڤبەرا گۆڕان و ئێکەتیێ دا بھێنە دابەشکرن.
ل گوری رێککەفتنێ دو سالێن ئێکێ پۆستێ پارێزگارێ سلێمانیێ دێ بۆ ئێکەتیێ بیت و جێگرێ وی دێ بۆ گۆڕان بیت و دو سالێن دوێ دێ پۆستێ پارێزگاری بۆ گۆڕان بیت و جێگر بۆ ئێکەتیێ.
ھەر ل گور وێ رێککەفتنێ یا کو دوھی ئیمزا ل سەر ھاتیە کرن سەرۆکێ جڤاتا پارێزگەھا سلێمانیێ دێ بۆ گۆران بیت و جێگرێ وی بۆ ئێکەتیێ.
دیسا پۆستێن پارێزگەھا ھەلەبجە ژی ب ھەمان شێوێ سلێمانیێ ب 50 ب 50 د ناڤبەرا ھەر دو ئالیێن ناڤھاتی دا ھاتینە بارڤەکرن ب رەنگەکێ کو دو سالێن دەستپێکێ پۆستێ پارێزگارێ ھەلەبجە بۆ گۆڕان بیت و جێگرێ وی بۆ ئێکەتیێ و دو سالێن دی بەرۆڤاژی بیت.
ژ ئەنجامێ ھەڤرکیا گۆڕان و ئێکەتیێ ل سەر پۆستێ پارێزگارێ سلێمانیێ، نێزیکی ھەشت ھەیڤان بوو کاروبارێن ئیداری یێن پارێزگەھا سلێمانیێ د جێگیر نەبوون و ئەڤە بۆ ئەگەرێ وێ یەکێ کو خەلکێ سلێمانیێ د دەمێ بۆری دا باجا ڤێ چەندێ بدەن. ل دۆر ڤێ چەندێ ئەندامەکێ جڤاتا پارێزگەھا سلێمانیێ ژ فراکسیۆنا پارتی دیموکراتی کوردستان د داخویانیەکێ دا داخواز ژ ھەر دو فراکسیۆنێن ئێکەتیێ و گۆڕان ل پارێزگەھا سلێمانیێ کر کو داخوازا لێبورینێ ژ خەلکێ سلێمانیێ بکەن، ژ بەر کو ژ بەر نەرێککەفتنا وان بارودۆخێ سلێمانیێ د دەمێ بۆری دا یێ جێگیر نەبوو.
د سەر ھندێ ڕا کو بزاڤا گۆڕان پۆستێ پارێزگارێ ھەلەبجە و سەرۆکێ جڤاتا پارێزگەھا سلێمانیێ وەرگرت، لێ گۆڕان وەکو زیانا ئێکێ د ڤێ رێککەفتنێ دا دھێـتە ھژمارتن، ژ بەر کو ژلایەکی ڤە، ل گۆرەی دەنگان بزاڤا گۆڕان دەنگێن ئێکێ ئینابوون و پۆستێ پارێزگارێ سلێمانیێ مافێ وێ، لێ دەست ژ وی مافی ھاتە بەردان. ژلایەکێ دی ڤە ژی د دەمێ چار سالێن بۆری دا گۆِران د پەیامێن خوە دا رەخنە ل ئێکەتیێ و پارتی دگرتن و د گۆت ھەموو دەستھەلات د ناڤبەرا خوە دا بارڤەکرینە و ئەڤ چەندە خزمەتا پرۆسا دیموکراسیێ ل کوردستانێ ناکەت، لێ پشتی ھەشت ھەیڤان ژ ئەنجامدانا ھەلبژارتنان، گۆڕان نەچار ما ب سیستەمێ 50 ب 50 ل گەل ئێکەتیێ بۆ رێڤەبرنا ھەر دو پارێزگەھێن سلێمانیێ و ھەلەبجە رازی ببیت.
دبیت ئێک ژ ئەگەرێن رازیبوونا گۆڕان ب ڤێ رێککەفتنێ ئەو بیت کو د دەمێ ھەشت ھەیڤێن بۆری دا ھەموو پۆستێن سلێمانیێ و ھەلەبجە د دەستێ ئێکەتیێ دا بوون و ب ئیمزاکرنا رێککەفتنێ نیڤا وان دێ کەڤنە دەستێ گۆڕان و ئەو ژی دێ د دەستھەلاتێ دا پشکدار بن، لێ ئەڤە تێرا وێ چەندێ ناکەت ھەتا گۆڕان باوەریێ بۆ ئەندام و لایەنگرێن خوە دروست بکەت ژ بەر کو د دەمێ بۆری دا گۆڕان ئەندام و لایەنگرێن خوە ل دژی سیستەمێ 50 ب 50 جوش داینە.